Lutu 2:1-23
2 Nawomi ndoo nɔ wanayɛi i pum diolaŋ Bowaa, fulaa o yuŋgu pɔnɔ ndɔ wo choo. Sullo pila poo hoo ndoo sul ni, nduyɛ yuŋgu pilɔɔ nda wa nda Ɛlimɛlɛki ni.
2 Mi Lutu, chua Mowabaitiinɔɔ dimul Nawomi aa: “Yandii, I yeema mi kuɛ o chiɔɔŋ waŋnda niŋ. Wana o wana kɔ chɛl la pɛ, I chɔuviaa yasala nda mɛi kɔɔli laŋ o chiɛi nduɛi niŋ.” Mi Nawomi dimul ndu aa: “Kɔ chua nuu.”
3 Okoŋ mbo kua, mbo kɔ kandu yasalaŋ chɔuviaa waŋwalla kɔɔli. Mi i yɔŋnuŋ kinɛi, mbo kua o chiɛi Bowaa ve niŋ, wanayɛi Ɛlimɛlɛki ve.
4 Mɛɛ teleŋ tiŋ hiou , mi Bowaa fula Bɛtilɛhɛm, mbo huŋ o chiɛi niŋ. Mbo dimul waŋwalaa nduaa aa: “Maa Chɛhowa wa a nya latulu.” Ma mulul ndu aa: “Maa Chɛhowa dɔu num sala.”
5 Mi Bowaa nyuna po wa waŋwalla bolleŋ ndo aa: “Nɛɛnɛ nɔ yɛ chuaa hoo?”
6 Mi poo hoo mulul ndu aa: “Mowabaitiinɔɔ chuaa hoo cho ni. O lɛŋnde Mowaabi leŋ niŋ o fula ni, ma huŋ nda Nawomi.
7 Mɛɛ o hiŋ, mbo nyuna aa, ‘Yandii, I chɔuviaa yasalaŋ o baliŋ waŋwalla cho kiolɔɔ ma mɛi kɔɔli woŋ* tɛɛŋ?’ Nduyɛ kani mbo huŋ kandu wallo diilɛŋ, mɛɛ suŋ suŋ mbo chal pɛŋgioo o yɛkpɔɔ bɛŋgu.”
8 Okoŋ, mi Bowaa dimul Lutu aa: “Yaŋ ya nilaŋ chua nuu. Kua lɛ o chiɛi wana cheleŋ niŋ le yasalaŋ chɔuviaa le. Kua lɛ ba o ba le. Wa wallo latulu a buɛiyaa niaa laanduaa.
9 Wa nda mɛɛndaŋndo. Ba o ba nda wa wallo pɛ, a kuɛ nda kɔɔli. I dimul puaa feleŋguaa maa a paaliaŋ* num te. Te kolɔɔ bii num pɛ, kɔ naa nda kɛsi mɛŋndaŋ nda ma kol mɛŋma nda kɔndu waŋ.”
10 Mɛɛ Lutu tuei hei, mbo tunduŋ mbo baŋ wulaŋ. Okoŋ mbo dimul ndu aa: “Le yɛɛnɛ ŋ che yɛ ya nyina ma tosal la kɛndɛi bɛnduii waa nuaa, mi che bɛɛ wana lekaa wo ya cho ni?”
11 Mi Bowaa mulul ndu aa: “Waŋnda dounuŋ ya kona kpou a nyɛ o nyɛ ŋ tosal kalalɛi num, mɛɛ pɔnɔ num vi. A dimul la a mɛɛ ŋ mɛi finya num, kala num, lɛŋnde numndeŋ, a wanayaŋ numndoŋ, ma huŋ wanaa ŋ sina paandu le wa tɛɛŋ yɛ.
12 Maa Chɛhowa dɔu num sala le nyɛ ŋ tosa wo. Nduyɛ maa Chɛhowa, Mɛlɛka Isɔluɛiya, o ŋ hiŋ o ba ndɔɔ bɛŋgu le vioŋnɔŋndo wo, ke num fanda* ŋ nɔ ma sɔla wo fɔ!”
13 Mi Lutu dimi aa: “Nuwali ma cha ya nyina masanɔ nuu. Kanifuule, diomnda ŋ dimul la laŋ ndaŋ la dɛɛniaa ya kɔllo nduyɛ mi la ke ya tiindaŋndo,* mi che bɛɛ I cho o buɛiyaa numnda tɛɛŋ te.”
