Maatiu 23:1-39
23 Okoŋ kɔɔli, mi Chiisu suaa naa faŋgaa chua a buɛiyaa nduaa aa:
2 “Wanaa pɛɛku waŋnda sawala Mɛlɛkalaŋ nda a Falisiiya chua foofo Muuse wo.
3 Lelaŋ, nyɛ o nyɛ nda dimul nya pɛ le tosaa, la tosa, kɛ la tual kaala ndalaŋ kɔɔli le. Kanifuule, o cho nyɛ nda dimi wo le nda tosa le.
4 A bii pɛ a chua wolɔɔla lusulɛilaŋ a handu chaanda o lachoŋgu, kɛ suei bɛɛ ndapila yee le laŋ chuaa le.
5 A yeema mi waŋchieeya che nyɛ o nyɛ nda tosa. Nyɛla waŋnda wounuŋ a diom Mɛlɛkaa leniŋ ndaŋ, ma tosa la ndalaŋ la bɛndu foodoo le ndapila mandaa. Nduyɛ ma bɛndi domala ndalaŋ lɔndi lɔndi.
6 Te a kuɛ pɛ o dunyaŋ, o fondaŋnda kɛndɛ kɛndɛlaŋ nda yeema challe ni. Nduyɛ te a kuɛ pɛ o chiɛila Chuuwa piɛi Mɛlɛka laŋ niŋ, o kpeŋgbeila* cho lachi* laŋ choo nda yeema challe ni.
7 Te a wa o luŋ* pɛ, a yeema mi waŋnda yil nda yilɔɔ teŋgeŋndo, nduyɛ ma veelu nda aa Wana Pɛɛkaa.
8 Kɛ nya nya, la chɛl ma veelu nya Wana Pɛɛkaa laŋ te, kanifuule Wana Pɛɛkaa opilɛ kpe nya nɔ ni. Kɛ nduyɛ, nya kpou puaapiliaa nya cho ni.
9 La veelu wana o wana o chieeŋndo choo naŋ aa finya nya le, kanifuule Finyaa opilɛ kpe nya nɔ ni, hoo o choo choo niŋ.
10 La chɛl ma veelu nya wanaa bɛnduaa laŋ te, kanifuule Wana Bɛndoo opilɛ kpe nya nɔ ni, Kiliti.
11 Kɛ wana bɛndoo nya tɛɛŋ nɔ mbo wa buɛiyo le nya.
12 Wana o wana heeluŋ pɛ, Mɛlɛka cho ndu tusi. Kɛ wana o wana tusiŋ pɛ, Mɛlɛka cho ndu heelu.
13 “Nyɛpalaa cho le nya wanaa pɛɛku waŋnda sawala Mɛlɛkalaŋ nda a nya Falisiiya. La cho wanaa mulu muluaŋ! Kanifuule, la kindal chaanda dioo le luɛiyɔɔ o Masale Mɛlɛkaleŋ niŋ o choo choo niŋ. Nyapila luei le, nduyɛ la chɛl vɛlɛ mi wanaa yeema luɛiyɔɔ wa luɛi le.
14 *——
15 “Nyɛpalaa cho le nya wanaa pɛɛku waŋnda sawala Mɛlɛkalaŋ nda a nya Falisiiya. La cho wanaa mulu muluaŋ! Kanifuule, mi la kuɛ ba o ba fee le waŋndo nuuviaa mbo simnuŋ wana laalaŋndo.* Kɛ okoŋ kɔɔli, mi la tosa vɛlɛ mi wana koŋ o huŋ kɔ Kɛhɛna* bɛmbɔɔ le diiŋ mbo hiou bɛɛ nyapila.
16 “Nyɛpalaa cho le nya simlachiaa sumɛiya. La dimi aa, ‘Te waŋndo chua pɛ buŋgɛi mbo mɛnaŋ a chiɛi Mɛlɛkaa, o cho suɛi wɔɔŋ te. Kɛ te waŋndo chua pɛ buŋgɛi mbo mɛnaŋ a kooliiyoŋ* o chiɛi Mɛlɛkaa niŋ, o nɔ mbo peelu buŋgɛi keŋ.’
