Isikiɛɛ 23:1-49
23 Mi Chɛhowa suaa vɛlɛ naa ya chua aa:
2 “Po wanachioo, waŋ laanduaa wa a ŋiɔɔŋ a ndaa fula kala pilɔɔ wa.
3 Ma simnuŋ waŋ laanduaa tiamaa o Ichipi niŋ. Nduyɛ, o feleŋgɔyɛi ndɛi niŋ nda kandu tiɔmɔɔ ni. Loŋ nda chiimiaa nda mɛɛyaŋ ni, ma sina suɛi wana pɔnɔɔ.
4 Diola ndalaŋ la cho laŋ ni: Kaasoŋnɔɔ wa Ohola* ni, pɔmbɔ ndɔ wa Oholiba* ni. Ma simnuŋ laandaa niaa, nduyɛ ma vialu puaa a waŋ laanduaa. Ohola sim le Sameeliaa ni, nduyɛ Oholiba sim le Chulusalɛm ni.
5 “Mi Ohola kandu suundaa mi che bɛɛ o wa ya o ba o nɔɔ niŋ. Mbo delnuŋ samaa nduaa kɔɔli, wanaa nda chiɛɛliaŋnda, nda cho yɛ Asiiliaŋnda ni.
6 Masaa ŋbuŋgaa a masaa pɔmbuaa nda wa ni. Nduyɛ, mi ndaa doviŋ o nyɛla bulii laŋ niŋ. Nda kpou puaa feleŋguaa kɛndɛ kɛndiaa nda wa ni, nduyɛ mi ndaa balu o suaa ndaa choo.
7 Mbo hiau lachi a suundaa a puaa kɛndɛ kɛndiaa kpou Asiiliaa. Nduyɛ mbo nɔɔliaa ndupila a piɔmaa nɔɔlɛiyaa* wanaa o wa suundaa a nda wa.
8 O mel kaa suundɛi ndoo tosa o Ichipi niŋndo le. Kanifuule o feleŋgɔyɛi nduɛi niŋ nda hini a ndu ni, mbo sina suɛi wana pɔnɔɔ, nduyɛ ma hiau lachi a hiniei tosaa a ndu.
9 Lelaŋ mi mal ndu samaa nduaa o ba, nda cho yɛ puaa Asiiliaa ni, a ndoo kaala hiniei tosaa a nda wa.
10 Ma yuŋga ndu o luŋ mbo lo tum fondo fuu, nduyɛ ma puu ndu puaa nduaa a chuaa nduaa laanduaa o ba, okoŋ ma dii ndu a muɛi faŋnde. Mbo kela tɔɔ waŋ laanduaa tɛɛŋ, nduyɛ ma tusi ndu nyɛpalaa choo.
11 “Mɛɛ Oholiba che nyɛ yɔŋnuŋndo, mbo chɔɔlu yiŋnɔŋ o kaa nɔɔlɛiyo niŋ, nduyɛ kaa ndɔ suundɛiyo ndoo hiou o bɛ ndɔ wo poloŋ.
12 Mbo luɛi suundaa a wanaa nda chiɛɛliaŋnda, nda cho yɛ puaa Asiiliaa ni. Masaa ŋbuŋgaa a masaa pɔmbuaa nda wa ni. Nduyɛ a wa a doviaŋ o nyɛla kɛndɛ kɛndɛlaŋ niŋ, ma balu o suaa choo. Nda kpou, puaa feleŋguaa kɛndɛ kɛndiaa nda wa ni.
13 Mɛɛ o nɔɔliaa ndupila, mi saaluŋ maa nda bɛ ndɔ kpou, nɛi pilɔɔ kpe nda tol kɔɔli ni.
14 Kɛ o wa tuŋ hiouwɔɔ lachi a kaa suundɛiyo tosaa. Mbo cha puaa Kaadiaŋnda a tuuliaa o chiɛiyo, nduyɛ ma suu nda pɔu siaŋaa ma diiya yeetete.
