Isikiɛɛ 34:1-31
34 Mi Chɛhowa suaa vɛlɛ naa ya chua. Mbo dimi aa:
2 “Po wanachioo, dimul wanaa mandaa lasaa Isɔluɛi a nyɛ cho nda yɔŋnɔŋndo okɔɔ. Dimul wanaa mandaa lasaa aa: ‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “Kpundɔɔ cho le wanaa mandaa lasaa Isɔluɛi, a buulaŋ haa le nyɛdiaa ndaa kinɛi ya! Baa o cho chɔluaa le wanaa mandaa lasaa nɔ ma ke nyɛdiaa le?
3 Mi la diu chɔluaa chelulɛiya, mi la de chuɛima ndaŋ, nduyɛ mi la wounuŋ nyɛla nda toosiaa a yiiŋii ndɛi laŋ. Kɛ la cho chɔluaa nyɛdiaa ke le.
4 Chɔluaa vi dialloŋ nda, la luei nda mayoomu le. A cho a naalaŋ nda, la chiɔu nda le. A yɔŋuluŋ nda, la yiu yiu nda pauve le. A saŋnuŋ nda, la miŋgi nda a tuaa choo le. A luusiaŋ nda, la kue nda nuuviaa le. Kɛ mi la bii nda ŋuasu ŋuasu.
5 Lelaŋ, ma saŋnuŋ kanifuule wana mandaa lasaa ve le. Ma saŋnuŋ, okoŋ ma simnuŋ nyɛdiaa le visiaa yonduaa suu o suu.
6 Mi saa niaa tiu a pembuŋ bɛndoŋ a o pembuŋ pɔmbɔŋ choo kpou. Mi saa niaa saŋnuŋ o lɛŋndeŋ choo kpou, wana o wana kue nda nuuviaa le.
7 “‘“Lelaŋ nya wanaa mandaa lasaa, la yaŋ nilaŋ o nyɛ Chɛhowa dimi wo:
8 ‘Chɛhowa, Mɛlɛka Kpuluŋguma Bɛndoo dimi aa: “Mɛɛ i cho kpendekele maa I cho yoomu yɛ, la tosa mi saa niaa simnuŋ nyɛdiaa le visiaa yonduaa suu o suu. Kanifuule, wana mandaa lasaa ve le nda manda ɔɔ mbo nuuviaa nda le. Le nyɛdiaa nyaa koni nya wa fafalaa ni, kɛ la ke saa niaa nyɛdiaa le.’”
9 Lelaŋ nya wanaa mandaa lasaa, la yaŋ nilaŋ o nyɛ Chɛhowa dimi wo.
10 Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘I cho wanaa mandaa lasaa chiŋalaŋ, nduyɛ mi nyuna nda le ma dɔɔnuŋ kona a saa niaa okɔɔ.* I cho nda kuuna saa niaa nyɛdiaa kioo,* nduyɛ ndapila bɛɛ ve lɛ niŋ nyɛdiaa sɔla le. I cho nda saa niaa poonda o sondo, okoŋ a ve lɛ niŋ nda dio le.’”
11 “‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “La che ya! Yapila cho saa niaa nuuviaa, mi handu nda hɔlteŋ choo.
12 I cho saa niaa hɔlteŋ handɔɔ choo, mɛɛ wana mandaa lasaa saaluŋ nuaa saa nduaa luusiaŋ nda nduyɛ mbo ke nda nyɛdiaa yɛ. Paale yumbu yumboo cho kumbɔɔ kpu nduyɛ mi nyumndaŋ ma tol kpiŋgbi leŋ, I cho saa niaa nuuviaa o fondaŋnda nda saŋnuŋ ndaŋ kpou.
13 I cho nda soli naa nda cho waŋnda tɛɛŋ o lɛŋnde niŋnda, mi chuuŋgiaa nda naapilɛ, nduyɛ mi hiŋ a nda o lɛŋnde ndaleŋ niŋ. I cho nda nyɛdiaa ke o pembuŋ bɛndoŋ choo Isɔluɛi, o peela pɔmbɔlaŋ ikɛi, a o fondaŋnda waŋnda cho ichali o lɛŋndeŋ niŋndaŋ kpou.
14 I cho lakɔ a nda o bil puiyaa kɛndɛ kɛndɔɔ ma wa diolaŋ loŋ. O pembuŋ bɛndoŋ Isɔluɛi choo nda cho wa billo dioo ni. A cho wa hiniŋndaŋ o fondaŋ bil kɛndɛ kɛndɔɔ cho wo, okoŋ ma de bil kɛndɛ kɛndɔɔ o pembuŋ bɛndoŋ choo Isɔluɛi.”
15 “‘“Yapila cho saa niaa nyɛdiaa ke ni, nduyɛ yapila cho nda fondaa ke ni le hinilaŋ.” Ya Chɛhowa, Mɛlɛka Kpuluŋguma Bɛndoo dimi lende ni.
