Maki 2:1-28
2 Mɛɛ palɛi hiou itiŋ, mi Chiisu miiŋgu vɛlɛ Kepaaniɔm. Mi tɔɔ tiu maa o cho chiɛiniŋ.
2 Mi waŋnda faŋga bɛndoo kɔ piɔ loŋ cha. Ba o ba fondaŋ ve lɛ le, o dio bɛɛ. Okoŋ, mbo kandu nda diom Mɛlɛkaa pɛɛkoo.
3 Mi puaa a hiɔɔlu chuu ndu wana bɛvɛiyo.
4 Kɛ ndaa nɔla luɛiyɔɔ a ndu o fondaŋ Chiisu wa wo le, kanifuule faŋgaa wa o dio. Le hei, ma buli yindɔ chiɛiyo Chiisu choo kpeekpei. Okoŋ, ma tusi wana bɛvɛi koŋ o fondaŋ nda buli wo o mboomaa niŋ.
5 Mɛɛ Chiisu che mɛɛ kpɛ ndaa laalaŋ yɛ, mbo dimul wana bɛvɛi koŋ aa: “Poo, I mal num haki le hakila numndaŋ.”
6 Wanaa pɛɛku waŋnda sawala Mɛlɛkalaŋ nda wa loŋ. Ma dimiŋ o lakɔl aa:
7 “Le yɛɛnɛ poo hoo cho yɛ suɛi nuaa? O cho diola Mɛlɛkalaŋ tɛɛmbuuwo. Wana o wana nɔla mbo mal waŋndo haki le hakila ndɔlaŋ te, mɛɛ Mɛlɛka ndupilɛ kpe.”
8 Kɛ o lepilɛ niŋ kpe, mi Chiisu sina yiyaŋ ndaa. Mbo nyuna nda aa: “Le yɛɛnɛ nya cho yɛ yiyaŋndo o kɔlta nyalaŋ niŋ lende?
9 Wana bɛvɛiyo dimullo aa, ‘I mal num haki le hakila numndaŋ’ a dimullo ndu aa, ‘Chɔŋ ma chua mbooma numndo ma kuɛŋnuŋ,’ i kuɛɛ hiou yɛ wa tɛtɛlɛ?
10 Kɛ le mi la sina maa Po wana pɔnɔɔ nɔ kpaayaa o lɛŋndeŋ choo le mbo mal waŋnda haki le hakila ndalaŋ . . .” mbo dimul po bɛvɛiyo aa:
11 “Mi dimul num, chɔŋ ma chua mbooma numndo ma kuɛŋnuŋ o numndo.”
12 Mi poo chaŋ nya, mbo chua mbooma ndɔɔ, mbo fulaŋ waŋnda kpou o hɔl. Mi kɔndɔfillo bii nda kpou. Okoŋ ma saŋgala Mɛlɛka. Ma dimi aa: “Le pilɛ bɛɛ ŋ chi wɔ i waa nuaa le.”
13 Mi Chiisu diam vɛlɛ kɔŋgɔ mɛŋma ibuŋgaa. Nduyɛ mi waŋnda faŋga bɛndoo tual ndu kɔɔli loŋ, okoŋ mbo kandu nda pɛɛkoo.
14 Mɛɛ o wa hiouwɔɔ, mbo cha Livai, po Afaasi wo ichali o chiɛi biyaa paawaa.* Mbo dimul ndu aa: “Huŋ ma tol la kɔɔli.” Mbo chaŋ mbo tual ndu kɔɔli.
15 Okoŋ kɔɔli, mɛɛ Chiisu wa nyɛdiaa dioo o Livai lo chiɛiniŋ o tibiiyo* choo, wanaa biyaa paawaa a wanaa lahakiaa cheleŋ bɛɛ wa loŋ tau, ma wa nyɛdiaa dioo latulu nda ndaa. Kanifuule, a bɔɔbɔɔ wa ndu tolɔɔ kɔɔli.
16 Kɛ mɛɛ wanaa pɛɛku waŋnda sawala Mɛlɛkalaŋ, nduyɛ ma wa Falisiiya wa che Chiisu nyɛdiaa dioo latulu nda wanaa biyaa paawaa a wanaa lahakiaa, ma nyuna buɛiyaa nduaa aa: “Le yɛɛnɛ o cho yɛ nyɛdiaa dioo latulu nda wanaa biyaa paawaa a wanaa lahakiaa?”