15 Yauve wa nda i yiyaa o lachaŋ, a kookola bɛndulaŋ o lebol. Nduyɛ, wanaa che nda pɛ aa puaa chɔuwa ni. Nda kpou ndaa velaŋ a Babiloniaŋnda a veluŋ o lɛŋnde Kaadiaŋ ndeŋ niŋnda.
16 Dimioo nuaa mbo cha puaa haa a tuuliaa o chiɛiyo, mi yeemɛi bɛnduei bii ndu le nda. Mbo viam waŋnda o nda lo o lɛŋnde Kaadiaŋ ndeŋ niŋ.
17 Okoŋ, mi puaa Babilɔŋ wa hunɔɔ naa ndu chua ma hini a ndu. Nduyɛ, mɛɛ nda hini a ndu tei ma nɔɔliaa ndu. Mɛɛ nda chii ndu nɔɔliaa, mbo kuisiŋ nda o kɔl.
18 “Mɛɛ o yiŋnuŋ o kaa suundɛiyo niŋ mbo chɔm dialuŋ ndɔŋ lasiɔmboŋ o luŋ kpendekele, mbo kuisiŋ ya o kɔl mɛɛ bɛ ndɔ ndoo kuisiŋ ya o kɔl lɛ.
19 Nduyɛ o wa hiouwɔɔ lachi a kaa suundɛiyo tosaa, mɛɛ ndoo tosa o lɛŋnde Ichipi leŋ niŋ teleŋ o wa feleŋgɔnɔ wo yɛ.
20 Ndoo nɔ yeemɛi le nda, mɛɛ laanduaa pɔmbuaa nɔ nuaa yeemɛi le piaandaa ndaa yɛ, a labɛŋguniŋ ndaa cho maa labɛŋguniŋ sofɛlɔɔ a soo wa.
21 Mi yeemɛi bii num le kaa nɔɔlɛi ŋ wa tosaa Ichipi wo, boondii mɛɛyaŋ ma pɛ num mi puaa Ichipi pisul a maŋ ndo.
22 “Lelaŋ num Oholiba, nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘Samaa num aa ŋ kuisiŋ o kɔl la, I cho nda dɔwɔɔ o kɔl ma fula ba o ba fee le num chiŋalaŋndo.
23 Nda cho ni, puaa Babilɔŋ a Kaadiaŋnda kpou, puaa Pɛkɔdi, Siowa, a Kowa, latulu a puaa Asiiliaa kpou. Nda kpou puaa feleŋguaa kɛndɛ kɛndiaa nda cho ni, masaa ŋbuŋgaa, masaa pɔmbuaa, kuubaa chɔuwa, vɛlɛ a puaa nda hɛli wa.* Nda kpou o suaa choo nda kua ni.
24 A cho wa hunɔɔ idiki dikiei a nyɛm nyaanaŋ suaa naŋndoŋ, boola bɛndula puaa chɔuwa, a boola pɔmbɔlaŋ,* mɔsilta chɔulaŋ, vɛlɛ a puaa chɔuwa kunda bɛndoo le num chiŋalaŋndo. A cho num hunɔɔ balɔɔ silɔ, nduyɛ mi ke nda dioo ma kilul num yamɛi. A cho num yamɛi kilul mɛɛ nda yeema yɛ.
25 I cho tumbe dɔɔnuŋ a num o kala kala, nduyɛ ma tusi num nyɛpalaa choo a kɔl tuuwo. A cho num miŋndo a nilaŋ kili, nduyɛ mi muɛi faŋnde diu wanaa num aa cho lo wa. A cho lakɔŋnɔŋ a puaa numnda vɛlɛ a chuauwaa num aa laanduaa, nduyɛ ma lom a tuaa cho lo wa o yiŋ chilikɔ.
