Maki 4:1-41
4 Mi Chiisu kandu vɛlɛ waŋnda pɛɛkoo o mɛŋma ibuŋgaŋ ikɛi, nduyɛ mi waŋnda faŋga bɛndoo chuuŋgiaŋ ndu ikɛi. Okoŋ, mbo luɛi o dɛndɔɔ niŋ mbo chal. Mbo faŋaŋ tiŋ o kɔŋgɔɔ ikɛi. Kɛ mi faŋgaa kpou chal o mɛŋma ibuŋgaŋ kɔŋgɔ.
2 Mbo kandu nda sɔɔŋ bɔɔbɔɔ pɛɛkoo o talelaŋ niŋ. Mɛɛ o wa nda pɛɛkoo, mbo dimul nda aa:
3 “La yaŋ nilaŋ! Po pilɛ chɛŋ ni mbo kua yɛiye saŋɔɔ o chiɛi nduɛi niŋ.
4 Mɛɛ o wa ndi saŋɔɔ, mi ipum del o nɛi kɔllo, okoŋ mi youwa huŋ chɔuviaa ndi.
5 Mi ipum del o lɛŋnde bandilaleŋ choo naa puulu bɔɔ ve le wa. Nduyɛ, mi i keleŋa wulɔɔ.
6 Kɛ mɛɛ paaleŋ le fula mi le luaa ndi, mi i nyamala, nduyɛ mi i vesa, kanifuule puundoŋ kue lɛŋ landaŋ te.
7 Mi ipum del o yɔɔŋ tɛɛŋ. Mi yɔɔŋ hindu, miŋ kaya kayaŋ ndi. Le hei, i chuulu le.
8 Kɛ mi ipum del o lɛŋnde kɛndɛleŋ choo. Mi i hindu, nduyɛ mi i chuulu. Yasaa opum kulloŋ hiouwɔɔ 30, hoo hiouwɔɔ 60, opilɔɔ hiouwɔɔ 100.”
9 Mbo chɔɔlu dimi aa: “Num o num nɔ pɛ nila tuɛiyaa isɔɔ, mɛɛ yaŋ nilaŋ.”
10 Mɛɛ o lo ndupilɛ, mi wanaa wa ndu ikɛiya a kiilaa nduaa 12 nda kandu ndu nyuuniaa le mbo tɛɛsial nda talelaŋ ndaŋ.
11 Mbo dimul nda aa: “Nya Mɛlɛka chɛl ni le mi la bii sɔɔŋ viaŋnaŋ cho a Masale Mɛlɛkaleŋ okɔɔ woŋ bila. Kɛ le acheleŋnda, mɛɛ mi pɛɛku nda o talelaŋ niŋ.
12 Kanifuule, ma tofa, kɛ a chi le. Mi che bɛɛ a cho tueiyɔɔ, kɛ a bii bila kposoŋ te, kɛlɛŋgaa niŋ te ma mal yɔŋnda ndala wɔɔŋndaŋ le ma sɔla malɔɔ hakioo.”
13 Mbo nyuna nda aa: “Te la bii taloo hoo bila le, vɛɛnɛ nya looku yɛ niŋ talela cheleŋndaŋ kpou biyɔɔ bila?
14 “Wana saŋaa saŋ diom Mɛlɛkaa mɛɛ wana saŋ yɛiye yɛ.
15 Yɛiyii del o nɛi kɔllo ve cho ko maa waŋnda apum, a tuei diom Mɛlɛkaa wa. Kɛ o lepilɛ niŋ kpe, mi Setana huŋ poonda ndu nda o lakɔl.
16 Yɛiyii del o lɛŋnde bandilaleŋ choo ve sim le waŋnda apum, a tuei diom Mɛlɛkaa, ma chɛl ndu a kɔl kɛndɛ wa.
17 Kɛ le mɛɛ o luei nda o kɔl te yɛ, ma laalaŋ le teleŋ tiŋ. Kɛ mɛɛ nyɛpalaa ɔɔ tɔɔndaŋndo komal dɔɔ nda le sabu diomndo hoo, ma mal laalaŋ ndaa.
18 Yɛiyii del o yɔɔŋ tɛɛŋnde sim le wanaa tuei yooŋgoo a Masale Mɛlɛkaleŋ okɔɔ wa.
19 Kɛ mi buulaŋnda chieeŋndo hoo,* yeemɛi sullo, a yeemɛi nyɛm cheleŋndoŋ hiau nda o kɔl kɔɔli, miŋ kaya kayaŋ diom nda tueiyo, a hiu lɛ lachi le.
20 Yɛiyii del o lɛŋnde kɛndɛleŋ choo ve sim le waŋnda apum, a yaŋ diom Mɛlɛkaa nilaŋ, ma chɛl ndu a kɔllo kpou wa. Nduyɛ ma yɔŋgu kɔmndeŋ, opum kulloŋ hiouwɔɔ 30, hoo hiouwɔɔ 60, opilɔɔ hiouwɔɔ 100.”
21 Mi Chiisu dimul nda vɛlɛ aa: “Waŋndo mɛndul lambuiyo mbo kuumbuu kambɛiyo lechoo ɔɔ mbo luei ndu o kpeloo bɛŋgu le, lende le? Baa o cho o tibiiyo* choo le o kɛsi ndu le?