17 Mɛɛ Chiisu tuei hei, mbo dimi aa: “Wanaa cho kɛndiaa wa heu ba a wana chiɔuwaa le. Kɛ wanaa cho a naalaŋ nda, nda hau ba a ndu. O cho le wanaa cho sakpo wa le ya hiŋ te, kɛ le wanaa lahakiaa.”
18 Buɛiyaa Chɔŋ nda a Falisiiya wa sumndo biyɔɔ. Okoŋ ma huŋ nyuna Chiisu aa: “Le yɛɛnɛ buɛiyaa Chɔŋ nda a buɛiyaa Falisiiya bii yɛ sumndo, kɛ buɛiyaa numnda bii sum te?”
19 Mi Chiisu mulul nda aa: “Te wana cho lanɔɔ chuaa wo wa wɔ pɛ latulu nda chaaŋaa nduaa, a nɔ kuee ma bii sum te, lende le? Te a wa wɔ pɛ latulu a wana cho lanɔɔ chuaa wo, a nɔ ma bii sum te.
20 Kɛ teleŋ cho fuuluu ma faŋa wana cho lanɔɔ chuaa wo nda tɛɛŋ, okoŋ ma bii sumndo a teleŋ koŋ.
21 Wana o wana beŋul tɛɛŋgei o doma paandoo a pɛŋgɛi kola sɛnɛiyo le. Kanifuule, te pɛŋgɛi kola sɛnɛiyo i ŋɔunuŋ pɛ, i chɔɔlu doma paandoo sɛɛsa. Okoŋ, tɛɛŋgei hiou maa paandu.
22 Nduyɛ wana o wana dou muɛima sɛnɛiyaŋ o bɔlɔ mamuɛi* paandoo niŋ te. Te o dɔu pɛ, muɛiyaŋ ma cho bɔlɔɔ piɔlɔɔ, mi ma choŋ. Okoŋ mi bɔlɔɔ tambu. Kɛ o bɔlɔ mamuɛi sɛnɛiyo niŋ wana duau muɛima sɛnɛiyaŋ ni.”
23 Mɛɛ Chiisu nda buɛiyaa nduaa wa keekoo o chiɛi ipum niŋ o Paale Pɛŋgiaaleŋ choo, mi buɛiyaa nduaa kandu tɔlɔɔ soondiaa o chiɛi keŋ niŋ.
24 Mi Falisiiya nyuna Chiisu aa: “Le yɛɛnɛ buɛiyaa numnda cho yɛ tosaa nyɛ wana nɔ ma tosa o Paale Pɛŋgiaaleŋ choo le wo?”
25 Kɛ mbo mulul nda aa: “Baa la chi wɔ o Yau Mɛlɛkaa niŋ a nyɛ Deeve nda puaa wa ndu kɔɔli wa tosa wo, boondii yiaaŋ ma wa nda nɛiyo ve le?
26 A boondii Abiaata wa masa wanaa soliaa lasalaa ve, mi Deeve luɛi o chiɛi Mɛlɛkaa niŋ mbo dia beedii* wa o yɔŋgaŋ o Mɛlɛka lo wo. Okoŋ mbo chua o tiŋ mbo ke wanaa wa ndu kɔɔli wa. Wana cheleŋ ndoo nɔ di kposoŋ mbo de ndu le, mɛɛ wanaa soliaa lasalaa kinɛi.”
27 Okoŋ mbo dimul nda aa: “Le tɔnɔ waŋchieeya Paale Pɛŋgiaaleŋ le handuŋ ni, kɛ o cho le Paale Pɛŋgiaaleŋ te waŋchieeya toosiaŋ te.
28 Po wana pɔnɔɔ cho Masanɔɔ le Paale Pɛŋgiaaleŋ ni.”
Tɛɛsiaalaŋ
^ Ɔɔ “chiɛi biyaa muloo.”
^ Ɔɔ “tabalioo.”
^ Bɔlɔ nda toosiaa a yau visioo wo.
^ Ɔɔ “bulu.”
