Isikiɛɛ 31:1-18
-
Ichipi, yɔm bɛndu Sida wo del (1-18)
31 O wɔsi 11 niŋ paŋgii yaa ve malɔ le pilɛ, mi Chɛhowa suaa vɛlɛ naa ya chua aa:
2 “Po wanachioo, dimul Feloo masaa le Ichipi a faŋga bɛndu cho ndu kɔɔli wo aa:‘O nɛɛnɛ cho yɛ o bɛndu maa num?
3 Asiiliaŋnɔ pilɛ wa, yɔm sida wo o wa o Lebanɔŋ niŋ ni.Ndoo nɔ lɛuwuŋ kɛndɛ kɛndɔŋ ŋ puiyaa yukɔŋ. O wa o vilɛi vilɛi, o bɛndu kpi,Nduyɛ mi tul ndɔɔ fuuluu o yumbu yumboo niŋ.
4 Mi mɛŋndaŋ ma tosa mbo chelul tau. Mi mɛŋma yiŋgilɛiyaŋ ma tosa mbo hindu mbo hel choo choo pɔ.
Peela pɔmbɔlaŋ la wa ndu la balaa silɔ naa nda tɔl ndu wa.Mi peela pɔmbɔlaŋ ndaŋ laa pɔɔliaa yɔmnde yondoo niŋ kpou.
5 Le saboo hoo, mbo bandu mbo hiau yɔmnde kpou yondoo niŋ.
Mbo soli lɛuwoŋ tau tau, nduyɛ miŋ bandu,Kanifuule mɛŋndaŋ ma wa tau o peela ndɔla pɔmbɔlaŋ niŋ.
6 Loŋ youwaa balu choo choo wa kpou ndaa toosiaa waaŋii ndɛi ni,Mi visiaa yonduaa kpou ndaa kom o lɛuwuŋ ndɔŋ bɛŋgu.O wunduma nduaŋ bɛŋgu wanaa faŋga bɛnduaa o lɛŋnde niŋ kpou ndaa chal ni.
7 Mi naŋɔɔ ndɔɔ a lɛuwuŋ ndɔŋ vilɛiyoŋ tosa mbo simnuŋ yɔm tɔɔma bɛndu.Kanifuule mi puunduŋ ndɔŋ tual lɛŋ di naa mɛŋndaŋ ma cho tau wa.
8 Yɔm sida kɛ kɛ cho o kpele Mɛlɛkaa niŋ mi wana tuu ndu a yɔmndo hoo le.
Yɔm chunipa kɛ kɛ nɔ lɛuwoŋ maa ndu le,Nduyɛ yɔm o yɔm cheleŋ nɔ lɛuwoŋ maa ndu le.
Yɔm kɛ kɛ cho o kpele Mɛlɛkaa niŋ mbo sim ndu o hɔl le naŋɔɔ le.
9 Mi tosa mbo pui yukɔŋ, mbo naŋ naŋɔɔ pila,Mi yɔmii tuɛi kpou o kpeloo Idɛŋ niŋ, kpele Mɛlɛka tonyaa paŋala ndu.’
10 “Lelaŋ nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘Le mɛɛ o* bandu tau tau, mi tul ndɔɔ fuuluu o yumbu yumboo niŋ, nduyɛ mi yoŋgaa luɛi ndu o kɔl le bandii duɛi yɛ,
11 I cho ndu malɔɔ masa kpaaya bɛndu hiou masaa o lɛŋnde niŋ kpou wo o ba. A tonya, o cho ndu chiŋalaŋ, nduyɛ mi kɛɛ ndu le dɛnɛ ndɔ wɔɔŋndo.
12 Mialaa kɔl vesɛiyaa bɛnduaa o lɛŋnde niŋ cho ndu kioŋ, ma mal ndu o pembuŋ bɛndoŋ choo, mi pei nduɛi chiɛɛluŋ o kpoloŋndaŋ niŋ, mi lɛuwuŋ ndɔŋ yomi yomi, miŋ deli o peela pɔmbɔlaŋ niŋ kpou o lɛŋndeŋ niŋ, okoŋ mi wanaa wa o wunduma nduaŋ bɛŋgu wa kpou mal ndu ma kuɛŋnuŋ.
