Isikiɛɛ 32:1-32
32 O wɔsi 12 niŋ paŋgii 12 malɔ le pilɛ, mi Chɛhowa suaa naa ya chua aa:
2 “Po wanachioo, soli chondii imɔnɛi a Feloo masaa le Ichipi okɔɔ, ma dimul ndu aa,‘A wa ko maa kpɔkuŋ* fɔŋndɔ kpaaya bɛndoo o lɛŋnde tɛɛŋ,Kɛ a mei doŋ.
A wa ko maa visi bɛndoo o pee mɛŋma ihɛllo niŋ. A wa mɛŋndaŋ lɔɔ o peela numndaŋ niŋ,Ma fasaŋiaa maŋ a ŋpelu, nduyɛ ma liindiaa maŋ.’
3 Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni:
‘I cho waŋnda o lɛŋii bɔɔbɔɔ niŋ soliŋ kpeku ma wuu num yala nuu choo,Okoŋ ma soli num o kɔŋgɔ.
4 I cho num soli o kɔŋgɔ,Mi mal num naa wakpaa.
I cho tosa mi youwaa balu choo choo wa huŋ chal num choo,Nduyɛ mi tosa mi visiaa yonduaa o lɛŋndeŋ choo de num ma hini kɔl.
5 I cho dialuŋ num vilɛiyoŋ viouwɔɔ o pembuŋ bɛndoŋ choo,Nduyɛ mi pei kpoloŋndaŋ cha a visiŋ cho lo woŋ.
6 I cho tosa mi lɛŋndeŋ le liwa yɔ yɔ a kooma numndaŋ haaa o pembuŋ bɛndoŋ choo,Nduyɛ mi ma pɛ o peela pɔmbɔlaŋ niŋ cha.’
7 ‘Te I tosa pɛ ma nyum pɔli, I cho choo choo kumbɔɔ nduyɛ mi tosa mi looŋ piimiaa.
I cho paaleŋ kumbɔɔ a yumbu yumboo,Nduyɛ mi tosa mi paŋgei kɛɛ le diondɔɔ.
8 I cho tosa mi nyɛm yɔŋgu nyɛ teŋgaa o choo choo niŋndoŋ kpou nyum pɔli le num,Nduyɛ mi kumbu lɛŋnde numndeŋ kpou a nyumndaŋ.’ Ya Chɛhowa, Mɛlɛka Kpuluŋguma Bɛndoo dimi lende ni.
9 ‘Kɔltaŋ la cho wanaa bɔɔbɔɔ laasiaŋ, te I kuɛ pɛ a wanaa num aa cho o biyɔɔ niŋnda o lɛŋii cheleŋnde niŋ,Lɛŋii nda sina kposoŋ te ve.
10 I cho tosa mi siooŋnde bii wanaa bɔɔbɔɔ,Nduyɛ masaa ndaa cho nyiiya a siooŋii bɛnduei le num, te I hiŋ pɛ muɛi nii faŋnde nda lachi.
Wana o wana cho nyiiya a siooŋnde le yoomu ndɔɔ,O paale ŋ cho delɔɔ leŋ choo.’
11 Kanifuule nyɛ Chɛhowa, Mɛlɛka Kpuluŋguma Bɛndoo dimi wo cho hoo ni:
‘Masaa le Babilɔŋ cho num hunɔɔ chiŋalaŋ a muɛi nduɛi faŋnde.
12 I cho tosa mi kuubaa chɔuwaa kpaayaa bɛnduaa diu faŋga bɛndu cho num kɔɔli wo a mɔɔŋ faŋndoŋ.Nda kpou wanaa kɔl vesɛiyaa bɛnduaa nda cho ni.
A cho nyɛm Ichipi kialu yoŋgaa a muŋ ndoŋ tɛɛmbuu, vɛlɛ a wanaa faŋga bɛnduaa cho ndu kɔɔli wa kpou.
13 I cho chɔluaa nduaa cho o peela ndɔlaŋ ikɛi ya kpou diu,Nduyɛ wanachiee ɔɔ chɔlu kɛ kɛ tusi lɛ pelei o maŋ niŋ mbo nɔɔliaa maŋ te.’
