Maatiu 20:1-34
20 “Masale Mɛlɛkaleŋ o choo choo niŋ le cho machuaa maa wana bɛndu pilɛ o pena fula idii puŋ le waŋ walla nuuviaa le wallo o kpele ndɔɔ niŋndo.
2 Mɛɛ nda chɛlaŋ nda waŋ walla le mbo paawa* nda dinaluɛiye* ipilɛ le paaleŋ kpɛŋ, mbo yɔŋ nda o kpele ndɔɔ niŋ.
3 Kɛ a lɔɔ 9:00 idiiyo,* mbo fula, mbo cha puaa apum isisi o lɔɔ niŋ, a ve nyɛ o nyɛ tosa le.
4 Kaŋ bɛɛ mbo dimul nda aa, ‘Nya bɛɛ la kɔ tosa wallo o kpele nuu niŋ, nduyɛ I cho nya paawa mi la hini kɔl.’
5 Ma kua. A lɔɔ 12:00 ipalaa,* mbo kua vɛlɛ kela waŋ walla. Lɔɔ 3:00 ipalaa* bɛɛ, lende koni o tosa ni.
6 O mɛɛlulaŋ, mbo kua vɛlɛ a lɔɔ 5:00 a paale yɔŋgaŋndeŋ.* Okoŋ, mbo saaluŋ vɛlɛ puaa cheleŋ isisi, a ve nyɛ o nyɛ tosa le. Mbo dimul nda aa, ‘Le yɛɛ nya niilu yɛ hau nanuŋ kpɛŋ la tosa nyɛ o nyɛ le?’
7 Ma muli aa, ‘Kanifuule, wana o wana chue naa le wali le.’ Mbo dimul nda aa, ‘Nya bɛɛ la kɔ tosa wallo o kpele nuu niŋ.’
8 “Mɛɛ paaleŋ le del doŋ, mi wana nɔ kpeloo wo dimul wana wa waŋ walla bolleŋndo aa, ‘Veelu waŋ walla ma paawa nda, kanduŋ a wanaa mɛɛlaa, mbo kɔ bii a wanaa tasiaa.’
9 Mɛɛ wanaa hiŋ a lɔɔ le 5:00 a paale yɔŋgaŋndeŋ nda hiŋ le paawa ndaa, mi o kɛ kɛ sɔla dinaluɛiye* ipilɛ.
10 Okoŋ, mɛɛ wanaa tasiaa hiŋ le paawa ndaa, ndaa yiyaŋ ko maa a cho sɔla ma hiou puaa a piliaa. Kɛ nda bɛɛ paawa pilɔɔ kpe nda sɔla ni, dinaluɛiye* ipilɛ.
11 Mɛɛ nda sɔla paawa ndaa, ma kandu ŋɔɔchiaŋndo a wana nɔ kpeloo wo.
12 Ma dimi aa, ‘Le hawɛiyo* opilɛ koni puaa mɛɛlaa haa tosa wallo ni. Naa yɛ, ŋ niilu fafalaa hau kpɛŋ o paaleŋ, kɛ a koŋ kpou, ma paawa naa nyɛ pilɔɔ kpe naa ndaa!’
13 Kɛ mi wana nɔ kpeloo wo dimul puaa kaŋ opilɛ aa, ‘Poo sei, I tosal num lakafa le. Ŋ chɛlaŋ le mi paawa num dinaluɛiye* ipilɛ le paaleŋ, lende le?
14 Bii nyɛ cho le numndo ma kuɛŋnuŋ. I yeema mi paawa wanaa mɛɛlaa mɛɛ ya paawa num yɛ.
15 Baa I nɔ di le mi tosa nyɛ ya yeema wo a nyɛm nuŋ te? Baa paŋalaa* ŋ cho ni le mɛɛ ya tosal nda kɛndɛi yɛ?’
16 O nɛiyo hoo choo, wanaa mɛɛlaa cho simnɔŋ wanaa tasiaa, mi wanaa tasiaa simnuŋ wanaa mɛɛlaa.”
17 Mɛɛ Chiisu nda kiilaa nduaa 12 nda wa kɔlaŋ Chulusalɛm, mbo sei a nda o nɛiyo ikɛi mbo dimul nda aa:
18 “Ŋ cho kɔlaŋ Chulusalɛm, nduyɛ loŋ nda cho Po wana pɔnɔɔ malɔɔ masaa wanaa soliaa lasalaa, a wanaa pɛɛku waŋnda sawala Mɛlɛkalaŋ nda o ba ni. Nduyɛ, ma kilul ndu yamɛi le ma dii ndu.
