Luku 22:1-71
-
Wanaa soliaa lasalaa kɛɛsiaa le Chiisu diyɔɔ (1-6)
-
Bɛɛndiaŋndo le Hiouwɔɔ Choo mɛɛlaa (7-13)
-
Kandɔŋ Nyɛdiaa Ichɔl Masanɔɔ (14-20)
-
“Wana cho ya pisi wo cho a ya latulu o tibiiyo choo” (21-23)
-
Sɛɛŋgiaŋ bɛndoo le wana cho wana bɛndoo wo (24-27)
-
Kpema Chiisu yii le masaleŋ ndo (28-30)
-
Chiisu soo a mɛɛ Pitɛ cho ndu viinɔŋ yɛ okɔɔ (31-34)
-
Waa a bɛɛndiaŋnda, mɔɔŋ muuŋ ndoŋ (35-38)
-
Chiisu piɛi o Pembii Ɔlifiive choo (39-46)
-
A bii Chiisu (47-53)
-
Pitɛ viinuŋ Chiisu (54-62)
-
A mam Chiisu (63-65)
-
A nyuuniaa ndu Laŋgbaa Kalaa Kialu Yamaŋ Nda o hɔl (66-71)
22 Bɔŋaŋ Beedii* Nɔ Yiisii* Leniŋ te Wo, o nda veelu vɛlɛ aa Bɔŋaŋ Hiouwɔɔ Choo Wo wo, o wa niŋ le fuuluuwo.
2 Masaa wanaa soliaa lasalaa a wanaa pɛɛku waŋnda sawala Mɛlɛkalaŋ nda wa nɛilaŋ nuuviaa le Chiisu diyɔɔ, kanifuule siooŋnde wa nda le faŋgaa.
3 Okoŋ mi Setana luɛi Chuda niŋ, o nda veelu aa Isikaliɔɔ wo. Ndu bɛɛ wa kiilaa 12 nda tɛɛŋ.
4 Mbo kɔ suukaŋ a masaa wanaa soliaa lasalaa, a masaa wanaa ndaa manda chiɛi Mɛlɛkaa wa le mɛɛ o looku mbo pisi Chiisu nda o ba yɛ.
5 Ma naŋ kɔl tau a ndi, nduyɛ ma chɛlaŋ le ma ke ndu kaniŋ* humboŋ.
6 Mbo chɛl. Okoŋ mbo kandu nɛilaŋ nuuviaa le Chiisu pisioo nda o ba, waŋnda sina a ndi okɔɔ le.
7 Mi paale taseleŋ le Beedii Nɔ Yiisii Leniŋ te Wo le fuuluu. O paaleŋ ndeŋ choo ndaa dii saa le Bɔŋaŋ Hiouwɔɔ Choo Wo ni.
8 Okoŋ mi Chiisu viam Pitɛ nda Chɔŋ, mbo dimul nda aa: “La kɔ bɛɛndiaa nyɛdiaa Bɔŋaŋ Hiouwɔɔ Choo Wo le miŋ deŋnuŋ.”
9 Ma nyuna ndu aa: “Kuɛɛnɛ ŋ yeema yɛ miŋ kɔ bɛɛndiaa ndu?”
10 Mbo dimul nda aa: “Te la luɛi pɛ chiee, la cho bɔŋaŋ a po pilɛ a kpɛɛnɛi mamɛŋnde. Chiɛi o luɛi pɛ, la luɛi ndu kɔɔli.
11 Nduyɛ mi la dimul wana chiɛiyo aa, ‘Wana Pɛɛkaa dimi maa naŋ nyuna num aa: “Kuɛɛnɛ fondaŋ mialla cho yɛ le mi de nyɛdiaa Bɔŋaŋ Hiouwɔɔ Choo Wo naa buɛiyaa niaa?”’
12 O cho nya chɔm fondaŋ fɛkɛi kɛndɛ kɛndɔɔ le mialla. La bɛɛndiaa nyɛdiaa loŋ.”
13 Ma kua, nduyɛ mi i yɔŋnuŋ mɛɛ o dimul nda yɛ. Okoŋ ma bɛɛndiaa nyɛdiaa le Bɔŋaŋ Hiouwɔɔ Choo Wo.
14 Mɛɛ teleŋndo fuuluu le nyɛdiaa dioo, mi Chiisu nda kiilaa nduaa chal o tibiiyo.*
15 Okoŋ mbo dimul nda aa: “Yeemɛi wa ya niŋ bɔɔ le nyɛdiaa Bɔŋaŋ Hiouwɔɔ Choo Wo hoo dioo a nya latulu tuupa mi sɔla saŋgaa.
