Lutu 1:1-22
1 O palɛi wanaa kialaa ŋyamaa ndaa dimi waŋnda sɔɔŋ tɛɛŋ nde niŋ,* mi yima bɛnduaŋ ma del o lɛŋndeŋ niŋ. Mi po pilɛ faŋaŋ Bɛtilɛhɛm o Chuda niŋ, le kɔlaŋ challe o lɛŋnde Mowaabi leŋ niŋ.* Mbo kua nda laa ndɔ a puaa nduaa ŋiɔɔŋnda.
2 Poo hoo, diola ndɔlaŋ la wa Ɛlimɛlɛki* ni. Laa ndɔ diolaŋ aa Nawomi.* Nduyɛ diola puaa nduaa ŋiɔɔŋnda la wa Maalɔŋ* a Chiliɔŋ* ni. Ɛfiluata ndaa fula ni. Koŋ cho ni, Bɛtilɛhɛm o Chuda niŋ. Nduyɛ ma kua o lɛŋnde Mowaabi leŋ niŋ, ma kɔ chal loŋ.
3 Mɛɛ teleŋ tiŋ hiou , mi Ɛlimɛlɛki, pɔnɔɔ Nawomi wu. Mi Nawomi lo a puaa nduaa ŋiɔɔŋnda.
4 Okoŋ kɔɔli, mi puaa haa chua waŋ laanduaa Mowaabi o nɔlaŋ niŋ. O pilɛ ndoo nɔ diolaŋ aa Ɔpa, o pilɔɔ aa Lutu. A wa o lɛŋnde leŋ niŋ le suɛi wɔsila tɔ.
5 Okoŋ mi puaa ŋiɔɔŋnda haa, Maalɔŋ nda Chiliɔŋ bɛɛ wu. Nawomi ndoo nɔ lɛ ŋchuau le, nduyɛ ndoo nɔ lɛ pɔnɔ le.
6 Mɛɛ o tuei maa Chɛhowa mulul wanaa nduaa hɔlla mbo ke nda nyɛdiaa,* mbo kɛɛsiaa le mbo faŋaŋ Mowaabi mbo miiŋgu o ndu lo. Nduyɛ, mi laandaa puaa nduaa mɛi ya tual ndu kɔɔli.
7 Mbo faŋaŋ o fondaŋ o wa ichali wo nda laandaa puaa nduaa mɛi ya le miiŋgoo. Mɛɛ nda bii nɛiyo le miiŋgoo o lɛŋnde Chuda leŋ niŋ,
8 mi Nawomi dimul nda aa: “La kɔ, la miiŋgu o la nya lo, o kalaa nyaa lo. Maa Chɛhowa chɔm nya kaala lo lechoo wo, mɛɛ nya chɔm ya a puaa niaa vi wa kaala lo lechoo wo yɛ.
9 Maa Chɛhowa ke* nya vɛlɛ piaanduaa, nduyɛ mi nɔla nyalaŋ la yeela fɔ.” Okoŋ, mbo sɔsa o kɛ kɛ kuuwo, ma chaŋ chaŋndo pila.
10 Kɛ ma dimul ndu aa: “Ŋ cho miiŋgu le, ŋ cho lakɔ a num latulu o wanaa numnda lo.”
11 Mi Nawomi dimi aa: “La miiŋgu chuauwaa niaa. Le yɛɛnɛ nya yeema yɛ miŋ kuɛ naa nyaa? I nɔla lɛ mi velu puaa, mi la chal nya ndaa o lanɔ niŋ te.
12 Chuauwaa niaa, la miiŋgu. La kɔ, kanifuule I yuuwa niŋ bɔɔ le challe o nɔ cheleŋ. Nduyɛ, o yɔŋ bɛɛ mi sɔla pɔnɔɔ chuɛllɛŋ mi velu puaa,
13 la nɔla niŋ pa mi la chum nda haaa ma sul? La nɔla niŋ pa mi la kɛɛ challe o nɔlaŋ le nda? Sako chuauwaa niaa. Mɔnɛi nyɛi cho ya bɔɔ. Kanifuule, Chɛhowa faŋa ya ba ndɔɔ kɔɔli, mbo tusi ya nyɛpalaa choo.”
