Isikiɛɛ 24:1-27
24 O wɔsi ŋɔmahiɔɔloo niŋ, paŋgii ŋɔmɔhiɔɔluei malɔ tɔ, mi Chɛhowa suaa vɛlɛ naa ya chua aa:
2 “Po wanachioo, poonyiaa paaleŋ ndeŋ, paaleŋ ndeŋ kpeekpei. O paaleŋ ndeŋ choo kpeekpei masaa le Babilɔŋ kandu Chulusalɛm chiŋalaŋndo ni.
3 Dimi taloo a wanaa bolii kalaa haa okɔɔ. Dimul nda aa:
“‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni:
“Handu kpɛɛnɛi yawɛi* o yiŋ, ma wou mɛŋndaŋ leniŋ.
4 Wou visioŋ leniŋ. Wou ŋ kɛndɛ kɛndɔŋ.Wou lɔlulaŋ a choŋgulaŋ. Pei ndi cha a paala kɛndɛ kɛndɛlaŋ.
5 Bii saa kɛndɛ kɛndɔɔ o chɔluaa tɛɛŋ ma dii, nduyɛ ma wou yɔmnde o kpɛɛnɛi bɛŋgu.
Yau visioŋ a paala cho leniŋ ndaŋ latulu.”’
6 “Lelaŋ, nyɛ Chɛhowa, Mɛlɛka Kpuluŋguma Bɛndoo dimi wo cho hoo ni:
‘Kpundɔɔ cho le chiee diu hoo waŋnda wo, chiee cho hoo maa kpɛɛnɛi sɔwaa kɛɛ le faŋaŋndo wo.
Soli visiŋ cho leniŋ ndoŋ ŋ pilɛŋ pilɛŋ. Hɛli muŋ o solioo niŋ te.*
7 Kooma wanaa o diu wa ma cho leniŋ. O pouwo choo o taaliaa maŋ ni.
O tala maŋ lɛŋ mbo kumbu maŋ a chundoo le.
8 Le mi dɔɔnuŋ tumbe nduyɛ mi miŋgul num maa,I mal kooma wanaa ŋ diu wa o pou kpɔlɔkɛiyo choo,I chɛl ma kumbu maŋ te.’
9 “Lelaŋ nyɛ Chɛhowa, Mɛlɛka Kpuluŋguma Bɛndoo dimi wo cho hoo ni:
‘Kpundɔɔ cho le chiee dii hoo waŋnda chieeya wo!
I cho yɔmnde diyɔɔ bembe bɛndoo.
10 Wou yɔmnde o yiŋ ma kiisuu yiŋndeŋ.Yau visioŋ nyɛkɛndɛ kɛndɛi, ma tosa mi paalaŋ la yɔŋnuŋ muutu muutu. Tala mbooyaa lɛŋ.
11 Handu kpɛɛnɛi fonduei o yiŋ, mi i tuulu kpɛi,Le halikpeŋ mi i diu yɔɔ.
Nɔɔ ndɔɔ cho chiɛɛlɔŋ, nduyɛ mi yiŋndeŋ le faŋa sɔwa ndɔɔ.
12 A cho saŋga yɔkɔɔ nduyɛ ma tambu kɔl,Kanifuule sɔwa ndɔɔ feŋaŋ te.
Viou ndi o yiŋ a sɔwa ndɔɔ kpou!’
13 “‘Kaala numnda nɔɔlɛilaŋ la tosa ma simnuŋ o nɔɔlɛi. Mi kindiŋ le nɔɔ numndo dindioo, kɛ a nɔla ma dendu le. A cho lo o nɔɔlɛi haaa mi tumbe ya dɔɔnuŋ a numndo pɔlul.
14 Ya Chɛhowa, ya pila soo ni, nduyɛ i cho yɔŋnɔŋ. I cho ndi kuuna yɔŋnɔŋndo le. I cho kɔl nuu siŋga le, kɛlɛŋgaa niŋ te mi mɔnɛi bii ya. A cho num yamɛi kilul a mɛɛ kelala numndaŋ a kaala numndaŋ la cho yɛ.’ Ya Chɛhowa, Mɛlɛka Kpuluŋguma Bɛndoo dimi lende ni.”