14 ‘A teleŋ koŋ, I cho mɛŋma ndaŋ dindi,Nduyɛ mi tosa mi peela ndalaŋ la wa hiouwɔɔ maa machuɛi.’ Ya Chɛhowa, Mɛlɛka Kpuluŋguma Bɛndoo dimi lende ni.
15 ‘Te I basu pɛ nyɛ o nyɛ cho Ichipi mbo simnuŋ pɔmndo,Nduyɛ mi tɛɛmbuu wana o wana cho loŋ,A cho sina maa ya cho Chɛhowa ni.
16 Chondii imɔnɛi cho hei ni. A tonya, waŋnda cho ndi soli.Chuaa laanduaa o lɛŋnde niŋ cho ndi soli.
A cho ndi soli le Ichipi vɛlɛ a wanaa faŋga bɛnduaa cho ndu kɔɔli wa.’ Ya Chɛhowa, Mɛlɛka Kpuluŋguma Bɛndoo dimi lende ni.”
17 O wɔsi 12 niŋ malɔ 15 o paŋgii keŋ niŋ, mi Chɛhowa suaa naa ya chua aa:
18 “Po wanachioo, chaŋ wanaa faŋga bɛnduaa cho Ichipi wa choo, ma tusi ndu o lɛŋndeŋ bɛŋgu. Tusi ndu a chuaa laanduaa cho o lɛŋii kpaayɛi bɛnduei niŋnda, vɛlɛ a wanaa cho kɔlaŋ o sooŋndo* niŋnda latulu o lɛŋndeŋ bɛŋgu.
19 “‘Baa a yiyaŋ pa maa a naŋ ma hiau acheleŋnda? Tol lɛŋ ma kɔ hini latulu a wanaa sɔla hivi chiɛi kɔɔli le wa.’
20 “‘A cho deli wanaa nda diu a muɛi faŋnde wa tɛɛŋ. A dii ndu a muɛi faŋnde. Sasu ndu a wanaa nduaa faŋga bɛnduaa kpou.
21 “‘Kuubaa chɔuwaa kpaayaa bɛnduaa cho lo o Sɛiyo* niŋ ma soo o ndu lo, a o wanaa nduaa malaa lo. A tonya, a cho tolɔɔ lɛŋ, nduyɛ ma hini maa wanaa sɔla hivi chiɛi kɔɔli le wa, a nda diu a muɛi faŋnde wa.
22 Asiiliaa cho loŋ a wanaa nduaa kpou. Sɛila ndalaŋ la cho ndu la balaa silɔ, nduyɛ nda kpou a muɛi faŋnde nda diu nda ni.
23 Sɛila ndɔlaŋ la cho o lɛŋndeŋ bɛŋgu di, nduyɛ mi wanaa nduaa wa a balaa silɔ o sɛi ndɔɔ. Nda kpou muɛi faŋnde diu nda ni, kanifuule a wa wanaa cho yoomu wa siooŋnde lueiyo.
24 “‘Ɛlam cho loŋ a wanaa nduaa a balaa silɔ o sɛi ndɔɔ. Nda kpou muɛi faŋnde diu nda ni. Ma tual o lɛŋndeŋ bɛŋgu a sɔla hivi chiɛi kɔɔli le. Nda wa wanaa cho yoomu wa siooŋnde lueiyo ni. Suŋ suŋ niŋ, a cho siɔmbula tol nda laŋ biunɔŋ, a wanaa cho kɔlaŋ o sooŋndo* niŋnda latulu.
25 A toosial ndu kpeloo wanaa nda diu wa tɛɛŋ, nduyɛ mi wanaa nduaa faŋga bɛnduaa balu sɛila ndɔlaŋ silɔ. Nda kpou a sɔla hivi chiɛi kɔɔli le, nduyɛ a muɛi faŋnde nda diu nda ni, kanifuule kuubaa chɔuwaa kpaayaa bɛnduaa haa wa wanaa cho yoomu wa siooŋnde lueiyo. A cho siɔmbula tol nda laŋ biunɔŋ a wanaa cho kɔlaŋ o sooŋndo* niŋnda latulu. A mal ndu wanaa nda diu wa tɛɛŋ.
