Maika 7:1-20
7 Kpundɔɔ komal la fɔ!I cho ko maa wana kuɛ nyɛm kuamaŋ lewɔɔ woŋ nuuviaa le dioo wo.Mɛɛ o kuɛ, fikiima tase ma o hɛnaŋ tau waŋ, lepilɛ bɛɛ o seeluŋ te.Nduyɛ kpɔŋjɔ makilepiiyo o pilɛ bɛɛ o seeluŋ vɛlɛ le dioo le.Kanifuule, ndaa chii niŋ maŋ kendi ma chɔuviaa maŋ paku.
2 O lɛŋndeŋ choo kpou, wana pilɛ bɛɛ cho lɛ lo lechoo wo chɔm te.Nduyɛ o ŋwaŋnda chiee tɛɛŋ kpou, wana pilɛ bɛɛ cho lɛ sakpo le.
Nda kpou cho keiyo viŋi viŋiŋndo le waŋnda diuwo.
O kɛ kɛ cho wanayɛi nduɛi yaŋɔɔleŋ* yeŋndo.
3 A nɔ niŋ kɔl kaloo o hɔbɛi le dɛnɛ wɔɔŋndo tosaa.Masaa waa cho waŋnda nyunaa le ma ke nda nyɔɔŋ.Wanaa kialaa ŋyamaa bɛɛ cho luɛiyɔɔ la niŋndaŋ biyɔɔ.Nduyɛ wanaa pɛlnuŋ ladio wa bɛɛ, nyɛ nda hɛnaŋ ndo nda baŋ waŋnda ni le ma tosal nda.Nda kpou a yiinaŋ le sɔɔŋ dɛnɛ wɔɔŋndoŋ muŋ tosaa.
4 Wana cho bɛɛ wana kɛndɔɔ nda tɛɛŋ mbo hiau a tuaa kpou wo, ndu cho ko mɛɛ yɔɔŋ cho nuaa yɛ.Nduyɛ, wana sandu mbo hiau a tuaa kpou wo, ndu wɔu mbo hiau bɔɔ ŋyɔɔ.
Kɛ paale wanaa nyaa mɛŋgɛlaa, a paale nya le kɔɔsɔleŋ le cho fuuluu.
Nda kpou siooŋnde cho nda biyɔɔ.
5 Wana laalaŋ lɛ chaaŋ num te,Kɛlɛŋgaa le, ma tiindaŋ chaaŋ num nya chii baltaŋ ndo.
Mandaŋ a wana kɔɔmiaŋ num ndo, te a wa pɛ suɛi o ndu lo.
6 Kanifuule, poleŋ le yeema bɛɛ mi le che finya ndɔ le.Mi chuaambɔ laandoo simul kala ndɔ,Nduyɛ mi lanɔɔ bɛɛ simul kalalɛi ndɔ.Waŋndo o ndu lo chiɛiniŋ kpeekpei yaamɔɔwaa nduaa cho ni.
7 Kɛ ya ya, I cho hiouwɔɔ lachi a Chɛhowa tofaa.
I cho biunɔŋ mi chum Mɛlɛka nuu, kanifuule ndu cho wana piŋi ya wo ni.
Mɛlɛka nuu cho ya diom tueiyɔ.
8 Kɛ num yaamɔɔnɔ* nuu, naŋ kɔl le kpundɛ komal la wo le.
Mi che bɛɛ I del, kɛ I cho vɛlɛ chɔnɔŋ.I cho bɛɛ o nyumndaŋ niŋ ni, kɛ Chɛhowa cho wa nyɛ ni teŋgaa ni.
9 Chɛhowa dɔɔnuŋ bɛɛ tumbe, I cho biunɔŋ.Kanifuule, I tosa hakioo a ndu.I cho chum haaa mbo suŋgu le ya, nduyɛ mbo tosa mi sɔla di nuu.
O cho hunɔɔ a ya naa nyɛ teŋgaa cho wa.Okoŋ mi che mɛɛ o cho wana sakpoo yɛ.
10 Yaamɔɔnɔ nuu bɛɛ cho chɔ,Nduyɛ mi siɔmbulaŋ la bii wana wa dimioo aa:
“Kuɛɛnɛ Chɛhowa Mɛlɛka numndo cho yɛ?”
