Maki 10:1-52
-
Nɔɔ a kɛyaŋndo (1-12)
-
Chiisu dɔu chuaambuaa sala (13-16)
-
Nyuna po chua piaandu sulaa (17-25)
-
Salala soliaŋndaŋ le Masale Mɛlɛkaleŋ (26-31)
-
Chiisu soo vɛlɛ a piɔm ndɔɔ okɔɔ (32-34)
-
Nyɛ Chemisi nda Chɔŋ nyuna le ndu wo (35-45)
-
Chiisu yɔŋgu yoomu ndɔɔ le wanaa bɔɔbɔɔ baŋaa (45)
-
-
Batimayɔɔ po sumɛiyo sɔla siŋgioo (46-52)
10 Mi Chiisu faŋaŋ loŋ, mbo kua o pɛŋgulaŋ o tanda Chudiaa wo niŋ, Chɔɔdaŋ leeloo. Mi waŋnda faŋga bɛndoo huŋ chuuŋgiaŋ o fondaŋ o wa wo. A mɛɛ ndoo tosa paandu yɛ, mbo kandu nda pɛɛkoo.
2 Okoŋ, mi Falisiiya huŋ le ndu tɔɔndaŋndo. Ma nyuna ndu te o bɛnda pɛ le mi poo kɛɛ laa ndɔ.
3 Mbo nyuna nda aa: “Yɛɛ Muuse ndoo dimullɛ nya?”
4 Ma dimi aa: “Mi Muuse chɛl maa poo tiuba mbo poonyiaa yau kɛyaŋndo le laa ndɔ kiɔɔ.”
5 Kɛ mi Chiisu dimul nda aa: “Le nila kalula nyalaŋ Muuse poonyiaa sawaa hoo ni.
6 Chɔŋ o kandɔŋndo, ‘mi Mɛlɛka toosiaa wana pɔnɔɔ a wana lanɔɔ.
7 Le saboo hoo poo mɛi finya ndɔ a kala ndɔ ni,
8 okoŋ ma simnuŋ dialle ipilɛ.’ O hei niŋ, a cho lɛ wanaa ŋiɔɔŋ te, kɛ dialle ipilɛ.
9 Lelaŋ, nyɛ Mɛlɛka mɔɔsa pɛ naapilɛ, wanachiee nɔ mbo piɔu ndu tɛɛŋ te.”
10 Mɛɛ nda wa vɛlɛ chiɛiniŋ, mi buɛiyaa nduaa kandu ndu nyunaa a hei okɔɔ.
11 Mbo dimul nda aa: “Wana o wana kɛɛ laa ndɔ pɛ mbo chua lanɔ cheleŋ, mɛɛ wana koŋ suunda.
12 Nduyɛ te o yɔŋ pɛ mi wana lanɔɔ kɛɛ pɔnɔ ndɔ, mbo kɔ chal o nɔ cheleŋ, mɛɛ o suunda.”
13 Mi waŋnda kandu hunɔɔ a chuaambuaa pɔmbuaa naa Chiisu chua, le mbo handu nda balaŋ choo. Kɛ mi buɛiyaa nduaa kuuna nda.
14 Mɛɛ Chiisu che hei, mbo tambu kɔl. Mbo dimul nda aa: “La mal chuaambuaa pɔmbuaa a huŋ o ya lo. La kuuna nda le, kanifuule le haa ndoo Masale Mɛlɛkaleŋ le cho ni.
15 A tonya mi dimul nya, wana o wana chɛl Masale Mɛlɛkaleŋ maa chuaambɔ pɔmbɔɔ le, o luei leniŋ te.”
16 Okoŋ mbo chua chuaambuaa, mbo handu nda balaŋ choo, nduyɛ mbo duau nda sala.
17 Mɛɛ o wa kɔlaŋ, mi po pilɛ nyaanuŋ naa ndu chua mbo kɔ beŋ ndu wulaŋ. Mbo nyuna ndu aa: “Wana Pɛɛkaa Kɛndɔɔ, yɛɛnɛ ya nɔ yɛ mi tosa le mi sɔla yoomu fafɛɛŋndo?”
18 Mi Chiisu dimul ndu aa: “Le yɛɛnɛ ŋ veelu yɛ ya aa wana kɛndɔɔ? Wana o wana cho o kɛndɛ le, mɛɛ Mɛlɛka ndupilɛ kpe.
19 A sina sawalaŋ ndaŋ, lende le? ‘Wana dii wanachioo le, wana suunda le, wana yɔŋ levii le, wana tɛnda seile lakafa le, wana chue nyɛ pila a lakafa le, ke finya num a kala num bɛɛleŋ.’”
