Isikiɛɛ 40:1-49
40 O wɔsi 25 naŋ wa o chɛleŋ niŋndo kandɔŋndo, malɔ tɔ o paŋgii tasei niŋ, mi nyina Chɛhowa wo tual la choo mbo kua a ya Chulusalɛm. Nduyɛ Chulusalɛm ndoo chii niŋ wɔsilaŋ 14 chɔŋ a teleŋ o sɔla tambei yo.
2 Mi Mɛlɛka chua ya o yilaŋnde niŋ mbo kua a ya o lɛŋndeŋ Isɔluɛi leŋ niŋ, mbo kɔ tusi ya o pembii vilɛi vilɛiye choo. Mi cha nyɔɔ o tuuliaa o pembii keŋ ba tou wo maa chiee bɛndu.
3 Mɛɛ o kuɛ a ya loŋ, mi cha poo isisi a kɔɔle chiliŋii siaŋɛi.* Yooleŋ a yɔm tuwaa* wa ndu o ba, nduyɛ o wa isisi o dio kpakioo hɔlndɔ.
4 Mbo dimul la aa: “Po wanachioo, nua chiŋ nduyɛ ma yaŋ nilaŋ yekeŋ. Handu kɔllo o nyɛ o nyɛ ya cho num wa chɔmndo wo choo, kanifuule le sabu koŋ ya hiŋ a num nanuŋ ni. Nyɛ o nyɛ ŋ che pɛ, dimul waŋnda Isɔluɛi a ndu okɔɔ.”
5 Mi cha kpakioo o balaa silɔ o chiɛi Mɛlɛkaa. Yɔm tuwaa wa poo o ba bandei nɛiyo le ŋɔmahiɔɔlu (nɛi kɛ kɛ, ma chɔɔlu toŋgu baa le pilɛ).* Mbo kandu kpakioo tuuwo, nduyɛ chelul kpakioo hoo wa nɛiyo le ŋɔmahiɔɔlu, helɔɔ ndɔɔ nɛiyo le ŋɔmahiɔɔlu.
6 Okoŋ mbo kua o dio kpakioo ba paaleŋ le chaŋ ndo, mbo hel o biŋnda ndɔlaŋ choo. Mɛɛ o tuu dio kpakioo hoo lebɛŋgu, toŋgii nduɛi wa nɛiyo le ŋɔmahiɔɔlu. Okoŋ mbo tuu dio kpakioo o pilɔɔ lebɛŋgu, ndu bɛɛ toŋgii nduɛi wa nɛiyo le ŋɔmahiɔɔlu.
7 Lumui wana mɛŋgɛlaa kɛ kɛ wa bandei nɛiyo le ŋɔmahiɔɔlu, a toŋgei nɛiyo le ŋɔmahiɔɔlu. Nduyɛ fondaŋ wa lumuilaŋ ndaŋ o kɛ kɛ tɛɛŋ ndo wa nɛiyo le ŋɔmmɛu a tɛndaa tɛɛŋ. Dio wa o toŋgo pɔmbɔɔ ikɛi le luɛiyɔɔ o chiɛi Mɛlɛkaa niŋndo, mɛɛ o tuu ndu lebɛŋgu, o wa nɛiyo le ŋɔmahiɔɔlu.
8 Mbo tuu toŋgo pɔmbɔ wa o dio le luɛiyɔɔ o chiɛi Mɛlɛkaa wo, nduyɛ o wa nɛiyo le ŋɔmahiɔɔlu.
9 Okoŋ mbo tuu toŋgo pɔmbɔ dio kpakioo, o wa nɛiyo 12. Mbo tuu suŋgbuma nduaŋ, ma wa nɛiyo le yaa. Nduyɛ, mi toŋgo pɔmbɔ wa dio kpakioo ikɛiyo muli hɔlla leniŋ.
10 Lumuila wanaa mɛŋgɛlaa la wa la yaa o kpeŋgii kɛ kɛ o dio kpakioo ba paaleŋ le chaŋ ndo. Lumuila yaalaŋ ndaŋ kpou la wa kpeŋ kpeŋ, nduyɛ suŋgbuma wa o kpeŋgoŋ ndaŋ bɛɛ nyɛpilɔɔ kpe ma wa ni.
11 Okoŋ mbo tuu fondaŋ wa le luɛiyɔɔ o dio kpakioo wo, toŋgii nduɛi wa nɛiyo 15, nduyɛ bandii dio kpakioo wa nɛiyo 19 a tɛndaa tɛɛŋ.
12 Fondaŋ wa lumuila wanaa mɛŋgɛlaa lachi o kpeŋgii kɛ kɛ choo wo wa nɛiyo le pilɛ a tɛndaa tɛɛŋ. Lumuila wanaa mɛŋgɛlaa wa o kpeŋgoŋ vellaa velle laŋ, o kɛ kɛ wa nɛiyo le ŋɔmahiɔɔlu.
