Isikiɛɛ 26:1-21
26 O wɔsi 11 niŋ, paale taseleŋ o paŋgei niŋ, mi Chɛhowa suaa naa ya chua aa:
2 “Po wanachioo, Taaya dimi a Chulusalɛm okɔɔ aa, ‘Dio kpaki waŋnda kei ma luɛiyo tambu! A chaa! Mɛɛ o sɔla niŋ nuaa tambei yɛ, nyɛ o nyɛ cho wa le ya, nduyɛ mi sul sullo pila.’
3 Lelaŋ nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘Oo Taaya, I dɔɔnuŋ tumbe a num. Nduyɛ I cho tosa mi lɛŋii bɔɔbɔɔ hinul num, mɛɛ mɛŋma ihɛllaŋ ma huŋ nuaa a kpaaya bɛndoo yɛ le num chiŋalaŋndo.
4 A cho kpakila numndaŋ pesi pesi, nduyɛ ma tɛɛmbuu chiɛila choo choola numndaŋ. I cho puulu cho lɛŋ ndo koondiaa, nduyɛ mi tosa mbo simnuŋ maa pou kpɔlɔkɛi.
5 O cho simnɔŋ lɛŋnde vesɛileŋ o mɛŋma ihɛllaŋ tɛɛŋ naa nda tɛi yalala yɔɔyaa laŋ nda.’
“‘O cho simnɔŋ fondaŋ lɛŋnde huŋ nyɔɔŋ puŋgaa wo.’ Ya Chɛhowa, Mɛlɛka Kpuluŋguma Bɛndoo, yapila soo ni.
6 ‘Wanaa nduaa* cho o sɔndɔkɔltaŋ o lɛŋndeŋ niŋnda, a cho nda diu a muɛi faŋnde. Okoŋ, waŋnda cho sina maa ya cho Chɛhowa ni.’
7 “Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘I cho Nɛbukanɛɛsa,* masaa le Babilɔŋ dimul mbo kɔ chiŋalaŋ Taaya ba luaŋ ndo. Ndu cho masa bɛndoo le masaa ni. O nɔ suaa, nyɛm nyaanaŋ suaa naŋndoŋ, puaa kua o suaa choo wa, a puaa chɔuwa* kunda bɛndoo.
8 O cho wanaa num aa cho o sɔndɔkɔltaŋ o lɛŋndeŋ niŋnda diu a muɛi faŋnde. O cho kpakioo taŋgul le num dɔwɔɔ o piŋndo niŋ, mbo deŋgela puuloo o kpakioo balɔɔ chɛ chɛ, okoŋ mbo heelu boo chɔuwo le num chiŋalaŋndo.
9 O cho kpakila numndaŋ pesi pesi a nyɛm o pesi kpakilaŋ ndoŋ,* nduyɛ mbo tɛɛmbuu chiɛila numnda choo choolaŋ a chooŋ.*
10 Suaa nduaa cho num kumbɔɔ kpu a chundoo le mɛɛ nda cho wa tau tau yɛ. Te ndu nda puaa nduaa chɔuwa wa pɛ luɛiyɔɔ idiki dikiei o diola kpakila numndaŋ a nyɛm ndɔŋ nyaanaŋ suaa naŋndoŋ, bɔɔluu koŋ cho tosa mi kpakila numndaŋ la hiiluŋ, naŋ chaa chiee kpakila ndɔlaŋ la koombiaa wo puaa chɔuwa bii ni.
11 Buukula suaa nduaa cho tiu o nɛila numnda bɛndulaŋ choo kpou. O cho wanaa numnda diu a muɛi faŋnde, nduyɛ mi suŋgbuma num ma kala kalaŋ ma koombiaa.
12 A cho fondaŋnda ŋ sɔla nyɔɔŋ ndaŋ poondiaa, ma puŋga yulale numndeŋ, ma pesi kpakila numndaŋ, nduyɛ ma tɛɛmbuu chiɛila numnda kɛndɛ kɛndɛlaŋ. Okoŋ ma chua pouta numndaŋ, yɔmii numnde, nduyɛ ma kɔndu puulu numndo ma viou o peelo.’
13 “‘I cho tosa fɛɛŋ bɛɛ wana tui lɛ chonduŋ numndoŋ a towala numndaŋ diom te.
