Isikiɛɛ 41:1-26
41 Okoŋ, mbo kua a ya o fondaŋ diandaa o chiɛi Mɛlɛkaa, mbo tuu suŋgbuma wa o kpeŋgoŋ ndaŋ. Kpeŋgei hei ma wa toŋgei nɛiyo le ŋɔmahiɔɔlu,* kpeŋgei i pilɛi ma wa toŋgei nɛiyo le ŋɔmahiɔɔlu.
2 Fondaŋ wa le luɛiyɔɔ wo wa toŋgei nɛiyo 15, suŋgbuma wa o kpeŋgoŋ vellaa velle le luɛiyɔɔ waŋ, le kɛ kɛ wa nɛiyo le ŋɔmmɛu a tɛndaa tɛɛŋ. Mɛɛ o tuu bandii nduɛi, i wa nɛiyo 60, nduyɛ toŋgii nduɛi wa nɛiyo 30.
3 Okoŋ mbo luɛi,* mbo tuu suŋgbule wa o dio le luɛiyɔɔ leŋ. Bu ndɔɔ wa nɛiyo le yaa, fonda wa le luɛiyɔɔ wo wa toŋgei nɛiyo le ŋɔmahiɔɔlu. Suŋgbuma wa o kpeŋgoŋ le luɛiyɔɔ vellaa velle waŋ ma* wa nɛiyo tɔ a tɛndaa tɛɛŋ.
4 Okoŋ kɔɔli, mbo tuu lumui mulul fondaŋ diandaa hɔlla wo. O wa bandei nɛiyo 30, toŋgei nɛiyo 30. Mbo dimul la aa: “Fondaŋ Hiou Diondɔɔ Wo cho hoo ni.”
5 Okoŋ mbo tuu chiyii chiɛi Mɛlɛkaa. Bu ndɔɔ wa nɛiyo le ŋɔmahiɔɔlu. Lumuila wa o chiɛi Mɛlɛkaa holnɔŋndo laŋ, la wa toŋgei nɛiyo le ŋɔmpum.
6 O chiɛi choo choo nɔ helɔɔ le yaa wo lumuilaŋ ndaŋ la wa ni. Nduyɛ helɔɔ kɛ kɛ ndoo nɔ lumuilaŋ 30. Ma balu nyɛlaŋ chɔuwɔɔ chɛ chɛ o chiyii chiɛi Mɛlɛkaa, le lumuilaŋ ndaŋ saa kpiŋ, le halikpeŋ nyɛlaŋ ndaŋ la luei o chiyii chiɛi Mɛlɛkaa niŋ te.
7 Fondaa wa o kpeŋguŋ chiɛi Mɛlɛkaa le keilaŋ.* Nduyɛ mɛɛ ŋ hel fau le kɔlaŋ o lumuila cho choo choo laŋ, lende o kua a kumbiŋndo ni. Te waŋndo wa pɛ helɔɔ o chiɛiyo hoo, lumuilaŋ o helɔɔ diiŋ ndɔɔ la hiau toŋgu a o helɔɔ tasoo. Nduyɛ laŋ o helɔɔ yaa ndɔɔ la hiau toŋgu a o helɔɔ diiŋ ndɔɔ.
8 Mi cha nyɔɔ maa biŋ o chiɛi Mɛlɛkaa balɔɔ silɔ. Nduyɛ chiyuŋ nda taŋgul lumuilaŋ lechoo woŋ, ŋ wa bandei nɛiyo le ŋɔmahiɔɔlu chɔŋ o sɔŋgioo hoo mbo kuɛ o sɔŋgioo o pilɔɔ.
9 Lumuilaŋ ndaŋ, chiyii nduɛi o bɛɛ wa toŋgei nɛiyo le ŋɔmmɛu a tɛndaa tɛɛŋ. Fondaa wa o kumbiaa nyɛɛmbɔ lumuilaŋ ndaŋ tɛɛŋ a chiɛi Mɛlɛkaa.*
10 Fondaa wa chiɛi Mɛlɛkaa tɛɛŋ a fondaŋnda diaa nyɛdiaa laŋ.* Kumbiŋ ndɔɔ wa nɛiyo 30 o kpeŋgii kɛ kɛ.
11 Nɛiyo wa le keilaŋ o lumuilaŋ tɛɛŋ a fondaŋ cho ba luaŋ ndo wo, nduyɛ nɛi cheleŋ wa le keilaŋ ba tou wo. Fondaŋndo hoo balɔɔ silɔ, kumbiŋ ndɔɔ wa le nɛiyo le ŋɔmmɛu a tɛndaa tɛɛŋ.
12 Chiɛi wa ba paaleŋ le del lo mbo muli hɔlla o fondaŋ wakpaa wo, toŋgii nduɛi wa nɛiyo 105, nduyɛ bandii nduɛi wa nɛiyo 135. Chiyii balu chiɛiyo hoo ve kpou, bu ndɔɔ wa nɛiyo le ŋɔmmɛu a tɛndaa tɛɛŋ.