13 Okoŋ mbo tuu dio kpakioo chɔŋ o yindɔ lumui wana mɛŋgɛlaa* o pilɛ, mbo kua o lumui wana mɛŋgɛlaa o pilɔɔ. Nduyɛ o wa toŋgei nɛiyo 37 a tɛndaa tɛɛŋ. Mi diola wa le luɛiyɔɔ o lumuilaŋ ndaŋ ndo, la mululaŋ hɔlla vellaa velle.
14 Okoŋ, mbo tuu suŋgbuma wa o kpeŋgoŋ ndaŋ, a suŋgbuma wa o diola kpakilaŋ o luŋ chiɛi Mɛlɛkaa balɔɔ laŋ kpou. Nduyɛ ma wa bandei nɛiyo 90.
15 Chɔŋ o dio kpakioo sondoo, mbo kɔ bii o toŋgo pɔmbɔ cho leniŋ o dio kpakioo ikɛiyo hɔlndɔ, o wa bandei nɛiyo 75.
16 Wundɛila* sɔɔkɛnyɛɛ laŋ la wa o lumuila wanaa mɛŋgɛlaa, a o suŋgbuma wa o dio kpakioo leniŋ o kpeŋgoŋ vellaa velle waŋ. Toŋgola pɔmbɔla wa leniŋ ndaŋ bɛɛ laa nɔ wundɛilaŋ o kpeŋgoŋ vellaa velle. Nduyɛ, wauwaŋ ma wa ma tuuliaa o suŋgbuma maŋ ikɛi.
17 Okoŋ mbo kua a ya o luŋ wa o bɛɛ wo. Nduyɛ mi cha fondaŋnda* diaa nyɛdiaa laŋ a fondaŋ nda tɛlɛka luŋndo balɔɔ silɔ wo. Lumuila diaa nyɛdiaa laŋ 30 la wa o fondaŋ nda tɛlɛka koŋ ndo ni.
18 Fonda nda tɛlɛka o diola kpakilaŋ ikɛiyo, bandii nduɛi wa nyɛ pilɛ kpe a diola kpakilaŋ. Tɛlɛkaa hoo ndoo hiou tolɔɔ.
19 Okoŋ mbo tuu toŋgii luŋ wa o bɛɛ wo, chɔŋ o dio kpaki wa lebɛŋgu wo kɔ o luŋ wa leniŋ ndo. O wa nɛiyo 150 ba paaleŋ le chaŋ ndo a ba luaŋ ndo.
20 Luŋ wa o bɛɛ wo ndoo nɔ kpakioo mbo muli hɔlla ba luaŋ ndo, nduyɛ mbo tuu bandii nduɛi a toŋgii nduɛi.
21 Lumuila wanaa mɛŋgɛlaa la yaa la wa ni o kpeŋgii kɛ kɛ choo. Suŋgbuma ndɔma wa o kpeŋgoŋ ndaŋ a maŋ o toŋgo pɔmbɔɔ, tuu pilɔɔ kpe nda tuu maŋ ni a ma wa o kpaki tasoo waŋ. Luŋndo hoo wa bandei nɛiyo 75 a toŋgei nɛiyo 37 a tɛndaa tɛɛŋ.
22 Wundɛila ndɔlaŋ, toŋgo ndɔ pɔmbɔɔ, a wauma ndɔma nda tuuliaa waŋ, nyɛpilɔɔ kpe la wa ni a la wa o dio kpakioo ba paaleŋ le chaŋ ndo laŋ. Le mi waŋnda ndaa fuuluu loŋ, mɛɛ mi ndaa hel biŋndaŋ la ŋɔmmɛu. Nduyɛ, toŋgo pɔmbɔɔ wa laŋ lachi.
23 Dio kpakioo wa o luŋndo leniŋ, mbo mulul dio kpaki wa ba luaŋ ndo wo a o wa ba paaleŋ le chaŋ ndo wo hɔlla. Mbo tuu tiŋ wa diola kpakilaŋ tɛɛŋ ndo, nduyɛ o wa nɛiyo 150.
24 Okoŋ kɔɔli, mbo kua a ya kpeŋgii ba tou ve, nduyɛ mi cha dio kpaki wa loŋ ndo. Mbo tuu suŋgbuma wa o toŋgo pɔmbɔɔ kpeŋgoŋ ndaŋ, nduyɛ nyɛpilɛ kpe ma wa ni a ma tuaŋ.
25 Wundɛilaŋ la wa o kpeŋguŋ ndɔŋ a o kpeŋguŋ toŋgo ndɔ pɔmbɔɔ mɛɛ la tɔlaŋ la wa yɛ. La wa bandei nɛiyo 75, a toŋgei nɛiyo 37 a tɛndaa tɛɛŋ.
