Luku 2:1-52
2 A boondii keŋ, mi Siisa Ɔkɔɔstɔɔ dimi maa a poonyiaa waŋnda kpou diolaŋ o lɛŋii o cho bolleŋ nde niŋ.
2 (Teleŋ tasoo wa hoo ni le waŋnda diolaŋ poonyiaa, nduyɛ teleŋ Kuiliniɔɔ wa masa ibuŋgaa o Siiliaa niŋndo hei yɔŋnuŋ ni.)
3 Mi waŋnda kpou kua o kɔɔlima ndaŋ le ma poonyiaa nda diolaŋ.
4 Nduyɛ le mɛɛ Choosɛ ndoo fula o pulale Deeveleŋ choo yɛ, mi ndu bɛɛ chaŋ Kalili mbo kua Naasaluɛi o Chudiaa niŋ o chiee Deevioo diolaŋ aa Bɛtilɛhɛm.
5 Mbo kua nda Meele laa ndɔ le ma kɔ poonyiaa nda diolaŋ, nduyɛ o wa niŋ o miaa a folioo.*
6 A lo loŋ mi teleŋndo fuuluu le mi Meele velu.
7 Okoŋ mbo vialu poo. Violɔɔ ndɔ tasoo wa koŋ ni. Mbo simbul ndu o kolala ŋpɛŋgɛlaŋ niŋ, mbo kɔ yambu ndu o fondaŋ nda dou chɔluaa nyɛdiaa wo, kanifuule a sɔla fondaŋ o chiɛi yiyaa mialla niŋ te.
8 O tanda pilɛ koŋ niŋ, wanaa mandaa lasaa wa chɔluaa ndaa mandaa o bɛɛ ichɔl koŋ.
9 O lepilɛ niŋ kpe, mi maalikɛinɔ Chɛhowa* wo huŋ sim nda lachi. Mi paŋgele Chɛhowa* wo balu nda silɔ, okoŋ mi siooŋnde bii nda tau.
10 Kɛ mi maalikɛinɔɔ dimul nda aa: “La yɔŋ isiooŋ te, kanifuule I chuu nya yooŋgu nyaale bɛndoo le mi waŋchieeya kpou tuei.
11 O paale hauleŋ ndeŋ choo, a vilul nya wana piŋiaa, o nda veelu aa Masanɔɔ Kiliti wo o chiee Deevioo niŋ.
12 Tamasioo le nya cho hoo ni: La cho chɛlɛkpɔɔ saalɔŋ o simbulaa o kolala ŋpɛŋgɛlaŋ niŋ o fondaŋ nda dou chɔluaa nyɛdiaa wo.”
13 O lepilɛ niŋ kpe, mi maalikɛiya faŋga bɛndoo o choo choo niŋ sɔɔŋguu maalikɛinɔɔ hoo ikɛi ma wa Mɛlɛka saŋgalaa aa:
14 “Saŋgalaa cho le Mɛlɛka cho o choo choo niŋndo. Nduyɛ kɔl nyuloo cho le wanaa o hini kɔl o chieeŋndo choo wa.”
15 Mɛɛ maalikɛiya faŋaŋ nda o hɔl ma miiŋguŋ o choo choo niŋ, mi wanaa mandaa lasaa dimulaŋ aa: “La ŋ kɔŋnuŋ Bɛtilɛhɛm, miŋ kɔ chɔ nyɛ yɔŋnuŋndo, o Chɛhowa* chɔm naa hoo wo.”
16 Ma kua chɔ chɔ, nduyɛ ma saaluŋ Meele nda Choosɛ, vɛlɛ a chɛlɛkpɔɔ o yambaa o fondaŋ nda dou chɔluaa nyɛdiaa wo.
17 Mɛɛ nda che hei, ma dimul waŋnda yooŋgu maalikɛinɔɔ dimul nda a chɛlɛkpɔɔ hoo okɔɔ wo.
18 Mi kɔndɔfillo bii wana o wana tuei nyɛ wanaa mandaa lasaa dimi wo.
19 Kɛ mi Meele kɛsiŋ sɔɔŋ muŋ kpou o kɔl, nduyɛ mbo wa yiyaŋndo o muŋ choo.
20 Okoŋ, mi wanaa mandaa lasaa miiŋguŋ. A wa Mɛlɛka saŋgalaa le nyɛ o nyɛ nda tuei nduyɛ ma cha, a mɛɛ nda dimul nda yɛ.
21 Mɛɛ palɛi hiou i ŋɔmaa, a teleŋ ndoo nɔ le hivi chiɛi kɔɔlioo sɔlaa wo, ma ke ndu diolaŋ aa Chiisu, diola maalikɛinɔɔ chɔm nda laŋ tuupa mi Meele chua foli ndɔɔ.