26 A cho num yuŋga, nduyɛ ma sooluu nyɛm kɛvɛlɛŋ kɛndɛ kɛndɛŋ cho num ŋ bayiaŋ ndoŋ.
27 I cho tosa mi kaa num nɔɔlɛiyo, a suunda ŋ kandu o Ichipi niŋndo mɛɛlu. A cho nda* faŋa kɔllo choo, nduyɛ fɛɛŋ bɛɛ a yiyaŋ lɛ a Ichipi okɔɔ le.’
28 “Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘I cho num malɔɔ wanaa ŋ* tul leyɛ wa o ba, wanaa ndaa kuisiŋ num o kɔl la.
29 A cho num wallo kɛsi le mɛɛ nda tul num yɛleŋ yɛ, nduyɛ ma poondiaa nyɛ o nyɛ ŋ saŋga le ndu, okoŋ ma mɛi num tum fondo fuu. Wana o wana cho num chɔ tum fondo, ma che sɔɔŋ nɔɔlɛi ŋ wa tosaa woŋ, a kaa suundɛi ŋ wa choo wo.
30 Sɔɔŋ muŋ kpou cho num komal le mɛɛ ŋ tisa waŋnda o lɛŋnde niŋ kɔɔli maa wana lanɔ suundɛi, nduyɛ ma nɔɔliaa numpila a piɔmaa ndaa nɔɔlɛiya yɛ.
31 Kaa bɛ num wa choo wo num bɛɛ tol kɔɔli ni. Lelaŋ, I cho num taala ndɔɔ sɔɔ o ba.’
32 “Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni:
‘A cho kolɔɔ o taala bɛndu yiŋgilɛi bɛ num ndo niŋ,Ma simnuŋ nyɛ mamaa waŋnda o hɔl, kanifuule taalaa hoo nɔ nyɔɔŋ tau leniŋ.
33 Muɛiyaŋ ma cho num biyɔɔ, nduyɛ ma bii mɔnɛi.Taala bɛ numndo, ndu cho yɛ Sameeliaa ni,Taala isiooŋndo a taala kpundɔɔ o cho ni.
34 A cho kolɔɔ o taalaa hoo niŋ ma koŋ ndu kɔ kɔ. Taalaa hoo cho piɔl ma sɔm pɛŋgɛŋ ndɔŋ,Okoŋ ma tɛɛndiaa mɛɛma numndaŋ.
Kanifuule ya Chɛhowa, Mɛlɛka Kpuluŋguma Bɛndoo, “yapila soo ni.”’
35 “Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘Le mɛɛ ŋ kɛɛ ya kpooŋ nduyɛ ma puɛɛnuŋ a ya okɔɔ yɛ, a cho fulamakɔɔlila wɔɔŋndaŋ sɔla le kaa num nɔɔlɛiyo, vɛlɛ a kaa num suundɛiyo.’”
36 Okoŋ mi Chɛhowa nyuna ya aa: “Po wanachioo, a kilul niŋ pa Ohola a Oholiba yamɛi, nduyɛ ma bii kɔllo le nda sɔɔŋ nɔɔlɛi nda tosa woŋ chɔmndo?
37 A tosa kaa suundɛiyo,* nduyɛ kooma wanaa nda diu wa ma cho nda o laba. O cho ko kaa suundɛiyo le nda tosa a piɔmaa ndaa nɔɔlɛiya le, kɛ ma soli vɛlɛ puaa nda vilul la wa sala o yiŋ le piɔmaa ndaa nyɛdiaa kioo.
38 Nyɛ cheleŋ nda tosal la vɛlɛ wo cho hoo ni: Ma nɔɔliaa chiɛi ni diandaa o paale leŋ choo, nduyɛ ma nɔɔliaa palɛi nii pɛŋgiɛi.
39 Mɛɛ nda diu puaa ndaa ma soli nda salalaŋ o piɔmaa ndaa nɔɔlɛiya lo, o paale leŋ choo kpeekpei, ma luɛi o chiɛi ni diandaa niŋ ma nɔɔliaa ndu. Hei nda tosa o ya lo chiɛiniŋ ni.
