Isikiɛɛ 39:1-29
39 “Lelaŋ num po wanachioo, dimul Kɔɔki a nyɛ cho ndu hunɔɔ yɔŋnɔŋ ndo okɔɔ. Dimul ndu aa, ‘Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: “Num Kɔɔli, masa bɛndoo Misiɛki a Tubaa, I cho num chiŋalaŋ.
2 I cho num hɔlla mulul, mi tosa ma fula o fondaŋnda yololɛlaŋ ba luaŋ ndo, okoŋ mi hiŋ a num o pembuŋ bɛndoŋ choo Isɔluɛi.
3 I cho chiɔule cho num o ba miallo leŋ lɔɔ, nduyɛ mi lɔɔ chiŋɔma cho num o ba kɛndɔɔ waŋ mi ma deli.
4 Num ni, puaa num aa chɔuwa ni, vɛlɛ a wanaa cho a num latulu wa kpou, la cho deli o pembuŋ bɛndoŋ Isɔluɛi choo. I cho youwaa suu o suu vɛlɛ a visiaa yonduaa dialuŋ nyaŋ vilɛiyoŋ ke ma de muŋ.”’
5 “‘La cho deli o fondaŋnda wakpa laŋ.’ Kanifuule ya Chɛhowa, Mɛlɛka Kpuluŋguma Bɛndoo pila soo ni.
6 “‘I cho yiŋndeŋ yɔŋ Makɔɔki choo, vɛlɛ a wanaa choŋnuŋ ichali hɛnɛkɛ o lɛŋii mɛŋndaŋ ma balu ve niŋnda. Okoŋ, a cho sina maa ya cho Chɛhowa ni.
7 I cho tosa mi wanaa niaa Isɔluɛiya sina diola nila diandaalaŋ. Nduyɛ, fɛɛŋ bɛɛ I chɛl lɛ mi diola nila diandaalaŋ la nɔɔla le. Okoŋ, waŋnda o lɛŋndeŋ niŋ cho sina maa ya cho Chɛhowa ni, Mɛlɛka Diandaa o Isɔluɛi niŋ.’
8 “‘A tonya, le cho hunɔɔ. Paale ya soo a leŋ okɔɔ leŋ le cho hunɔɔ, mi nyɛ ya dimi wo yɔŋnuŋ.’ Ya Chɛhowa, Mɛlɛka Kpuluŋguma Bɛndoo dimi lende ni.
9 ‘Wanaa cho ichali o chieeŋ bɛndoŋ o Isɔluɛi niŋnda cho lakɔ nyɛm chɔuwoŋ chɔuviaa ma kiisuu yiŋndeŋ a muŋ. Muŋ cho ni, boola pɔmbɔla chɔulaŋ,* boola bɛndula chɔulaŋ, chiɔulaŋ a chiŋuaŋ, vɛlɛ a yɔmii siombu siombuei a baltaŋ. A cho wa yiŋndeŋ kiisuuwo a nyɔɔŋ muŋ le wɔsilaŋ la ŋɔmmɛu.
10 A ve niŋ kɔlaŋ yondoo niŋ yɔmnde tiŋgɔɔ le yiŋndeŋ mɛndul te. Kanifuule, nyɛm chɔuwoŋ muŋ nda cho wa soliŋndo kpeku ni le yiŋndeŋ mɛndullo.’
“‘Nda bɛɛ cho wanaa wa nyɛm ndaŋ chɔuviaa wa chɔuviaa, nduyɛ ma puŋga nyɛm wanaa wa nyɛm ndaŋ puŋgaa wa.’ Ya Chɛhowa, Mɛlɛka Kpuluŋguma Bɛndoo dimi lende ni.
11 “‘O paale leŋ choo, I cho Kɔɔki ke fondaŋndo le ma kumbu ndu o lɛŋnde Isɔluɛi leŋ niŋ, o kpoloŋ waŋnda keeku le kɔlaŋ o pee mɛŋma ihɛllo ba paaleŋ le chaŋ ndo wo. Nduyɛ fondaŋndo hoo cho nɛiyo kinda le wanaa keeku loŋ nda. Loŋ nda cho Kɔɔki a faŋga bɛndu cho ndu kɔɔli wo kpou kumbɔɔ ni, nduyɛ ma ke fondaŋ koŋ diolaŋ aa, Kpoloŋ Hamɔŋ-Kɔɔki Wo.*
12 Waŋnda Isɔluɛi cho chua paŋgoŋ ŋɔmmɛu le nda kumbɔɔ, le halikpeŋ ma dindi lɛŋndeŋ.
13 Waŋnda o lɛŋndeŋ niŋ kpou cho wallo tosa kalaŋ le nda kumbɔɔ. Nduyɛ, hei cho tosa ma fula tɔɔ o paale ya cho fula tɔɔ leŋ choo.’ Ya Chɛhowa, Mɛlɛka Kpuluŋguma Bɛndoo dimi lende ni.
14 “‘A cho puaa pum hɛli le ma balu o lɛŋndeŋ niŋ silɔ, le dialuŋ vilɛi cho lo woŋ kumbɔɔ, le halikpeŋ ma dindi lɛŋndeŋ. A cho hiouwɔɔ lachi a nuuviaa le paŋgoŋ ŋɔmmɛu.
