Isikiɛɛ 43:1-27
43 Okoŋ mbo kua a ya o dio kpaki muli hɔlla ba paaleŋ le chaŋ ndo wo.
2 I lo loŋ mi cha naŋɔɔ bɛndu Mɛlɛka Isɔluɛiya fulaa ba paaleŋ le chaŋ ndo. Diom ndɔɔ wa suɛi maa bal bɛndu, mi paŋgele naŋɔɔ ndɔɔ tiu o lɛŋndeŋ choo kpou.
3 Nyɛ ya che wo ndoo velaŋ a yilaŋii ya che teleŋ ya* hiŋ le chiee bɛndoo tɛɛmbuuwo wo, nduyɛ ndoo velaŋ a nyɛ ya che o pioo Kiba ikɛiyo. Okoŋ, mi baŋ wulaŋ mi fuuluu hɔlla lɛŋ mɛɛ.
4 Mi naŋɔɔ bɛndu Chɛhowa wo keeku o dio kpaki wa ba paaleŋ le chaŋ ndo wo mbo luɛi o chiɛi Mɛlɛkaa niŋ.
5 Okoŋ mi nyina Mɛlɛkaa heelu ya mbo kua a ya o luŋ wa leniŋ ndo. Mi cha maa naŋɔɔ bɛndu Chɛhowa wo cho o piaa cha o chiɛi Mɛlɛkaa niŋ.
6 Okoŋ mi tuɛi waŋndo suɛi o ya lo o chiɛi Mɛlɛkaa niŋ, nduyɛ mbo huŋ sim ya ikɛi.
7 Mbo dimul la aa:
“Po wanachioo, naŋnuŋ kpeŋgbei* ni lemasaa a fondaŋ ni kɛsiaa ŋpeloo cho ni, naa ya cho wa Isɔluɛiya tɛɛŋ lefafɛɛŋ nda. Fɛɛŋ bɛɛ waŋnda Isɔluɛi a masaa ndaa soliŋ lɛ niŋ piɔmaa ndaa nɔɔlɛiya kpeku, a dialuŋ vilɛi masaa ndaa le diola nila diandaa laŋ nɔɔliaa le.
8 Ma nɔɔliaa diola nila diandaa laŋ a sɔɔŋ nɔɔlɛi nda wa tosaa woŋ, mɛɛ nda taŋgul maaŋ ndaa chiɛi ni diandaa ikɛi. Kpakioo kinɛi wa naa tɛɛŋ ni. Le hei, mi tɛɛmbuu nda a kɔl ni tuuwo.
9 Lelaŋ, dimul nda ma faŋa piɔmaa ndaa nɔɔlɛiyaa nda sooluu wa, vɛlɛ a dialuŋ vilɛi masaa ndaa ya o hɔl, le halikpeŋ mi wa nda tɛɛŋ lefafɛɛŋ.
10 “Kɛ num po wanachioo, tɛɛsial waŋnda Isɔluɛi a chiɛi ni diandaa okɔɔ, le halikpeŋ mi siɔmbulaŋ la bii nda le hakila ndalaŋ. Nduyɛ, a nɔ ma pɛɛku le sinaa mɛɛ o cho o tuuliaa yɛ.*
11 Te siɔmbulaŋ la bii nda pɛ le sɔɔŋ nda tosa woŋ kpou, a chɔm nda mɛɛ chiɛi ni diandaa cho o taŋgulaa yɛ, diolaŋ le fulaa, vɛlɛ a diolaŋ le luɛiyɔɔ. Chɔm nda mɛɛ chiɛiyo hoo cho o tuuliaa yɛ kpou, nɛila ndɔla chɔmaalaŋ, vɛlɛ a sawala ndɔlaŋ. Poonyiaa laŋ nda o hɔl, le halikpeŋ ma diikuŋ sawala cho a chiɛiyo hoo okɔɔ laŋ kpou.
12 Sawa cho a chiɛi Mɛlɛkaa okɔɔ wo cho hoo ni. Tanda balu pembii bɛnduei bolleŋ ndo kpou, fondaŋ hiou diondɔɔ wo o cho ni. A tonya, sawa cho a chiɛi Mɛlɛkaa okɔɔ wo cho hoo ni!
13 “Mɛɛ nda tuu bandu luamaa lasalaa yɛ cho hoo ni (nɛiyo le pilɛ a tɛndaa tɛɛŋ ma chɔɔlu toŋgu baa lechoo).* Nyɛ nda kɛsi ndu lechoo wo wa nɛiyo le pilɛ a tɛndaa tɛɛŋ, nduyɛ bu ndɔɔ nɛiyo le pilɛ a tɛndaa tɛɛŋ. Ndoo nɔ kandoo o balaa silɔ. Toŋgii nduɛi wa toŋgii baa* le yaa. Nyɛ bandu luamaa lasalaa wa o kɛsiaa lechoo wo wa hoo ni.