22 Mɛɛ teleŋndo fuuluu le ma sɔla dindioo a mɛɛ Sawala Mɛlɛka ke Muuse laŋ la dimi yɛ, ma kua a Chiisu Chulusalɛm le ndu yɔŋgoo o Chɛhowa* lo,
23 a mɛɛ i cho i poonyiaa o Sawa Chɛhowa* wo niŋ yɛ aa: “Chɛlɛkpɛ piaandu tase kɛ kɛ nda velu pɛ, o nɔ mbo wa le Chɛhowa.”*
24 Nduyɛ ma soli salaa a mɛɛ i cho i dimiaŋ o Sawa Chɛhowa* wo niŋ yɛ aa: “Kaŋgbuaa a ŋiɔɔŋ ɔɔ piinda a ŋiɔɔŋ.”
25 Po pilɛ wa Chulusalɛm diolaŋ aa Simiɔŋ. O wa sakpo nduyɛ mbo yɔŋguŋ o Mɛlɛka lo. O wa chumndo le teleŋ Mɛlɛka cho Isɔluɛi kɔl dɛɛniaa ke wo. Nduyɛ nyina Mɛlɛkaa wa ndu choo.
26 Mi Mɛlɛka soliŋ nyina ndɔ diandaa kpeku le ndu chɔmndo maa o cho lo yoomu haaa mbo che Kiliti, wana Chɛhowa* vem ndo.
27 Mi nyina Mɛlɛkaa tosa mbo huŋ o chiɛi Mɛlɛkaa niŋ, a teleŋ Choosɛ nda Meele hiŋ a Chiisu le ma tosa mɛɛ i cho i dimiaŋ o Sawaa* niŋ yɛ.
28 Mbo chua chɛlɛkpɔɔ o balaŋ choo, mbo mel Mɛlɛka balikaa. Mbo dimi aa:
29 “Mɛlɛka Kpuluŋguma Bɛndoo, buɛi numndo nɔla niŋ mbo vi o kɔl nyulu niŋ a mɛɛ ŋ dimi yɛ,
30 kanifuule I che wana ŋ soliŋ kpeku le waŋchieeya piŋioo wo a lehɔl pɛɛŋ.
31 A yɔŋgu ndu le mi waŋnda kpou che ndu.
32 Ndu cho nyɛ teŋgaa soli niŋ waŋnda kpou o nyumndaŋ niŋndo ni. O cho tosa mi wanaa numnda Isɔluɛi a sɔla bɛɛleŋ.”
33 Mi kɔndɔfillo bii Choosɛ nda Meele a sɔɔŋ nda wa dimioo a chɛlɛkpɔɔ okɔɔ woŋ.
34 Okoŋ, mi Simiɔŋ duau nda sala mbo dimul Meele aa: “Chɛlɛkpɔɔ hoo tosa niŋ mi wanaa bɔɔbɔɔ o Isɔluɛi niŋ del, nduyɛ mi a bɔɔbɔɔ chɛŋ. Mɛlɛka chɔm bɛɛ tamasilaŋ maa o cho a ndu latulu, wanaa bɔɔbɔɔ cho ndu simul.
35 (Nduyɛ num Meele, muɛi faŋii vilɛiye cho num tɛnda duu.) Okoŋ, mi yiyaŋnda cho wanaa bɔɔbɔɔ o kɔltaŋ niŋndaŋ la chɔɔmuŋ.”
36 Wɛɛŋ pilɛ wa vɛlɛ diolaŋ aa Ana. Wana ndoo suaa le Mɛlɛka wo o wa ni. Nduyɛ finya ndɔ wa Fanuwɛl ni, fulaa o kaale Asiɛɛleŋ niŋ. Ndoo yuuwa niŋ tau, nduyɛ wɔsilaŋ la ŋɔmmɛu kinɛi nda tosa nda pɔnɔ ndɔ o nɔɔ niŋ ni.