22 Nyɛ o nyɛ cho o viaŋnaŋ, o cho hunɔɔ fula kpendekele. Nyɛ o nyɛ cho o kumbaa, o cho hunɔɔ kumbiŋ.
23 “Num o num nɔ pɛ nila tuɛiyaa isɔɔ, mɛɛ yaŋ nilaŋ.”
24 Mbo chɔɔlu nda dimul aa: “La kɛsiŋ nyɛ nya cho tueiyɔɔ wo o lakɔl. Te la yɔŋgu pɛ tau, la cho chɔɔlu sɔla, nduyɛ mbo hiou bɛɛ mɛɛ nya yɔŋgu yɛ.
25 Kanifuule, wana o wana nɔ o ba, o cho chɔɔlu sɔla tau. Kɛ wana o wana nɔ o ba le, hali o pɔmbɔ o nɔ wo bɛɛ, a cho ndu ndu poonda o ba.”
26 Mbo hiau lachi a nda dimullo aa: “Masale Mɛlɛkaleŋ le cho ko maa po kɔ saŋ yɛiye lɛŋ ndo.
27 Te nyumndaŋ ma tol pɛ, o kɔ hini. Te paaleŋ le sɛ pɛ, o chɛŋ, haaa mbo cha mi kuluŋ o saŋ ndoŋ wul, miŋ bandu bandei pila. Kɛ o sina mɛɛ ŋ looku hindɔɔ yɛ le.
28 Lɛŋndeŋ leŋ pila le nɔla mi le tosa mi yɛiye hindu o pɔmpɔmbɔ. Te i hindu pɛ, i mɛ, i chuulu, i nɛɛŋguŋ.
29 Te i vesa pɛ, o kandu kouwɔɔ a wɔlɔtɔɔ, kanifuule teleŋ kuauwaa fuuluu ni.”
30 Mbo hiau lachi a nda dimullo aa: “A yɛɛnɛ naŋ tuu yɛ Masale Mɛlɛkaleŋ? A tale kuɛɛnɛ naŋ tɛɛsiaa yɛ leŋ?
31 Le cho ko maa kulii mɔsitaa ve. Teleŋ nda tɔl ndi lɛŋ ndo, kulle hei ndii hiou mɛsɛla a kulloŋ kpou o chieeŋndo choo.
32 Kɛ mɛɛ nda tɔl ndi, mi i hindu hindɔɔ pila. Mi i simnuŋ yɔm bɛndoo o hiou yɔmnde kpou o fondaŋ koŋ ndo. Mi i soli lɛuwuŋ bɛndoŋ, nduyɛ mi youwa huŋ sɔla naa chalaa o wunduma nduaŋ bɛŋgu.”
33 Mi Chiisu pɛɛku waŋnda diom Mɛlɛkaa o talela bɔɔbɔɔ waa nuaa niŋ, mɛɛ kpɛ ndaa tiuba ma yaŋ ndu nilaŋ yɛ.
34 A tonya, ndoo suu o nda lo mbo kɛɛ nda taloo dimul te. Kɛ te ndoo wa pɛ a buɛiyaa nduaa kpeele, mi ndoo tɛɛsial nda sɔɔŋ muŋ kpou.
35 O paale leŋ choo, mɛɛ paaleŋ le del, mbo dimul nda aa: “La ŋ taŋnuŋ o kɔŋgɔɔ leeloo.”
36 Mɛɛ buɛiyaa Chiisu wa dimul faŋgaa le ma kuɛ o la nda lo, ma chua ndu o dɛndɔɔ niŋ. Nduyɛ dɛndɛla cheleŋ la wa ndu ikɛi.
37 Okoŋ kɔɔli, mi hueiyii wɔɔŋ wɔɔŋnde kandu hɔŋndo. Mi mɛŋma wa hiilɔŋndo waŋ ma wa luɛiyɔɔ o dɛndɔɔ niŋ, nduyɛ ndoo lo niŋ chobe mi dɛndɔɔ ndoo mɔɔwa.
38 Kɛ Chiisu waŋnuŋ o luaŋ o dɛndɔɔ tumndo. Mbo handu bolleŋ o pileiyo* choo. Okoŋ ma tindi ndu, ma dimul ndu aa: “Wana Pɛɛkaa, a cho chɔ maa loo le naŋ hiŋ nuaa o peelo le?”
39 Okoŋ, mbo chaŋ mbo kpaa hueiye. Mbo dimul mɛŋndaŋ aa: “Mei! I tuɛi lɛ hau le dɛ!” O lepilɛ niŋ kpe, mi nyɛ o nyɛ mei doŋ.
40 Okoŋ mbo nyuna nda aa: “Le yɛɛnɛ nya cho yɛ siooŋnde? Baa la nɔ laalaŋ kposoŋ te?”
41 Mi siooŋnde bii nda kpou, okoŋ ma dimulaŋ aa: “Wana maavɛɛ kpeekpei cho yɛ hoo? Hueiye a mɛŋndaŋ bɛɛ, tueiyɔɔ ndu diom.”
