Maki 5:1-43
5 Ma fuuluu o mɛŋma ibuŋgaŋ kɔŋgɔɔ leeloo o tanda Kɛluasiŋ ndo niŋ.
2 Mɛɛ Chiisu fula dɔɔ o dɛndɔɔ niŋ, mi po nyina wɔɔŋndo wa kɔɔli wo fula o sɛilaŋ* tɛɛŋ, mbo huŋ naa ndu chua.
3 O sɛila laŋ tɛɛŋ o waŋnuŋ ni. Wana o wana ndoo nɔla ndu yii mbo kɛɛ timbiŋ te, a yɔŋ bɛɛ a yɔlɔŋ.
4 Teleŋnda bɔɔbɔɔ, mi ndaa baŋ ndu o kpiɔɔ, nduyɛ ma dɔu ndu o yɔlɔŋ. Kɛ mbo kili kili yɔlɔŋ muŋ, nduyɛ mbo tɛɛmbuu kpiɔɔ. Wana o wana ndoo nɔla lɛ ndu biyɔɔ le.
5 Nduyɛ ipala ni, ichɔl ni, o wa chaŋndo o sɛilaŋ a o pemboŋ tɛɛŋ, mbo tɛɛndiaŋ ndupila a poutaŋ.
6 Mɛɛ o che Chiisu landaŋ, mbo nyaanuŋ mbo kɔ beŋ ndu wulaŋ.
7 Mbo deŋi choo choo kpeleŋ aa: “Yɛɛnɛ ŋ yeema yɛ ma tosal la, num Chiisu, Po Mɛlɛka Bɛndoo? Mɛnaŋ o Mɛlɛka lo po maa a cho ya nyɛpalaa tusi choo le.”
8 Kanifuule Chiisu ndoo chii niŋ ndu dimul aa: “Num nyina wɔɔŋndo hoo, fula poo hoo niŋ.”
9 Kɛ mi Chiisu nyuna ndu aa: “Vɛɛnɛ ŋ nɔ yɛ diolaŋ?” Mbo mulul ndu aa: “Diola nilaŋ aa Faŋgaa,* kanifuule ŋ cho a hɔbɛi.”
10 Mbo nyɔɔlu Chiisu maa o soli nyinaa wɔɔŋaa kaŋ o lɛŋnde leŋ niŋ te.
11 Peuwa kunda bɛndoo wa nda diolaŋ ikɛi o pembei choo.
12 Mi nyinaa wɔɔŋaa kaŋ nyɔɔlu Chiisu aa: “Yandii, tosa miŋ kɔ luɛi peuwa haa niŋ.”
13 Mbo chɛl nda. Mi nyinaa wɔɔŋnda haa faŋaŋ poo kɔɔli, ma kɔ luɛi peuwa niŋ. Mi peuwaa kaŋ nyaanuŋ o kɔŋgɔ feke fekioo, ma deli o peelo. Ndaa wa le 2,000. Nda kpou ma wu.
14 Kɛ mi wanaa wa peuwa mandaa wa nyaanuŋ, ma kɔ dounuŋ waŋnda kona o chiee bɛndoo niŋ a o sɔndɔkɔltaŋ. Nduyɛ mi waŋnda huŋ le chɔɔ nyɛ yɔŋnuŋndo.
15 Ma huŋ naa Chiisu chua, ma cha po nyinaa wɔɔŋaa Faŋgaa wa kɔɔli wo. O wa ichali a nyɛlaŋ lekɔɔ. Ndoo miiŋgu niŋ o ndupila niŋ. Mi siooŋnde bii nda.
16 Mi wanaa che suɛi heiya kɔ dimul waŋnda nyɛ yɔŋnuŋ a poo hoo wo, nduyɛ a nyɛ yɔŋnuŋ peuwa wo.
17 Okoŋ, ma nyɔɔlu Chiisu le mbo faŋaŋ o tanda ndaa niŋ.
18 Mɛɛ Chiisu wa luɛiyɔɔ o dɛndɔɔ niŋ, mi po nyina wɔɔŋndo wa kɔɔli wo nyɔɔlu ndu le ma kuɛ nda ndu.
19 Kɛ o chɛl te. Mbo dimul ndu aa: “Kɔ o numndo, ma kɔ dimul wanaa numnda nyɛ o nyɛ Chɛhowa* tosal num, nduyɛ a mɛɛ o tuiinuŋ num inyiɛɛ yɛ.”
20 Okoŋ mbo kuaŋnuŋ, mbo kɔ kandu waŋnda dimullo o tanda Dɛkapɔliiyo* niŋ nyɛ o nyɛ Chiisu tosal ndu. Mi kɔndɔfillo bii waŋnda kpou.
21 Mɛɛ Chiisu miiŋgu vɛlɛ taŋɔɔ kɔŋgɔɔ opilɔɔ o dɛndɔɔ niŋ, mi faŋga bɛndoo chuuŋgiaŋ ma huŋ naa ndu chua. O wa o mɛŋma ibuŋgaŋ ikɛi.
22 Mi wana bɛndu pilɛ o chiɛi Chuuwa piɛi Mɛlɛka wo niŋ, diolaŋ aa Chaliɔɔ huŋ. Mɛɛ o che Chiisu, mbo beŋ ndu wulaŋ.
23 Mbo nyɔɔlu ndu tau aa: “Chua ni pɔmbɔɔ cho a naa lakalu tei.* Yandii, huŋ ma handu ndu balaŋ choo mbo seŋgu, yɔŋii o wu.”
