Maki 15:1-47
15 Idiiyo puŋ, mi Laŋgbaa Kalaa Kialu Yamaŋ Nda kpou, koŋ cho ni, masaa wanaa soliaa lasalaa, laŋgbaa kalla, a wanaa pɛɛku waŋnda sawala Mɛlɛkalaŋ nda, chuuŋgiaŋ ma naŋgu le suɛi Chiisu ve. Okoŋ kɔɔli, ma yii ndu balaŋ ma kɔ mal ndu Paile o ba.
2 Mi Paile nyuna ndu aa: “Num cho Masa Chuuwa ni?” Mi Chiisu muli aa: “Numpila chii dimi.”
3 Kɛ masaa wanaa soliaa lasalaa wa ndu sɔɔŋ bɔɔbɔɔ hɛɛnduuwo choo.
4 Mi Paile nyuna ndu vɛlɛ aa: “Mɛɛ a nɔ nyɛ le dimi le? Tueiyɔ sɔɔŋ nda cho num hɛɛnduuwo choo woŋ.”
5 Kɛ mi Chiisu meinuŋ kpili. Le hei, mi kɔndɔfillo bii Paile.
6 O bɔŋaŋ hiouwɔɔ choo kɛ kɛ choo, mi Paile ndoo solul nda wana nda yeema wo o chiɛi manyumndo niŋ.
7 A teleŋ koŋ, po pilɛ diolaŋ aa Baluabaa nda wanaa cheleŋ wa o chiɛi manyumndo niŋ, le mɛɛ ndaa simul masaleŋ, nduyɛ ma dii waŋnda yɛ.
8 Mi faŋgaa huŋ dimul Paile le mbo tosal nda nyɛ o tosal nda paandu wo.
9 Mi Paile mulul nda aa: “Baa la yeema mi mel nya Masa Chuuwa?”
10 Paile ndoo sina maa nɛyɔŋndo tosa ni mi masaa wanaa soliaa lasalaa mal Chiisu ndu o ba.
11 Kɛ mi masaa wanaa soliaa lasalaa suaa faŋgaa o lani le mi Paile mel nda Baluabaa.
12 Mi Paile nyuna nda vɛlɛ aa: “Yɛɛnɛ ya tosa yɛ niko a wana nya veelu aa Masa Chuuwa wo?”
13 Ma deŋi vɛlɛ choo choo kpeleŋ aa: “Dii ndu o yɔmndo choo!”
14 Kɛ mi Paile nyuna nda aa: “Le yɛɛ? Suɛi wɔɔŋ kuɛɛ o tosa yɛ?” A koŋ kpou ma chɔɔlu deŋi choo choo aa: “Dii ndu o yɔmndo choo!”
15 Paile ndoo yeema mbo nɛŋi faŋgaa kɔl. Le hei, mbo mel nda Baluabaa. Mbo tosa ma luaa Chiisu. Okoŋ, mbo yɔŋgu ndu le ma kɔ dii ndu o yɔmndo choo.
16 Mi puaa chɔuwa kua a Chiisu o bɛɛ Paile wo, nduyɛ ma chuuŋgiaa puaa chɔuwa kpou naapilɛ.
17 Ma wou ndu doma bɛndu siaŋa pum. Nduyɛ, ma toosiaa mɔsil lemasaa a yɔɔŋ ma wou ndu.
18 Okoŋ ma kandu ndu mamɔɔ aa: “Isɛ yoo, Masa Chuuwa!”
19 A wa ndu bolleŋ lɔɔ a yɔmndo, ma tufu ndu lɔluaŋ choo. Ma beŋ ndu wulaŋ.
20 Mɛɛ nda chii ndu mamɔɔ, ma soli ndu doma bɛndu siaŋa koŋ lekɔɔ, ma miŋgi ndu nyɛla ndɔlaŋ lekɔɔ. Okoŋ, ma kua a ndu le ma kɔ baŋ ndu o yɔmndo choo.
21 Mɛɛ nda wa kɔlaŋ, ma bɔŋaŋ a po waa Sailuini diolaŋ aa Saimɔŋ, finyaa Alɛkisanda nda Lufɔɔsi. O wa fulaa o chiɔɔŋ niŋ. Ma baŋ poo hoo le mbo kuɛ a yɔm imɔnɔ* Chiisu wo.
22 Okoŋ ma kua a ndu o fonda pilɛ diolaŋ aa, Kɔlkɔta. Koŋ cho ni, “Fondaŋ Lakpokpoo.”
23 Ma kindiŋ le ndu muɛima nda muuliaŋ a nyɛ lolɛi pumndo* kioo le mbo kol, kɛ mbo kɛɛ.
24 Okoŋ, ma baŋ ndu o yɔmndo choo. Le nyɛla ndɔlaŋ piɔuviaŋndo, ma wuu kooŋ le sinaa la wana o wana sɔla niŋndaŋ.
25 O wa niŋ a lɔɔ 9:00 idiiyo,* ma baŋ ndu o yɔmndo choo.
26 Ma poonyiaa diomndaŋ le sabu nda dii ndu wo aa: “Masa Chuuwa.”
27 Ma baŋ vɛlɛ viiya a ŋiɔɔŋ ndu ikɛi o yɔmnde choo. Hoo wa o ba ndɔ kɛndɔɔ choo, opilɔɔ wa o ba ndɔ miallo choo.
28 *——
29 Mi wanaa hiauwaŋ nda wa ndu yioulaŋ, ma hiiluu bolle ma dimi aa: “Kpo poo! Num te dimi maa a cho chiɛi Mɛlɛkaa piɔlɔɔ ma miŋgi ndu taŋgul o palɛi yaa bɛŋgu le?
