Maatiu 24:1-51
24 Mɛɛ Chiisu wa faŋaŋndo o chiɛi Mɛlɛkaa, mi buɛiyaa nduaa sɔɔŋguu ndu ikɛi ma chɔm ndu taŋgulta yɛ yɛla wa o fondaŋ chiɛi Mɛlɛkaa laŋ.
2 Mbo dimul nda aa: “La cho pa taŋgulta yɛ yɛlaŋ ndaŋ chɔɔ? A tonya mi dimul nya, pouwo opilɛ bɛɛ lo niŋ o chaaŋ ndɔ choo le. Laŋ kpou la cho koombiaa.”
3 Mɛɛ o wa ichali o Pembii Ɔlifiive choo, mi buɛiyaa nduaa sɔɔŋguu ndu ikɛi nda kpeele, ma nyuna ndu aa: “Dimullɔ naa, boondii kuɛɛnɛ sɔɔŋ muŋ cho yɛ yɔŋnɔŋ? Nduyɛ tamasi yɛɛ yɔŋnuŋ yɛ niŋ le chɔmndo maa a miiŋgu nanuŋ?* Yɛɛ yɔŋnuŋ yɛ niŋ le sinaa maa mɛɛlula chieeŋndo hoo* la fuuluu?”
4 Mi Chiisu mulul nda aa: “La mandaŋ yɔŋii wana hui nya.
5 Kanifuule, wanaa bɔɔbɔɔ huŋ niŋ o diola nilaŋ niŋ ma dimi aa, ‘Ya cho Kiliti ni,’ okoŋ ma hui wanaa bɔɔbɔɔ.
6 La tuɛi niŋ a chɔulaŋ okɔɔ, vɛlɛ a konala chɔulaŋ. Kɛ siooŋii bii nya le, kanifuule sɔɔŋ muŋ nɔ le yɔŋnɔŋndo fɛlɛŋ, kɛ koŋ cho wɔ lamɛɛlu le.
7 “Lɛŋndeŋ le cho sɔŋga a lɛŋndeŋ, mi masaleŋ le sɔŋga a masaleŋ. Yima bɛnduaŋ ma del niŋ, nduyɛ lɛŋnde nyiiyaaleŋ le wa niŋ o fondaŋnda bɔɔbɔɔ.
8 Kɛ sɔɔŋ muŋ kpou ŋ wa niŋ mawaa nyɛpalaa kandɔŋndo, mɛɛ pulii vialɛi kandu nuaa wana lanɔɔ nɛiyo yɛ.
9 “A boondii keŋ, a bii niŋ nya ma tusi nya nyɛpalaa choo nduyɛ ma dii nya. Waŋnda kpou a cho nya yɛleŋ tul le diola nilaŋ.
10 Nduyɛ keŋ tosa niŋ mi wanaa bɔɔbɔɔ a mal tiindaŋ nda nɔ o Mɛlɛka niŋndo, ma piisiaŋ o waŋnda lo, nduyɛ ma tulnaŋ yɛleŋ vellaa velle.
11 Wanaa lachoowaa dimi maa le Mɛlɛka nda suaa ni wa a wa niŋ tau, nduyɛ ma hui wanaa bɔɔbɔɔ.
12 Le mɛɛ dɛnɛ wɔɔŋndo cho hiouwɔɔ lachi a kuiyo yɛ, kaala wanaa bɔɔbɔɔ nɔ wo cho nyulul.
13 Kɛ wana o wana biunuŋ pɛ haaa o mɛɛlulaŋ, o cho pioŋɔɔ sɔla.
14 Nduyɛ, yooŋgu kɛndɔɔ hoo a Masale Mɛlɛkaleŋ okɔɔ cho dimiŋ ba o ba fee o chieeŋndo choo, le mi waŋnda kpou tuei. Okoŋ, mi mɛɛlula chieeŋndo la fuuluu.
15 “Lelaŋ, te la che pɛ mi nyɛ nɔɔlɛi tɛɛmbuu nyɔɔŋ ndo sim o fondaŋ diandaa, a mɛɛ Daaniɛɛ wana ndoo suaa le Mɛlɛka wo dimi yɛ (wana cho tofaa o yauwo hoo niŋndo yiyaŋ nyɛkɛndɛi le suɛi hei biyɔɔ bila),
16 mɛɛ wanaa cho Chudiaa wa kandu nyaanɔŋndo o pemboŋ choo.