I cho hunɔɔ wa tofaa ma wa ndu kpaatiaa,
Mɛɛ nda kpaatiaa nuaa loolioo o nɛilaŋ yɛ.
11 Nduyɛ num chioo hoo,* teleŋndo wa niŋ koŋ ni le mi kpakila numndaŋ la miiŋgu taŋgulɔŋ a poutaŋ.O paale leŋ choo, pɛŋgula numndaŋ la cho chɔɔlu naŋnɔŋ lachi.
12 O paale leŋ choo, waŋnda cho wa fulaa ba o ba fee ma hiŋ naa num chua.A cho wa chɔnɔŋndo Asiiliaa pɔɔli, a o chieeŋ bɛndoŋ niŋ Ichipi.Nduyɛ mi haa wa fulaa chɔŋ Ichipi loŋ haaa mbo kuɛ a lɛŋii fuuluu o Pee Bɛndoo* ve.Haa cho wa vɛlɛ fulaa o lɛŋii cho o peela mɛŋma ihɛllaŋ, a o pembuŋ bɛndoŋ tɛɛŋ nde.
13 Nduyɛ lɛŋndeŋ le cho hunɔɔ tambei sɔla,Le nyɛ wanaa cho leniŋ nda tosa wo.
14 Manda wanaa numnda a tinda numndo. Nda cho saa numnda a nyɛm kɛŋ numndoŋ ni.A waŋnuŋ paandu o bundɔɔ niŋ nda kpeele, o kpele nɔ yɔmii kuamɛi kɛndɛ kɛndɛiyo niŋ.
Maa tosa ma wa nyɛdiaa sɔlaa Baasiaŋ a Kiliaadi, mɛɛ ndaa sɔla ndu o sindɔɔ niŋ yɛ.
15 “I cho tosa mi la che sɔɔŋ kɔndɔfilloŋ,Nuawɔ ko mɛɛ ndii yɔŋnuŋ teleŋ nya fula o lɛŋnde Ichipi leŋ niŋndo yɛ.
16 Waŋnda o lɛŋii cheleŋnde niŋ cho chɔ, mi siɔmbulaŋ la bii nda, mi che bɛɛ a nɔ kpaayaa.
A cho hunɔɔ balaŋ handɔŋ o lasondo,Nduyɛ mi nilaŋ la baŋul nda.
17 A cho chundoo deembuu maa ŋkɛu.Maa nyaa yoomaa sasuŋ o demboo choo o lɛŋndeŋ choo wa, a cho hunɔɔ fula a nyiiyaa kpa kpa o naa ndaa viaŋnaŋnda.
A cho wa nyiiyaa ma hiŋ o Chɛhowa Mɛlɛka naa lo,Nduyɛ ma nɔ siooŋnde le ndu.”
18 Mɛlɛka kuɛɛnɛ cho yɛ maa num?Ma mal wanaa lo o nyɛm kɛŋ numndoŋ tɛɛŋ nda haki, nduyɛ ma puɛɛnuŋ a sɔɔŋ wɔɔŋ nda tosa woŋ.
A dɔɔnuŋ tumbe, ma lo o tumbe koŋ niŋ le fɛɛŋ a fɛɛŋ te.Kanifuule, kaala lo lechoo wo ŋ hɛnaŋ chɔmndo ni.
19 A cho naa vɛlɛ inyiɛɛ tuiinɔŋ maa paandu, nduyɛ ma yem yɔŋnda naala wɔɔŋndaŋ.
A cho hakila wanaa numnda kɔndɔɔ kpou, ma kɔ viou laŋ o lumnde o pee mɛŋma ihɛllo niŋ.
20 A cho wa sakpo naa Chekɔpu chua,Nduyɛ ma chɔm Ebilaham kaala lo lechoo wo.Buŋgɛi ŋ chuel finyaa naa mamaa sindɛ ve, a cho ndi peelu.
Tɛɛsiaalaŋ
^ Hibuluiye, “yala bɛndu nda yɔɔya suuwa wo.”
^ O Hibuluiye niŋ, diom nda soliŋ kpeku le suɛi a waŋ laanduaa okɔɔ wo nda soliŋ kpeku ni le diomndo hoo, “yaamɔɔnɔɔ.”
^ Naapum a Saayɔŋ ɔɔ a Chulusalɛm okɔɔ o cho suɛi ni.
^ Koŋ cho ni, Yufiluaati.