26 Biŋndaŋ la wa la ŋɔmmɛu le luɛiyɔɔ leniŋ, nduyɛ toŋgo pɔmbɔɔ wa laŋ lachi. Wauwaŋ ma wa ma tuuliaa o kpeŋgii kɛ kɛ o suŋgbuaŋ maŋ choo.
27 Luŋ wa leniŋ ndo ndoo nɔ dio kpakioo ba tou wo. Mbo tuu tiŋ wa diola kpakila wa ba tou wo laŋ tɛɛŋ. Nduyɛ bandii nduɛi wa nɛiyo 150.
28 Okoŋ kɔɔli, mbo kei a ya o dio kpakioo ba tou wo mbo kua a ya o luŋndo leniŋ. Mɛɛ o tuu dio kpakioo ba tou wo, nyɛpilɔɔ kpe o wa ni a la tɔlaŋ.
29 Lumuila ndɔla wanaa mɛŋgɛlaa ni, suŋgbuma ndɔma wa o kpeŋgoŋ ndaŋ ni, a toŋgu ndɔɔ, nyɛpilɔɔ kpe la wa ni a la tɔlaŋ. Wundɛilaŋ la wa o kpeŋguŋ ndɔŋ a o kpeŋguŋ toŋgo ndɔ pɔmbɔɔ. La wa bandei nɛiyo 75 a toŋgei nɛiyo 37 a tɛndaa tɛɛŋ.
30 Toŋgola pɔmbɔlaŋ la wa la balaa silɔ, la wa bandei nɛiyo 37 a tɛndaa tɛɛŋ, a toŋgei nɛiyo 7 a tɛndaa tɛɛŋ.
31 Mi toŋgo ndɔɔ muli hɔlla o luŋ wa o bɛɛ wo. Wauwaŋ ma wa ma tuuliaa o suŋgbuma nduaŋ choo, nduyɛ biŋndaŋ la wa la ŋɔmmɛu le helɔɔ loŋ.
32 Mɛɛ o keeku a ya ba paaleŋ le chaŋ ndo mbo luɛi a ya o luŋ wa leniŋ ndo, mbo tuu dio kpaki wa loŋ ndo, nduyɛ nyɛpilɔɔ kpe o wa ni a la tɔlaŋ.
33 Lumuila ndɔla wanaa mɛŋgɛlaa ni, suŋgbuma ndɔma wa o kpeŋgoŋ ndaŋ ni, a toŋgo ndɔɔ, nyɛpilɔɔ kpe la wa ni a la tɔlaŋ. Wundɛilaŋ la wa o kpeŋguŋ ndɔŋ, a o kpeŋguŋ toŋgo ndɔ pɔmbɔɔ, la wa bandei nɛiyo 75 a toŋgei nɛiyo 37 a tɛndaa tɛɛŋ.
34 Mi toŋgo ndɔɔ muli hɔlla kpeŋgii luŋ wa o bɛɛ wo. Wauwaŋ ma wa ma tuuliaa o suŋgbuma nduaŋ choo vellaa velle, nduyɛ biŋndaŋ la wa la ŋɔmaa le helɔɔ loŋ.
35 Okoŋ mbo kua a ya o dio kpaki wa ba luaŋ ndo wo, mbo tuu ndu. Nduyɛ, nyɛpilɔɔ kpe o wa ni a la tɔlaŋ.
36 Lumuila ndɔla wanaa mɛŋgɛlaa ni, suŋgbuma ndɔma wa o kpeŋgoŋ ndaŋ ni, a toŋgo ndɔɔ, nyɛpilɔɔ kpe la wa ni a la tɔlaŋ. Ndoo nɔ wundɛilaŋ o kpeŋgii kɛ kɛ choo. La wa bandei nɛiyo 75, a toŋgei nɛiyo 37 a tɛndaa tɛɛŋ.
37 Mi suŋgbuma nduaŋ ma mulul luŋ wa o bɛɛ wo hɔlla, wauwaŋ ma wa ma tuuliaa o suŋgbuma nduaŋ choo vellaa velle, nduyɛ biŋndaŋ la wa la ŋɔmaa le helɔɔ loŋ.
38 Fondaŋ diaa nyɛdiaa, a naa wana keeku le luɛiyɔɔ loŋ nda wa o suŋgbuma wa o diola kpakilaŋ kpeŋgoŋ ndaŋ. Loŋ ndaa tuaa salala luamaala kpulukuulaŋ ni.
39 Tibiilaŋ* la tiɔɔŋ la wa o toŋgo pɔmbɔ dio kpakioo o kpeŋgii kɛ kɛ choo. Loŋ ndaa dii chɔluaa le sala luamaala kpulukuulaŋ ni, sala hakioo, a le sala yɔŋ wɔɔŋndo.