15 Mi Chɛhowa suaa vɛlɛ naa ya chua aa:
16 “Po wanachioo, I cho tosa mi laa num kaalaa vi o lepilɛ niŋ kpe. A nɔ ma bii imɔnɔ le,* kɛlɛŋgaa niŋ te ma chaŋ ɔɔ ma tusi mɛmiaŋ.
17 Chaŋ o kɔl niŋ. Tosa naamu kɛ kɛ le mɔnɛi biyɔɔ le wana vi wo le. Yiinuŋ kooko bɛndoo o lebol, nduyɛ ma wounuŋ kɔwɛilaŋ.* A nɔ ma kumbu siɛiye* le, nduyɛ a nɔ ma de nyɛdiaa* waŋnda cho num chuu wo le.”
18 Mi suaa o waŋnda lo idiiyo, nduyɛ a paale yɔŋgaŋndeŋ mi laa nuu wu. Diimandɔɔ idiiyo, mi tosa mɛɛ o dimul la yɛ.
19 Waŋnda wa ya nyunaa aa: “Mɛɛ a cho naa chɔm nyɛ sɔɔŋ ŋ cho muŋ tosaa woŋ sim le naa wo le?”
20 Mi mulul nda aa: “Nyɛ Chɛhowa dimul la wo cho hoo ni,
21 ‘Dimul waŋnda Isɔluɛi aa: “Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni, ‘I cho chiɛi ni diandaa nɔɔliaa, o nya pɛɛluŋ a ndu nduyɛ mi la kaala ndu a kɔl nyaa* kpou wo. Muɛi faŋnde cho puaa nyaa a chuauwaa nyaa laanduaa nya mɛi kɔɔli wa diu.
22 Okoŋ nya bɛɛ cho tosa mɛɛ ya tosa yɛ. La nɔ mi la kumbu siɛiyii* le, nduyɛ la nɔ mi la de nyɛdiaa nda cho nya chuu wo le.
23 Kookola bɛndulaŋ la cho nya wa o lebol, nduyɛ mi la wounuŋ kɔwɛila nyalaŋ. La nɔ mi la bii mɔnɛi ɔɔ mi la chaŋ te. Kɛ la cho wa o kɔl tambɛi bɛndoo niŋ le hakila nyalaŋ, nduyɛ mi la wa chaŋndo o kɔl niŋ vellaa velle.
24 Isikiɛɛ cho tamasi nyaa ni. La nɔ mi la tosa mɛɛ o tosa yɛ. Te keŋ yɔŋnuŋ pɛ, la cho sina maa ya cho Chɛhowa, Mɛlɛka Kpuluŋguma Bɛndoo ni.’”’”
25 “Kɛ num po wanachioo, paale ya cho nda tiindaŋ ndaa, nyɛ nda handu kɔllo choo wo, nyɛ kɛndɛ kɛndɛ ke nda nyaaloo wo, nyɛ kɔlta ndalaŋ la hɛnaŋndo, puaa ndaa a chuauwaa ndaa laanduaa faŋa o ba leŋ,
26 wana cho hiɔlɔŋndo cho num hunɔɔ kona doonɔŋ.
27 O paale leŋ choo, a ve niŋ o sondo kumbaa niŋ te. A cho sondoo kumbi ma soo o wana hɛluŋ mbo nyaanuŋ ndo lo. A cho simnɔŋ tamasioo le nda okoŋ ma sina maa ya cho Chɛhowa ni.”
Tɛɛsiaalaŋ
^ Ɔɔ “kpɛɛnɛi nɔ sondoo kpayaŋ nde.”
^ Ɔɔ “Wuu kooŋ le muŋ solioo le.”
^ Ɔɔ “A nɔ ma lɔɔ takpa le.”
^ Ɔɔ “samtalaŋ.”
^ Ɔɔ “siɛiye o miŋndo bɛŋgu.”
^ Hibuluiye, “beedii ɔɔ bulu.”
^ Ɔɔ “yoomu nyaa.”
^ Ɔɔ “siɛiye o miŋndo bɛŋgu.”
