Maika 3:1-12
3 Mi dimi aa: “Nya waŋ banaa o chiɛi Chekɔpu wo niŋ,A nya masaa Isɔluɛi, a yandii, la yaŋ nilaŋ.
Baa o cho nya le nɔ mi la sina nyɛ cho sakpo wo le?
2 Kɛ la tul sɔɔŋ kɛndɔŋ leyɛ, mi la kaala sɔɔŋ wɔɔŋndoŋ.La cho wanaa niaa kɔlulaŋ buuviaa, mi la wa visiŋ ndaŋ sɛɛsiaa mi la mɛi paalaŋ.
3 La cho visiŋ wanaa niaa dioo,Mi la wa nda kɔlulaŋ buuviaa.La cho paala ndalaŋ pesi pesioo, mi la wa laŋ chuiyo mululu,Mɛɛ nda yau nuaa visioŋ a paalaŋ o kpɛɛnɛi bɛnduei niŋ yɛ.
4 Teleŋ cho fuuluu mi la wa koŋullo o Chɛhowa lo le malaa,Kɛ o muli niŋ nya diom te.
A teleŋ koŋ, o mulul nya niŋ bɛɛ pɛŋ a hɔl te.Kanifuule, le dɛnɛ nya wɔɔŋndo.
5 Wanaa dimi maa le Mɛlɛka nda suaa ni wa, nda kpeekpei cho wanaa niaa faŋaa o nɛi tonyaa choo ni.A teleŋ nyɛdiaa wa nda o sondo wo kinɛi nda yonda ni aa, ‘Kɔl nyuloo cho!’Kɛ te waŋndo ke nda nyɛdiaa le, a dimi maa chɔuwo cho ndu komal. Lelaŋ, nyɛ Chɛhowa dimi a nya okɔɔ wo cho hoo ni:
6 ‘La cho wa o nyumndaŋ niŋ, yilaŋii ve niŋ te.Nyumndaŋ ma cho tolɔɔ kpiŋgbi le nya, la cho lɛ wa sɔɔŋ waa lachioŋ dimi le.
Paaleŋ le cho delɔɔ doŋ le wanaa suaa le Mɛlɛka wa,Nduyɛ paaleŋ le cho wa fulaa, mi nyumndaŋ ma tol kpiŋgbi le nda.
7 Siɔmbulaŋ la cho hunɔɔ wanaa cha yilaŋndoŋ nda biyɔɔ.Nduyɛ wanaa dimi sɔɔŋ waa lachioŋ nda, sondo suaa bɛɛ a nɔ niŋ te.
Nda kpou cho hunɔɔ balaŋ handɔŋ o lasondo.*Kanifuule, a nyuna bɛɛ Mɛlɛka o mulul nda niŋ te.’”
8 Kɛ ya ya, nyina Chɛhowa wo ke ya kpaayaa.O tosa mi sina nyɛ cho sakpo wo, mbo luei ya yoomuaŋ,Le mi dimul Chekɔpu sɔɔŋ wɔɔŋ o tosa woŋ,* nduyɛ mi chɔm waŋnda Isɔluɛi haki nda tosa wo.
9 Nya waŋ banaa o chiɛi Chekɔpu wo niŋ,A nya masaa Isɔluɛi, a yandii, la yaŋ nilaŋ.La tul sandei leyɛ, nduyɛ mi la mal nɛi tonyaa le sɔɔŋ tosaa o kafalaŋ choo.
10 La cho Saayɔŋ taŋgullo a kooma waŋnda chieeya, nduyɛ mi la wa Chulusalɛm taŋgullo o dɛnɛ wɔɔŋndo choo.
11 Luɛiyɔɔ niŋndo masaa* cho loŋ nda bii ni le yamaŋ kiolɔɔ.Wanaa soliaa lasalaa bɛɛ, mɛɛ mi waŋnda paawa* nda malaŋ nda pɛɛku nda.Wanaa suaa le Mɛlɛka wa bɛɛ cho waŋnda sɔɔŋ waa lachioŋ dimullo, le ma ke nda nyɛsɔlaa.*
Nda kpou yiyaŋ maa Chɛhowa nda tiindaŋ ni ma wa dimioo aa:
“Chɛhowa cho a naa latulu,
Kpundɛ o kpundɛ cho naa komal te.”
12 Kɛ nduyɛ le sabu nyaa,A cho Saayɔŋ waa mɛɛ nda waa nuaa chiɛi yɛ,Nduyɛ mi Chulusalɛm simnuŋ bembelaŋ.Pembii bɛnduei o Chiɛiyo* cho simnɔŋ fondaŋnda filioŋndaŋ o bundɔɔ niŋ.
Tɛɛsiaalaŋ
^ Ɔɔ “siɛyii ndɛi kumbɔɔ.”
^ Ɔɔ “a simul o simul Mɛlɛka wo okɔɔ.”
^ Hibuluiye, “waŋ banaa.”
^ Ɔɔ “sala.”
^ Ɔɔ “kaniŋ humboŋ.”
^ Ɔɔ “Chiɛi Mɛlɛkaa.”
