Maika 6:1-16
6 La yaŋ nilaŋ a yandii, o nyɛ Chɛhowa cho dimioo wo.
La chɔŋ mi la hiŋ a sɔɔŋ nyaŋ pembuŋ bɛndoŋ lachi, mi la sim le kɔɔsɔɔ.Nduyɛ, mi pembuŋ pɔmbɔŋ bɛɛ kpou tuei nyɛ nya nɔ le dimioo wo.
2 Chɛhowa bɛɛ yeema mbo kɔɔsa le ndupila.Lelaŋ, maa pembuŋ bɛndoŋ a chiyuŋ kala kalaŋ saa chieeŋndo woŋ bɛɛ kpou yaŋ nilaŋ.Kanifuule, Chɛhowa nda wanaa nduaa nɔ le kɔɔsɔɔ.O nɔ sɔɔŋ tau le chɔmndo waŋnda Isɔluɛi choo:
3 “Wanaa niaa, yɛɛnɛ kpeekpei ya yɔŋ yɛ nya?
Yɛɛ ya tosa yɛ mbo pala nya?
La chɔm sɔɔŋ ya tosal nya woŋ.
4 Ya soli nya o lɛŋnde Ichipi leŋ niŋ ni.La wa saŋgaa o chɛleŋ niŋ mi baŋa nya.Mi yɔŋ Muuse, Elɔŋ, a Meeliam nya lachi.
5 Wanaa niaa, yandii la loonuŋndɔ nyɛ Masaa Belaki o lɛŋnde Mowaabi leŋ niŋ ndoo tuu a nya okɔɔ wo.Nduyɛ la loonuŋ a nyɛ Belam po Biyɔɔ wo dimul ndu wo,Nyɛ yɔŋnuŋ chɔŋ Sitim kɔ Kikal lo.Keŋ cho nya mala mi la sina maa nyɛ cho sakpo wo Chɛhowa tosa lɔɔlɔɔ ni.”
6 A yɛɛnɛ ya cho yɛ hunɔɔ lasisi Chɛhowa lachi?
A yɛɛnɛ kpeekpei ya cho yɛ hunɔɔ tundɔŋ Mɛlɛka cho choo choo wo lachi?
Baa salala luamaala kpulukuulaŋ,A nauwaa chii niŋ wɔsioo o pilɛ wa ya cho hunɔɔ o ndu lo ni?
7 Baa Chɛhowa cho pa kɔl naŋɔɔ te I chuu ndu pɛ saa konduaa waalaŋ o waalaŋ niŋ?O cho pa kɔl naŋɔɔ te I chuu ndu pɛ chuɛiyaŋ mi ma wa ma kuaŋnaŋ kɛ kɛ maa pee?
Baa po ni tasoo ya soli niŋ sala ni le simul ya simul ndu wo,Ɔɔ po nuu ya yɔŋgu niŋ ni le haki nuu?
8 O chɔm wanachioo nyɛ bɛnda le tosaa wo.
Nduyɛ, yɛɛnɛ Chɛhowa yeema yɛ mi wanachioo tosa?
Nyɛ o yeema ndu o ba kinɛiyo cho ni maa, o nɔ mbo chɔm sandei,* mbo kaala sɔɔŋ kɛndɔŋ tosaa,*Nduyɛ mbo wa wana tusiaŋ te o wa pɛ kɔlaŋ latulu a Mɛlɛka ndɔɔ.*
9 Chɛhowa soo choo choo kpeleŋ o wanaa cho o chioo niŋnda lo.Wanaa nɔ taasioo wa cho siooŋnde nɔ le diola numndaŋ.
La handu kɔllo o sioŋnde nda cho hunɔɔ nya sila leŋ choo, nduyɛ a wana cho hunɔɔ a leŋ ndo.
10 Baa sulta dɛnɛ wɔɔŋndaŋ la cho wɔ pa o chiɛila wanaa dɛnɛ wɔɔŋnda niŋ?Ɛfaa nda tuu nyɔɔŋ* o kafalaŋ choo mi tul ndu leyɛ wo cho wɔ pa nda o ba?
11 I nɔla pa mi wa wana sakpoo te I wa pɛ kafalaŋ tosaa a sekeleilaŋ,*Ɔɔ a pouta nda soliŋ kpeku le lusul nyɔɔŋ sinaa laŋ?
12 Wanaa sulaa cho o chioo hoo niŋnda kaala bɔɔ sɔŋgɔlaŋ.Nduyɛ wanaa cho o chiee kalaa niŋnda, choolaŋ nda dimi ni.Nda kpou sondo yeelɛiyo pila nda nɔ ni le waŋnda huiyo.
13 “Lelaŋ, I cho nya lo lɔɔ haaa mi booluu nya,Nduyɛ mi tɛɛmbuu nya le hakila nyalaŋ.
14 La cho wa nyɛdiaa dioo, kɛ la cho wa pum te.Kanifuule, fofolaa cho nya delɔɔ niŋ.
O yɔŋ bɛɛ mi la veŋ nyɛm nyaŋ, la nɔla niŋ muŋ manda le.Nduyɛ nyɛ o nyɛ nya veŋ pɛ, I cho ndu malɔɔ yaamɔɔwaa nyaa o ba ma tɛɛmbuu ndu.
15 La cho wa chiɔɔŋ tosaa, kɛ la kuu niŋ te.
La cho chii ɔlifii ma nyaŋ niɔu niɔu, kɛ la soliŋ niŋ chuɛima maŋ kpeku le.Nduyɛ la cho wa muɛima sɛnɛiyaŋ toosiaa, kɛ la kol niŋ maŋ te.
16 Kanifuule, la cho kɔlaŋ o nɛila Omili laŋ choo, nduyɛ mi la wa sɔɔŋ tosaa mɛɛ yuŋgu Ehaabi wo tosa yɛ.Nyɛ o nyɛ nda dimi, lechoo nya cho kɔlaŋ ni.
Le hei, I cho tosa mi siooŋnde bii waŋnda a nyɛ cho nya yɔŋnɔŋndo.Waŋnda cho hunɔɔ chɔ wanaa cho o chioo hoo niŋnda ma hɔŋ huiye.Nduyɛ, a cho wa kelaa a nya o lasondo ma mam nya.”
Tɛɛsiaalaŋ
^ Ɔɔ “wa sakpo.”
^ Ɔɔ “mbo tosal waŋnda kɛndɛi nduyɛ mbo chɔm nda kaala lo lechoo wo.” Hibuluiye, “kaala lo lechoo wo kaalaa.”
^ Ɔɔ “mbo sina kpeleŋ ndɔɔ nda Mɛlɛka tɛɛŋ.”
^ Tofa Tɛɛsiaa B14.
^ Ɔɔ “kilolaŋ.”
