Isikiɛɛ 9:1-11
9 Okoŋ mi tuɛi mbo veelu choo choo kpeleŋ aa: “Chuuŋgiaa wanaa nɔ le chioo hoo nyɛpalaa tusioo choo wa naapilɛ, nduyɛ mi wana o wana bii wolɔɔ ndɔ chɔuwo o ba le chioo tɛɛmbuuwo!”
2 Mi cha puaa a ŋɔmpum fulaa o dio kpakioo amaluaŋ kpeŋgii ba luaŋ nde. Wana o wana wolɔɔ ndɔ chɔuwo wa ndu o ba le wosoŋaa.* Nduyɛ wana pilɛ wa nda tɛɛŋ, o wa o doviaŋ o nyɛla humbulaŋ niŋ a kpɛkile wana poonyiaa ndu o chaŋ. Nda kpou ma huŋ sim bandu luamaa lasala nda toosiaa a chiliŋii siaŋɛi yo* ikɛi.
3 Mi naŋɔɔ bɛndu Mɛlɛka Isɔluɛiya faŋaŋ naa o wa chɛlɔbiiya choo wa, mbo kɔ sim o dioo choo le luɛiyɔɔ o chiɛi Mɛlɛkaa. Okoŋ, mi Mɛlɛka veelu po wa o doviaŋ o nyɛla humbulaŋ niŋ mi kpɛkile wana poonyiaa wa ndu o chaŋ ndeŋ.
4 Mi Chɛhowa dimul ndu aa: “Kɔ Chulusalɛm chiee, ma balu ndu silɔ, nduyɛ ma handu waŋnda tamaseliiyo o ŋtendu, a cho chaŋndo nduyɛ ma wa kuŋndaŋ le sɔɔŋ wɔɔŋ cho tosaŋndo o chioo niŋndoŋ kpou wa.”
5 Okoŋ mi tuɛi mbo dimul a tuaa aa: “La tol ndu kɔɔli mi la kua a waŋnda diuwo. La tuiinuŋ nda inyiɛɛ le, nduyɛ la bii imɔnɔ le nda le.
6 Bɛndu yuu ni, chua piaandu ni, yufuaanɔ ni, chuaambɔ pɔmbɔ ni, wana lanɔ ni, nda kpou la diu nda. Kɛ wana o wana nɔ tamasioo o ŋtendu, la sɔɔŋguu nda ikɛi le. La kandu a chiɛi ni diandaa.” Ma kandu a waŋ banaa wa o chiɛi Mɛlɛkaa hɔlndɔ wa.
7 Mbo dimul nda aa: “La kɔ nɔɔliaa chiɛi nuu, nduyɛ mi la pei luŋnda balu ndu laŋ cha a waŋ vilɛiya.” Okoŋ, ma kua ma diu waŋnda o chioo niŋ.
8 Mɛɛ nda wa nda diuwo, yapilɛ kpe lo ni. Okoŋ mi baŋ wulaŋ, mi fuuluu hɔlla lɛŋ, mi chaŋ choo choo kpeleŋ aa: “Kpoo Chɛhowa, Mɛlɛka Kpuluŋguma Bɛndoo! Baa a cho pa wanaa lo haa yoomu o Isɔluɛi niŋnda tɛɛmbuu kpou, le mɛɛ ŋ dɔɔnuŋ tumbe o kala kala a Chulusalɛm yɛ?”
9 Mbo dimul la aa: “Yɔŋ wɔɔŋ waŋnda Isɔluɛi a waŋnda Chuda tosa wo cho bɔɔ o bɛndu. Lɛŋndeŋ le cho le piaa cha a kooma waŋnda chieeya, nduyɛ kafalaŋ la cho ba o ba fee o chioo hoo niŋ. Kanifuule a dimi aa, ‘Chɛhowa faŋaŋ o lɛŋndeŋ niŋ, nduyɛ Chɛhowa cho chɔ le.’
10 Kɛ ya, I cho nda tuiinɔŋ inyiɛɛ le, kɛlɛŋgaa niŋ te mi bii mɔnɛi le nda. I cho tosa mi fulamakɔɔlila wɔɔŋnda hakila ndalaŋ la tol nda choo.”
11 Okoŋ mi cha po wa o doviaŋ o nyɛla humbulaŋ niŋ a kpɛkile wana poonyiaa ndu o chaŋ ndo hunɔɔ mbo dimi aa: “Nyɛ o nyɛ ŋ dimul la le tosaa, I chii ndu tosa.”