16 Mi dimul nya, I di lɛ niŋ nyɛdiaa hoo a nya le mɛɛ mi sabu ndɔɔ peeluŋ o Masale Mɛlɛkaleŋ niŋ.”
17 Okoŋ mbo bii taalaa, mbo piɛi. Mbo dimi aa: “La bii mi la keŋnaŋ, mi la kol.
18 Kanifuule mi dimul nya, chɔŋ a hau, I kol lɛ niŋ muɛiyaŋ maŋ te haaa mi Masale Mɛlɛkaleŋ le hiŋ.”
19 Mbo chua beediiyo, mbo piɛi, mbo yimi yimi. Okoŋ mbo ke nda. Mbo dimi aa: “Hoo sim le dialuŋ nuŋ ni. Muŋ ya cho yɔŋgu le nya ni. La wa hei tosaa le loonɔŋndo a ya.”
20 Mɛɛ nda chii nyɛdiaa ichɔllo dio, mbo tosa vɛlɛ nyɛpilɛ koŋ kpe a taalaa. Mbo dimi aa: “Taalaa hoo sim le kpema sɛnɛi yiinuŋ a kooma niaŋ ndo ni. Maŋ ma cho talaŋ le nya ni.
21 “Kɛ wana cho ya pisi wo cho a ya latulu o tibiiyo hoo.
22 A tonya, Po wana pɔnɔɔ nɔ le piɔmndo sɔlaa a mɛɛ i dimiŋ yɛ. Kɛ, nyɛpalaa cho le wana cho ndu pisi wo!”
23 Okoŋ ma kandu suukaŋndo ndapila tɛɛŋ le sinaa wana kpeekpei tosa niŋ heiyo.
24 Okoŋ kɔɔli, mi sɛɛŋgiaŋ bɛndoo del nda tɛɛŋ le wana cho wana bɛndoo nda tɛɛŋndo.
25 Kɛ mi Chiisu dimul nda aa: “Masaa chieeŋnda haa, mɛɛ nda yeema yɛ nda bii waŋnda ni. Nduyɛ, ma veelu wanaa nɔ nda kpaayaa choo wa aa wanaa kɛndiaa.
26 Kɛ o cho lende le nya nɔ mi la wa le. Wana cho wana bɛndoo nya tɛɛŋndo nɔ mbo wa maa chuaambɔ pɔmbɔ, okoŋ mi wana cho chilaŋ chuaa wo wa buɛiyo.
27 Nɛɛnɛ cho yɛ wana bɛndoo? Wana cho nyɛdiaa dioo wo ɔɔ wana cho ndu nyɛdiaa kioo wo? O cho wana cho nyɛdiaa dioo wo le? Kɛ ya, I cho nya tɛɛŋ maa buɛi.
28 “Nya wa a ya latulu o nyɛpalaa nuu niŋ ni.
29 Nduyɛ I yii kpemaa a nya, mɛɛ Finya nuu bɛɛ yii kpemaa a ya le masaleŋ yɛ.
30 La dia niŋ nyɛdiaa, nduyɛ mi la kol a ya latulu o tibii* nuu choo o Masale nileŋ niŋ. Nduyɛ, mi la chal o kpeŋgbeila* lemasalaŋ choo le mi la kɔɔsa a kayii 12 nde Isɔluɛi.
31 “Saimɔŋ, Saimɔŋ! Setana yeema mbo hɛi nya kpou mɛɛ nda hɛi nuaa witiiyoŋ yɛ.
32 Kɛ I chii Mɛlɛka piɛi le num le mi laalaŋ numndo kendu, a vi ŋdial te. Nduyɛ te a miiŋgu pɛ ya o ibuŋ, luei puaapiliaa numnda yoomuaŋ.”
33 Mi Pitɛ dimul ndu aa: “Masanɔɔ, I cho o bɛɛndiaŋ le kɔlaŋ naa num o chiɛi manyumndo niŋ, a le piɔmndo sɔlaa naa num latulu.”
34 Kɛ mi Chiisu dimul ndu aa: “Mi dimul num Pitɛ, tuupa sɔɔ koowa hau, a cho viinɔŋ bɛmbɔɔ le yaa maa a sina ya le.”
35 Mi Chiisu nyuna nda aa: “Teleŋ ya vem nya mi dimul nya maa la chua bɔlɔ ikani* ɔɔ bɔlɔ nyɛdiaa ɔɔ lakɔwɛi* le wo, nyɛ wa pa nya lepɛŋ?” Ma muli aa: “Ɛ ɛ!”
