Maatiu 15:1-39
15 Okoŋ kɔɔli, mi Falisiiya a wanaa pɛɛku waŋnda sawala Mɛlɛkalaŋ nda chaŋ Chulusalɛm ma huŋ naa Chiisu chua. Ma nyuna ndu aa:
2 “Le yɛɛnɛ buɛiyaa numnda cho yɛ naamula finyaa naa mamaa tɛɛmbuuwo? Le tamaseliiyo, a pulu* balaŋ le nyɛdiaa dioo le.”
3 Mbo nyuna nda aa: “Le yɛɛnɛ nya cho yɛ sawa Mɛlɛkaa tɛɛmbuuwo le naamula nyalaŋ?
4 Le tamaseliiyo, Mɛlɛka dimi aa, ‘Ke finya num a kala num bɛɛleŋ.’ Mbo dimi vɛlɛ aa, ‘Wana o wana dimul pɛ finya ndɔ ɔɔ kala ndɔ diomnda wɔɔŋndaŋ, o nɔ mbo sɔla piɔmndo.’
5 Kɛ mi nya dimi aa, ‘Wana o wana dimul pɛ finya ndɔ ɔɔ kala ndɔ aa: “Nyɛ yaa nɔ le num kioo wo, I chii buŋgɛi chua o Mɛlɛka lo le ndu kioo,”
6 mbo ke lɛ bɛɛ finya ndɔ ɔɔ kala ndɔ lebɛɛ kposoŋ te.’ Lelaŋ nya cho diom Mɛlɛkaa kpeeŋaa ikɛi ni le naamula nyalaŋ.
7 Nya wanaa mulu muluaŋnda haa, a nya okɔɔ kpeekpei Aisaya dimi ni aa:
8 ‘A lasondo waŋnda haa cho ya biiloo ni, kɛ kɔlta ndalaŋ la cho levil a ya.
9 Fondo fuu nda cho ya piɛiyo ni, kanifuule sawala ndapila dɔu laŋ nda pɛɛku waŋnda ni.’”
10 Okoŋ, mi Chiisu veelu faŋgaa mbo dimul nda aa: “La yaŋ nilaŋ nyɛkɛndɛi, nduyɛ mi la bii bila.
11 O cho nyɛ waŋndo dia wo le nɔɔliaa ndu le. Kɛ nyɛ fula ndu o sondo wo, ndu nɔɔliaa ndu ni.”
12 Okoŋ, mi buɛiyaa nduaa huŋ naa ndu chua, ma nyuna ndu aa: “A sina pa maa mi Falisiiya tambu kɔl a nyɛ ŋ dimi wo?”
13 Mbo mulul nda aa: “Yɔm o yɔm Finya nuu o choo choo niŋ tol te, o cho ndu hunɔɔ suŋgɔɔ.
14 Lelaŋ, la saalaŋ nda le. Kanifuule, a cho ko maa wanaa sumɛiyaa cho chaaŋaa ndaa wanaa sumɛiya tindaa seelullo wa. Te wana sumɛiyo seelul pɛ wana sumɛiyo tindaa, nda ŋiɔɔŋ kpou a cho lakɔ delɔɔ o sooŋndo niŋ.”
15 Mi Pitɛ dimi aa: “Tɛɛsiallɔ naa taloo hoo.”
16 Mi Chiisu dimi aa: “Mɛɛ la sina wɔ suɛi hei lapɛŋgu le?
17 La sina wɔ maa nyɛ o nyɛ waŋndo de pɛ, ndu o dembe le o keeku, okoŋ mbo kɔ sɔndaŋ ndu le?
18 Kɛ, nyɛ o nyɛ fula pɛ waŋndo o sondo, ndu o kɔl o fula ni. Nduyɛ, nyɔɔŋ muŋ nɔɔliaa waŋndo ni.
19 Kanifuule, o kɔllo niŋ yiyaŋnda wɔɔŋndaŋ, yiyaŋ diyaa wanachioo, suundaa, kaa ihini nɔɔlɛiyo,* viileŋ, seile lakafaleŋ timbioo, a waŋndo tɔɔ tɛɛmbuuwo chaŋ ni.
20 Sɔɔŋ muŋ nɔɔliaa waŋndo ni. Kɛ o cho nyɛdiaa dioo a pulu* fɛlɛŋ balaŋ te le nɔɔliaa waŋndo le.”
21 Okoŋ, mi Chiisu faŋaŋ loŋ mbo kua o tanda Taaya a Saidɔŋ ndo niŋ.
22 Mi chua fula o tanda Foniisiaa wo niŋndo huŋ naa Chiisu chua a chaŋndo aa: “Masanɔɔ, Po Deevioo, tuiinuŋ ya inyiɛɛ fɔ. Nyina wɔɔŋndo cho bɔɔ chua nuu saaŋgiaa.”