15 Te wanaa nda hɛli wa lo pɛ balɔɔ o lɛŋndeŋ niŋ ma che paa wanachioo, a handu tamasioo ikɛi. Okoŋ wanaa nda hɛli le kumbɔɔ wa chua paa koŋ a kumbu ndu o Kpoloŋndo niŋ Hamɔŋ-Kɔɔki.
16 Chiee bɛndu cheleŋ cho wa vɛlɛ diolaŋ Hamɔɔna,* nda bɛɛ cho lɛŋndeŋ dindi.’
17 “Kɛ num po wanachioo, nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘Dimul youwaa suu o suu a visiaa yonduaa kpou aa, “La chuuŋgiaŋ naapilɛ mi la hiŋ. Nya kpou la huŋ balu sala ni ya bɛɛndiaa le nya wo, sala bɛndu ya bɛɛndiaa o pembuŋ bɛndoŋ Isɔluɛi choo wo. La cho dialuŋ waŋnda chieeya dio, nduyɛ mi la kol kooma ndaŋ.
18 La cho dialuŋ vilɛi wanaa kpaayaa bɛnduaa dio, nduyɛ mi la kol kooma wanaa cho yuŋgulaŋ bolle o lɛŋndeŋ choo wa. Nda cho yɛ saa konduaa, saa fɔŋnduaa, chuiŋnda, a nauwa ni. Nda kpou, chɔluaa chelulɛiya Baasiaŋ nda cho ni.
19 La cho chuɛiyaŋ a koowaŋ kolɔɔ o sala ya bɛɛndiaa le nya wo haaa mi la kpɛi.”’
20 “‘O tibii* nuu choo, la cho suaa, puaa kua a nyɛm nyaanaŋ suaa naŋndoŋ nda, puaa chɔuwaa kpaayaa bɛnduaa, a kuubaa chɔuwaa suu o suu dio mi la pim cha.’ Ya Chɛhowa, Mɛlɛka Kpuluŋguma Bɛndoo dimi lende ni.
21 “‘I cho waŋnda o lɛŋnde niŋ tɔɔmayɛi nii chɔm, okoŋ mi nda kpou che yamɛi ya cho kiolɔɔ ve, vɛlɛ a kpaaya* ni bɛndu ya cho chɔm nda tɛɛŋ ndo.
22 Chɔŋ a paale leŋ mbo kuɛ kɛ, waŋnda Isɔluɛi cho sina maa ya cho Chɛhowa Mɛlɛka ndaa ni.
23 Okoŋ waŋnda o lɛŋnde niŋ cho sina maa mi waŋnda Isɔluɛi kua o chɛleŋ niŋ, le mɛɛ nda tosa hakioo ma kɛɛ waa sakpo a ya yɛ. Le hei mi viŋ nda hɔlla, nduyɛ mi mal nda yaamɔɔwaa ndaa o ba ma diu nda kpou a muɛi faŋnde.
24 Mi bii nda a mɛɛ kaa nda nɔɔlɛiyo vɛlɛ a hakila ndalaŋ la wa yɛ. Nduyɛ, mi viŋ nda hɔlaa niaa.’
25 “Lelaŋ nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘I cho wanaa nda kuɛ o biyɔɔ niŋ o yuŋgu Chekɔpu wo choo wa miŋgi o nda lo, nduyɛ mi tuiinuŋ waŋnda Isɔluɛi kpou inyiɛɛ. I cho diola nila diandaalaŋ manda a yoomuma niaŋ kpou.
26 Te a tɛɛmbuu nda pɛ labɛɛ le mɛɛ nda kɛɛ waa sakpo a ya yɛ, I cho tosa ma waŋnuŋ hɛnɛkɛ o lɛŋnde ndaleŋ niŋ, wana o wana luei nda niŋ isiooŋ te.
27 Te I soli nda pɛ naa nda kuɛ o lɛŋii yaamɔɔwaa ndaa niŋnde, mi chuuŋgiaa nda naapilɛ, okoŋ mi miŋgi nda o nda lo, I cho vɛlɛ waŋnda o lɛŋii bɔɔbɔɔ niŋ chɔm maa Mɛlɛka diandaa ya cho nda tɛɛŋ ni.’
28 “‘Te I kuɛ pɛ a nda o chɛleŋ niŋ kaalaŋ tɛɛŋ nduyɛ mi chuuŋgiaa nda naapilɛ, mi miŋgi nda pila o lɛŋnde ndaleŋ niŋ wana o wana lo kɔɔli le, a cho sina maa ya cho Chɛhowa Mɛlɛka ndaa ni.
29 I cho lɛ waŋnda Isɔluɛi hɔlaa niaa viŋ te, kanifuule nyina nuu cho nda wa choo.’ Ya Chɛhowa, Mɛlɛka Kpuluŋguma Bɛndoo dimi lende ni.”
Tɛɛsiaalaŋ
^ Boolaŋ ndaŋ, wanaa wuu chiŋuaŋ nda soliŋ ndaŋ kpeku ni.
^ Ɔɔ “Kpoloŋ Wanaa Kɔɔki Wa.”
^ O sim, “Faŋgaa.”
^ Ɔɔ “tabali.”
^ Hibuluiye, “ba.”
