Isikiɛɛ 6:1-14
6 Mi Chɛhowa suaa vɛlɛ o ya lo aa:
2 “Po wanachioo, muli hɔlla o pembuŋ bɛndoŋ Isɔluɛi, ma dimul muŋ nyɛ cho hunɔɔ muŋ yɔŋnɔŋndo.
3 A nɔ ma dimi aa, ‘Oo pembuŋ bɛndoŋ Isɔluɛi, yaŋ nilaŋ o nyɛ Chɛhowa, Mɛlɛka Kpuluŋguma Bɛndoo dimi wo. Nyɛ Chɛhowa, Mɛlɛka Kpuluŋguma Bɛndoo dimi a pembuŋ bɛndoŋ, pembuŋ pɔmbɔŋ, peela pɔmbɔlaŋ, a kpoloŋndaŋ okɔɔ wo cho hoo ni: “I cho nya chiŋalaŋ a muɛi faŋnde, mi tɛɛmbuu fondaŋnda nyala filioŋndaŋ.
4 I cho bandula nyala luamaa lasalalaŋ tɛɛmbuu, nduyɛ mi pesi pesi bandula nya luam nyɛm chuŋ kɛndɔŋ lechoo laŋ. I cho dialuŋ vilɛi wanaa nda diu wa viouwɔɔ piɔmaa nyaa nɔɔlɛiya* lachi.
5 I cho dialuŋ vilɛi waŋnda Isɔluɛi viouwɔɔ piɔmaa ndaa nɔɔlɛiya lachi, nduyɛ mi sɛŋi paala ndalaŋ o bandula nyala luamaa lasalalaŋ balɔɔ silɔ.
6 Chieeŋ bɛnduŋ nya cho ichali leniŋ ndoŋ vɛlɛ a fondaŋnda filioŋndaŋ kpou cho tambei sɔla. Bandula nyala luamaa lasalalaŋ la cho piɔl wɔ wɔ, mi piɔmaa nyaa nɔɔlɛiya sɔla tambei. Bandula nya luam nyɛm chuŋ kɛndɔŋ lechoo laŋ la cho tambei sɔla, nduyɛ mi walta nyalaŋ kpou la tambu.
7 A cho waŋnda diu diu nya tɛɛŋ, okoŋ mi la sina maa ya cho Chɛhowa ni.
8 “‘“Kɛ I cho tosa mi waŋnda apum lo yoomu, kanifuule a bɔɔbɔɔ cho muɛi faŋnde hiɔlɔŋ, okoŋ ma sɛŋiŋ o lɛŋnde niŋ kpou.
9 Nduyɛ, wanaa cho hiɔlɔŋ nda cho loonɔŋ a ya o lɛŋii nda kuɛ a nda o biyɔɔ niŋnde. A cho sina maa mi tambu kɔllo a nda mɛɛ nda kɛɛ waa sakpo a ya, okoŋ ma muliŋ piɔmaa ndaa nɔɔlɛiya tolɔɔ kɔɔli le nda sooluuwo. Siɔmbulaŋ la cho nda biyɔɔ le sɔɔŋ wɔɔŋ nda tosa woŋ kpou, nduyɛ ma tul muŋ leyɛ.
10 A cho sina maa ya cho Chɛhowa ni, nduyɛ maa o cho kɔŋgɔlaŋ fuu le ya wa le nda nyɛpalaa tusioo choo le.”’
11 “Nyɛ Chɛhowa, Mɛlɛka Kpuluŋguma Bɛndoo dimi wo cho hoo ni: ‘Lɔɔ balaŋ ma wa kɔlaŋ a nɛiyo chapaa chapaa a chaŋndo, nduyɛ ma koŋul kpeleŋ le sɔɔŋ wɔɔŋ waŋnda Isɔluɛi tosa woŋ. Kanifuule a cho nda diu a muɛi faŋnde, yiaaŋ, vɛlɛ a naala taŋ waŋnda laŋ.
12 Naala taŋ waŋnda laŋ la cho a cho landaŋ nda diu, mi muɛi faŋnde diu a cho kpɛɛluŋ nda. A cho hiɔlɔŋ ma nyaanuŋ nda, yima bɛnduaŋ ma cho nda diu. I cho nda tumbe ni kala kalaa tusi choo.
13 Te dialuŋ ndaŋ vilɛiyoŋ wa pɛ piɔmaa ndaa nɔɔlɛiya lachi, bandula ndala luamaa lasalalaŋ, o pembuŋ vilɛiyoŋ choo, o pembuŋ bɛndoŋ kpou bolle, o yɔmii bɛnduei bɛŋgu, a o lɛuwuŋ yɔmii bɛnduei bɛŋgu, naa nda soli salalaŋ le piɔmaa ndaa nɔɔlɛiya kpou kɔltaŋ nɛŋioo wa, a cho sina maa ya cho Chɛhowa ni.
14 I cho ba nuu siɛndi mi chiŋalaŋ nda, mi lɛŋnde ndaleŋ le lo pɔm. Fondaŋnda ndala chalaalaŋ kpou la cho lo pɔm, mbo hiou pollo Dibila ikɛi. Nduyɛ, a cho sina maa ya cho Chɛhowa ni.’”
Tɛɛsiaalaŋ
^ Diom maHibului nda soliŋ kpeku wo chiɛɛliaŋ lepum a “poolaŋ.” Nduyɛ ma soliŋ ndu kpeku le nyɔɔ pɛɛsaa.