17 Wana cho o chiɛiyo choo wo tual lɛ lɛŋ, mbo luɛi chiɛiniŋ le nyɛm ndɔŋ chuaa le.
18 Wana cho o chiɛi nduɛi niŋndo miiŋgu lɛ le doma ndɔɔ chuaa le.
19 Nyɛpalaa wa niŋ bɔɔ le wanaa lafoliaa* a komsaa o palɛi keŋ niŋ!
20 La hiou lachi a piɛileŋ yɔŋii kilta laŋ la komal nya a sialteŋ ɔɔ o Paale Pɛŋgiaaleŋ choo.
21 Kanifuule, nyɛpalaa bɛndoo wa niŋ bɔɔ. Kani mi chieeŋndo kanduŋ mbo huŋ bii a hau, nyɛpalaa waa lende yɔŋnuŋndɔ le, nduyɛ o yɔŋnuŋ lɛ niŋ vɛlɛ le.
22 Te o cho mi Mɛlɛka faŋa palɛi keŋ i tiŋ lechoo le, wana o wana sɔla niŋ pioŋɔɔ le. Kɛ le sabu wanaa o hɛli wa, o cho palɛi keŋ faŋa i tiŋ lechoo.
23 “Lelaŋ te waŋndo dimul nya pɛ aa, ‘Mi cheŋ Kiliti nanuŋ,’ ɔɔ ‘O cho o nda!’ la laalaŋ ndu le.
24 Kanifuule, wanaa lachoowaa dimi maa nda cho Kiliti ni wa, a wanaa lachoowaa dimi maa le Mɛlɛka nda suaa ni wa, a cho chɔnɔŋ ma wa walta kaamaala suu o suu tosaa le waŋnda huiyo, hali wanaa sɔla hɛlioo wa bɛɛ.
25 Lelaŋ ya cho nya pɔɔ silaa ni.
26 Te waŋnda dimul nya pɛ aa: ‘La nuawɔ ndu o pollo niŋ nda,’ la kua loŋ te. Ɔɔ ma dimul nya aa, ‘O cho chiɛiniŋ nda,’ la laalaŋ nda le.
27 Kanifuule, mɛɛ nyɔɔ tosa nuaa ŋualalɛi o choo choo niŋ mi paŋgeloo tiu silɔ yɛ, lende hunɔɔ* Po wana pɔnɔɔ wa niŋ ni.
28 Ba o ba nyɛ vilɛiyo wa pɛ, loŋ koviaa* chuuŋgiaŋ ni.
29 “Te palɛi nyɛpalaa koŋ i hiou dɔɔ pɛ, nyumndaŋ ma kumbu niŋ paaleŋ kpu, mi paŋgei bɛɛ i pɛŋgi diondɔɔ, nduyɛ mi looŋ fula o choo choo niŋ miŋ deli. Okoŋ mi kpaayalaŋ o choo choo niŋ la hiiluŋ woku woku.
30 Tamasilaŋ la cho chɔmnɔŋ o choo choo niŋ le sinaa maa Po wana pɔnɔɔ chɛŋ hunɔɔ. Nduyɛ, waŋnda o kaalaŋ niŋ o chieeŋndo choo kpou wa niŋ viiviŋndo a chaŋndo, ma che Po wana pɔnɔɔ hunɔɔ o yumbu yumboo niŋ o choo choo niŋ a kpaayaa vɛlɛ a naŋɔɔ bɛndoo.
31 Nduyɛ te bulu bɛndoo soo pɛ, o cho maalikɛiyaa nduaa viomɔɔ o sɔŋgilaŋ* kpou o chieeŋndo choo, vɛlɛ a ba o ba fee o choo choo niŋ, le wanaa nduaa o hɛli wa chuuŋgiaa.
32 “La chua wɔ tamaseliiyo a yɔm mafikiiyo okɔɔ. Te lɛuwuŋ yɔmndo hoo ŋ kandu dɔɔ pɛ pei sɛnɛiye solioo, la sina dɔɔ maa teleŋ tualaa fuuluu.
