Maika 4:1-13
4 O palɛi mɛɛlɛi niŋ,Pembii bɛnduii chiɛi Chɛhowa wo cho o taŋgulaa lechoo ve,I cho lasisi pembuŋ bɛndoŋ choo kpou.Pembuŋ pɔmbɔŋ kpou cho wa lebɛŋgu pɔ pɔ.Nduyɛ, o pembei hei waŋnda wa niŋ kɔlaŋ ikpɔlɔ kpɔluɛi ni.
2 Waŋnda cho wa fulaa o lɛŋii yɛ yɛi niŋ ma wa dimioo aa:
“La huŋ miŋ kuɛŋnuŋ o pembii bɛnduii Chɛhowa ve choo.La ŋ kɔŋnuŋ o chiɛi Mɛlɛka Chekɔpu wo.
O cho naa lakɔ pɛɛku nyɛ o yeema naa miŋ tosa wo,Nduyɛ miŋ kuɛ o nɛi ndɔɔ choo.”
Saayɔŋ sawala* Mɛlɛkalaŋ la cho wa fulaa ni,Nduyɛ, mi diom Chɛhowa wo wa fulaa Chulusalɛm.
3 O cho hunɔɔ yamɛi kiolɔɔ wanaa bɔɔbɔɔ tɛɛŋ.Lɛŋii kpaaya bɛnduii cho bɛɛ kɔɔli kɔɔli ve, o cho ndi sɔɔŋ siɛɛnduu tɛɛŋ.
A cho hunɔɔ mɔɔŋ ndaŋ faŋndoŋ chɔuwɔɔ dɛndɛla waa laŋ,Nduyɛ ma chɔu balta ndalaŋ mɔɔŋ nda bɛɛndiaa tɔlɔɔlaŋ ndoŋ.
Lɛŋnde kɛ kɛ chue lɛ niŋ mɔɔŋ faŋndoŋ, mi le kɔ chiŋalaŋ lɛŋnde cheleŋ a sɔŋgɔɔ le.Nduyɛ fɛɛŋ bɛɛ a pɛɛku lɛ niŋ le kɔlaŋ o chɔuwo le.
4 Wana o wana cho hunɔɔ ichali* o yɔm ndɔ makilepiiyo, a o yɔm ndɔ mafikiiyo bɛŋgu.Nduyɛ wana o wana luei lɛ niŋ nda isiooŋ te.Chɛhowa, Mɛlɛka puaa chɔuwa* dimi lende ni.
5 Waŋnda kpede cho wa kɔlaŋ o diola mɛlɛkaa ndaa choo.Kɛ naa naa, o diola Chɛhowa Mɛlɛka naa choo naŋ cho wa kɔlaŋ ni le fɛɛŋ a fɛɛŋ.
6 Chɛhowa dimi aa: “O paale leŋ choo,I cho chuuŋgiaa namtaa wa kɔlaŋ o pelei choo wa naapilɛ,Nduyɛ mi dii wanaa saŋnuŋ nda,A wanaa yaa tusi nyɛpalaa choo wa kpou diompilɛ.
7 Namtaa wa kaŋ kɔlaŋ o pelei choo wa, nda cho lo ni.Okoŋ mi tosa mi a saŋnuŋ kaŋ kɔɔli kɔɔli wa, simnuŋ lɛŋnde kpaaya le bɛndu.Nduyɛ chɔŋ niŋ a teleŋ koŋ mbo kuɛ kɛ, Chɛhowa cho simnɔŋ masa ndaa o pembii Saayɔŋ nde choo,Le fɛɛŋ a fɛɛŋ.
8 Kɛ num cho hoo bandu mɛŋgɛlaa le chɔluaa mandaa wo,Pembii Saayɔŋ cho o taŋgulaa lechoo ve,Masale tasele wa leŋ, le cho num miiŋgu o ba.Masale waŋnda Chulusalɛm le cho miiŋgu pila.
9 Mɛɛ le yɛɛnɛ ŋ cho yɛ niko deŋioo, ma wa bɔɔluu bɛndoo hoo?
Baa a nɔ masa le?Ɔɔ wana silaa ŋ nɔ le ni?Baa keŋ tosa ni mi nyɛ nɛiyaa kpuuwa num mɛɛ pulii vialɛi kpuuwa nuaa wana folioo* yɛ?
10 Nya waŋnda Saayɔŋ, la chaŋ mi la yuuliaŋ lɛŋ,Mɛɛ pulii vialɛi kpuuwa nuaa wana folioo mbo wa nyuumbɔŋndo yɛ.Kanifuule, la cho hunɔɔ faŋaŋ chiee mi la kɔ wa yondoo niŋ.
La cho hunɔɔ lakɔ pɔɔli o lɛŋnde Babilɔŋ ndeŋ niŋ.Nduyɛ, loŋ nya cho lo ni mi la sɔla baŋaa.Loŋ nya cho lo ni mi Chɛhowa pendu nya yaamɔɔwaa nyaa o ba.
11 Lɛŋii bɔɔbɔɔ cho hunɔɔ chuuŋgiaŋ naapilɛ, ma chiŋalaŋ nya.A cho wa dimioo aa, ‘Saayɔŋ nɔ mbo simnuŋ o nɔɔlɛi.Nduyɛ mɛɛ mi hɔlta naalaŋ la che hei o yɔŋnɔŋndo.’
12 Kɛ a sina nyɛ Chɛhowa yiyaŋ ndo le.A sina bɛɛ pɛŋ nyɛ cho tuu ndɔɔ wo le.O cho nda chuuŋgiaa, mɛɛ nda kialu nuaa witiiyoŋ ma dii muŋ o yasaba yɛ.
13 Waŋnda Saayɔŋ, la chɔŋ mi la niɔu niɔu nda.I cho leela nyalaŋ siŋga mi miŋgi laŋ chiliŋnde,Nduyɛ mi siŋga buukula nyalaŋ, mi miŋgi laŋ chiliŋii siaŋɛi.La cho wanaa faŋga faŋga niɔu niɔu, mi la chui nda mululu.
La cho nyɛm nda bii waŋnda o laba o kafalaŋ choo woŋ poondiaa, mi la chuu Chɛhowa.Nduyɛ mi la bii nyɛ o nyɛ nda nɔ, mi la chuu Masanɔ tonyaa le lɛŋndeŋ kpou.”