17 La cho diɔmaa sumɛiyaa bɛndu! Kooliiyoŋ a chiɛi Mɛlɛka tosa mi kooliiyoŋ wa le Mɛlɛka wo, o kuɛɛnɛ hiou yɛ wa o sɔvɛ?
18 La dimi vɛlɛ aa, ‘Te waŋndo chua pɛ buŋgɛi mbo mɛnaŋ a bandu luamaa lasalaa, o cho suɛi wɔɔŋ te. Kɛ te waŋndo chua pɛ buŋgɛi mbo mɛnaŋ a sala cho o bandu koŋ choo wo, o nɔ mbo peelu buŋgɛi keŋ.’
19 Nya wanaa sumɛiya haa! Salaa a bandu luamaa lasala tosa mi salaa wa le Mɛlɛka wo, o kuɛɛnɛ hiou yɛ wa o sɔvɛ?
20 Lelaŋ, wana o wana chua pɛ buŋgɛi mbo mɛnaŋ a bandu luamaa lasalaa, mɛɛ o chii mɛnaŋ a ndu vɛlɛ a nyɛ o nyɛ cho lechoo.
21 Nduyɛ, wana o wana chua pɛ buŋgɛi mbo mɛnaŋ a chiɛi Mɛlɛkaa, mɛɛ o chii mɛnaŋ a Mɛlɛka cho o chiɛi koŋ niŋndo.
22 Nduyɛ wana o wana chua pɛ buŋgɛi mbo mɛnaŋ a choo choo, mɛɛ o chii mɛnaŋ a kpeŋgbei lemasa Mɛlɛkaa vɛlɛ a wana cho ichali lechoo wo.
23 “Nyɛpalaa cho le nya wanaa pɛɛku waŋnda sawala Mɛlɛkalaŋ nda a nya Falisiiya. La cho wanaa mulu muluaŋ! Kanifuule, mi la yɔŋgu talama miŋtiiyo, a diliiyo, a kiumiŋndo.* Kɛ sɔɔŋ hiou wa ŋ sɔvɛ o Sawala Mɛlɛkalaŋ niŋndoŋ, mɛɛ sandei, nyiɛɛye, a waa sakpo cho nuaa yɛ, mi la kpeeŋa muŋ ikɛi. Sɔɔŋ muŋ cho nya kuee le tosaa, kɛ la nɔ mi la kpeeŋa sɔɔŋ cheleŋndoŋ ikɛi le.
24 Nya wanaa sumɛiya haa, mi la yuei mɛŋma nya kol laŋ le nyaa pɔmbuaa deli leniŋ nda, kɛ mɛɛ nyɔɔmiɔɔ cho nuaa yɛ, mi la mel koŋ.
25 “Nyɛpalaa cho le nya wanaa pɛɛku waŋnda sawala Mɛlɛkalaŋ nda a nya Falisiiya. La cho wanaa mulu muluaŋ! Kanifuule, mi la tuei taalaa a hɛŋgɛiyo o kɔɔ fo fo, kɛ hɔlte bɛndeŋ a pululeŋ le cho nya le piaa niŋ cha.
26 Nya Falisiiyaa sumɛiya haa, la dindi wɔ fɛlɛŋ taalaa ɔɔ hɛŋgɛiyo leniŋ. Okoŋ, o nɔla mbo wa o diandaa o kɔɔ.
27 “Nyɛpalaa cho le nya wanaa pɛɛku waŋnda sawala Mɛlɛkalaŋ nda a nya Falisiiya. La cho wanaa mulu muluaŋ! Kanifuule, la cho ko maa sɛila nda suu pɔu humboo laŋ. O kɔɔ, naŋɔɔ pila la naŋ ni. Kɛ leniŋ ndu, la piaa cha a paala waŋvilɛiya, vɛlɛ a nyɛm wɔɔŋ suu o suu ko.
28 Lende koni nya bɛɛ cho ni. Waŋnda o hɔl, mi la chɔm maa la cho wanaa sakpo. Kɛ kaa mulu muluaŋndo a sɔɔŋ wɔɔŋ suu o suu cho nya ŋ piaa niŋ cha.
