Maki 11:1-33
11 Mɛɛ Chiisu nda buɛiyaa nduaa wa fuuluuwo Chulusalɛm, Bɛfee a Bɛtani ikɛi o Pembii Ɔlifiive, mbo viam buɛiyaa nduaa a ŋiɔɔŋ.
2 Mbo dimul nda aa: “La kɔ o sɔndɔkɔlɔɔ hoo nya lachi. Te la fuuluu dɔɔ pɛ, la cho chɔ sofɛlɛ wana o wana chellɔ lechoo le wo o baa. La timbi ndu mi la chuu ya.
3 Te wana nyuna nya pɛ aa, ‘Le yɛɛnɛ nya cho yɛ ndu timbioo?’ La dimul ndu aa, ‘Masanɔɔ hau ba a ndu, o cho ndu miŋgi naŋ suŋ suŋ.’”
4 Mɛɛ nda kuɛ, ma komal sofɛlɔɔ o baa o dio o nɛiyo daŋgala. Okoŋ ma timbi ndu.
5 Mi wanaa wa isisi loŋ nda apum nyuna nda aa: “Le yɛɛnɛ nya cho yɛ sofɛlɛ koŋ timbioo?”
6 Ma dimul nda mɛɛ Chiisu dimul nda yɛ, okoŋ ma mal nda ma kuaŋnuŋ.
7 Ma kua a sofɛlɔɔ naa Chiisu chua, okoŋ ma pɛŋgɛliaa domala ndalaŋ sofɛlɔɔ o kɔɔ, mi Chiisu chal lechoo.
8 Mi wanaa bɔɔbɔɔ pɛŋgɛliaa domala ndalaŋ o nɛi. Kɛ mi apum bɛɛsiaa lɛuwuŋ yɔmnde o nɛiyo daŋgala.
9 Mi wanaa wa ndu kɔlaŋ lachi wa, a haa ndu kɔɔli wa deŋioo choo choo aa: “Mɛlɛka, piŋi ndu fɔ! Salaa cho le wana hiŋ hoo o diola Chɛhowa* laŋ niŋndo!
10 Dɔu Masale cho hunɔɔ leŋ sala, Masale finya naa Deeveleŋ! Mɛlɛka, piŋi ndu fɔ, num cho hoo o choo choo niŋndo!”
11 Mɛɛ o luɛi Chulusalɛm, mbo kua o chiɛi Mɛlɛkaa niŋ, mbo mɛɛndiaŋ nyɛ o nyɛ fee. Kɛ le mɛɛ teleŋ ve lɛ le yɛ, mbo kuaŋnuŋ Bɛtani nda kiilaa nduaa 12 nda.
12 Diimandɔɔ mɛɛ nda wa faŋaŋndo Bɛtani, yiaaŋ ma wa ndu nɛiyo.
13 O lo landaŋ mbo cha yɔm mafikiiyo o puiyaa. Mbo kua tofaa te o saaluŋ niŋ pɛ nyɛ lechoo le mbo de. Kɛ mɛɛ o fuuluu, o chi komɔɔ lechoo le, mɛɛ pei. Kanifuule, o ve teleŋ yɔm mafikiiyo kom te.
14 Mbo dimul yɔmndo aa: “Fɛɛŋ bɛɛ wana di lɛ komɔɔ num te.” Nduyɛ buɛiyaa nduaa wa nilaŋ yaŋɔɔ.
15 Mɛɛ nda fuuluu Chulusalɛm, mbo luɛi o chiɛi Mɛlɛkaa niŋ. Mbo kandu wanaa wa nyɔɔŋ pisioo a piinduuwo o chiɛi Mɛlɛkaa niŋnda touwɔɔ. Mbo nyiinduu tibiila* wanaa wa kanioŋ* siŋgaa wa, a kpeŋgbeila* wanaa wa kaŋgbuaa pisioo wa.
16 Nduyɛ o chɛllɛ mi wana o wana keeku a nyɛ o nyɛ o bɛɛ chiɛi Mɛlɛkaa le.
17 O wa nda pɛɛkoo a nda dimullo aa: “I cho i poonyiaa aa, ‘A veelu niŋ chiɛi nuu aa chiɛi lepiɛiyo le kaalaŋ kpou,’ kɛ mi nya siiŋguu ndu buulu viiya viaŋnuŋndo.”