37 Pɔnɔ ndɔ ndoo vi niŋ, nduyɛ wɛɛŋndo hoo ndoo nɔ niŋ wɔsilaŋ 84. Kɛ lepilɛ bɛɛ ndoo bindu kɔlaŋ o chiɛi Mɛlɛkaa niŋ te. Paaleŋ a nyumndaŋ o wa wali Mɛlɛkaa tosaa, sumndo biyɔɔ, a piɛileŋ o Mɛlɛka lo.
38 A teleŋ koŋ, mbo sɔɔŋguu nda ikɛi mbo kandu Mɛlɛka balikaa mello. Nduyɛ o wa suɛi a chɛlɛkpɔɔ hoo okɔɔ o wanaa wa chumndo le mi Mɛlɛka piŋi Chulusalɛm nda lo kpou.
39 Mɛɛ nda chii nyɛ o nyɛ tosa a mɛɛ Sawa Chɛhowa* wo dimi yɛ, ma miiŋgu Kalili o chiee ndaa niŋ Naasaluɛi.
40 Okoŋ, mi poombɔɔ hiau lachi a hindɔɔ, vɛlɛ a yoomuaŋ sɔlaa. Mbo sɔla taasioo tau, nduyɛ sala Mɛlɛkaa wa ndu choo.
41 Wɔsi o wɔsi, mi wanaa nduaa ndaa kuɛ Chulusalɛm le Bɔŋaŋ Hiouwɔɔ Choo Wo biyɔɔ.
42 Mɛɛ o fuuluu wɔsilaŋ 12, ma kua nda yuŋgu ndɔɔ Chulusalɛm le bɔŋaŋndo hoo biyɔɔ mɛɛ ndaa tosa paandu yɛ.
43 Mɛɛ bɔŋaŋndo chuu ma chaŋ miiŋgoo, mi Chiisu loŋnuŋ Chulusalɛm. Kɛ wanaa velu ndu wa sina le.
44 A wa yiyaŋndo maa o cho wanaa nda wa kɔlaŋ nda tɛɛŋ. Ma niilu kɔlaŋ kpɛŋ. Okoŋ, ma kandu ndu nuuviaa wanayaŋ ndaŋ a wanaa nda wa kɔlaŋ nda tɛɛŋ.
45 Kɛ a seeluŋ ndu le. Ma miiŋgu Chulusalɛm di le ndu nuuviaa ba o ba fee.
46 Mɛɛ palɛi hiou i yaa, ma kɔ saaluŋ ndu o chiɛi Mɛlɛkaa niŋ. O wa ichali wanaa pɛɛku waŋnda sawala Mɛlɛkalaŋ nda tɛɛŋ. O wa nda nilaŋ yaŋɔɔ, a nda nyuuniaa.
47 Kɛ mi kɔndɔfillo bii wanaa wa ndu nilaŋ yaŋɔɔ wa kpou le sinapɛŋgu ndɔɔ, nduyɛ a mɛɛ o wa nyunalaŋ mulioo yɛ.
48 Mɛɛ wanaa velu ndu wa che ndu, mi kɔndɔfillo bii nda. Mi kala ndɔ dimul ndu aa: “Po nuu, le yɛɛnɛ ŋ luei yɛ naa o kɔl landɛi waa nuaa niŋ? Ŋ wa num nuuviaa kpeekpei naa finya num.”
49 Kɛ mbo dimul nda aa: “Le yɛɛnɛ nya cho yɛ ya nuuviaa? La sina maa I nɔ mi wa o chiɛi Finya nuu niŋ te?”
50 Kɛ a bii nyɛ o wa nda dimullo wo bila le.
51 Okoŋ mbo miiŋgu nda ndaa Naasaluɛi, nduyɛ mbo hiau lachi a nda diikɔŋndo. Mi kala ndɔ kɛsiŋ sɔɔŋ muŋ kpou o kɔl.
52 Mi Chiisu hiau lachi a taasioo sɔlaa, nduyɛ a hindɔɔ o dialloŋ niŋ. Mi Mɛlɛka a waŋchieeya hini kɔl a ndu.
Tɛɛsiaalaŋ
^ Ɔɔ “yollo.”
^ Tofa Tɛɛsiaa.
^ Tofa Tɛɛsiaa.
^ Tofa Tɛɛsiaa.
^ Tofa Tɛɛsiaa.
^ Tofa Tɛɛsiaa.
^ Tofa Tɛɛsiaa.
^ Tofa Tɛɛsiaa.
^ Tofa Tɛɛsiaa.
^ Koŋ cho ni, Sawala Mɛlɛka ke Muuse laŋ.
^ Tofa Tɛɛsiaa.
