Maika 2:1-13
2 “Kpundɔɔ cho le wanaa tuunuŋ haa sɔɔŋ wɔɔŋndoŋ o kɔl la.A loŋnuŋ ihini o kpelela ndalaŋ choo, ma tuunuŋ sɔɔŋ wɔɔŋndoŋ o kɔl!
Te paaleŋ le sɛ niŋ dɔɔ pɛ, a tosa nyɛ nda tuu wo.Kanifuule a nɔ kpaayaa le ndu tosaa.
2 Te a che pɛ chiɔɔŋ pilaŋ ma luɛi muŋ hɔlteŋ, a poondiaa muŋ a kaka.Nduyɛ chiɛila pilalaŋ bɛɛ, ma poondiaa laŋ a kaka.Ma hɛlu waŋndo chiɛi ndɔɔ o ba o kafalaŋ choo,Nduyɛ ma poonda nyɛm kɛŋ ndɔŋ.
3 Lelaŋ, nyɛ Chɛhowa dimi wo cho hoo ni:
‘I cho bɛɛndiaŋndo le waŋnda haa nyɛpalaa tusioo choo. Nduyɛ wana pilɛ bɛɛ o heluŋ niŋ te.*
Yoŋga nya cho kiolɔɔ wo cho mɛɛlu, kanifuule teleŋ nyɛpalaa cho wa koŋ ni.
4 O paale leŋ choo, waŋnda cho taloo dimi a nya okɔɔ.A cho mɔnɛi biyɔɔ le nya, ma chaŋ chaŋndo pila.
A cho wa dimioo aa: “Mbɔ naŋ chuu fɔ!
O bii naa yondola naalaŋ o ba, mbo ke wanaa cheleŋ.
Nduyɛ chiɔɔŋ naŋ* bɛɛ o bii mbo ke wanaa cho wanaa laalaŋ te wa.”
5 Lelaŋ, wana ve niŋ nya tɛɛŋ mbo chua yoole tuwaaleŋ,Le lɛŋndeŋ piɔuwo wanaa Chɛhowa wa tɛɛŋ te.
6 Kɛ a cho dimioo aa: “La pɛŋgi yooŋgulaŋ ndaŋ dimioo!La nɔ mi la dimul waŋnda yooŋgulaŋ ndaŋ te,Siɔmbula cho naa biyɔɔ kposoŋ te!”
7 Nya cho o chiɛi Chekɔpu wo niŋnda, la tuei niŋ pa waŋnda dimioo aa:
“Baa Chɛhowa saŋga pa a biuwɔŋndo?
Kani bɛɛ o tosa wɔ pa i waa nuaa?”
O cho sɔɔŋ kɛndɔŋ te ya dimi le wanaa cho kɔlaŋ o nɛi sakpoo choo wa tosallo le?
8 Kɛ wanaa niaa simnuŋ niŋ hau yaamɔɔwaa niaa.
Te waŋnda wounuŋ pɛ nyɛla kɛndɛ kɛndɛlaŋ, ma wa kɔŋndaŋ mɛɛ waŋnda yam nuaa chɔuwo ma wa miiŋgoo yɛ,Mi la yuŋga nda o luŋ kpendekele.
9 Waŋ laanduaa cho bɛɛ o wanaa niaa tɛɛŋ nda, mi la soli nda o chiɛila ndala kɛndɛ kɛndɛlaŋ niŋ.Nduyɛ, nyɛm kɛndɛŋ ya dɔu nda sala a muŋ ndoŋ kpou, mi la poondiaa muŋ chuauwaa ndaa o laba.
10 La chɔŋ la faŋaŋ nanuŋ. O cho fonda wana chal te cho hoo le.
Kanifuule, lɛŋndeŋ le nɔɔla. Nduyɛ, le nɔ le tambii wɔɔŋ wɔɔŋnde sɔlaa.
11 Te wana fondo hui waŋnda wo kɛɛsiaŋ pɛ choolaŋ o kɔl mbo dimi aa:
“I hiŋ nya yooŋgu Mɛlɛkaa dimul a muɛiyaŋ okɔɔ,”
Wana waa lende kpeekpei waŋnda haa yeema nilaŋ yaŋɔɔ ni!
12 Nya chuauwaa Chekɔpu wa kpou, I cho nya chuuŋgiaa naapilɛ.I cho tosa a sabu mi dii wanaa tuaa lo Isɔluɛi ya diompilɛ.
I cho hunɔɔ a nda diompilɛ, mɛɛ saa wa nuaa o hioo niŋ yɛ.Mɛɛ saa kundaa kua nuaa diolaŋ o bil puiyaa niŋ yɛ, lende nda wa niŋ ni.Nduyɛ, fondaa cho hunɔɔ yɔŋnɔŋ wɔkɔ wɔkɔ a waŋnda chieeya.’
13 Wana buli kpakioo wo cho nda wa kɔlaŋ lachi.A cho kpakioo buli ma keeku o dio, nduyɛ ma fula.
Masa ndaa cho hiouwɔɔ mbo wa nda lachi.Nduyɛ, Chɛhowa cho nda wa lachi kpou ni.”
