Isikiɛɛ 42:1-20
42 Okoŋ, mbo kua a ya o luŋ wa kpeŋgii ba luaŋ ndo wo. Nduyɛ, mbo luei ya naa fondaŋ diaa nyɛdiaa wa o fondaŋ wakpaa ikɛi naa nda chɔɔlu chiɛiyo ba luaŋ ndo wa.
2 Luŋndo hoo ba luaŋ ndo, bandii nduɛi wa nɛiyo 150,* toŋgii nduɛi nɛiyo 75.
3 Luŋndo hoo wa luŋ cho leniŋ ndo tɛɛŋ a luŋ nda tɛlɛkiaa o bɛɛ wo. Nduyɛ luŋ wa leniŋ ndo, toŋgii nduɛi wa nɛiyo 30, mi fondaŋnda waŋnda kei laŋ la mululaŋ hɔlla vellaa velle, nduyɛ la wa helɔɔ le yaa.
4 Naa keiyaa wa leniŋ fondaŋnda* diaa nyɛdiaa laŋ lachi. Toŋgii nduɛi wa nɛiyo 15, bandii nduɛi wa nɛiyo 150. Nduyɛ ba luaŋ ndo diola wanaa keeku le luɛiyɔɔ o lumuilaŋ ndaŋ niŋndo la wa ni.
5 Lumuila diaa nyɛdiaala wa o helɔɔ yaa ndɔɔ laŋ laa hiou dɔɔnaŋ a la wa o helɔɔ diiŋ ndɔɔ a o helɔɔ tasoo laŋ. Kanifuule mi fondaŋnda wa le hiouwɔɔ o kpeŋgoŋ ndaŋ la chua fondaa tau.
6 O chiɛi choo choo nɔ helɔɔ le yaa wo lumuilaŋ ndaŋ la wa ni, kɛ laa nɔ masuŋgbu mɛɛ luŋndaŋ laa nɔ suŋgbuaŋ yɛ le. Lelaŋ laa kumbiŋ maa laŋ o helɔɔ diiŋ ndɔɔ a o helɔɔ tasoo le.
7 Kpaki lapouwo wa fondaŋnda diaa nyɛdiaa laŋ ikɛi kpɛɛluŋ a luŋ wa o bɛɛ wo, mbo mulul fondaŋnda diaa nyɛdiaala cheleŋ hɔlla. Nduyɛ, o wa bandei nɛiyo 75.
8 Lumuila diaa nyɛdiaala wa luŋ wa o bɛɛ wo ikɛi laŋ, la wa bandei nɛiyo 75, kɛ la mulul chiɛi Mɛlɛkaa hɔlla laŋ, la wa bandei nɛiyo 150.
9 Nɛiyo wa fulaa o luŋ wa o bɛɛ wo ba paaleŋ le chaŋ ndo le luɛiyɔɔ o lumuila diaa nyɛdiaa laŋ niŋ.
10 Lumuila diaa nyɛdiaala cheleŋ la wa o kpaki lapouwo kɔɔli, o luŋ wa ba paaleŋ le chaŋ ndo wo. Nduyɛ la wa fonda wakpaa a chiɛi wa ba paaleŋ le del lo wo ikɛi.
11 Naa hiauwaa wa lumuila diaa nyɛdiaa laŋ ndaŋ lachi maa la wa ba luŋndo laŋ. Bandii pilɛi a toŋgii pilɛi la wa ni. Nyɛ pilɛ kpe la wa ni, nduyɛ naa fulaa o pilɛ kpe laa nɔ ni. Diola wa le luɛiyɔɔ o fondaŋnda diaa nyɛdiaala wa ba luaŋ ndo laŋ,
12 nyɛ pilɛ kpe la wa ni a la wa le luɛiyɔɔ o fondaŋnda diaa nyɛdiaa laŋ ba tou wo laŋ. Dioo wa le luɛiyɔɔ o fondaŋ waŋnda keiyo. Nduyɛ o kpaki lapouwo ikɛi ba paaleŋ le chaŋ ndo o wa ni. Loŋ waŋnda ndaa kei ni le luɛiyɔɔ.
13 Okoŋ mbo dimul la aa: “Fondaŋnda diaa nyɛdiaa laŋ ba luaŋ ndo a laŋ ba tou wo, fondaŋnda diandaa laŋ la cho, nduyɛ loŋ wanaa soliaa lasalaa tosa wallo Chɛhowa lachi wa dia salala hiou diondɔɔ laŋ ni. Loŋ koni nda kɛsi salala hiou diondɔɔ laŋ ni, sala ŋkullo, sala hakioo, a sala yɔŋ wɔɔŋndo, kanifuule fondaŋ diandaa o cho ni.
14 Te wanaa soliaa lasalaa luɛi pɛ o fondaŋ diandaa, tuupa ma fula le kɔlaŋ o luŋ cho o bɛɛ wo, a nɔ fɛlɛŋ ma soli nyɛla wa nda lekɔɔ ma wa wallo laŋ. Kanifuule, nyɛla diandaa laŋ la cho ni. A nɔ ma wounuŋ nyɛla cheleŋ tuupa ma kuɛ o fondaŋnda wana o wana nɔ dioo le kɔlaŋ ndaŋ.”
15 Mɛɛ o chii chiɛi Mɛlɛkaa tuu leniŋ, mbo keeku a ya o dio kpaki cho ba paaleŋ le chaŋ ndo wo le fulaa o bɛɛ, okoŋ mbo tuu fondaŋ cho loŋ ndo kpou.
16 Mbo tuu fondaŋ wa ba paaleŋ le chaŋ ndo wo a yɔm tuwaa* wa ndu o ba wo. Mɛɛ o tuu fondaa hoo, chɔŋ kpeŋgei hei mbo kuɛ kpeŋgei i pilɛi, o wa bandii yɔm tuwaa hoo bɛmbɔɔ 500.
17 Mbo tuu fondaŋ wa ba luaŋ ndo wo. Mɛɛ o tuu fondaa hoo, o wa bandii yɔm tuwaa hoo bɛmbɔɔ 500.
18 Mbo tuu fondaŋ wa ba tou wo wo. Mɛɛ o tuu fondaa hoo, o wa bandii yɔm tuwaa hoo bɛmbɔɔ 500.
19 Mbo kua ba paaleŋ le del lo. Mɛɛ o tuu fondaŋ koŋ, o wa bandii yɔm tuwaa hoo bɛmbɔɔ 500.
20 Mbo tuu kpeŋguŋ hiɔɔloŋ kpou. Kpaki wa o balaa silɔ wo wa bandii yɔmndo hoo bɛmbɔɔ 500, toŋgei 500. O tosa hei le teŋgeŋndo handɔɔ fondaŋ diandaa tɛɛŋ a fondaŋ wana o wana soliŋ kpeku wo.