36 Okoŋ mbo dimul nda aa: “Kɛ suŋ suŋ niŋ, wana nɔ bɔlɔ ŋkani pɛ, o chua. Wana nɔ bɔlɔ nyɛdiaa pɛ, o chua. Nduyɛ wana nɔ imɔɔ le, o pisi doma ndɔ bɛndoo mbo pendu muɛi.
37 Kanifuule mi dimul nya, nyɛ o nyɛ cho o poonyiaa a ya okɔɔ nɔ mbo peeluŋ. Ndu cho ni, ‘Ma chua ndu maa wana tɛɛmbuu sawaa wo.’* Nyɛ dimiŋ hoo a ya okɔɔ wo sɔla peelɔŋndo.”
38 Ma dimul ndu aa: “Masanɔɔ, tofawɔ! Ŋ nɔ mɔɔŋ ŋmuuŋ.” Mbo dimul nda aa: “Muŋ cho letuu.”
39 Mɛɛ Chiisu faŋaŋ loŋ, mbo kua o Pembii Ɔlifiive choo mɛɛ ndoo tosa paandu yɛ. Mi buɛiyaa nduaa tual ndu kɔɔli.
40 Mɛɛ nda fuuluu loŋ, mbo dimul nda aa: “La hiou lachi a piɛileŋ, yɔŋii nya del o tɔɔndaŋndo niŋ.”
41 Okoŋ mbo faŋaŋ nda ikɛi mbo kua tiŋ landaŋ, mbo kɔ baŋ wulaŋ. Mbo kandu piɛileŋ
42 aa: “Kɛkɛ, te o bɛnda pɛ, mɛɛ faŋa ya taalaa hoo kuee. Kɛ nduyɛ, hɛnaŋ numndo ŋ tosa ni, o cho hɛnaŋ nuu le.”
43 Okoŋ mi maalikɛinɔɔ fula o choo choo niŋ mbo huŋ luei ndu yoomuaŋ.
44 Kɛ le mɛɛ o wa mɔnɛi biyɔɔ tau yɛ, mbo hiau lachi a piɛileŋ kpeekpei. Okoŋ mi lalii nduɛi simnuŋ mɛɛ koowaŋ ma deli nuaa lɛŋ yɛ.
45 Mɛɛ o chii piɛileŋ mbo miiŋgu naa buɛiyaa nduaa chua, mbo komal nda o luaŋ, kanifuule a wa a saŋgɛi yɔkɔɔ a mɔnɛi.
46 Mbo dimul nda aa: “Le yɛɛnɛ nya cho yɛ luaŋ? La tiondu, mi la wa piɛileŋ yɔŋii nya luɛi o tɔɔndaŋndo niŋ.”
47 Chiisu lo suɛi, mi waŋnda huŋ faŋga bɛndoo. Chuda, wana pilɛ o kiilaa 12 nda tɛɛŋ wa nda lachi ni. Mbo huŋ sɔsa ndu kuuwo.
48 Kɛ mi Chiisu dimul ndu aa: “Chuda, mɛɛ a kuuwo sɔsaa ŋ cho Po wana pɔnɔɔ pisioo ni?”
49 Mɛɛ wanaa wa isisi ikɛiya che nyɛ wa hunɔɔ yɔŋnɔŋndo, ma dimi aa: “Masanɔɔ, ŋ lɔuviaa nda a mɔɔŋ?”
50 Mi wana pilɛ nda tɛɛŋ lɔwa buɛi masa wanaa soliaa lasalaa nile ba kɛndɛleŋ, mbo kialu leŋ kpali.
51 Kɛ mi Chiisu dimul nda aa: “La pɛŋgi lende.” Okoŋ mbo pilaŋ poo nileŋ, mi le siaŋgu.
52 Mi Chiisu nyuna masaa wanaa soliaa lasalaa, masaa wanaa ndaa manda chiɛi Mɛlɛkaa wa, a laŋgbaa kalla, a hiŋ le ndu biyɔɔ wa aa: “La vɛ hunɔɔ a mɔɔŋ vɛlɛ a yɔmii biŋgiei mɛɛ nda yɔŋ ko aa viinɔɔ nya hiŋ biyɔɔ ni?