14 Chɔŋ lɛŋ o fondaŋ o wa o kɛsiaa choo wo kɔ o kandu tasoo, o wa bandei nɛiyo le yaa, toŋgei nɛiyo le pilɛ a tɛndaa tɛɛŋ. Chɔŋ o kandu pɔmbɔ balu ndu wo kɔ o kandu bɛndoo, o wa bandei nɛiyo le ŋɔmpum, toŋgei nɛiyo le pilɛ a tɛndaa tɛɛŋ.
15 Yiŋnda chieele bandu luamaa lasalaa wa helɔɔ nɛiyo le ŋɔmpum. Nduyɛ, mi leelaŋ la hiɔɔlu la soli bolle o yiŋnda chieeloo hoo.
16 Yiŋnda chieele bandu luamaa lasalaa ndoo nɔ kpeŋgoŋ hiɔɔlu. Bandei nɛiyo 18, toŋgei nɛiyo 18.
17 Kpeŋguŋ hiɔɔluŋ balu ndu woŋ wa bandei nɛiyo 21, toŋgei nɛiyo 21. Kandu balu ndu wo ndoo wa le nɛiyo le pilɛ, nduyɛ nyɛ o chal choo wo kpeŋgii kɛ kɛ wa nɛiyo le pilɛ a tɛndaa tɛɛŋ.
“Mi biŋnda ndɔlaŋ la muli hɔlla ba paaleŋ le chaŋ ndo.”
18 Okoŋ mbo dimul la aa: “Po wanachioo, nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘Te la wa pɛ bandu luamaa lasalaa toosiaa, nɛila chɔmaalaŋ ndaŋ nya nɔ ni mi la tol kɔɔli, le halikpeŋ mi la soli salala luamaala kpulukuulaŋ, nduyɛ mi la fasaŋiaa koowaŋ lechoo.’
19 “‘La nɔ mi la hɛli nau piaandu fɔŋndɔɔ o chɔluaa nyaa tɛɛŋ le sala hakioo, mi la ke wanaa soliaa lasalaa o yuŋgu Sadɔki wo choo, a fula o pulale Livai leŋ choo ma wa wallo ya lachi wa.’ Ya Chɛhowa, Mɛlɛka Kpuluŋguma Bɛndoo dimi lende ni.
20 ‘A nɔ ma chua kooma nduaŋ ma tiŋ ma suu maŋ o leela hiɔɔlula cho o bandu luamaa lasalaa laŋ, kpeŋguŋ hiɔɔluŋ balu ndu woŋ vellaa velle, a o kandu balu ndu wo silɔ, le halikpeŋ mbo sɔla dindioo, nduyɛ ma soli sala malɔɔ hakioo lechoo.
21 Okoŋ a chua nau piaandu fɔŋndɔɔ le sala hakioo, le halikpeŋ ma lom ndu o fondaŋ cho o hɛliaa o chiɛi Mɛlɛkaa o bɛɛ wo.
22 O paale diiŋndɔ leŋ choo, la soli chuiŋ piaandu kɛndɛ kɛndɔɔ sala hakioo. Nduyɛ a nɔ ma dindi bandu luamaa lasalaa mɛɛ nda dindi ndu a nau piaandu fɔŋndɔɔ yɛ.’
23 “‘Te la chii ndu pɛ dindi, la hɛli nau piaandu fɔŋndɔ kɛndɛ kɛndɔɔ o chɔluaa nyaa tɛɛŋ, vɛlɛ a saa kondo kɛndɛ kɛndɔɔ o chɔluaa nyaa tɛɛŋ le salaa solioo.
24 La nɔ mi la yɔŋgu nda o Chɛhowa lo, mi wanaa soliaa lasalaa chuchu nda hɛlle choo, okoŋ ma soli nda sala luamaa kpulukuu wo o Chɛhowa lo.
25 Lepaa o lepaa, la cho wa chuiŋ piaandoo, nau piaandu fɔŋndɔɔ o nauwaa nyaa tɛɛŋ, a saa kondoo o chɔluaa nyaa tɛɛŋ sala hakioo solioo le palɛi i ŋɔmmɛu. Chɔluaa nɔ sɔŋ o sɔŋ te wa nya nɔ ni mi la wa salaa solioo.
26 Le palɛi i ŋɔmmɛu, la nɔ mi la soli sala malɔɔ hakioo, le bandu luamaa lasalaa dindioo le halikpeŋ mbo wa o bɛɛndiaa le salalaŋ solioo.
27 Te palɛi ŋɔmmɛu ve chuu pɛ, chɔŋ o paale ŋɔmaa leŋ choo mbo kuɛ kɛ, wanaa soliaa lasalaa cho wa salala luamaala kpulukuulaŋ a salala nyala* kɔl nyulu laŋ solioo o bandu luamaa lasalaa choo. Nduyɛ I cho naŋɔɔ kɔl a nya.’ Ya Chɛhowa, Mɛlɛka Kpuluŋguma Bɛndoo dimi lende ni.”
Tɛɛsiaalaŋ
^ Ɔɔ naapum, “o.”
^ Ɔɔ “kpɛŋɛ.”
^ Hibuluiye, “mɛɛ o cho yɛ.”
^ Tofa Tɛɛsiaa B14.
^ Tofa Tɛɛsiaa B14.
^ Koŋ cho ni, salala waŋnda.
