Maki 7:1-37
7 Okoŋ, mi Falisiiya a wanaa pɛɛku waŋnda sawala Mɛlɛkalaŋ nda apum, a ndaa fula Chulusalɛm nda chuuŋgiaŋ Chiisu ikɛi.
2 Ma cha buɛiyaa nduaa apum nyɛdiaa dioo a bala nɔɔlɛilaŋ. Koŋ cho ni, a pulu laba le.*
3 (Tuupa mi Falisiiya a Chuuwa kpou ndaa de nyɛdiaa, mɛɛ mi ndaa pulu fɛlɛŋ balaŋ haaa o duŋndo. Kanifuule, naamu finyaa ndaa mamaa nda wa tolɔɔ kɔɔli ni.
4 Nduyɛ te ndaa fula pɛ o lɔɔ niŋ, mɛɛ mi ndaa puluŋ fɛlɛŋ malaŋ ndaa dia nyɛdiaa. A wa naamula cheleŋnda bɔɔbɔɔ tolɔɔ kɔɔli, mɛɛ taalalaŋ, kpɛɛnɔŋ, a nyɛm laanduŋ nda toosiaa a kapaa* woŋ yiŋɔɔ o mɛŋndaŋ niŋ cho nuaa yɛ.)
5 Mi Falisiiya haa a wanaa pɛɛku waŋnda sawala Mɛlɛkalaŋ nda nyuna ndu aa: “Le yɛɛnɛ buɛiyaa numnda cho yɛ naamula finyaa naa mamaa tɛɛmbuuwo, ma wa nyɛdiaa dioo a bala nɔɔlɛilaŋ?”
6 Mbo mulul nda aa: “Nyɛ Aisaya dimi a nya wanaa mulu muluaŋnda haa okɔɔ wo, tonya kpeekpei o cho ni. Mbo dimi aa, ‘A lasondo waŋnda haa cho ya biiloo ni, kɛ kɔlta ndalaŋ la cho levil a ya.
7 Fondo fuu nda cho ya piɛiyo ni, kanifuule sawala ndapila dɔu laŋ nda pɛɛku waŋnda ni.’
8 La kpeeŋa sawala Mɛlɛkalaŋ ikɛi, mi la wa naamula waŋchieeya tolɔɔ kɔɔli.”
9 Mbo chɔɔlu nda dimul aa: “La chaa bɔɔ kafɛilaŋ nuuviaa le sawala Mɛlɛkalaŋ kiɔɔ, le halikpeŋ mi la tol naamula nyalaŋ kɔɔli.
10 Le tamaseliiyo, mi Muuse dimi aa, ‘Ke finya num a kala num bɛɛleŋ.’ Mbo dimi vɛlɛ aa, ‘Wana o wana dimul pɛ finya ndɔ ɔɔ kala ndɔ diomnda wɔɔŋndaŋ, o nɔ mbo sɔla piɔmndo.’
11 Kɛ mi nya dimi aa, ‘Wana o wana dimul pɛ finya ndɔ ɔɔ kala ndɔ aa: “Nyɛ yaa nɔ le num kioo wo, I chii buŋgɛi chua o Mɛlɛka lo le ndu kioo,”’*
12 pesiŋ bɛɛ la chɛllɛ mi waŋndo hoo mala finya ndɔ ɔɔ kala ndɔ le.
13 La siiŋguu diom Mɛlɛkaa nyɛ fondoo fuu a naamula finyaa nyaa mamaa. Nduyɛ la cho sɔɔŋ bɔɔbɔɔ waa nuaa tosaa.”
14 Okoŋ, mbo veelu vɛlɛ faŋgaa mbo dimul nda aa: “Nya kpou la yaŋ nilaŋ nyɛkɛndɛi mi la bii bila.
15 O cho nyɛ waŋndo dia wo le nɔɔliaa ndu le, kɛ nyɛ fula ndu o sondo wo, ndu nɔɔliaa ndu ni.”
16 *——
17 Mɛɛ o mɛi waŋnda mbo luɛi chiɛiniŋ, mi buɛiyaa nduaa kandu ndu nyuuniaa le nyɛ taloo hoo sim ndo.
18 Mbo nyuna nda aa: “Mɛɛ nya bɛɛ la sina wɔ suɛi hei lapɛŋgu le? La sina wɔ maa o cho nyɛ waŋndo dia wo le nɔɔliaa ndu le le?
19 Te waŋndo de nyɛdiaa pɛ, o cho o kɔllo niŋ te o kua le, kɛ o dembe, okoŋ mbo kɔ sɔndaŋ ndu.” Nyɛ Chiisu dimi wo chɔm maa nyɛdiaa o nyɛdiaa naŋ le dioo.
