Isikiɛɛ 35:1-15
-
Huuluei a pemboŋ Siaa okɔɔ (1-15)
35 Mi Chɛhowa suaa vɛlɛ naa ya chua aa:
2 “Po wanachioo, muli hɔlla kpeŋgii tanda ŋpemboo Sɛyaa, ma dimul ndu nyɛ cho ndu hunɔɔ yɔŋnɔŋndo.
3 Dimul ndu aa: ‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “Oo tanda ŋpemboo Sɛyaa, I cho ba nuu siɛndi mi chiŋalaŋ num, nduyɛ mi tosa ma simnuŋ pɔmndo.
4 I cho chieeŋ num bɛndoŋ tɛɛmbuu ma simnuŋ pɔmndo, okoŋ a cho sina maa ya cho Chɛhowa ni.
5 Kanifuule a wa tuŋ hiouwɔɔ lachi a waŋnda Isɔluɛi yɛleŋ tullo, nduyɛ ma mal nda muɛi faŋnde o ba a teleŋ nda wa o nyɛpalaa niŋndo, teleŋ nda wa nyɛpalaa mɛɛlaa sɔlaa wo.”’
6 “‘Lelaŋ, mɛɛ i cho kpendekele maa I cho yoomu yɛ, I cho num bɛɛndiaa le mi soli num koowaŋ, okoŋ mi koowaŋ ma tisa num kɔɔli. A tul koowaŋ leyɛ, kɛ koowaŋ ma cho num tisa kɔɔli.’ Ya Chɛhowa, Mɛlɛka Kpuluŋguma Bɛndoo dimi lende ni.
7 ‘I cho tosa mi tanda ŋpemboo Sɛyaa simnuŋ pɔmndo, nduyɛ mi tosa wana o wana kei lɛ loŋ te.
8 I cho waŋvilɛiya pei o pembuŋ num bɛndoŋ choo cha. Nduyɛ wanaa muɛi faŋnde cho diu wa cho deli o pembuŋ num pɔmbɔŋ choo, o kpoloŋnda numndaŋ, a o peela numnda pɔmbɔlaŋ niŋ kpou.
9 I cho tosa ma lo pɔm le fɛɛŋ a fɛɛŋ, nduyɛ wana o wana chel lɛ o chieeŋ num bɛndoŋ niŋ te. Okoŋ, a cho sina maa ya cho Chɛhowa ni.’
10 “Mi che bɛɛ ya Chɛhowa pila wa lɛŋii ŋiiŋnde hei a kaala tiɔɔŋndaŋ ndaŋ tɛɛŋ, kɛ ma dimi maa num nɔ ni, nduyɛ maa nyɛm kɛŋ numndo i cho wa ni.
11 ‘Lelaŋ, mɛɛ i cho kpendekele maa I cho yoomu yɛ, mɛɛ ŋ tuulu kɔllo ŋama ŋama a nda, ma paŋala nda, nduyɛ ma tul nda yɛleŋ yɛ, lende ya bɛɛ cho num tosal ni. Te I kilul num pɛ yamɛi, I cho tosa ma sina ya.’ Ya Chɛhowa, Mɛlɛka Kpuluŋguma Bɛndoo dimi lende ni.
12 ‘A cho sina maa ya Chɛhowa pila tuei diomnda wɔɔŋnda ŋ dimi a pembuŋ bɛndoŋ Isɔluɛi okɔɔ laŋ. Ma dimi aa: “Ŋ lo pɔm, nduyɛ a mal naa muŋ o ba le miŋ tɛɛmbuu muŋ.”*
13 Ma suaa o ya lo a yoŋga, nduyɛ ma dimul la diomnda wɔɔŋndaŋ tau tau. Mi tuɛi muŋ kpou.’
14 “Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘Te I tosa pɛ ma lo pɔm, lɛŋndeŋ kpou le cho dɔɔnɔŋ nyaale.
15 Mɛɛ nyɛm kɛŋ waŋnda Isɔluɛi sɔla tambei ma duaunuŋ nyaale yɛ, lende koni ya bɛɛ cho num tosal ni. Nya pembuŋ bɛndoŋ o tanda Sɛyaa wo niŋ, nya kpou cho simnɔŋ pɔmndo. A tonya, Idɔm kpou cho simnɔŋ pɔmndo. Okoŋ, a cho sina maa ya cho Chɛhowa ni.’”
Tɛɛsiaalaŋ
^ Hibuluiye, “maa nyɛdiaa.”