14 Ma chaŋ vɛlɛ chaŋndo pila. Okoŋ, mi Ɔpa sɔsa kalalɛi ndɔ kuuwo, mbo miiŋguŋ. Kɛ mi Lutu ndu kɛɛ le miiŋgoo.
15 Lelaŋ mi Nawomi dimi aa: “Chaŋ num nya vii piaanduaa wo miiŋguŋ o wanaa nduaa lo, a o mɛlɛkaa nduaa lo. La miiŋgu nya ndu.”
16 Kɛ mi Lutu dimi aa: “Yandii, nyɔɔlu ya le mi miiŋgu, mi faŋaŋ num kɔɔli le. Ba o ba ŋ kuɛ pɛ, naa num cho lakɔ ni. Nduyɛ ba o ba ŋ lɔl pɛ, loŋ ya bɛɛ cho malɔ ni. Wanaa numnda cho wa wanaa niaa ni, nduyɛ mi Mɛlɛka numndo wa Mɛlɛka nuu.
17 Naa ŋ cho wu wa, loŋ ya bɛɛ cho wu ni ma kumbu ya. O fula o piɔmndo kɔɔli, te I chɛl pɛ mi nyɛ o nyɛ cheleŋ piɔu naa tɛɛŋ, maa Chɛhowa tusi ya dɛnɛ palaa bɛndoo choo.”
18 Mɛɛ Nawomi che maa Lutu kɛɛ le miiŋgoo, mbo pɛŋgi ndu nyɔɔloo.
19 Ma hiau lachi a kɔlaŋ haaa ma fuuluu Bɛtilɛhɛm. Mɛɛ nda fuuluu dɔɔ Bɛtilɛhɛm, mi chioo kpou hiiluŋ. Mi waŋ laanduaa wa dimioo aa: “Nawomi pa cho hoo ni?”
20 Mbo dimul nda aa: “La veelu ya aa Nawomi* le, la veelu ya aa Maalua.* Kanifuule, Mɛlɛka Kpaaya Kpou Kpou Wo tosa mi sɔɔŋ kɔl tambɛiyoŋ komal la o yoomu nuu niŋ.*
21 Kɔla ya wa laŋ, yaa nɔ nyɛ o nyɛ. Kɛ Chɛhowa tosa mi miiŋgu bala fondo. Le yɛɛnɛ nya cho yɛ ya veeloo aa Nawomi? Chɛhowa pila chiŋalaŋ ya ni, nduyɛ ndu Mɛlɛka Kpaaya Kpou Kpou Wo tusi ya nyɛpalaa choo ni.”
22 Mɛɛ nuaa Nawomi looku chɔnɔŋ Mowaabi ni le miiŋgoo o ndu lo nda Lutu, lanɔ Mowabaitiinɔ po ndɔɔ mɛiyo. A teleŋ waŋnda kandu baliiyoŋ kiolɔɔ wo kinɛi nda fuuluu Bɛtilɛhɛm ni.
Tɛɛsiaalaŋ
^ Ɔɔ “wa waŋnda chilaŋ nde niŋ.”
^ Ɔɔ “tanda Mowaabi wo niŋ.”
^ Diolaŋ ndaŋ la sim, “Masaa Mɛlɛka Nuu Cho Ni.”
^ Diolaŋ ndaŋ la sim, “Wana Ni Kaalaa.”
^ Naapum o Hibuluiye niŋ diolaŋ ndaŋ la sim, “wana kindu ŋdial te wo, wana lakɔsɔɔ.”
^ Diolaŋ ndaŋ la sim, “Wana Yɔkpa Wo, Wana Cho Tambei Sɔla Wo.”
^ Hibuluiye, “beediiyo ɔɔ buloo.”
^ Ɔɔ “fanda.”
^ Diolaŋ ndaŋ la sim, “Wana Ni Kaalaa.”
^ Diolaŋ ndaŋ la sim, “Lollo.”
^ Ɔɔ “Mɛlɛka Kpaaya Kpou Kpou Wo tosa mi yoomu nuu lol.”
