Luku 4:1-44
4 Mi Chiisu faŋaŋ o Pioo Chɔɔdaŋ. Mi Mɛlɛka ke ndu nyina diandaa. Mi nyina diandaa koŋ tosa mbo kua o pollo niŋ
2 le palɛi 40. Mi Setana* kɔ tɔɔndaŋ ndu loŋ. Nduyɛ o ve nyɛ o nyɛ dio le. Mɛɛ palɛi keŋ i chuu, mi yiaaŋ ma nɛi ndu.
3 Okoŋ mi Setana* dimul ndu aa: “Te po Mɛlɛkaa ŋ cho ni, mɛɛ siiŋguu wɔ pouwo hoo nyɛdiaa.”*
4 Kɛ mi Chiisu mulul ndu aa: “I cho i poonyiaa aa: ‘O cho ko nyɛdiaa le tosa mi wana wa yoomu le.’”
5 Mi Setana* heelu ndu o fondaŋ filioŋndo, mbo chɔm ndu masɛi o chieeŋndo choo kpou o teleŋ biŋgi bɛŋgu.
6 Okoŋ mi Setana* dimul ndu aa: “I cho num kpaaya masɛi hei a sulta ndɔlaŋ kpou ke, kanifuule ya nɔ ndi ni. Nduyɛ wana ya yeema wo ya ke ni.
7 Lelaŋ, te a baŋ pɛ wulaŋ kinɛi ma piɛi ya, masɛi hei kpou I ke num.”
8 Kɛ mi Chiisu dimul ndu aa: “I cho i poonyiaa aa: ‘Chɛhowa* Mɛlɛka numndo ŋ nɔ ni ma piɛi. Nduyɛ ndu pilɛ kpe ŋ nɔ ni ma biilu.’”
9 Mbo kua a ndu Chulusalɛm, mbo heelu ndu o chiɛi Mɛlɛkaa tullo. Mbo dimul ndu aa: “Te po Mɛlɛkaa ŋ cho ni, mɛɛ chicha wɔ lɛŋ.
10 Kanifuule, i cho i poonyiaa aa: ‘Mɛlɛka cho maalikɛiyaa nduaa viomɔɔ ma manda num,’
11 nduyɛ ‘A cho balaŋ hau ma saala num, pelei bɛɛ a loo o pouwo le.’”
12 Mi Chiisu dimul ndu aa: “I cho i dimiaŋ aa: ‘Wana tɔɔndaŋ Chɛhowa* Mɛlɛka numndo le.’”
13 Mɛɛ Setana* chii ndu tɔɔndaŋ, mbo faŋaŋ ndu kɔɔli, mbo wa ndu chumndo le teleŋ cheleŋ.
14 Mi Chiisu miiŋgu Kalili, nduyɛ nyina Mɛlɛkaa wa ndu choo. Mi tɔɔ ndɔ kɛndɔɔ tiu o lɛŋnde leŋ niŋ kpou.
15 Mbo kandu vɛlɛ waŋnda pɛɛkoo o chiɛila Chuuwa piɛi Mɛlɛka laŋ niŋ. Waŋnda kpou wa sɔɔŋ kɛndɔŋ dimioo a ndu okɔɔ.
16 Okoŋ mbo kua Naasaluɛi, naa o sul la. Mbo luɛi o chiɛi Chuuwa piɛi Mɛlɛka wo niŋ mɛɛ ndoo tosa paandu o Paale Pɛŋgiaaleŋ choo yɛ, mbo sim le diomndaŋ veeloo.
17 Ma yɔŋgu ndu yau simbulaa Aisaya wo, wana ndoo suaa le Mɛlɛka wo. Okoŋ mbo timbi ndu, mbo saaluŋ fondaŋ o cho o poonyiaa wo aa:
18 “Nyina Chɛhowa* wo cho ya choo, kanifuule o pɔya ya le mi dimul wanaa bala fonduaa yooŋgu kɛndɔɔ. O vem ya le mi baŋa wanaa cho o chɛleŋ niŋnda, nduyɛ mi tosa mi wanaa cho a sumɛiya wa che, le mi wanaa cho a saŋgɛiya wa sɔla pɛŋgioo,
19 nduyɛ mi dimul waŋnda a wɔsi Chɛhowa* tosal niŋ nda kɛndɛi nduɛi yo okɔɔ.”