13 Mbo tuu chiɛi Mɛlɛkaa, nduyɛ o wa bandei nɛiyo 150. Fondaŋ wakpaa, chiɛiyo,* a chiiyuŋ ndɔŋ bɛɛ wa bandei nɛiyo 150.
14 Luŋ cho chiɛi Mɛlɛkaa lachi ba paaleŋ le chaŋ ndo wo, vɛlɛ a fondaŋ wakpaa, toŋgii nduɛi wa nɛiyo 150.
15 Mbo tuu bandii chiɛi ndoo mulul fondaŋ wakpaa hɔlla wo amakɔɔ, latulu a fondaŋnda hiauwaala wa o kpeŋgoŋ vellaa velle laŋ. Nduyɛ o wa bandei nɛiyo 150.
Mbo tuu vɛlɛ fondaŋ diandaa, fondaŋ hiou diondɔɔ wo, vɛlɛ a toŋgola pɔmbɔla wa o luŋndo laŋ.
16 Okoŋ kɔɔli, mbo tuu vɛlɛ diolaŋ lebɛŋgu, wundɛila sɔɔkɛnyɛɛ laŋ, vɛlɛ a nɛila wa le keilaŋ o fondaŋnda yaa laŋ ndaŋ ndo. Pɛŋgɔŋ wa ŋ holi holiaa o chiɛiyo chɔŋ lɛŋ o dioo bɛŋgu haaa hel o wundɛilaŋ. Nduyɛ wundɛilaŋ la wa la kiindiaa.
17 Mbo tuu dio wa le luɛiyɔɔ wo, chiɛi Mɛlɛkaa leniŋ a o bɛɛ, vɛlɛ a chiɛiyo balɔɔ silɔ.
18 Chɛlɔbiiya a wauwaŋ ma wa ma tuuliaa lechoo, nduyɛ wau kɛ kɛ wa chɛlɔbiiya a ŋiɔɔŋ tɛɛŋ. Chɛlɔbiinɔ kɛ kɛ ndoo nɔ hɔlla sala tiɔɔŋ.
19 Hɔlaa wanachioo wa a muliaa kpeŋgei i pilɛ o wauwo, mi hɔlaa kpɔkuŋndo* wa a muliaa kpeŋgei i pilɛi o wauwo. Lende nda wa a tuuliaa o chiɛi Mɛlɛkaa balɔɔ silɔ ni.
20 Chɔŋ lɛŋ o dio wana keeku le luɛiyɔɔ wo haaa o dioo choo, chɛlɔbiiya a wauwaŋ ma wa ma tuuliaa o chiɛi Mɛlɛkaa balɔɔ silɔ.
21 Keedeŋ* diola wa le luɛiyɔɔ o fondaŋ diandaa woŋ, bandei ni, kumbiŋndo ni, nyɛ pilɛ kpe la wa ni. Nyɔɔ wa o fondaŋ diandaa* lachi naŋ chaa
22 bandu luamaa lasalaa nda toosiaa a yɔmnde wo ni. O wa helɔɔ nɛiyo le hiɔɔlu a tɛndaa tɛɛŋ, bandei nɛiyo le yaa. Ndoo nɔ keedoŋ o kpeŋgoŋ. Nduyɛ kpeŋgoŋ muŋ a nyɛ nda kɛsi muŋ lechoo woŋ, a yɔmndo ndaa toosiaa ndu ni. Okoŋ mbo dimul la aa: “Tibii* cho Chɛhowa lachi wo cho hoo ni.”
23 Fondaŋ diandaa vɛlɛ a fondaŋ hiou diondɔɔ wo, o kɛ kɛ ndoo nɔ diolaŋ la tiɔɔŋ.
24 Diolaŋ ndaŋ, o kɛ kɛ ndoo nɔ koŋndaŋ la tiɔɔŋ.
25 Chɛlɔbiiya a wauwaŋ ma wa ma tuuliaa o diolaŋ le luɛiyɔɔ o fondaŋ hiou diondɔɔ wo mɛɛ la wa la tuuliaa o chiɛiyo yɛ. Fɛɛfɛ iyɔmndo wa vɛlɛ o toŋgo pɔmbɔ wa o bɛɛ wo choo.
26 Toŋgo pɔmbɔɔ hoo ndoo nɔ wundɛila sɔɔkɛnyɛɛ laŋ a wauwaŋ ma tuuliaa o kpeŋguŋ ndɔŋ vellaa velle. Nduyɛ nyɔɔŋ muŋ wa vɛlɛ ŋ tuuliaa o kpeŋguŋ lumuila chiɛi Mɛlɛkaa a o fɛɛfɛla iyɔm ndaŋ.
Tɛɛsiaalaŋ
^ Tofa Tɛɛsiaa B14.
^ Koŋ cho ni, o chiɛi Mɛlɛkaa niŋ, ɔɔ Fondaŋ Hiou Diondɔɔ Wo.
^ Hibuluiye, “Toŋgei le luɛiyɔɔ.”
^ Naapum biŋnda tiu tiu laŋ.
^ Naapum nɛi sɔɔkɛnyɛɛ wo le keilaŋ o chiɛi Mɛlɛkaa.
^ Ɔɔ “lumuilaŋ.”
^ Koŋ cho ni, chiɛi wa ba paaleŋ le del lo o chiɛi Mɛlɛkaa wo.
^ Ɔɔ “yalakanaa.”
^ Hibuluiye, “Keedei.” Naapum keedei le luɛiyɔɔ o fondaŋ Diandaa.
^ Naapum o sim le Fondaŋ Hiou Diondɔɔ Wo.
^ Ɔɔ “Tabali.”
