Maki 16:1-8
-
Chiisu miiŋgu yoomu (1-8)
16 Mɛɛ Paale Pɛŋgiaaleŋ le hiou, mi Meele Madaliŋ, Meele kalaa Chemisi, a Salomi piandu nyɛma chuŋ kɛndiaŋ, le ma kɔ suu o dialuŋ Chiisu woŋ.
2 Diimandɔɔ, idiiyo puŋ, o paale taseleŋ choo o lɔɔ bɛŋgu, a teleŋ paaleŋ le kandu fulaa wo, ma kua o sɛiyo.*
3 A wa dimulaŋndo aa: “Nɛɛnɛ cho yɛ naa pouwo feŋal o sɛiyo sondoo?”
4 Kɛ mɛɛ nda siɛndi hɔlla, ma cha maa pou bɛndu wa o sɛiyo sondoo wo faŋaŋ.
5 Mɛɛ nda luɛi o sɛiyo niŋ, ma cha po chua piaandoo ichali o ba kɛndɔɔ choo a doma humbu vilɛiyo ndu lekɔɔ. Mi siooŋnde bii nda.
6 Mbo dimul nda aa: “La yɔŋ isiooŋ te. I sina maa Chiisu fula Naasaluɛiyo nya cho nuuviaa ni, o nda dii o yɔmndo choo wo. O miiŋgu yoomu. O cho lɛ naŋ te. La huŋ tofa fondaŋ ndaa yambu ndu wo.
7 La kɔ, mi la dimul buɛiyaa nduaa a Pitɛ aa, ‘O cho nya pɔɔ kɔlaŋ lachi Kalili. La cho ndu lakɔ chɔ loŋ, a mɛɛ o dimul nya yɛ.’”
8 Mɛɛ nda fula o sɛiyo niŋ, ma nyaanuŋ. A wa nyiiyaa, nduyɛ mi kɔndɔfillo bii nda tau. Kɛ a dimul wana nyɛ o nyɛ le, kanifuule a wa a siooŋnde.*
Tɛɛsiaalaŋ
^ Ɔɔ “sɛi loonaŋndo.”
^ A mɛɛ yaula nda poonyiaa sindɛ Baabuiyo lechoo laŋ la dimi yɛ, Yau Maki poonyiaa wo mɛɛlu a diomnda cho o sɔɔŋ 8 woŋ niŋndaŋ. Tofa Tɛɛsiaa.