Isikiɛɛ 38:1-23
38 Mi Chɛhowa suaa vɛlɛ naa ya chua aa:
2 “Po wanachioo, mulul Kɔɔki o lɛŋnde Makɔɔki leŋ niŋ, masa bɛndoo le Misiɛki a Tubaa hɔlla, ma dimul ndu a nyɛ cho ndu hunɔɔ yɔŋnɔŋndo okɔɔ.
3 Dimul ndu aa, ‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “Oo Kɔɔki, masa bɛndoo le Misiɛki a Tubaa, I cho num chiŋalaŋ.
4 I cho num doluŋndoŋ wou o yaalolaŋ niŋ, mi tosa mi num, puaa num aa chɔuwa, suaa, a wanaa nyaanuŋ suaa wa kpou chua nɛi cheleŋ. Nda kpou cho a doviaŋ o nyɛla kɛndɛ kɛndɛlaŋ niŋ, ma wa faŋga bɛndu bɛndoo a boola chɔula bɛndulaŋ, vɛlɛ a boola chɔula pɔmbɔlaŋ* o laba. Nduyɛ nda kpou sayiaŋ mɔɔŋ faŋndoŋ.
5 Paasiaa, Itoopiaa, a Puti cho a nda latulu. Nda kpou nɔ boola chɔula pɔmbɔlaŋ o laba a mɔsiltaŋ o lebol.
6 Wanaa bɔɔbɔɔ cho a num latulu. Koma a puaa nduaa chɔuwa kpou, waŋnda Tokaama fulaa o fondaŋnda yololɛlaŋ ba luaŋ ndo, latulu a puaa ndaa chɔuwa kpou.
7 “‘“Num a puaa num aa chɔuwaa chuuŋgiaŋ naapilɛ wa kpou, la bɛɛndiaŋ nyɛkɛndɛi. Nduyɛ, num cho wa masa ndaa* ni.
8 “‘“Te palɛi bɔɔbɔɔ hiou pɛ, I cho num fula o hɔl. Te wɔsila bɔɔbɔɔ hiou pɛ, a cho delɔɔ lɛŋnde muɛi faŋnde tɛɛmbuu, kɛ mi wanaa nduaa miiŋgu ichali loŋ pila leŋ choo. Wanaa wa a sɛŋiaŋ wanaa bɔɔbɔɔ tɛɛŋ, kɛ ma chuuŋgiaa nda naapilɛ o pembuŋ bɛndoŋ Isɔluɛi choo wa. Pemboŋ muŋ wa ŋ tambɛi le teleŋ vilɛi. O lɛŋii cheleŋ niŋ wanaa cho o lɛŋndeŋ ndeŋ niŋnda fula ni, nduyɛ nda kpou choŋnuŋ hɛnɛkɛ.
9 Num a puaa num aa chɔuwa kpou vɛlɛ a wanaa faŋga bɛndu cho a num latulu wa, la cho nda hunɔɔ chiŋalaŋ maa hueiyii kpaaya bɛndu, nduyɛ mi la kumbu lɛŋnde ndaleŋ kpu maa mɔm.”’
10 “Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘O paale leŋ choo, a cho wa yiyaŋndo o sɔɔŋ choo, nduyɛ ma tuunuŋ sɔɔŋ wɔɔŋndoŋ o kɔl.
11 A cho dimi aa: “I cho lɛŋnde cho leŋ kpalamandaŋ ndeŋ delɔɔ choo. Wanaa choŋnuŋ haa hɛnɛkɛ nyɛ o nyɛ cho nda paaliaŋ te wa, I cho nda chiŋalaŋ. Nda kpou choŋnuŋ o sɔndɔkɔlta nɔ lakpaki, diola ŋchiliŋ, ɔɔ sulukula ŋchiliŋ te laŋ niŋ.”
12 Le ma puŋga nyɔɔŋ tau tau ŋ cho hei tosa ni. A cho fondaŋnda wa la tambɛi kɛ mi wanaa fula o lɛŋnde niŋnda miiŋgu ichali loŋ ndaŋ chiŋalaŋ. Waŋnda haa nɔ sultaŋ vɛlɛ a nyɔɔŋ tau tau, nduyɛ ma wa ichali o chieeŋndo tɛɛŋ deŋ.
