Isikiɛɛ 28:1-26
28 Mi Chɛhowa suaa vɛlɛ naa ya chua aa:
2 “Po wanachioo, dimul masaa le Taaya aa, ‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni:
“Le mɛɛ yoŋgaa pɛ num o kɔl lɛ, a cho hiouwɔɔ lachi a dimioo aa, ‘Ya bɛɛ mɛlɛka ya cho ni.
I cho ichali o pee mɛŋma ihɛllo kɔllo o kpeŋgbei* lemasa mɛlɛkaa choo.’
Kɛ a cho mɛlɛka le, wanachioo koni ŋ cho ni,Mi che bɛɛ a cho yiyaŋndo o kɔl niŋ maa mɛlɛka ŋ cho ni.
3 A nɔ taasioo ma hiau Daaniɛɛ.
Nyɛ o nyɛ viŋnuŋ num te.
4 Taasi numndo a sinapɛŋgu numndo tosa ma sul sullo pila,Nduyɛ ma hiau lachi a kooliiyoŋ vɛlɛ a kaniŋ humboŋ deŋgelaa o chiɛi num kɛsiaa nyɛsɔlaa niŋ.
5 Taasi ŋ nɔ o yulaleŋ niŋndo tosa ma sul sullo pila,Nduyɛ mi kɔl numndo pia cha a yoŋgaa le mɛɛ ŋ sul lɛ.”’
6 “‘Lelaŋ nyɛ Chɛhowa, Mɛlɛka Kpuluŋguma Bɛndoo dimi wo cho hoo ni:
“Le mɛɛ ŋ yiyaŋ o kɔl numndo niŋ maa mɛlɛka ŋ cho ni yɛ,
7 I cho waŋnda soli o lɛŋnde niŋ ma huŋ chiŋalaŋ num, wanaa kɔl vesɛiya pila nda cho ni.A cho mɔɔŋ ndaŋ faŋndoŋ soli yau ma chiŋalaŋ nyɛm ŋ sɔla a taasi numndo woŋ,Nduyɛ ma tɛɛmbuu num labɛɛ.
8 A cho num tusi o sooŋndo* niŋ,Ma vi wu imɔnɔɔ o pee mɛŋma ihɛllo kɔllo.
9 Baa a cho pa wana cho num diyɔɔ wo dimul aa, ‘Ya bɛɛ mɛlɛka ya cho ni’?
Wanachioo ŋ cho wa wanaa cho num bɛɛlaŋ tɛɛmbuu wa o hɔl ni, kɛ o cho mɛlɛka le. ”’
10 ‘Wanaa fula o lɛŋii cheleŋnde niŋnda cho num diyɔɔ, mɛɛ nda dii nuaa wanaa sɔla hivi chiɛi kɔɔli le wa yɛ.Kanifuule ya Mɛlɛka pila soo ni,’ Chɛhowa, Mɛlɛka Kpuluŋguma Bɛndoo dimi lende ni.”
11 Mi Chɛhowa suaa vɛlɛ naa ya chua aa:
12 “Po wanachioo, soli chondii imɔnɛi a masaa le Taaya okɔɔ, ma dimul ndu aa: ‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni:
“Num wa tamaseliiyo ni a naŋɔɔ okɔɔ,Num oo nɔ taasioo o hɔbɛi nduyɛ num oo naŋ bɔɔ.
13 A wa o kpele Mɛlɛkaa niŋ Idɛŋ,
Ma chuɛɛnuŋ pouta baa kalala suu o suu,Lɔbi, topaasi, a chasipaa, kilisoluɛi, ɔnisi, a chadi, safaluɛɛ, tɔkuɛɛsi, a ɛmɔluadi,Nduyɛ nyɛla nda wou laŋ leniŋ ndaŋ, a kooliiye nda toosiaa laŋ ni.
O paale ya toosiaa numndeŋ choo ya bɛɛndiaa laŋ ni.
14 Mi hɛli num maa chɛlɔbiinɔ le ma wa kpeloo hɔlteŋ.
A wa o pembii diandɛi Mɛlɛkɛi choo, nduyɛ ma wa balɔɔ o pouta leyiŋndaŋ tɛɛŋ.