26 “‘Loŋ Misiɛki, Tubaa, a wanaa ndaa* faŋga bɛnduaa kpou cho ni. Sɛila ndalaŋ la cho ndu la balaa silɔ, nda kpou a sɔla hivi chiɛi kɔɔli le, nduyɛ a muɛi faŋnde nda diu nda ni, kanifuule a wa wanaa cho yoomu wa siooŋnde lueiyo.
27 A cho wa ihini a kuubaa chɔuwaa kpaaya bɛnduaa sɔla hivi chiɛi kɔɔli le wa latulu, a nda diu ma kua o Sɛiyo* niŋ a nyɛm ndaŋ chɔuwoŋ nda. A cho mɔɔŋ ndaŋ faŋndoŋ handɔɔ o bolii ndɛi* bɛŋgu, nduyɛ mi hakila ndalaŋ la wa o paala ndalaŋ choo, kanifuule a wa wanaa cho yoomu wa siooŋnde lueiyo.
28 Kɛ num, a cho num piɔlɔɔ wanaa sɔla hivi chiɛi kɔɔli le wa tɛɛŋ, nduyɛ ma hini a wanaa nda diu a muɛi faŋnde wa latulu.
29 “‘Idɔm, masaa nduaa, a laŋgbaa nduaa kalla kpou cho loŋ. Mi che bɛɛ ndaa nɔ kpaayaa tau, kɛ ma yambu nda wanaa nda diu a muɛi faŋnde wa tɛɛŋ. Nda bɛɛ cho ihini a wanaa sɔla hivi chiɛi kɔɔli le wa latulu, vɛlɛ a wanaa cho kɔlaŋ o sooŋndo* niŋnda.
30 “‘Loŋ laŋgbaa kalla* ba luaŋ ndo cho ni, latulu a Saidoniaŋnda kpou, a tol o lɛŋndeŋ bɛŋgu a wanaa nda diu wa latulu, mi che bɛɛ ma luei waŋnda siooŋnde a kpaaya nda bɛndoo. A cho ihini a wanaa sɔla hivi chiɛi kɔɔli le wa latulu, a nda diu a muɛi faŋnde wa. Nduyɛ, a cho siɔmbula tol nda laŋ biunɔŋ a wanaa cho kɔlaŋ o sooŋndo* niŋnda latulu.
31 “‘Feloo cho hei chɔ, mbo sɔla kɔl dɛɛniaa a nyɛ yɔŋnuŋ wanaa nduaa faŋga bɛnduaa kpou wo. Feloo nda puaa nduaa chɔuwa kpou cho piɔmndo sɔla a muɛi faŋnde.’ Ya Chɛhowa, Mɛlɛka Kpuluŋguma Bɛndoo dimi lende ni.
32 “‘Le mɛɛ Feloo tosa mi siooŋnde bii wanaa cho yoomu wa yɛ, ndu a wanaa nduaa faŋga bɛnduaa cho wu, ma kumbu nda latulu a wanaa sɔla hivi chiɛi kɔɔli le wa, a nda diu a muɛi faŋnde wa.’ Ya Chɛhowa, Mɛlɛka Kpuluŋguma Bɛndoo dimi lende ni.”
Tɛɛsiaalaŋ
^ Ɔɔ “yalakana.”
^ Ɔɔ “sɛiyo.”
^ Ɔɔ “Siɔl.” Koŋ cho ni, sɛila waŋnda chieeya kpou. Tofa Tɛɛsiaa.
^ Ɔɔ “sɛiyo.”
^ Ɔɔ “sɛiyo.”
^ Hibuluiye, “nduaa.”
^ Ɔɔ “Siɔl.” Koŋ cho ni, sɛila waŋnda chieeya kpou. Tofa Tɛɛsiaa.
^ Naapum i sim le kuubaa chɔuwaa nda kumbu a mɔɔŋ ndaŋ faŋndoŋ, le nda bɛɛleŋ kioo wa.
^ Ɔɔ “sɛiyo.”
^ Ɔɔ “simlachiaa.”
^ Ɔɔ “sɛiyo.”