19 Okoŋ kɔɔli, a cho ndu malɔɔ wanaa cho ŋChuu le wa o ba, ma mam ndu, ma lɔɔ ndu, nduyɛ ma dii ndu o yɔmndo choo. Kɛ o paale yaa ndɔleŋ choo, mbo miiŋgu yoomu.”
20 Okoŋ kɔɔli, mi kalaa puaa Sɛbidiya huŋ naa Chiisu chua a puaa nduaa. Mbo beŋ Chiisu wulaŋ, nduyɛ mbo nyuna le mbo tosal ndu nyɛ.
21 Mi Chiisu nyuna ndu aa: “Yɛɛnɛ ŋ yeema yɛ?” Mbo muli aa: “Nyɔɔloo ya cho num ni le mi puaa niaa ŋiɔɔŋnda haa chal num ikɛi o Masale numndeŋ niŋ. Hoo o ba num kɛndɔɔ choo, opilɔɔ o ba num miallo choo.”
22 Mi Chiisu mulul ndu aa: “La sina pɛŋ nyɛ nya cho hoo nyunaa le ndu wo le. La nɔla pa mi la kol o taala ya cho hunɔɔ kolɔɔ wo niŋ?” Ma muli aa: “Ŋ nɔla.”
23 Mi Chiisu dimul nda aa: “Tonya, la kol niŋ o taala nuu hoo niŋ. Kɛ te o wa le challe o ba ni kɛndɔɔ choo a o ba ni miallo choo pɛ, o cho ya le yɔŋgu wana fonda koŋ te. Kɛ le wanaa Finya nuu hɛli wa fonda koŋ cho ni.”
24 Mɛɛ kiilaa a piliaa tuei nyɛ puaa ŋiɔɔŋnda haa tosa wo, ma tuulu kɔl a nda.
25 Kɛ mi Chiisu veelu nda, mbo dimul nda aa: “La sina maa wanaa cho masaa o chieeŋndo niŋnda, mɛɛ nda yeema yɛ nda bii waŋnda ni. Nduyɛ, kindilaa pila nda kindila wanaa nda cho masaleŋ choo wa ni.
26 Kɛ o cho lende le i nɔ mi i wa nya tɛɛŋ te. Wana o wana yeema pɛ mbo wa wana bɛndoo nya tɛɛŋ, o nɔ mbo wa buɛiyo le nya.
27 Nduyɛ wana o wana yeema pɛ mbo wa wana tasoo nya tɛɛŋ, o nɔ mbo wa chiɔɔ le nya.
28 Lende koni Po wana pɔnɔɔ tosa ni. O hiŋ le mi wana tosal ndu wali le. Kɛ le mbo tosal waŋnda wallo, nduyɛ mbo yɔŋgu yoomu ndɔɔ le wanaa bɔɔbɔɔ baŋaa.”
29 Mɛɛ nda wa faŋaŋndo Chɛluiko, mi faŋga bɛndoo tual ndu kɔɔli.
30 Wanaa sumɛiya wa ichali o nɛiyo daŋgala nda ŋiɔɔŋ. Mɛɛ nda tuei maa Chiisu cho hiouwɔɔ, ma deŋi choo choo aa: “Masanɔɔ, Po Deevioo, tuiinuŋ naa inyiɛɛ fɔ!”
31 Mi faŋgaa kpaa nda, ma wa nda dimullo le ma pɛŋgi bɔɔluuwo. Kɛ ma chɔɔlu deŋi choo choo aa: “Masanɔɔ, Po Deevioo, tuiinuŋ naa inyiɛɛ fɔ!”
32 Mi Chiisu sim mbo veelu nda. Mbo nyuna nda aa: “O yɛɛnɛ nya yeema yɛ mi tosal nya?”
33 Ma mulul ndu aa: “Masanɔɔ, ŋ yeema ma tosa miŋ che.”
34 Mi nyiɛɛye bii Chiisu tau le nda. Okoŋ mbo pilaŋ nda hɔltaŋ. O lepilɛ niŋ kpe, ma cha. Nduyɛ ma tual ndu kɔɔli.
Tɛɛsiaalaŋ
^ Ɔɔ “sala.”
^ Tofa Tɛɛsiaa.
^ Kilikiiye, “hawɛi ɔɔ lɛɛlɛ yaa ndɔɔ.”
^ Kilikiiye, “hawɛi ɔɔ lɛɛlɛ ŋɔmpumndo.”
^ Kilikiiye, “hawɛi ɔɔ lɛɛlɛ ŋɔmahiɔɔloo.”
^ Kilikiiye, “hawɛi ɔɔ lɛɛlɛ 11.”
^ Tofa Tɛɛsiaa.
^ Tofa Tɛɛsiaa.
^ Ɔɔ “lɛɛlɔɔ.”
^ Tofa Tɛɛsiaa.
^ Kilikiiye, “nɛyɔŋndo.”