20 Okoŋ, mbo simbul yauwo, mbo ke wana wa wallo o chiɛi Mɛlɛkaa niŋndo, mbo chal. Mi wanaa wa loŋ nda kpou wa ndu nuaa tom tom.
21 Mbo dimi aa: “Suɛi nya laŋga tuei hei o yau Mɛlɛkaa niŋnde, i peeluŋ hau.”
22 Mi nda kpou kandu sɔɔŋ kɛndɔŋ dimioo a ndu okɔɔ. Nduyɛ mi kɔndɔfillo bii nda a diomnda kɛndɛla wa ndu fulaa o sondo laŋ. Ma wa dimioo aa: “O cho po Choosɛ wo le cho hoo le?”
23 Mi Chiisu dimul nda aa: “A tonya, la dimul niŋ ya taloo hoo aa, ‘Wana chiɔuwaa, siŋgi wɔ fɛlɛŋ numpila. Walta naŋ tuei maa a tosa o Kepaaniɔm niŋndaŋ, tosa wɔ laŋ o numndo chiee naŋ.’”
24 Mbo dimi vɛlɛ aa: “A tonya mi dimul nya, wana suaa le Mɛlɛka wo, waŋnda chɛl ndu o ndu lo chiee le.
25 Kɛ mi dimul nya tonyaa: Waŋ laanduaa vii piaanduaa wa a wa tau Isɔluɛi o teleŋ Ilaicha wo niŋ. A boondii keŋ, mi piɔɔ kɛɛ le siaa le wɔsilaŋ la yaa a paŋgoŋ ŋɔmpum, nduyɛ mi yima bɛnduaŋ ma del o lɛŋndeŋ niŋ kpou.
26 Kɛ Mɛlɛka vim Ilaicha naa opilɛ bɛɛ chua le, mɛɛ o chua vii pɔnɔ ndɔ mbo wa Saluɛfati chiee o lɛŋnde Saidɔŋndeŋ niŋndo lo.
27 Nduyɛ a boondii Ilaisia, wana ndoo suaa le Mɛlɛka wo bɛɛ, wanaa ndaa nɔ lɛlɔŋ nda wa tau o Isɔluɛi niŋ. Kɛ, opilɛ bɛɛ sɔla siŋgioo le, mɛɛ Naamaŋ, o wa Siiliaŋnɔɔ wo.”
28 Mɛɛ wanaa wa ndu nilaŋ yaŋɔɔ o chiɛi Chuuwa piɛi Mɛlɛka wo niŋnda kpou tuei hei, ma tuulu kɔl tau.
29 Ma chaŋ ma faŋa ndu chiee chɔ chɔ. Ma kua a ndu o pembei landɔŋndo naa chiee ndaa wa o taŋgulaa wa, le ma nyindu ndu mbo kɔ del a lebol.
30 Kɛ mbo keekuŋ nda tɛɛŋ mbo kuaŋnuŋ.
31 Okoŋ kɔɔli, mbo kua Kepaaniɔm chiee o Kalili niŋ. O wa waŋnda pɛɛkoo o Paale Pɛŋgiaaleŋ choo,
32 mi kɔndɔfillo bii nda a mɛɛ ndoo chaa pɛɛkoo yɛ, kanifuule o wa suɛi maa wana nɔ kpaayaa wo.
33 Po pilɛ wa o chiɛi Chuuwa piɛi Mɛlɛka wo niŋ, nyina wɔɔŋndo wa ndu kɔɔli. Mbo deŋi choo choo aa:
34 “Yɛɛ ŋ yeema yɛ ma tosal naa, num Chiisu fula hoo Naasaluɛiyo? Baa le naa tɛɛmbuuwo ŋ hiŋ ni? I sina wana ŋ cho wo. Buɛi Diandaa Mɛlɛkaa ŋ cho ni.”