23 Kɛ Chiisu kuŋ te, o soli le. Okoŋ, mi buɛiyaa nduaa huŋ naa ndu chua ma dimul ndu aa: “Masanɔɔ, chuaa hoo cho wɔ naa hunɔɔ kɔɔli kɛ a chaŋndo. Dimul ndu o miiŋgu.”
24 Kɛ mbo mulul nda aa: “O wanaa cho maa saa luusiaŋnda o Isɔluɛi niŋnda lo kinɛi nda vem ya ni.”
25 Kɛ mi chuaa huŋ beŋ ndu wulaŋ, mbo dimul ndu aa: “Masanɔɔ, mala ya fɔ!”
26 Mi Chiisu dimul ndu aa: “O bɛnda mi wana chua nyɛdiaa cho le chuaambuaa wo ma dou tuŋaa chuauwa le.”
27 Mi chuaa dimi aa: “Tonya keŋ cho ni Masanɔɔ. Kɛ tuŋaa chuauwa bɛɛ, te masanɔ ndaa wa pɛ nyɛdiaa dioo, kuuwuŋ deli o tibiiyo* bɛŋgu woŋ, muŋ nda bɛɛ dia ni.”
28 Okoŋ mi Chiisu dimul ndu aa: “Chuaa, laalaŋ numndo cho bɔɔ o bɛndu. Maa i yɔŋnuŋ a num mɛɛ ŋ yeema yɛ fɔ.” Nduyɛ mi chua ndɔɔ o siaŋgu a teleŋ koŋ kpeekpei.
29 Mɛɛ Chiisu faŋaŋ loŋ, mbo kua o Pioo Kalili ikɛi. Mbo hel o pembei choo, mbo kɔ chal.
30 Okoŋ kɔɔli, mi waŋnda faŋga bɛndoo huŋ naa ndu chua. Ma huŋ a wanaa bɛvɛiya, wanaa yomiɛiya, wanaa sumɛiya, bobuaa, a wanaa lanaa suu o suu, ma kɛsi nda ndu o labɛŋguniŋ, nduyɛ mbo siŋgi nda.
31 Le hei, mi kɔndɔfillo bii waŋnda mɛɛ nda che mi bobuaa wa suɛi, mi wanaa yomiɛiya wa sioŋgɔɔ, mi wanaa bɛvɛiya wa kɔlaŋ, nduyɛ mi wanaa sumɛiya wa chɔɔ. Mi nda kpou saŋgala Mɛlɛka Isɔluɛiya.
32 Kɛ mi Chiisu veelu buɛiyaa nduaa mbo dimi aa: “Nyiɛɛye cho ya bɔɔ le waŋnda haa, kanifuule le palɛi i yaa a cho ya kɔɔli, nduyɛ a nɔ nyɛ o nyɛ nda de le. I yeema mi miŋgi nda o la nda lo lende le, yɔŋii nda kei wou nɛi tɛɛŋ a yiaaŋ.”
33 Kɛ mi buɛiyaa nduaa nyuna ndu aa: “Kuɛɛnɛ naŋ cho yɛ nyɛdiaa sɔla o fondaŋ yololiɔɔ hoo le mi faŋga bɛndoo hoo kpou de ma pim?”
34 Okoŋ mi Chiisu nyuna nda aa: “Vɛɛnɛ nya nɔ yɛ beediiyo* kpuŋgbaŋ?” Ma muli aa: “Kpuŋgbaŋ ŋɔmmɛu a suwaa pɔmbuaa nyɛɛmbɔ.”
35 Mɛɛ o dimul waŋnda le ma chal lɛŋ,
36 mbo chua beedii kpuŋgbaŋ ŋɔmmɛu koŋ a suwaa kaŋ, mbo piɛi. Mbo yimi yimi, mbo ke buɛiyaa nduaa. Nduyɛ mi buɛiyaa nduaa nda ke waŋnda.
37 Mi nda kpou dia ma pum cha. Ma chɔuviaa o biŋgi biŋgi nda dema wo, mbo pia kambɛila* bɛndulaŋ la ŋɔmmɛu.
38 Waŋ piaanduaa de nyɛdiaa hoo wa, a wa 4,000. A chɔm waŋ laanduaa a chuaambuaa le.
39 Okoŋ kɔɔli, mɛɛ Chiisu dimul waŋnda le ma miiŋgu o la nda lo, mbo luɛi o dɛndɔɔ niŋ mbo kua o tanda Makadaŋndo niŋ.
Tɛɛsiaalaŋ
^ Koŋ cho ni, balaŋ pulɔɔ a mɛɛ naamoo dimi yɛ.
^ Kilikiiye, pɔniaa. Tofa Tɛɛsiaa.
^ Koŋ cho ni, balaŋ pulɔɔ a mɛɛ naamoo dimi yɛ.
^ Ɔɔ “tabalioo.”
^ Ɔɔ “buloo.”
^ Ɔɔ “kambɛila nda wou nyɛdiaa laŋ.”