33 Nya bɛɛ, te la che pɛ sɔɔŋ muŋ, la sina maa o cho niŋ o dio.
34 A tonya mi dimul nya, waŋnda teleŋndo hoo a chuu niŋ wu le mi sɔɔŋ muŋ kpou ŋ yɔŋnuŋ.
35 Choo choo a lɛŋndeŋ cho faŋaŋ, kɛ diomnda nilaŋ la feŋaŋ lechoo le.
36 “Wana o wana sina paale leŋ a hawɛi* koŋ te. Maalikɛiya o choo choo niŋ a Po wana pɔnɔɔ bɛɛ sina le, mɛɛ Finyaa ndupilɛ kpe.
37 Mɛɛ palɛi Nuuwa ve wa yɛ, lende koni hunɔɔ* Po wana pɔnɔɔ wa niŋ ni.
38 A boondii keŋ tuupa Mɛŋma Koŋgi Bɛnduaŋ, waŋnda wa diolaŋ a kolɔɔ, puaa wa laanduaa chuaa nduyɛ mi waŋ laanduaa wa challe o nɔlaŋ, haaa a paale Nuuwa luɛi o dɛndɔɔ niŋndeŋ.
39 A dou ndi taasi le, haaa mi Mɛŋma Koŋgi Bɛnduaŋ ma huŋ basu nda tɛɛ. Lende boondii Po wana pɔnɔɔ cho miiŋgu nanuŋnde i wa niŋ ni.
40 Puaa a ŋiɔɔŋ cho wa o chiɛi niŋ ma chua opilɛ, kɛ ma mɛi opilɔɔ.
41 Waŋ laanduaa a ŋiɔɔŋ wa niŋ chuoo o chiei niŋ ma chua opilɛ, kɛ ma mɛi opilɔɔ.
42 Lelaŋ, la wa lahɔl, kanifuule la sina paale Masanɔ nyaa cho hunɔɔ leŋ te.
43 “La sina hei pɛŋgu maa, te wana chiɛiyo ndoo sina pɛ boondii viinɔɔ wa hunɔɔ ichɔllo ve, o wa lo lahɔl nduyɛ ndoo chɛl mi viinɔɔ ndoo pɛl dio ndɔɔ le.
44 Lelaŋ, lende nya wa a bɛɛndiaŋ ni, kanifuule Po wana pɔnɔɔ cho hunɔɔ a boondii nya ve niŋ kɔl te ve.
45 “Nɛɛnɛ kpeekpei cho yɛ buɛi cho sakpo, nduyɛ mbo wa buɛi taasi wo, o masanɔ ndɔɔ handu hoo chaaŋaa nduaa buɛiya lachi, le mbo wa nda nyɛdiaa kioo a teleŋndo kinɛiyo?
46 Kɔl kɛndɔɔ cho le buɛi koŋ te masanɔ ndɔɔ miiŋgu pɛ mbo komal ndu hei tosaa!
47 A tonya mi dimul nya, o cho ndu handɔɔ nyɛm ndɔŋ kpou lachi.
48 “Kɛ te buɛi koŋ wa pɛ buɛi wɔɔŋ, o cho dimi o kɔl ndɔɔ niŋ aa, ‘Masanɔ nuu cho yala hunɔɔ le.’
49 Okoŋ, mbo kandu chaaŋaa nduaa buɛiya lɔɔ, nduyɛ mbo luɛinuŋ diola ndɔ a kolɔɔ nda wanaa kolaa bɛnduaa latulu.
50 Buɛi koŋ, paale o ve niŋ masanɔ ndɔɔ kɔl te leŋ, a boondii o wa niŋ o puɛiyaŋ pɔli ve o cho ndu komal ni.
51 Okoŋ, mbo tusi ndu nyɛpalaa wɔɔŋ wɔɔŋndo choo, nduyɛ mbo viou ndu naa wanaa mulu muluaŋnda cho wa. Loŋ o wa niŋ koŋullo a chiŋndoŋ sɔmndo ni.
Tɛɛsiaalaŋ
^ Tofa Tɛɛsiaa.
^ Tofa Tɛɛsiaa.
^ Ɔɔ “layolla.”
^ Tofa Tɛɛsiaa.
^ Ɔɔ naapum, duaa.
^ Kilikiiye, “kpeŋguŋ hiɔɔloŋ.”
^ Ɔɔ “lɛɛlɛ.”
^ Tofa Tɛɛsiaa.