13 “‘Siɛba, Dɛdaŋ, yulaa bɛnduaa Taasi vɛlɛ a puaa ndaa chɔuwa kpou cho num nyuna aa: “Baa le nyɔɔŋ puŋgaa ŋ cho lɛŋnde leŋ chiŋalaŋndo ni? Baa le ma chua kaniŋ humboŋ, kooliiyoŋ, sulta ndalaŋ, nduyɛ ma poondiaa nda nyɔɔŋ o laba tau tau ma kuɛŋnuŋ a muŋ ŋ chuuŋgiaa puaa num aa chɔuwa ni?”’
14 “Lelaŋ po wanachioo, dimul Kɔɔki aa, ‘Nyɛ Chɛhowa, Mɛlɛka Kpuluŋguma Bɛndoo dimi a num okɔɔ wo cho hoo ni: “O paale leŋ choo, a cho sina maa wanaa niaa Isɔluɛiya choŋnuŋ hɛnɛkɛ, lende le?
15 Num a wanaa cho a num latulu wa kpou, la cho chɔnɔŋ o fondaŋnda yololɛlaŋ ba luaŋ ndo. La cho wa hunɔɔ faŋga bɛndoo o suaa choo, puaa chɔuwaa faŋga bɛnduaa.
16 La cho hunɔɔ wanaa niaa Isɔluɛiya tolɔɔ choo mɛɛ mɔmndo kumbu nuaa lɛŋndeŋ yɛ. Oo Kɔɔki, te palɛi bɔɔbɔɔ hiou pɛ o mɛɛlulaŋ kpɔŋ, I cho tosa ma huŋ chiŋalaŋ lɛŋnde nileŋ, le halikpeŋ mi waŋnda o lɛŋnde niŋ sina maa Mɛlɛka diandaa ya cho ni, te I mal num pɛ woloŋ.”’
17 “Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘Baa o cho a num okɔɔ le wanaa suaa le ya o Isɔluɛi niŋnda ndaa dimi huuluei paandu le? Le wɔsiŋ bɔɔbɔɔ a wa dimioo maa a cho hunɔɔ wanaa niaa chiŋalaŋ.’
18 “‘O paale Kɔɔki del niŋ waŋnda Isɔluɛi choo leŋ choo, I cho dɔɔnɔŋ tumbe a ndu o kala kala.’ Ya Chɛhowa, Mɛlɛka Kpuluŋguma Bɛndoo dimi lende ni.
19 ‘I cho dɔɔnɔŋ tumbe o kala kala maa leyiŋ, nduyɛ mi soo a kɔl tuu bɛndoo. Lɛŋnde Isɔluɛi leŋ le cho nyiiya kpa kpa o paale leŋ choo.
20 I cho tosa mi suuwa o pee mɛŋma ihɛllo niŋ, youwaa balu choo choo wa, visiaa yonduaa, nyaa yoomaa kua o demboo choo o lɛŋndeŋ choo wa kpou, vɛlɛ a waŋnda chieeya o lɛŋndeŋ choo kpou nyiiya. Pembuŋ bɛndoŋ cho tolɔɔ lɛŋ mɔlɔmɔlɔ, nduyɛ mi pembuŋ feke fekoŋ a kpakilaŋ kpou la koombiaa.’
21 “‘I cho muɛi faŋnde yɔŋ, mi i chiŋalaŋ ndu o pembuŋ niŋ bɛndoŋ choo kpou. Wana o wana cho chaaŋ ndɔ mululaŋ a muɛi faŋnde.’ Ya Chɛhowa, Mɛlɛka Kpuluŋguma Bɛndoo dimi lende ni.
22 ‘I cho ndu yamɛi kilul, mi tusi ndu a puaa nduaa chɔuwa naa taŋ waŋnda wo choo, nduyɛ mi kooma ndaŋ ma kuɛ koŋgilaŋ. I cho ndu, puaa nduaa chɔuwa, vɛlɛ a faŋga bɛndu cho a ndu latulu wo piɔɔ a looŋ kpuŋgbaŋ tusi choo, vɛlɛ a yiŋndeŋ a pouta leyiŋndaŋ.
23 I cho kpaaya nuu chɔm, nduyɛ mi chɔm waŋnda o lɛŋii bɔɔbɔɔ niŋ maa Mɛlɛka diandaa ya cho ni. Okoŋ, a cho sina maa ya cho Chɛhowa ni.’
Tɛɛsiaalaŋ
^ Boolaŋ ndaŋ, wanaa wuu chiŋuaŋ nda soliŋ ndaŋ kpeku ni.
^ Hibuluiye, “wana manda nda wo.”