29 “Nyɛpalaa cho le nya wanaa pɛɛku waŋnda sawala Mɛlɛkalaŋ nda a nya Falisiiya. La cho wanaa mulu muluaŋ! Kanifuule, mi la chɔu sɛila wanaa ndaa suaa le Mɛlɛka wa, nduyɛ mi la bɛɛndiaa sɛila* wanaa cho sakpo wa nyɛkɛndɛi.
30 Mi la dimi aa, ‘Te naŋ wa teleŋ finyaa naa mamaa a wa sindɛ wo pɛ, ŋ ve nda sɔɔŋguu ikɛi le wanaa ndaa suaa le Mɛlɛka wa diuwo le.’
31 Kɛ, la cho chɔmndo kpendekele maa wanaa diu kaŋ wanaa ndaa suaa le Mɛlɛka wa, chuauwaa ndaa nya cho ni.
32 Mɛɛ la siou niko wali finyaa nyaa mamaa kandu wo.
33 “Nya kɛuwaa wɔɔŋ wɔɔŋnda haa, vɛɛ nya hialuŋ yɛ niŋ yamɛi cho nya hunɔɔ kilulɔŋ le kɔlaŋ Kɛhɛna* ve.
34 Le saboo hoo, I cho wanaa suaa le Mɛlɛka wa, a wanaa taasiaa, a wanaa pɛɛku waŋnda sawala Mɛlɛkalaŋ nda viomɔɔ naa nya chua. La cho apum diyɔɔ, apum mi la dii nda o yɔmndo choo, apum mi la lɔɔ nda o chiɛila Chuuwa piɛi Mɛlɛka laŋ niŋ, nduyɛ mi la tusi nda nyɛpalaa choo o chiooŋ niŋ,
35 le halikpeŋ mi tɔɔyaŋ piɔm wanaa sakpuaa kpou o chieeŋndo choo wa nya choo. Chɔŋ a piɔm wana sakpoo Ebɛl mbo kɔ bii a Sɛkalaya po Baluakaya wo, o nya dii o chiɛi Mɛlɛkaa hɔlndɔ, o bandu luamaa lasalaa ikɛiyo.
36 A tonya mi dimul nya, nyɛpalaa cho nya hunɔɔ choo le sɔɔŋ nya tosa muŋ ndoŋ kpou.
37 “Ee nya waŋnda Chulusalɛm! La diu wanaa ndaa suaa le Mɛlɛka wa, nduyɛ mi la vii vii wanaa nda vem o nya lo wa a poutaŋ. Teleŋ o teleŋ I wa kindiŋndo le nya chuuŋgiaa naapilɛ mɛɛ sɔɔ komsaa chuuŋgiaa nuaa chuauwaa nduaa o kumbaŋnda ndɔlaŋ bɛŋgu yɛ. Kɛ la chɛl te.
38 Le saboo hoo, Mɛlɛka chii chiɛi nyaa baa faŋa choo.*
39 Mi dimul nya, la chi lɛ niŋ ya le haaa mi la huŋ dimi aa, ‘Salaa cho le wana hiŋ hoo o diola Chɛhowa* laŋ niŋndo!’”
Tɛɛsiaalaŋ
^ Ɔɔ “kpɛŋɛla.”
^ Ɔɔ “sɔvɛ sɔvɛ.”
^ Ɔɔ “o lɔɔ niŋ.”
^ Tofa Tɛɛsiaa.
^ Ɔɔ “wana lekaa wo.” Koŋ cho ni, wana chɛl piɛile Chuuwa wo.
^ Tofa Tɛɛsiaa.
^ Ɔɔ “sianioŋ.”
^ Miŋtiiyo, diliiyo, a kiumiŋndo cho nyɛm nda wou o nyɛdiaa le chuŋ kɛndɔɔ woŋ ni.
^ Ɔɔ “sɛila loonaŋndaŋ.”
^ Tofa Tɛɛsiaa.
^ Ɔɔ naapum, o mal ndu le tambei sɔlaa.
^ Tofa Tɛɛsiaa.