53 Lepaa o lepaa I wa a nya latulu o chiɛi Mɛlɛkaa niŋ, la bii ya teleŋ koŋ te. Kɛ teleŋ nyaa, a teleŋ kpaaya wanaa cho o nyumndaŋ niŋnda cho hoo ni.”
54 Okoŋ ma bii ndu, ma kua a ndu o chiɛi masa wanaa soliaa lasalaa. Mi Pitɛ tual ndu kɔɔli, kɛ o wa tiŋ landaŋ.
55 Mɛɛ nda kiisuu yiŋndeŋ o bɛɛ ma chal haŋgɔɔ, mi Pitɛ bɛɛ chal nda tɛɛŋ.
56 Kɛ mɛɛ buɛi laandu pilɛ che Pitɛ ichali o yiŋndeŋ ikɛi, mbo tofa ndu chiŋ, mbo dimi aa: “Poo hoo bɛɛ wa ndu kɔɔli.”
57 Kɛ mbo viinuŋ aa: “I sina ndu le chuaa.”
58 Mɛɛ nyɔɔ viou tiŋ, mi wana cheleŋ cha ndu mbo dimi aa: “Num bɛɛ wa ndu kɔɔli.” Kɛ mi Pitɛ dimi aa: “O cho ya le poo.”
59 Mɛɛ teleŋndo hiou le hawɛiyo* opilɛ, mi po cheleŋ baŋ ndi kaŋgalaŋ aa: “Tonya kpeekpei, poo hoo bɛɛ wa ndu kɔɔli, kanifuule wana waa Kalili o cho ni!”
60 Mi Pitɛ dimi aa: “Poo sei, I sina bɛɛ pɛŋ nyɛ ŋ cho hoo dimioo wo le.” Pitɛ lo suɛi, o lepilɛ niŋ kpe mi sɔɔ koowa.
61 Mi Masanɔɔ muliŋ mbo tofa Pitɛ, okoŋ mi Pitɛ loonuŋ nyɛ Masanɔɔ dimul ndu wo aa: “Tuupa sɔɔ koowa hau, a cho viinɔŋ bɛmbɔɔ le yaa maa a sina ya le.”
62 Okoŋ mi Pitɛ fula o bɛɛ, mbo kɔ chaŋ chaŋndo pila.
63 Mi wanaa bii Chiisu wa kandu ndu mamɔɔ, ma wa ndu kuindi kuindioo.
64 Mɛɛ nda kumbu ndu hɔlla, ma nyuna ndu aa: “Dimullɔ naa! Nɛɛnɛ lɔɔ yɛ num?”
65 Nduyɛ ma dimi sɔɔŋ wɔɔŋ cheleŋ tau a ndu okɔɔ.
66 Mɛɛ paaleŋ le sɛ, mi laŋgbaa kalla le waŋnda, nda cho ni, masaa wanaa soliaa lasalaa a wanaa pɛɛku waŋnda sawala Mɛlɛkalaŋ nda chuuŋgiaŋ naapilɛ. Ma kua a Chiisu o chiɛi nda Kialu Yamaŋ ndo niŋ, ma dimul ndu aa:
67 “Te num cho Kiliti ni, dimul naa.” Kɛ mbo dimul nda aa: “O yɔŋ bɛɛ mi dimul nya, la laalaŋ niŋ kposoŋ te.
68 Nduyɛ I nyuna bɛɛ nya, la mulul la niŋ te.
69 Kɛ, chɔŋ a boondei hei, Po wana pɔnɔɔ cho wa ichali o ba kɛndɛ Mɛlɛka kpaaya bɛndoo choo.”
70 Mi nda kpou nyuna aa: “Mɛɛ num cho Po Mɛlɛkaa ni?” Mbo mulul nda aa: “Nyapila chii dimi maa ya cho Po Mɛlɛkaa ni.”
71 Ma dimi aa: “Seiyaa cheleŋ yeemaŋ lɛ pa? Naapila ŋ tuei nyɛ fula ndu o sondo wo.”
Tɛɛsiaalaŋ
^ Ɔɔ “Bulu.”
^ Ɔɔ “Lɛvɛŋ.”
^ Ɔɔ “woliŋ.”
^ Ɔɔ “tabalioo.”
^ Ɔɔ “tabali.”
^ Ɔɔ “kpɛŋɛla.”
^ Ɔɔ “iwoli.”
^ Ɔɔ “lasamta.”
^ Kilikiiye, “ma chɔm ndu a wanaa yɔŋ wɔɔŋnda latulu.”
^ Ɔɔ “lɛɛlɔɔ.”