16 “A luusiaŋ nda, I cho nda nuuviaa. A saŋnuŋ nda, I cho nda chuuŋgiaa naapilɛ. A yɔŋuluŋ nda, I cho nda pauve yiu yiu. A vi dialloŋ nda, I cho nda yoomuaŋ luei. Kɛ saa chelulɛiya a saa nɔ yoomuaŋ nda, I cho nda tɛɛmbuu. I cho nda pimi cha a nyɛpalaa.”
17 “‘Kɛ nya saa niaa nda, nyɛ ya Chɛhowa, Mɛlɛka Kpuluŋguma Bɛndoo dimi wo cho hoo ni: “I cho nya yamɛi kilul a pilɛŋ pilɛŋnda, nduyɛ mi kelu yamɛi saa konduaa a chuiŋaa piaanduaa tɛɛŋ.
18 Baa bil kɛndɛ kɛndɛ nya cho dioo wo cho letuu a nya le? Baa la nɔ pa mi la niɔu niɔu vɛlɛ bil tɔ lo wo a ŋpelu? Nduyɛ te la chii pɛ mɛŋma kɛndiaŋ kolɔɔ, baa la nɔ pa mi la liindiaa maŋ a ŋpelu?
19 Baa saa niaa nɔ pa ma de bil nya niɔu niɔu a ŋpelu wo, nduyɛ ma kol mɛŋma nya linda a ŋpelu waŋ?”
20 “‘Lelaŋ nyɛ Chɛhowa, Mɛlɛka Kpuluŋguma Bɛndoo dimul nda wo cho hoo ni: “La che ya! Yapila cho yamɛi kiolɔɔ saa chelulɛiya a saa nyavɛiya tɛɛŋ.
21 Kanifuule, la wa saa niaa nyindɔɔ a choŋgula nyalaŋ, nduyɛ mi la lo a wa a naalaŋ nda kuindioo a leela nyalaŋ haaa ma saŋnuŋ.
22 Kɛ nduyɛ, I cho saa niaa piŋi, fɛɛŋ bɛɛ a ve lɛ niŋ nyɛdiaa le visiaa biyaa le. I cho saa yamɛi kilul a pilɛŋ pilɛŋnda.
23 I cho Deeve buɛi nuu hɛli mbo wa nda mandaa, nduyɛ mbo ke nda nyɛdiaa. Ndupila cho nda wa nyɛdiaa kioo ni, nduyɛ mbo wa nda mandaa.
24 Ya Chɛhowa, I cho simnɔŋ Mɛlɛka ndaa, mi Deeve buɛi nuu wa nda bolleŋ. Ya Chɛhowa, yapila soo ni.
25 “‘“I cho kpema kɔl nyuloo yii a nda, mi soli visiaa biyaa o lɛŋndeŋ niŋ, le halikpeŋ ma waŋnuŋ hɛnɛkɛ o pollo niŋ, nduyɛ ma wa luaŋ o bundɛlaŋ niŋ nyɛ o nyɛ yɔŋnuŋ nda le.
26 I cho nda a fondaŋnda balu pembii nii pɔmbuɛi laŋ salaa dɔwɔɔ, nduyɛ mi tosa mi piɔɔ wa siaa a teleŋ kpeekpei o nɔ le siaa wo. Salaa cho nda tolɔɔ choo mɛɛ piɔɔ sia nuaa yɛ.
27 I cho tosa mi tɔlɔɔlaŋ la naŋ tau o lɛŋndeŋ niŋ, nduyɛ mi yɔmii cho yondoo niŋnde bɛɛ yɔŋgu kɔmndeŋ. A cho waŋnɔŋ hɛnɛkɛ o lɛŋndeŋ niŋ, nduyɛ a cho sina maa ya cho Chɛhowa ni, te I yimi pɛ yɔmii lawoluɛi cho nda o lakɛsu ve, nduyɛ mi baŋa nda wanaa kuɛ a nda o chɛleŋ niŋnda o ba.
28 A ve lɛ niŋ nyɛdiaa le waŋnda o lɛŋnde niŋ te, nduyɛ visiaa yonduaa o lɛŋndeŋ choo del lɛ nda choo ma tɛɛmbuu nda le. A cho waŋnɔŋ hɛnɛkɛ, wana o wana luei lɛ nda isiooŋ te.
29 “‘“I cho nda fondaa ke mbo simnuŋ fonda tɔɔma bɛndu, le mɛɛ o naŋ tɔlɔɔlaŋ yɛ. Fɛɛŋ bɛɛ a ve lɛ niŋ a yiaaŋ o lɛŋndeŋ niŋ te, nduyɛ waŋnda o lɛŋnde niŋ tɛɛmbuu lɛ niŋ nda labɛɛ le.
30 ‘Okoŋ a cho sina maa ya Chɛhowa Mɛlɛka ndaa, I cho a nda latulu, nduyɛ maa waŋnda Isɔluɛi cho wanaa niaa ni.’ Ya Chɛhowa, Mɛlɛka Kpuluŋguma Bɛndoo dimi lende ni.”’
31 “‘Kɛ nya saa ya cho mandaa wa nda, waŋnda chieeya nya cho ni, mi ya wa Mɛlɛka nyaa.’ Ya Chɛhowa, Mɛlɛka Kpuluŋguma Bɛndoo dimi lende ni.”