18 Mɛɛ masaa wanaa soliaa lasalaa, a wanaa pɛɛku waŋnda sawala Mɛlɛkalaŋ nda tuei a ndi okɔɔ, ma kandu nɛilaŋ nuuviaa le ndu diyɔɔ. Kɛ siooŋii nduɛi wa nda, kanifuule waŋnda kpou kɔndɔfillo wa nda a mɛɛ ndoo pɛɛku yɛ.
19 A paale delaaleŋ, mi Chiisu nda buɛiyaa nduaa faŋaŋ chiee ma kuaŋnuŋ.
20 Kɛ idiiyo puŋ, mɛɛ nda wa miiŋgoo, ma cha yɔm mafikiiyo o vesɛi chɔŋ o puundoŋ mbo hel di.
21 Mi Pitɛ loonuŋ, mbo dimul ndu aa : “Wana Pɛɛkaa, tofawɔ! Yɔm mafikii ŋ mɛna maa fɛɛŋ bɛɛ wana di lɛ komɔɔ ndɔ le wo, o vesa.”
22 Okoŋ mi Chiisu dimul nda aa: “La nɔ laalaŋndo o Mɛlɛka niŋ.
23 A tonya mi dimul nya, wana o wana dimul pɛ pembei hei aa, ‘Suŋguŋ ma kɔ del o pee mɛŋma ihɛllo niŋ,’ mbo nɔ kiisaŋ o kɔl te, nduyɛ mbo nɔ tiindaŋndo maa nyɛ o dimi wo nɔ le yɔŋnɔŋndo, o nɔla mbo yɔŋnuŋ.
24 Lelaŋ ya dimul nya ni maa, nyɛ o nyɛ nya piɛi pɛ le ndu, la nɔ tiindaŋndo maa la chii ndu sɔla, nduyɛ maa la cho ndu sɔla.
25 Te la sim pɛ piɛileŋ, la mal wanaa tosal nya yɔŋ wɔɔŋndo wa haki. Okoŋ, Finya nya cho o choo choo niŋndo bɛɛ nɔla mbo mal nya haki le yɔŋnda nyala wɔɔŋndaŋ.”
26 *——
27 Ma miiŋgu vɛlɛ Chulusalɛm. Mɛɛ o wa balɔɔ o bɛɛ chiɛi Mɛlɛkaa, mi masaa wanaa soliaa lasalaa, a wanaa pɛɛku waŋnda sawala Mɛlɛkalaŋ nda, a laŋgbaa kalla huŋ naa ndu chua.
28 Ma nyuna ndu aa: “A kpaaya nɛɛnɛ ŋ cho yɛ sɔɔŋ muŋ tosaa? Nɛɛnɛ ke yɛ num kpaayaa hoo le sɔɔŋ muŋ tosaa?”
29 Mi Chiisu dimul nda aa: “Ya bɛɛ I nyuna wɔ nya. Te la mulul la pɛ, mɛɛ ya bɛɛ I chɔm nya wana ke ya kpaayaa le sɔɔŋ muŋ tosaa wo.
30 Nɛɛnɛ ndoo vem yɛ Chɔŋ le waŋnda yiŋɔɔ? Mɛlɛka ɔɔ waŋchieeya? La mulullɔ ya.”
31 Ma kandu suukaŋndo ndapila tɛɛŋ aa: “Te ŋ dimi pɛ aa, ‘Mɛlɛka,’ o cho naa dimul aa, ‘Mɛɛ le yɛɛnɛ la laalaŋ a nyɛ o wa nya dimullo wo le?’
32 Kɛ baa miŋ dimi aa, ‘Waŋchieeya’?” A wa siooŋii faŋgaa, kanifuule waŋnda kpou ndaa chua Chɔŋ maa wana ndoo suaa le Mɛlɛka wo kpeekpei o wa ni.
33 Okoŋ, ma mulul Chiisu aa: “Ŋ sina le.” Mi Chiisu bɛɛ dimul nda aa: “Mɛɛ ya bɛɛ I cho nya chɔm wana ke ya kpaayaa le sɔɔŋ muŋ tosaa wo le.”
