Isikiɛɛ 25:1-17
25 Mi Chɛhowa suaa vɛlɛ naa ya chua aa:
2 “Po wanachioo, muli hɔlla kpeŋgii Amɔnaitiiya, ma dimul nda nyɛ cho nda hunɔɔ yɔŋnɔŋndo.
3 Dimul nda aa, ‘La yaŋ nilaŋ o nyɛ Chɛhowa, Mɛlɛka Kpuluŋguma Bɛndoo dimi wo. Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “Mɛɛ fondaŋ ni diandaa nɔɔla, mi lɛŋnde Isɔluɛi leŋ le lo pɔm, nduyɛ mi waŋnda Chuda kua o chɛleŋ niŋ, mi la dimi aa, ‘A chaa!’
4 Le mɛɛ nya dimi lende yɛ, I cho nya wanaa cho Ba Paaleŋ le Chaŋ Ndo wa malɔɔ o ba. A cho dɔɔŋgɔla ndalaŋ* kila nya tɛɛŋ, nduyɛ ma kindu tɛndiila ndalaŋ. A cho komɔɔla nyalaŋ dio, nduyɛ ma kol milikiima nyaŋ.*
5 I cho tosa mi Luaba simnuŋ fondaŋ nyɔɔmiaa kua billo dioo wo, nduyɛ mi lɛŋnde Amɔnaitiiya simnuŋ fondaŋ chɔluaa pɛŋgi wo. Okoŋ, la cho sina maa ya cho Chɛhowa ni.”’”
6 “Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘Le mɛɛ nya tɛm balaŋ, nduyɛ mi la huulu a nyaaloo* le lɛŋnde Isɔluɛi leŋ mamɔɔ le sɔɔŋ palaŋ komal leŋ ndo yɛ,
7 I cho ba nuu siɛndi mi mal nya lɛŋnde o ba ma puŋga nyɛm nyaŋ. I cho nya faŋa waŋnda tɛɛŋ bau, nduyɛ mi tɛɛmbuu nya o lɛŋnde niŋ. I cho nya basɔɔ tɛɛ. Okoŋ, la cho sina maa ya cho Chɛhowa ni.’
8 “Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘Mi waŋnda Mowaabi a Sɛyaa dimi aa, “Waŋnda Chuda cho ko maa waŋnda o lɛŋii tuɛi niŋ kpou.”
9 Le hei, I cho tosa mi waŋnda del chieeŋ bɛnduŋ Mowaabi woŋ choo, chieeŋ cho o pɛŋgulaŋ, miŋ soli ndu tɔɔ woŋ.* Muŋ cho ni, Bɛti-chɛsimɔti, a Baal-miɔŋ haaa kɔ bii Kiliaatim.
10 I cho Mowaabi a Amɔnaitiiya malɔɔ wanaa cho Ba Paaleŋ le Chaŋ Ndo wa o ba, le halikpeŋ waŋnda o lɛŋnde niŋ loonuŋ lɛ a Amɔnaitiiya okɔɔ le.
11 I cho waŋnda Mowaabi nyɛpalaa tusi choo, okoŋ ma sina maa ya cho Chɛhowa ni.’
12 “Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘Idɔm tusi waŋnda Chuda nyɛpalaa choo le nda maa miŋgullo. Kɛ ma kuandu hakioo a nda o maa miŋgiaa koŋ niŋ.
13 Lelaŋ nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “Ya bɛɛ I cho ba nuu siɛndi mi tusi Idɔm nyɛpalaa choo, nduyɛ mi tɛɛmbuu waŋnda chieeya a chɔluaa, okoŋ mi tosa mbo lo pɔm. I cho nda diu a muɛi faŋnde chɔŋ Tɛmaŋ haaa kɔ Dɛdaŋ.
14 ‘I cho wanaa niaa Isɔluɛi soliŋ kpeku le Idɔm maa miŋgullo. A cho Idɔm kɔl ni tuuwo tusi choo, okoŋ ma sina maa ya miŋgul nda maa ni.’ Ya Chɛhowa, Mɛlɛka Kpuluŋguma Bɛndoo dimi lende ni.”’
15 “Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘Le mɛɛ nda bii niŋ waŋnda Isɔluɛi yɛleŋ tullo yɛ, mi Filitiaŋnda bɛɛ mia kuu a nda le nda maa miŋgullo ma tɛɛmbuu nda.
16 Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “I cho ba nuu siɛndi, mi tusi Filitiaŋnda nyɛpalaa choo, nduyɛ mi basu Kɛluitaitiiya tɛɛ, okoŋ mi tɛɛmbuu wanaa cho lo ma holnuŋ pee mɛŋma ihɛllo wa.
17 I cho nda nyɛpalaa kala kalaa tusi choo le nda maa miŋgullo. Nduyɛ te I miŋgul nda pɛ maa, a cho sina maa ya cho Chɛhowa ni.”’”
Tɛɛsiaalaŋ
^ Ɔɔ “dɔɔŋgɔla nɔ kpakilaŋ ndaŋ.”
^ Ɔɔ “nɔnɔ nyaa.”
^ Ɔɔ “mi la luaa peloŋ.”
^ Ɔɔ “miŋ nɛŋi lɛŋndeŋ ndoŋ.”