14 Mɛɛ teleŋ diaa nyɛdiaa fuuluu, mi Bowaa veelu ndu aa: “Huŋ le nyɛdiaa. Huŋ ma chua kpuŋgbɛi beediiye* ma yiŋ o muɛima waalɛiyaŋ niŋ, ma de.” Okoŋ, mbo kɔ chal waŋwalla ikɛi. Mi Bowaa chua baliŋ tuaŋaŋ ŋtiŋ mbo ke ndu. Mi Lutu dia, mbo pum, nduyɛ mbo mɛi o tiŋ.
15 Mɛɛ o chɛŋ le miiŋgoo yasalaŋ chɔuviaa, mi Bowaa dimul puaa feleŋguaa aa: “O yɔŋ bɛɛ mbo wa yasalaŋ chɔuviaa o ŋ nya kelu woŋ* tɛɛŋ, la mal ndu. La bii ndu biyɔɔ wɔɔŋ te.
16 La wa vɛlɛ yasalaŋ latiŋ sooluuwo o balaŋ tɛɛŋ mi la mɛi kɔɔli, le mbo chɔuviaa. La dimi nyɛ o nyɛ le ndu kuunaa le.”
17 Mi Lutu hiau lachi a yasalaŋ chɔuviaa o chiɛi keŋ niŋ haaa mi paaleŋ le del. Mɛɛ o lɔɔ yasala o chɔuviaa laŋ, baliŋ o sɔla woŋ muŋ wa le kiloo 13.*
18 Okoŋ, mbo kua a muŋ chiee, mbo kɔ chɔm kalalɛi ndɔ. Mi Lutu soli vɛlɛ nyɛdiaa ndoo pim mbo mɛiyo, mbo ke ndu.
19 Mi kalalɛi ndɔ nyuna ndu aa: “Kuɛɛnɛ ŋ wa yɛ hau yasalaŋ chɔuviaa? Kuɛɛnɛ ŋ tosa yɛ hau wallo? Maa salaa wa wana tosal num hoo kɛndɛiyo choo fɔ.” Mbo chɔm kalalɛi ndɔ naa o niilu wallo wa. Mbo dimul ndu aa: “Po ya niilu wallo o chiɛi nduɛi niŋndo, diola ndɔlaŋ aa Bowaa.”
20 Okoŋ, mi Nawomi dimul ndu aa: “Maa Chɛhowa, o chɔm kaala lo lechoo wo o wanaa cho yoomu wa a o wanaa vi wa lo wo, dɔu ndu sala fɔ! Mi Nawomi hiau lachi a suɛi aa: “Wanayɛi nɛi kpeekpei po koŋ cho ni. O cho waŋndo o pilɛ o nɔ dioo le naa baŋaa* wo.
21 Mi Lutu, chua Mowabaitiinɔɔ dimi aa: “Mbo dimul la vɛlɛ aa, ‘Tosa wallo a waŋwalaa niaa latulu haaa ma chii chiɛi nii kiolɔɔ.’”
22 Okoŋ, mi Nawomi dimul Lutu, lanɔɔ po ndɔɔ aa: “O bɛnda bɔɔ chua nuu. O cho fisa ma tosa wallo a buɛiyaa nduaa laanduaa, mbo hiau kɔlaŋ o chiɛi wana cheleŋ niŋ ma bii num biyɔɔ wɔɔŋndo.”
23 Okoŋ, mbo hiau lachi a wallo tosaa nda buɛiyaa laanduaa Bowaa wa latulu. O lo yasalaŋ chɔuviaa o chiɛi keŋ niŋ haaa ma chii baliiyoŋ a witiiyoŋ kiolɔɔ. Nduyɛ, mbo hiau lachi a waa kalalɛi ndɔ ikɛi.
Tɛɛsiaalaŋ
^ Ɔɔ naapum, balaŋ.
^ Hibuluiye, “pilaŋ.”
^ Ɔɔ “paawa.”
^ Hibuluiye “la fuuluu ya o kɔl di.”
^ Ɔɔ “buloo.”
^ Ɔɔ naapum, balaŋ.
^ Hibuluiye, “le ɛfaa o pilɛ.” Tofa Tɛɛsiaa B14.
^ Baŋaa hoo sim le waŋndo solioo o chɛleŋ niŋ, nyɛm kɛŋ yuŋgoo loo ɔɔ piondɔɔ, vɛlɛ a lanɔ wana vi wo mɛiyo loo.