20 Mi poo dimul ndu aa: “Wana Pɛɛkaa, I wa wɔ o pɔmbɔ mi kandu laŋ kpou biyɔɔ.”
21 Mi Chiisu nua ndu chiŋ. Nduyɛ le mɛɛ ndoo nɔ kaalaa le ndu yɛ, mbo dimul ndu aa: “Nyɔɔ opilɛ lo wɔ num le tosaa ni. Kɔ pisi nyɛm ŋ nɔ woŋ ma ke wanaa bala fonduaa kaniŋ muŋ. A cho sullo sɔla o Mɛlɛka lo. Okoŋ a hiŋ, a tol la kɔɔli.”
22 Kɛ mbo tambu kɔl le nyɛ o tuei hoo wo. Okoŋ mbo kuaŋnuŋ, kanifuule ndoo nɔ nyɔɔŋ tau.
23 Mɛɛ Chiisu mɛɛndiaŋ, mbo dimul buɛiyaa nduaa aa: “I cho ikala le mi wanaa nɔ kanioŋ* tau wa luɛi o Masale Mɛlɛkaleŋ niŋ.”
24 Kɛ mi kɔndɔfillo bii buɛiyaa nduaa le nyɛ o dimi hoo wo. Mi Chiisu dimul nda aa: “Chaaŋaa niaa,* i cho ikala le luɛiyɔɔ o Masale Mɛlɛkaleŋ niŋ.
25 I cho bɛɛŋ bɛɛŋ le mi nyɔɔmiɔɔ kei o tɛɛŋgu lesiɛndioo niŋ, mbo hiau wana sulaa luɛiyɔɔ o Masale Mɛlɛkaleŋ niŋ.”
26 Mi kɔndɔfillo chɔɔlu nda biyɔɔ. Ma nyuna ndu* aa: “Mɛɛ mi nɛɛnɛ kpeekpei sɔla yɛ niŋ pioŋɔɔ?”
27 Mi Chiisu tofa nda o lahɔl mbo dimul nda aa: “Wanachioo nɔla ndi tosa le. Kɛ Mɛlɛka ndu nɔla mbo tosa nyɛ o nyɛ.”
28 Mi Pitɛ kandu ndu dimullo aa: “Ŋ mal nyɛ o nyɛ miŋ tual num kɔɔli.”
29 Mi Chiisu dimi aa: “A tonya mi dimul nya, wana o wana mɛi pɛ chiɛi ndɔɔ, ɔɔ bɛndaa nduaa, ɔɔ pɔmbuaa nduaa, ɔɔ yemaa nduaa, ɔɔ kala ndɔ, ɔɔ finya ndɔ, ɔɔ chuauwaa nduaa, ɔɔ yondola ndɔlaŋ le mɛɛ o cho buɛi nuu a le sabu yooŋgu kɛndɔɔ yɛ,
30 Mɛlɛka cho ndu hunɔɔ hendul lechoo hiouwɔɔ bɛmbɔɔ 100 o teleŋndo hoo niŋ. Okoŋ mbo sɔla chiɛilaŋ, bɛnduaa, pɔmbuaa, yemaa, kalla, finyaa, chuauwa, a yondolaŋ. A koŋ kpou, tɔɔndaŋndaŋ la cho ndu komal. Nduyɛ mbo huŋ sɔla yoomu fafɛɛŋndo o chilaŋ* niŋ.
31 Wanaa bɔɔbɔɔ cho hau wanaa tasiaa wa cho hunɔɔ simnɔŋ wanaa mɛɛlaa, mi wanaa mɛɛlaa simnuŋ wanaa tasiaa.”
32 Chiisu nda buɛiyaa nduaa wa o nɛi tɛɛŋ le kɔlaŋ Chulusalɛm, mbo wa nda kɔlaŋ lachi. Mi kɔndɔfillo bii nda. Kɛ mi siooŋnde kandu wanaa wa nda tolɔɔ kɔɔli wa biyɔɔ. Okoŋ, mbo sei vɛlɛ a kiilaa nduaa 12 nda. Mbo kandu nda dimullo a sɔɔŋ nɔ le ndu yɔŋnɔŋndo woŋ okɔɔ. Mbo dimi aa:
33 “Ŋ cho kɔlaŋ Chulusalɛm, nduyɛ loŋ nda cho Po wana pɔnɔɔ malɔɔ masaa wanaa soliaa lasalaa, a wanaa pɛɛku waŋnda sawala Mɛlɛkalaŋ nda o ba ni. Nduyɛ, ma kilul ndu yamɛi le ma dii ndu. A cho ndu malɔɔ wanaa cho ŋChuu le wa o ba,
34 ma mam ndu, ma tufu ndu lɔluaŋ choo, ma lɔɔ ndu, okoŋ ma dii ndu. Kɛ o paale yaa ndɔleŋ choo, mbo miiŋgu yoomu.”