30 Piŋi niko numpila! Tollɔ naa ŋ cho kaŋ o yɔmndo* choo wa.”
31 Mi masaa wanaa soliaa lasalaa, a wanaa pɛɛku waŋnda sawala Mɛlɛkalaŋ nda bɛɛ kandu ndu mamɔɔ, ma wa dimioo aa: “Chaanda o nɔla piŋioo ni, kɛ o nɔla mbo piŋi ndupila le!
32 Kiliti, Masaa le Isɔluɛi, o tollɔ niko o yɔm imɔnɔɔ* choo miŋ che, okoŋ miŋ laalaŋ ndu.” Wanaa wa a baŋaa o yɔmnde choo ndu ikɛiya bɛɛ wa ndu mamɔɔ.
33 Mɛɛ lɔɔ 12:00 ipalaa* fuuluu, mi nyumndaŋ ma tual kpiŋgbi o lɛŋnde leŋ niŋ kpou haaa a lɔɔ 3:00 ipalaa.*
34 A lɔɔ 3:00 ipalaa, mi Chiisu deŋi choo choo kpeleŋ aa: “Ila, Ila, lama sabatani?” Koŋ cho ni, “Mɛlɛka nuu, Mɛlɛka nuu, le yɛɛnɛ ŋ mal lɛ ya?”
35 Mɛɛ wanaa wa isisi loŋ nda apum tuei hei, ma dimi aa: “La tueiyɔ! O cho Ilaicha veeloo.”
36 Okoŋ mi wana pilɛ nyaanuŋ mbo kɔ pɔɔla nyɛ fɔɔndiɔŋ pum o muɛima waalɛiyaŋ niŋ. Mbo sɔɔŋa ndu o sioŋndeŋ mbo ke Chiisu le mbo kol. Mbo dimi aa: “La mallɔ ndu! Ŋ tofaŋndɔ te Ilaicha cho ndu hunɔɔ piŋi.”
37 Mi Chiisu deŋi choo choo kpeleŋ. Okoŋ, mbo malnuŋ kɔl.
38 Mi kola bɛndu wa o landaa o chiɛi Mɛlɛkaa niŋndo tɛnda kpala, chɔŋ amaluaŋ haaa mbo fuuluu lebɛŋgu di.
39 Wana bɛndu puaa chɔuwa wa isisi loŋ mbo wa ndu tofaa. Mɛɛ o che nyɛ yɔŋnuŋ teleŋ Chiisu malnuŋ kɔl lo, mbo dimi aa: “A tonya kpeekpei, Po Mɛlɛkaa poo hoo wa ni.”
40 Waŋ laanduaa bɛɛ wa loŋ ma wa tofaa kɔɔli kɔɔli. Meele Madaliŋ, Meele kalaa Chemisi Pɔmbɔ a Chosɛsi, a Salomi wa waŋ laanduaa haa tɛɛŋ.
41 Nda wa Chiisu balɔɔ kɔɔli ni teleŋ o wa Kalili wo le ndu malaa. Waŋ laanduaa bɔɔbɔɔ cheleŋ, a kuɛ ndu kɔɔli Chulusalɛm nda bɛɛ wa loŋ.
42 Mɛɛ paaleŋ le yɔŋguŋ, o paale waŋnda bɛɛndiaŋ le Paale Pɛŋgiaaleŋ ndo choo,
43 mi Choosɛ, fulaa Alimatiaa chiee huŋ. Waŋnda ndaa nɔ bɛɛleŋ tau le ndu, nduyɛ o wa waŋndo opilɛ o Kunda Kialaa Ŋyamaa choo. Ndu bɛɛ wa chumndo le Masale Mɛlɛkaleŋ. Mbo bii kɔllo, mbo kɔ nyuna Paile le dialuŋ Chiisu woŋ.
44 Kɛ Paile ndoo yeema sinaa te Chiisu ndoo vi niŋ ɔɔ te ndoo vi wɔ le. Le hei, mbo veelu wana bɛndu puaa chɔuwa mbo nyuna ndu.
45 Mɛɛ Paile sina maa Chiisu vi, mbo chɛl le mi Choosɛ kɔ chua dialloŋ.
46 Okoŋ, mi Choosɛ piandu feŋgbɛ kɛndɛ kɛndɔɔ. Mbo kɔ tusi dialuŋ ndɔŋ, mbo simbul muŋ leniŋ. Mbo kɔ yambu muŋ o sɛi* ndaa tou o pouwo niŋ maa buulu wo. Okoŋ, mbo pimbul pou bɛndoo o sɛi koŋ sondoo.
47 Kɛ mi Meele Madaliŋ nda Meele kalaa Chosɛsi lo loŋ, a wa tofaa naa nda yambu ndu wa.
Tɛɛsiaalaŋ
^ Tofa Tɛɛsiaa.
^ Ɔɔ “mɔɔ wo.” Tofa Tɛɛsiaa.
^ Kilikiiye, “hawɛi ɔɔ lɛɛlɛ yaa ndɔɔ.”
^ Tofa Tɛɛsiaa.
^ Tofa Tɛɛsiaa.
^ Tofa Tɛɛsiaa.
^ Kilikiiye, “hawɛi ɔɔ lɛɛlɛ ŋɔmpumndo.”
^ Kilikiiye, “hawɛi ɔɔ lɛɛlɛ ŋɔmahiɔɔloo.”
^ Ɔɔ “sɛi loonaŋndo.”
