Lutu 4:1-22
4 Okoŋ kɔɔli, mi Bowaa kua o dio kpaki chioo mbo kɔ chal. O lo ichali loŋ, mbo cha wana baŋaa o soo a ndu okɔɔ wo hiouwɔɔ. Mi Bowaa veelu ndu aa: “Poo sei, yandii huŋ challɔ nanuŋ.” Mi poo kua, mbo kɔ chal.
2 Mi Bowaa veelu waŋ banaa chieeya tɔ, mbo dimul nda aa: “Yandii, la huŋ ndɔ mi la chal naa ikɛi.” Okoŋ, ma kɔ chal.
3 Mi Bowaa dimul wana baŋaa hoo aa: “Nawomi chɛŋ o lɛŋnde Mowaabi leŋ niŋ, mbo miiŋgu nanuŋ. Nduyɛ, o nɔ mbo pisi lɛŋnde Ɛlimɛlɛki wanayɛi nɛi mɛi leŋ.
4 Lelaŋ I yiyaŋ a ndi okɔɔ, mi cha maa o bɛnda mi dimul num ma pendu leŋ waŋnda kpou o hɔl a waŋ banaa chieeya. Te a wa leŋ pɛ baŋa, mɛɛ baŋa. Kɛ te a ve baŋa le, dimul la mi sina. Kanifuule, num kpeekpei nɔ dioo ni le leŋ baŋaa. Te num faŋaŋ pɛ, ya cho wana diiŋ ndɔɔ ni.” Mbo muli aa: “I cho leŋ baŋa.”
5 Okoŋ mi Bowaa dimi aa: “Te o yɔŋ pɛ ma pendu leŋ Nawomi o ba, mɛɛ a nɔ ma pendu leŋ vɛlɛ Lutu o ba, lanɔ Mowabaitiinɔ po vi wo mɛiyo. O hei niŋ, diola po vi wo la nɔla mi la hiou lachi a waa o nyɛm kɛŋ ndɔŋ choo.”
6 Okoŋ mi wana baŋaa hoo muli aa: “I nɔla leŋ baŋa le, yɔŋii nyɛm kɛŋ nuŋ laasiaŋ. I ke num dioo le ma chua fonda nuu ma baŋa leŋ. Kɛ ya I nɔla mi baŋa leŋ te.”
7 O Isɔluɛi niŋ sindɛ, te waŋndo ndoo yeema pɛ le wanayɛi nduɛi di o nɔ le nyɛm kiɔɔŋ baŋaa wo kioo, ɔɔ le nyɛm kɛŋ o nɔ woŋ pisioo, naamu wa le chɛlaŋndo tosaa wo wa hoo ni: Wana koŋ ndoo nɔ mbo soliŋ kɔwɛiyo* o ipelu mbo ke waŋndo o pilɔɔ. O nɛiyo hoo choo ndaa chɔm o Isɔluɛi niŋ ni maa, chɛlaŋndo* luɛi nda tɛɛŋ.
8 Lelaŋ, mɛɛ wana baŋaa hoo dimul Bowaa aa “Piondu leŋ le numpila,” mbo soli kɔwɛiyo mbo ke ndu.
9 Okoŋ, mi Bowaa dimul waŋ banaa chieeya a waŋnda kpou aa: “Nya kpou la cho lesei maa, nyɛ o nyɛ Ɛlimɛlɛki, Chiliɔŋ a Maalɔŋ nɔ, I cho hau ndu piondɔɔ Nawomi o ba.
10 I cho vɛlɛ Lutu, lanɔ Mowabaitiinɔ Maalɔŋ mɛiyo chua o nɔɔ niŋ. Koŋ cho tosa, mi diola po vi wo la hiou lachi a waa o nyɛm kɛŋ ndɔŋ choo. Nduyɛ mi diola ndɔlaŋ la lo o yuŋgu ndɔɔ niŋ a o ndu lo chiee.* Lelaŋ, nya kpou la cho hau lesei.”
11 Okoŋ, mi wanaa wa o dio kpaki chioo wa a waŋ banaa chieeya kpou dimi aa: “Ŋ cho lesei! Maa Chɛhowa dɔu lanɔ ŋ cho hunɔɔ chuaa wo sala mbo wa maa Luechɛl nda Liya, waŋ laanduaa velu chuauwa Isɔluɛi ya. Maa sɔla batiuwaa o Ɛfiluata niŋ, nduyɛ ma pɛlnuŋ ladio o Bɛtilɛhɛm niŋ fɔ.
12 Sanaa a chuauwaa Chɛhowa cho tosa mi chuaa hoo vilul numnda, maa yuŋgu numndo simnuŋ maa yuŋgu Piluɛsi wo fɔ, po Tamaa vilul Chuda wo.”
13 Mi Bowaa chua Lutu o nɔɔ niŋ. Mɛɛ o hiviŋ ndu kɔɔli, mi Chɛhowa tosa mbo chua folioo,* nduyɛ mbo vialu poo.
14 Okoŋ, mi waŋ laanduaa dimul Nawomi aa: “Saŋgalaa cho le Chɛhowa, o tosa hau ma sɔla wana baŋaa wo. Maa poombɔɔ hoo piɔlnuŋ ladio o Isɔluɛi niŋ fɔ!
15 Poombɔɔ hoo, ndu miŋgi num yoomoo o miliŋ ni, nduyɛ ndu cho num manda o yuuwɛi numnde niŋ ni. Kanifuule, lanɔ po numndo mɛiyo velu ndu ni. Chuaa hoo kaala num, nduyɛ o cho o sɔvɛ le num mbo hiau puaa a ŋɔmmɛu.”
16 Mi Nawomi chua poombɔɔ, mbo bii ndu o ibuŋ, okoŋ mbo wa ndu niko mandaa.
17 Mi waŋ laanduaa nda chiɛɛliaŋnda dimi aa: “A vilul Nawomi wana pɔnɔɔ.” Nduyɛ ma ke ndu diolaŋ aa Obɛdi. Ndu velu Chɛɛse ni, finyaa Deeve.
18 Yuŋgu Piluɛsi wo, pulale ndaleŋ le cho leŋ ni: Piluɛsi velu Hɛsilɔŋ ni.
19 Hɛsilɔŋ velu Luam ni. Luam velu Aminadabi ni.
20 Aminadabi velu Naasiɔŋ ni. Naasiɔŋ velu Salimɔŋ ni.
21 Salimɔŋ velu Bowaa ni. Bowaa velu Obɛdi ni.
22 Obɛdi velu Chɛɛse ni, nduyɛ Chɛɛse velu Deeve ni.