24 Okoŋ, mi Chiisu kua a ndu latulu. Mi faŋga bɛndoo tual ndu kɔɔli. A wa ndu a balaa silɔ ma wa nyiindaŋndo.
25 Chuaa pum wa loŋ, le wɔsilaŋ 12 o wa a naa ŋwaŋ laandoo.
26 Mbo saŋga tau wanaa chiɔuwaa bɔɔbɔɔ o ba. Nduyɛ, mbo pisi nyɛ o nyɛ ndoo nɔ. Kɛ o siŋgu le. Naa wa hiouwɔɔ lachi tuŋ a wɔuleŋ.
27 Mɛɛ o tuei a walta Chiisu tosa laŋ okɔɔ, mbo huŋ ndu amakɔɔ faŋgaa tɛɛŋ, mbo pilaŋ doma ndɔɔ.
28 Kanifuule o wa dimioo o kɔl niŋ aa: “Doma ndɔɔ kinɛi bɛɛ ya pilaŋ ni, I cho sioŋgɔɔ.”
29 O lepilɛ niŋ kpe, mi naa ndɔɔ pɛŋgi. Mbo sinaŋ maa naa wɔɔŋ wa ndu wo seŋgu.
30 O foofo koŋ choo, mi Chiisu sinaŋ maa kpaayaa fula ndu o ŋdial. Mbo muliŋ mbo nyuna aa: “Nɛɛnɛ pilaŋ yɛ doma nuu?”
31 Kɛ mi buɛiyaa nduaa dimul ndu aa: “A cho chɔɔ mɛɛ waŋnda cho num a balaa ma wa nyiindaŋndo yɛ, a nyuna aa, ‘Nɛɛnɛ pilaŋ yɛ ya?’”
32 A koŋ kpou, o wa mɛɛndaŋndo le chɔɔ wana pilaŋ ndu wo.
33 Chuaa hoo ndoo sina nyɛ yɔŋnuŋ ndu wo. Mbo fula a nyiiyaa lende. Nduyɛ siooŋnde wa ndu. Okoŋ mbo beŋ Chiisu wulaŋ. Mbo dimul ndu nyɛ o nyɛ yɔŋnuŋ.
34 Mi Chiisu dimul ndu aa: “Chua nuu, laalaŋ numndo siŋgi num. Kɔ wa kɛndɛ.* Naa wɔɔŋ wa numndo seŋgu.”
35 Chiisu lo suɛi, mi puaa pum fula o chiɛi Chaliɔɔ wo, ma dimul ndu aa: “Chua numndo vi pɛ! Le yɛɛnɛ ŋ cho yɛ vɛlɛ Wana Pɛɛkaa saaŋgiaa?”
36 Kɛ mi Chiisu tuɛi sɔɔŋ nda wa dimioo woŋ. Mbo dimul Chaliɔɔ aa: “Buulaŋ te. Num nɔ laalaŋndo suee.”
37 O chɛl mi wana o wana tol lɛ ndu kɔɔli le mɛɛ Pitɛ, Chemisi, a Chɔŋ pɔmbɔɔ Chemisi.
38 Mɛɛ nda fuuluu o chiɛi Chaliɔɔ wo, mi Chiisu komal waŋnda bɔɔluuwo a chaŋndaŋ choo choo kpeleŋ.
39 Okoŋ mbo luɛi chiɛiniŋ, mbo nyuna nda aa: “Le yɛɛnɛ nya cho yɛ bɔɔluuwo hoo a chaŋndaŋ? Chuaambɔɔ vi le, kɛ o luaŋ o cho ni.”
40 Okoŋ ma kandu ndu mamɔɔ. Mɛɛ o soli nda kpou o bɛɛ, mbo chua finyaa chuaambɔɔ, a kala ndɔ, a buɛiyaa nduaa wa loŋ nda, ma luɛi o fondaŋ nda yambu chuaambɔɔ wo.
41 Mi Chiisu saa chuaambɔɔ baa, mbo dimul ndu aa: “Talita kuumi.” Koŋ cho ni, “Chuaambɔɔ, mi dimul num, ‘Chɔŋ!’”
42 O lepilɛ niŋ kpe, mi chuaambɔɔ chaŋ mbo kandu balɔɔ. (O wa wɔsilaŋ 12.) Mɛɛ hei yɔŋnuŋ, mi wanaa wa loŋ nda kpou duaunuŋ nyaale tau tau.
43 Mi Chiisu sila nda o kala kala maa a dimul wana o wana a ndi okɔɔ le. Mbo dimul nda maa a ke chuaambɔɔ nyɛdiaa mbo de.
Tɛɛsiaalaŋ
^ Ɔɔ “sɛila loonaŋndaŋ.”
^ Ɔɔ “Sɛlɔɔ.”
^ Tofa Tɛɛsiaa.
^ Ɔɔ “Tanda Chieeŋ Bɛnduŋ Tɔ Woŋ.”
^ Ɔɔ “tendu piɔm.”
^ Kilikiiye, “Kɔ wa a kɔl kɛndɛ.”