13 Youwaa balu o choo choo niŋnda kpou cho wa o yɔm kombɛi koŋ choo, nduyɛ mi visiaa yonduaa kpou wa o lɛuwuŋ ndɔŋ choo.
14 Hei cho yɔŋnɔŋ le halikpeŋ yɔm o yɔm cho o mɛŋndaŋ ikɛi nɔla mbo bandu tei mi tul ndɔɔ pilaŋ yumbu yumboo le. Nduyɛ yɔm kɛ kɛ cho mɛŋndaŋ sɔlaa nyɛkɛndɛi nɔla mbo fuuluu o yumbu yumboo niŋ te. Kanifuule ndi kpou cho hunɔɔ wu, mi i tol o lɛŋndeŋ bɛŋgu latulu a chuauwaa ŋwaŋnda chiee, a cho kɔlaŋ o sooŋndo* niŋnda.’
15 “Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘Paale o cho tolɔɔ o Sɛiyo* niŋ ndeŋ, I cho tosa mi chaŋndaŋ la buli bu. Lelaŋ, I cho peela bɛndulaŋ kanda, nduyɛ mi saa peela ndɔla pɔmbɔlaŋ le halikpeŋ mi la pɛŋgi hiouwɔɔ. I cho tosa mi nyumma kpiŋgbima bɛnduaŋ ma tol Lebanɔŋ le ndu, nduyɛ mi yɔmnde yondoo niŋ kpou vesa.
16 Te o del pɛ mi bɔɔluu bɛndoo soo, nduyɛ mi tusi ndu o Sɛiyo* niŋ latulu a wanaa cho kɔlaŋ o sooŋndo* niŋnda kpou, I cho tosa mi lɛŋnde nyiiya. Yɔmnde Idɛŋ kpou, yɔmii kɛndɛ kɛndɛi Lebanɔŋ, a i cho mɛŋndaŋ sɔlaa ve kpou cho kɔl dɛɛniaa sɔla o lɛŋndeŋ bɛŋgu.
17 I tol o Sɛiyo* niŋ a ndu latulu, naa wanaa nda diu a muɛi faŋnde wa cho wa, latulu a wanaa nduaa malaa,* a wa ichali o wundule ndɔleŋ bɛŋgu kayii cheleŋ tɛɛŋ nda.’
18 “‘O yɔmnde Idɛŋ tɛɛŋ kpou, o kuɛɛ wa yɛ o bɛndu nduyɛ mbo nɔ tɔɔ maa num? Kɛ num bɛɛ cho tolɔɔ o lɛŋndeŋ bɛŋgu a yɔmnde Idɛŋ latulu. A cho hini wanaa sɔla hivi chiɛi kɔɔli le wa tɛɛŋ, wanaa nda diu a muɛi faŋnde wa. Hei cho Feloo a faŋga bɛndu cho ndu kɔɔli wo kpou yɔŋnɔŋ ni.’ Ya Chɛhowa, Mɛlɛka Kpuluŋguma Bɛndoo dimi lende ni.”
Tɛɛsiaalaŋ
^ Hibuluiye, “ŋ.”
^ Ɔɔ “sɛiyo.”
^ Ɔɔ “Siɔl.” Koŋ cho ni, sɛila waŋnda chieeya kpou. Tofa Tɛɛsiaa.
^ Ɔɔ “Siɔl.” Koŋ cho ni, sɛila waŋnda chieeya kpou. Tofa Tɛɛsiaa.
^ Ɔɔ “sɛiyo.”
^ Ɔɔ “Siɔl.” Koŋ cho ni, sɛila waŋnda chieeya kpou. Tofa Tɛɛsiaa.
^ Hibuluiye, “choŋgu ndɔɔ.”