20 Mbo hiau lachi a dimioo aa: “Kɛ nyɛ o nyɛ fula pɛ waŋndo o sondo, ndu nɔɔliaa ndu ni.
21 Kanifuule, o kɔl wanachioo niŋ sɔɔŋ wɔɔŋndoŋ fula ni. Muŋ cho ni, yiyaŋnda wɔɔŋndaŋ, kaa ihini nɔɔlɛiyo,* viileŋ, yiyaŋ diyaa wanachioo,
22 suundaa, hɔlteŋ nɔɔ, sɔɔŋ dɛnɛ wɔɔŋndoŋ tosaa, kaŋgalaa, kaa kɔl vesɛiyo,* paŋalaa, sɔɔŋ wɔɔŋndoŋ dimioo a waŋndo okɔɔ, yoŋgaa, a kiɔɔ sinapɛŋgoo nɔɔ.
23 O kɔllo niŋ sɔɔŋ wɔɔŋndoŋ muŋ kpou fula ni, nduyɛ muŋ nɔɔliaa wanachioo ni.”
24 Mi Chiisu faŋaŋ loŋ mbo kua o tanda Taaya a Saidɔŋ ndo niŋ. Mbo luɛi o chiɛiyo opum niŋ. Ndoo yeema mi wana sina a ndu okɔɔ le. Kɛ ndoo nɔla vioŋnɔŋndo le.
25 Mɛɛ o fuuluu dɔɔ, mi chua pilɛ, o nyina wɔɔŋndo wa chua ndɔ pɔmbɔɔ kɔɔli wo tuɛi a ndu okɔɔ, mbo huŋ beŋ ndu wulaŋ.
26 Kilikiinɔɔ chuaa hoo wa ni, fulaa Foniisiaa o lɛŋnde Siiliaaleŋ niŋ. Mbo lambaŋ Chiisu nyɔɔloo le mbo tou nyina wɔɔŋ wa chua ndɔɔ kɔɔli wo.
27 Kɛ mi Chiisu dimul ndu aa: “Chuaambuaa dio wɔ fɛlɛŋ ma pim. Kanifuule, o bɛnda mi wana chua nyɛdiaa cho le chuaambuaa wo ma dou tuŋaa chuauwa le.”
28 Mbo mulul Chiisu aa: “Tonya i cho ni fallo. Kɛ tuŋaa chuauwa bɛɛ, te chuaambuaa wa pɛ nyɛdiaa dioo, kuuwuŋ deli o tibiiyo* bɛŋgu woŋ, muŋ nda bɛɛ dia ni.”
29 Mi Chiisu dimul ndu aa: “Le nyɛ ŋ dimi hoo wo, kɔŋnuŋ. Nyina wɔɔŋndo faŋaŋ chua numndo kɔɔli.”
30 Okoŋ mi chuaa kuaŋnuŋ o ndu lo. Mɛɛ o fuuluu, o komal chuaambɔɔ ihini o kpele. Nyina wɔɔŋndo ndoo faŋaŋ ndu niŋ kɔɔli.
31 Mɛɛ Chiisu faŋaŋ o tanda Taaya wo niŋ, mbo miiŋgu Saidɔŋ o mɛŋma ibuŋgaŋ Kalili, o tanda Dɛkapɔliiyo* niŋ.
32 Ma chuu ndu po nila baŋulɛiyo. Poo hoo ndoo chiee vɛlɛ suɛi lapi le. Ma nyɔɔlu Chiisu le mbo handu ndu baa choo.
33 Mi Chiisu faŋaŋ a poo hoo faŋgaa tɛɛŋ. Mbo wou ndu sooŋ o lani. Nduyɛ mɛɛ o tufu lɔluaŋ, mbo pilaŋ ndu diɔɔmuleŋ.
34 Mɛɛ Chiisu heelu hɔlla choo choo, mbo yoomu fuu, okoŋ mbo dimul ndu aa: “Ɛfata,” koŋ cho ni, “Kumbiŋ.”
35 Mi nila poo hoo la kumbiŋ, nduyɛ mi diɔɔmule ndɔleŋ le yɔŋnuŋ fefele. Okoŋ mbo kandu suɛi nyɛkɛndɛi.
36 Mi Chiisu sila nda maa a dimul wana o wana le. Kɛ mɛɛ o sila nda fau, lende koni nda hiau lachi a ndi pɛŋgɛlaa ni.
37 Mi kɔndɔfili bɛndu bɛndoo bii nda, ma dimi aa: “Sɔɔŋ kɔndɔfilloŋ kpu o tosa ni. Mbo tosa pɛŋ mi wanaa nila baŋulɛiya tuei, nduyɛ mi bobuaa soo.”
Tɛɛsiaalaŋ
^ Koŋ cho ni, balaŋ pulɔɔ a mɛɛ naamoo dimi yɛ.
^ Koŋ cho ni, chiliŋii siaŋɛi.
^ Kilikiiye, “Kɔbaŋndo.” Koŋ cho ni, ke cho le Mɛlɛka wo.
^ Tofa Tɛɛsiaa.
^ Kilikiiye, pɔniaa. Tofa Tɛɛsiaa.
^ Ɔɔ “sɔɔŋ lasiɔmboŋ.” Kilikiiye, asɛlchiaa. Tofa Tɛɛsiaa.
^ Ɔɔ “tabalioo.”
^ Ɔɔ “Tanda Chieeŋ Bɛnduŋ Tɔ Woŋ.”