35 Kɛ mi Chiisu kpaa ndu aa: “Mei, nduyɛ ma faŋaŋ poo hoo kɔɔli.” Mi nyina wɔɔŋndo mal ndu lɛŋ waŋnda kpou o hɔl. Okoŋ mbo faŋaŋ ndu kɔɔli, kɛ o yɔŋul ndu le.
36 Le hei, mi kɔndɔfillo bii waŋnda kpou, ma kandu dimulaŋndo aa: “Suɛi suu maavɛɛnɛ cho yɛ hei? Kanifuule, nyinaa wɔɔŋnda bɛɛ o nɔ nda kpaayaa choo, nduyɛ te o dimul nda pɛ aa la fula, ma fula!”
37 Okoŋ mi tɔɔ Chiisu wo tiu ba o ba fee o lɛŋnde leŋ niŋ.
38 Mɛɛ o faŋaŋ o chiɛi Chuuwa piɛi Mɛlɛka wo, mbo luɛi o chiɛi Saimɔŋ ndo niŋ. O komal kalaa lanɔɔ Saimɔŋ a dialloŋ ŋ tuu kpɛi, okoŋ ma dimul ndu le mbo mala ndu.
39 Mi Chiisu sim ndu choo, mbo siŋgi ndu. O lepilɛ niŋ kpe, mbo chaŋ, mbo kandu nda nyɛdiaa toosiallo.
40 Kɛ mɛɛ paaleŋ le hiŋ le delɔɔ, mi wanaa ndaa nɔ waŋnda a naala yɛ yɛlaŋ nda huŋ a nda naa Chiisu chua. Mbo handu nda balaŋ choo kpou mbo siŋgi nda.
41 Nyinaa wɔɔŋnda bɛɛ wa faŋaŋndo wanaa bɔɔbɔɔ kɔɔli a yeelaŋ aa: “Po Mɛlɛkaa ŋ cho ni.” Kɛ mbo kpaa nda. Ndoo chɛl nda ma soo le, kanifuule ndaa sina maa ndu cho Kiliti ni.
42 Mɛɛ paaleŋ le sɛ, mbo faŋaŋ o fondaŋ koŋ mbo kua naa yololiaa. Kɛ mi faŋgaa kandu ndu nuuviaa, nduyɛ ma huŋ o fondaŋ o wa wo. Ma dɛɛniaa ndu le mbo lo loŋ nda ndaa.
43 Kɛ mbo dimul nda aa: “I nɔ mi dimi vɛlɛ yooŋgu kɛndɔɔ a Masale Mɛlɛkaleŋ okɔɔ o chieeŋ cheleŋ, kanifuule le hei Mɛlɛka vem ya ni.”
44 Okoŋ mbo hiau lachi a yooŋgu kɛndɔɔ dimioo o chiɛila Chuuwa piɛi Mɛlɛka laŋ niŋ Chudiaa.
Tɛɛsiaalaŋ
^ Kilikiiye, diabolos. O sim le “wana tɛɛmbuu acheleŋnda tɔɔ wo.”
^ Kilikiiye, diabolos. O sim le “wana tɛɛmbuu acheleŋnda tɔɔ wo.”
^ Kilikiiye, “kpuŋgbaŋ beediiyo.”
^ Kilikiiye, diabolos. O sim le “wana tɛɛmbuu acheleŋnda tɔɔ wo.”
^ Kilikiiye, diabolos. O sim le “wana tɛɛmbuu acheleŋnda tɔɔ wo.”
^ Tofa Tɛɛsiaa.
^ Tofa Tɛɛsiaa.
^ Kilikiiye, diabolos. O sim le “wana tɛɛmbuu acheleŋnda tɔɔ wo.”
^ Tofa Tɛɛsiaa.
^ Tofa Tɛɛsiaa.