35 Mi Chemisi nda Chɔŋ, puaa Sɛbidiya, huŋ naa Chiisu chua ma dimul ndu aa: “Wana Pɛɛkaa, ŋ yeema num ma tosal naa nyɛ o nyɛ naŋ nyuna num pɛ.”
36 Mbo nyuna nda aa: “Yɛɛnɛ nya yeema yɛ mi tosal nya?”
37 Ma mulul ndu aa: “Chɛl naa miŋ kɔ chal num ikɛi o Masale numndeŋ niŋ. Hoo o ba num kɛndɔɔ choo, opilɔɔ o ba num miallo choo.”
38 Kɛ mi Chiisu dimul nda aa: “La sina pɛŋ nyɛ nya cho hoo nyunaa le ndu wo le. La nɔla pa mi la kol o taala ya cho kolɔɔ wo niŋ ɔɔ mi la yiŋ mɛɛ ya yiŋ yɛ?”
39 Ma muli aa: “Ŋ nɔla.” Okoŋ mi Chiisu dimul nda aa: “La nɔla mi la kol o taala ya cho kolɔɔ wo niŋ, nduyɛ mi la yiŋ yiŋɔɔ ya yiŋndo.
40 Kɛ te o wa le challe o ba ni kɛndɔɔ choo ɔɔ o ba ni miallo choo pɛ, o cho ya le yɔŋgu wana fonda koŋ te. Kɛ le wanaa Mɛlɛka hɛli wa fonda koŋ cho ni.”
41 Mɛɛ kiilaa a piliaa tuei nyɛ Chemisi nda Chɔŋ tosa wo, ma tuulu kɔl a nda.
42 Kɛ mi Chiisu veelu nda, mbo dimul nda aa: “La sina maa wanaa cho masaa o chieeŋndo niŋnda, mɛɛ nda yeema yɛ nda bii waŋnda ni. Nduyɛ kindilaa pila nda kindila wanaa nda cho masaleŋ choo wa ni.
43 Kɛ o cho lende le i nɔ mi i wa nya tɛɛŋ te. Wana o wana yeema pɛ mbo wa wana bɛndoo nya tɛɛŋ, o nɔ mbo wa buɛiyo le nya.
44 Nduyɛ wana o wana yeema pɛ mbo wa wana tasoo nya tɛɛŋ, o nɔ mbo wa chiɔɔ le nya kpou.
45 Po wana pɔnɔɔ bɛɛ, o hiŋ le mi wana tosal ndu wali le. Kɛ le mbo tosal waŋnda wallo, nduyɛ mbo yɔŋgu yoomu ndɔɔ le wanaa bɔɔbɔɔ baŋaa.”
46 Ma fuuluu Chɛluiko. Mɛɛ Chiisu nda buɛiyaa nduaa a waŋnda faŋga bɛndoo wa faŋaŋndo Chɛluiko, po sumɛi ndoo piɛi waŋnda nyɔɔŋ ndo wa ichali o nɛiyo daŋgala. Diola ndɔlaŋ aa Batimayɔɔ (po Timiyɔɔ wo).
47 Mɛɛ o tuei maa Chiisu fula Naasaluɛiyo cho hiouwɔɔ ni, mbo kandu deŋioo choo choo aa: “Chiisu, Po Deevioo, tuiinuŋ ya inyiɛɛ fɔ!”
48 Kɛ mi wanaa bɔɔbɔɔ wa ndu kpaa, ma wa ndu dimullo le mbo pɛŋgi bɔɔluuwo. Kɛ mbo chɔɔlu deŋi choo choo aa: “Chiisu, Po Deevioo, tuiinuŋ ya inyiɛɛ fɔ!”
49 Mi Chiisu sim mbo dimi aa: “La veelu ndu o huŋ.” Okoŋ ma veelu ndu. Ma dimul ndu aa: “Tambu kɔl te! Chɔŋ ma sim, o cho num veeloo.”
50 Mbo viau doma wa ndu lekɔɔ wo, mbo chaŋ nya, mbo kua sakpo naa Chiisu chua.
51 Mi Chiisu nyuna ndu aa: “O yɛɛnɛ ŋ yeema yɛ mi tosal num?” Mi po sumɛiyo dimul ndu aa: “Wana Pɛɛkaa, I yeema ma tosa mi che vɛlɛ.”
52 Mi Chiisu dimul ndu aa: “Kɔ. Laalaŋ numndo siŋgi num.” O lepilɛ niŋ kpe, mbo kandu vɛlɛ chɔɔ, okoŋ mbo tual ndu kɔɔli.