40 Tibiilaŋ la tiɔɔŋ la wa o bɛɛ le luɛiyɔɔ o dio kpaki wa ba luaŋ ndo wo sondoo. Nduyɛ tibiilaŋ la tiɔɔŋ la wa leniŋ o toŋgo pɔmbɔ dio kpakioo.
41 Tibiilaŋ la wa la hiɔɔlu o kpeŋgii kɛ kɛ o dio kpakioo. Kpou kpou, tibiilaŋ la ŋɔmaa. Lechoo ndaa dii chɔluaa ni le salalaŋ solioo.
42 Tibiila hiɔɔlula ndaa dii chɔluaa lechoo le sala luamaa kpulukuu wo laŋ, a pouta sialaa laŋ nda toosiaa laŋ ni. Nduyɛ la wa bandei nɛiyo le diiŋ a nyɛɛmbɔ, toŋgei nɛiyo le diiŋ a nyɛɛmbɔ, helɔɔ nɛiyo le pilɛ a tɛndaa tɛɛŋ. O tibiilaŋ ndaŋ choo ndaa kɛsi nyɔɔŋ ni le chɔluaa diyɔɔ le salala luamaa laŋ, a le salala cheleŋndaŋ solioo.
43 Fondaŋnda nda kɛsi nyɔɔŋ ndaŋ la wa la holiaa o chiɛiyo balɔɔ silɔ leniŋ. Nduyɛ nyɛlaŋ ndaŋ o kɛ kɛ, toŋgii nduɛi wa le toŋgu baa kinɛi. O tibiilaŋ choo ndaa kɛsi visiŋ ndaa soli salalaŋ ndoŋ ni.
44 Fondaŋnda diaa nyɛdiaa laŋ la wa o dio kpaki wa o bɛɛ wo ikɛi le wanaa ŋchonduaa. La wa o luŋndo niŋ o dio kpaki cho ba luaŋ ndo wo ikɛi mi la muli hɔlla ba tou wo. Fonda diaa nyɛdiaa cheleŋ wa o dio kpakioo ba paaleŋ le chaŋ ndo ikɛi, mbo muli hɔlla ba luaŋ ndo.
45 Mbo dimul la aa: “Fondaŋ diaa nyɛdiaa muli hoo hɔlla ba tou wo wo, le wanaa soliaa lasalaa nɔ dioo le wallo tosaa o chiɛi Mɛlɛkaa niŋnda o cho ni.
46 Fondaŋ diaa nyɛdiaa muli hɔlla ba luaŋ ndo wo, le wanaa soliaa lasalaa nɔ dioo le wallo tosaa o bandu luamaa lasalaa wa o cho ni. Nda cho yɛ puaa Sadɔki wa ni, fulaa o yuŋgu Livaiyo choo. Nda nda hɛli ni le ma sim Chɛhowa lachi ma tosal ndu wallo.”
47 Okoŋ mbo tuu luŋ wa leniŋ ndo. Kpeŋguŋ hiɔɔloŋ kpou, o wa bandei nɛiyo 150 a toŋgei nɛiyo 150. Bandu luamaa lasalaa wa chiɛi Mɛlɛkaa lachi.
48 Okoŋ mbo kua a ya o toŋgo pɔmbɔ chiɛi Mɛlɛkaa, mbo tuu suŋgbuma wa o toŋgo pɔmbɔɔ waŋ. Le pilɛ wa bandei nɛiyo le ŋɔmmɛu a tɛndaa tɛɛŋ, le pilɛ leŋ nɛiyo le ŋɔmmɛu a tɛndaa tɛɛŋ. Toŋgii dio kpakioo kpeŋgei i pilɛ wa nɛiyo le hiɔɔlu a tɛndaa tɛɛŋ, kpeŋgei i pilɛi nɛiyo le hiɔɔlu a tɛndaa tɛɛŋ.
49 Bandii toŋgo pɔmbɔɔ wa nɛiyo 30, toŋgei nɛiyo 16 a tɛndaa tɛɛŋ. O Biŋndaŋ choo waŋnda ndaa kei ni le helɔɔ loŋ. Suŋgbuaŋ ma wa o daŋgaltaŋ vellaa velle.
Tɛɛsiaalaŋ
^ Ɔɔ “kapaa.”
^ Tofa Tɛɛsiaa B14.
^ Tofa Tɛɛsiaa B14.
^ Naapum o sim le fondaŋ wana mɛŋgɛlaa chal choo choo wo.
^ Ɔɔ “Finɛtelela.”
^ Ɔɔ “lumuila.”
^ Ɔɔ “Tabalilaŋ.”