15 Chɔŋ a teleŋ ya toosiaa numndo, num oo nɔ sɔŋ o sɔŋ te.Kɛ mɛɛ teleŋ pum fuuluu, ma kandu sɔɔŋ cho sakpo le woŋ tosaa.
16 Le mɛɛ yulale numndeŋ le kui tau yɛ,Ma simnuŋ wana latanda, okoŋ ma kandu hakioo tosaa.
Num chɛlɔbiinɔ cho hoo kpeloo hɔlteŋ ma wa o pouta leyiŋndaŋ tɛɛŋ ndo,I cho num soli o pembii diandɛi Mɛlɛkɛi choo mi tɛɛmbuu num, kanifuule wana nɔɔlɛiyo ŋ cho ni.
17 Le mɛɛ ŋ naŋ yɛ, mi yoŋgaa pia num o kɔl.
Ma laasiaa taasi numndo, le mɛɛ ŋ fula tɔɔ yɛ.
Kɛ I cho num viɔl lɛŋ kpɔl.
I cho tosa mi masaa waa sim num nuaa.
18 Le mɛɛ ŋ tosa hakioo tau nduyɛ ma wa yulale lakafaleŋ tosaa yɛ, ma nɔɔliaa fondaŋnda numnda diandaa laŋ.
I cho tosa mi yiŋndeŋ le fula o fondaŋ ŋ cho wo, mi le lom num.
I cho tosa ma simnuŋ pultaŋ o lɛŋndeŋ choo wanaa cho num wa tofaa wa kpou o hɔl.
19 Wanaa ndaa sina numnda kpou cho num wa tofaa o kɔndɔfili bɛndoo niŋ.
Mɛɛlula numndaŋ la cho wa o lepilɛ niŋ kpe, nduyɛ la wɔu niŋ bɔɔ.Fɛɛŋ a fɛɛŋ bɛɛ a ve niŋ te.”’”
20 Mi Chɛhowa suaa vɛlɛ naa ya chua aa:
21 “Po wanachioo, muli hɔlla kpeŋgii Saidɔŋ nde, ma dimul ndu nyɛ cho ndu hunɔɔ yɔŋnɔŋ ndo.
22 Dimul ndu aa: ‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni:
“Num Saidɔŋ, I cho num chiŋalaŋ, nduyɛ mi nyɛ cho num yɔŋnɔŋndo tosa mi sɔla bɛɛleŋ.Waŋnda cho sina maa ya cho Chɛhowa ni, te I kilul num pɛ yamɛi nduyɛ mi sɔla bɛɛleŋ sanaa o num niŋ.
23 I cho num naa taŋ waŋnda wo tusi choo, nduyɛ mi tosa mi koowaŋ ma kuɛ koŋgilaŋ o nɛila numnda bɛndulaŋ choo.
I cho tosa mi muɛi faŋnde fula ba o ba fee mi i huŋ chiŋalaŋ num, mi dialuŋ vilɛiyoŋ tiu loŋ silɔ.Okoŋ, a cho sina maa ya cho Chɛhowa ni.
24 “‘“Okoŋ kɔɔli, fɛɛŋ bɛɛ yɔɔŋ wɔɔŋ wɔɔŋndoŋ ve lɛ niŋ waŋnda Isɔluɛi ŋ balaa silɔ le. Koŋ cho ni, wanaa chua nda chɔdɔ wa. Okoŋ, waŋnda cho sina maa ya cho Chɛhowa, Mɛlɛka Kpuluŋguma Bɛndoo ni.”’
25 “‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “Te I soli pɛ waŋnda Isɔluɛi naa nda cho a saŋnaŋ waŋnda tɛɛŋ nda, mi miŋgi nda chuuŋgiaa naapilɛ, I cho bɛɛleŋ sɔla nda tɛɛŋ kaalaŋ kpou o hɔl. Nduyɛ ma chal o lɛŋnde ndaleŋ choo, lɛŋnde ya ke Chekɔpu buɛi nuu leŋ.
26 A cho wa ichali loŋ ma waŋnuŋ hɛnɛkɛ, ma baŋ chiɛilaŋ, nduyɛ ma tɔl kpelela makilepiilaŋ. Isɔluɛiya cho waŋnɔŋ hɛnɛkɛ, te I kilul pɛ wanaa balu nda wa kpou yamɛi, wanaa chua nda chɔdɔ wa. Okoŋ, a cho sina maa ya cho Chɛhowa Mɛlɛka ndaa ni.”’”