40 Ma viam waŋndo naa levil le mbo kɔ veelul nda puaa. Mɛɛ puaa haa wa hunɔɔ, num Oholiba, ma puluŋ nyɛkɛndɛi, ma suinuŋ tiweiyo, nduyɛ ma wounuŋ nyɛm kɛvɛlɛŋ kɛndɛ kɛndɔŋ.
41 Ma chal o kpeŋgbei fɔɔndiɔŋ kɛndɛ kɛndɔɔ choo a tibiiyo* ndu o kɛsiaa lachi. Nduyɛ ma kɛsi nyɛm chuŋ kɛndɛŋ nuŋ a chuɛima niaŋ lechoo.
42 Puaa fonduaa faŋga bɛndoo wa bɔɔluu kɔl kɛndɔɔ loŋ, nduyɛ wanaa kolaa fula o pollo niŋnda wa nda tɛɛŋ. Ma wou Ohola nda Oholiba kelaŋ o laba, vɛlɛ a mɔsilta kɛndɛ kɛndɛla lemasa laŋ.
43 “Okoŋ mi dimi a Oholiba okɔɔ, o suundaa ndoo soli niŋ o baa niŋndo aa: ‘O sɔla niŋ fondaa le hiouwɔɔ lachi a kaa suundɛiyo tosaa.’
44 Mi puaa haa hiau lachi a kɔlaŋ kpɔlɔkpɔlɔ o ndu lo, mɛɛ nda kua nuaa o wana lanɔ suundɛiyo lo yɛ. Nuaa puaa haa ndaa kua o waŋ laanduaa kaa nɔɔlɛiya haa lo ni, Ohola nda Oholiba.
45 Kɛ puaa cho sakpo wa cho ndu yamɛi kpeekpeiye kilul le kaa ndɔ suundɛiyo, a wanaa o diu wa. Kanifuule, waŋ laanduaa suundɛiya nda cho ni, nduyɛ kooma wanaa nda diu wa ma cho nda o laba.
46 “Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘I cho puaa chɔuwa yɔŋ ma kɔ chiŋalaŋ nda nduyɛ ma puŋga nyɛm ndaŋ. Nyɛ cho nda yɔŋnɔŋndo cho tosa mi siooŋii bɛnduei bii wanaa balu nda wa.
47 Puaa chɔuwa cho nda vii vii a poutaŋ, nduyɛ ma diu nda a mɔɔŋ faŋndoŋ. A cho puaa ndaa a chuaa ndaa laanduaa diu, nduyɛ ma mal chiɛila ndalaŋ o yiŋ.
48 I cho kaala nɔɔlɛilaŋ o lɛŋndeŋ niŋ faŋa, nduyɛ mi waŋ laanduaa kpou pɛɛku nyɛ o hei niŋ, yɔŋii nda tol kaala nyala nɔɔlɛilaŋ kɔɔli.
49 A cho nya nyɛpalaa tusi choo le kaala nyala nɔɔlɛilaŋ vɛlɛ a hakila nya tosa a piɔmaa nyaa nɔɔlɛiya laŋ. Okoŋ la cho sina maa ya cho Chɛhowa, Mɛlɛka Kpuluŋguma Bɛndoo ni.’”
Tɛɛsiaalaŋ
^ Diolaŋ ndaŋ la sim, “Tɛndii Ndɔɔ.”
^ Diolaŋ ndaŋ la sim, “Tɛndii Nuu Cho o Ndu Niŋ.”
^ Diom maHibului nda soliŋ kpeku wo chiɛɛliaŋ lepum a “poolaŋ.” Nduyɛ ma soliŋ ndu kpeku le nyɔɔ pɛɛsaa.
^ Hibuluiye, “puaa nda yooŋgu wa.”
^ Boolaŋ ndaŋ, wanaa wuu chiŋuaŋ nda soliŋ ndaŋ kpeku ni.
^ Koŋ cho ni, Ichipiaŋnda.
^ Ɔɔ “yoomu numndo.”
^ Koŋ cho ni, a cho sakpo a Mɛlɛka le.
^ Ɔɔ “tabalioo.”