14 I cho tosa ma simnuŋ pou kpɔlɔkɛiyo, vɛlɛ a fondaŋ nda tɛi yalala yɔɔyaa laŋ ndo. Nduyɛ fɛɛŋ bɛɛ wana miŋgi lɛ niŋ num taŋgul te, kanifuule ya Chɛhowa pila soo ni.’ Ya Chɛhowa, Mɛlɛka Kpuluŋguma Bɛndoo dimi lende ni.
15 “Nyɛ Chɛhowa, Mɛlɛka Kpuluŋguma Bɛndoo dimul Taaya wo cho hoo ni: ‘Te a del pɛ mi bɔɔluu bɛndoo soo, mi wanaa cho tendu piɔm nda* wa kuŋndaŋ a nyɛ nɛiyaa, ma diu waŋnda o num niŋ, baa lɛŋii mɛŋndaŋ ma balu ve cho nyiiya le?
16 Laŋgbaa kalla* o pee mɛŋma ihɛllo kpou cho tolɔɔ o kpeŋgbeila* ndala lemasalaŋ choo ma soli domala ndala vilɛilaŋ* a domala ndala huauwaa laŋ, okoŋ ma nyiiya a siooŋii bɛnduei. A cho ichali lɛŋ, ma wa nyiiyaa kpa kpa, nduyɛ ma wa num nuaa mi kɔndɔfillo bii nda a num.
17 A cho chondii imɔnɛi soli a num okɔɔ ma dimi aa:
“Ee ya, num chiee tɔɔma bɛndu ndoo nɔ hoo wanaa fula o pee mɛŋma ihɛllo wa, a sɔla tambei.Num nya wanaa numnda,* kpaayaa pila nyaa nɔ o pee mɛŋma ihɛllo choo ni.Nduyɛ mi nyaa tosa mi siooŋnde ndii bii waŋnda kpou o lɛŋndeŋ choo!
18 Lɛŋii mɛŋndaŋ ma balu ve cho nyiiya o paale ŋ cho delɔɔ leŋ choo.Lɛŋii mɛŋma ihɛllaŋ ma balu ve cho hiilɔŋ woku woku te a sɔla pɛ tambei.”’
19 “Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘Te I tɛɛmbuu num pɛ ma simnuŋ maa chieeŋ wana cho leniŋ te woŋ, nduyɛ mi tosa mi mɛŋma kpaaya bɛnduaŋ ma kumbu num kpu,
20 I cho num a wanaa numnda tusi, mɛɛ nda tusi nuaa waŋnda o sooŋndo* niŋ yɛ, naa wanaa masindiaa cho niŋ le teleŋ vilɛi ya. I cho tosa ma tol o sooŋ yiŋgilɛiyo niŋ, latulu a wanaa cho kɔlaŋ o sooŋndo niŋnda maa fondaŋnda laa sɔla tambei o paandoo niŋndaŋ, le halikpeŋ wana kue lɛ o numndo le challe le. Okoŋ, mi tosa mi lɛŋnde wanaa cho yoomu wa sɔla bɛɛleŋ.*
21 “‘I cho num nyɛpalaa tusi choo o lepilɛ niŋ kpe, nduyɛ fɛɛŋ bɛɛ a cho lɛ wa le. Waŋnda cho num nuuviaa, kɛ fɛɛŋ a seeluŋ lɛ niŋ num te.’ Ya Chɛhowa, Mɛlɛka Kpuluŋguma Bɛndoo dimi lende ni.”
Tɛɛsiaalaŋ
^ Hibuluiye, “Chuauwaa nduaa laanduaa.”
^ Hibuluiye, “Nɛbukadɛlɛsa.” Nɛi cheleŋ le laŋ poonyiaa.
^ Hibuluiye, “waŋnda.”
^ Ɔɔ “maasiila nda pesi kpakilaŋ ndaŋ.”
^ Ɔɔ “mɔɔŋ faŋndoŋ.”
^ Hibuluiye, “wanaa cho piɔmndo wa.”
^ Ɔɔ “Yuŋgula leboltaŋ.”
^ Ɔɔ “kpɛŋɛla.”
^ Ɔɔ “domala bala biŋgi laŋ.”
^ Hibuluiye, “Ndu nda wanaa nduaa.”
^ Ɔɔ “sɛiyo.”
^ Ɔɔ “naŋ.”
