Maki 8:1-38
8 O palɛi keŋ niŋ, mi waŋnda faŋga bɛndoo chuuŋgiaŋ vɛlɛ. Nduyɛ ndaa nɔ nyɛ o nyɛ le dio le. Okoŋ mbo veelu buɛiyaa nduaa, mbo dimul nda aa:
2 “Nyiɛɛye cho ya bɔɔ le waŋnda haa, kanifuule le palɛi i yaa a cho ya kɔɔli, nduyɛ a nɔ nyɛ o nyɛ nda de le.
3 Te I mal nda pɛ le miiŋgoo o la nda lo, a cho kei wou nɛi tɛɛŋ a yiaaŋ. Nduyɛ, apum naa levil nda fula ni.”
4 Kɛ mi buɛiyaa nduaa nyuna ndu aa: “Kuɛɛnɛ naŋ cho yɛ nyɛdiaa sɔla o fondaŋ yololiɔɔ hoo le mi waŋnda haa kpou de ma pim?”
5 Okoŋ mbo nyuna nda aa: “Vɛɛnɛ nya nɔ yɛ beediiyo* kpuŋgbaŋ?” Ma muli aa: “Kpuŋgbaŋ ŋɔmmɛu.”
6 Mbo dimul waŋnda le ma chal lɛŋ. Okoŋ mbo chua beedii kpuŋgbaŋ ŋɔmmɛu koŋ, mbo piɛi, mbo yimi yimi, mbo ke buɛiyaa nduaa le ma piɔu waŋnda. Mi buɛiyaa nduaa piɔu waŋnda.
7 Ndaa nɔ vɛlɛ suuwa nyɛɛmbɔ. Mɛɛ o piɛi, mbo dimul nda vɛlɛ le ma piɔu waŋnda.
8 Mi nda kpou dia, ma pum cha. Ma chɔuviaa o biŋgi biŋgi nda dema wo, mbo pia kambɛila* bɛndulaŋ la ŋɔmmɛu.
9 Waŋ piaanduaa wa loŋ nda a wa le 4,000. Okoŋ mbo dimul nda le ma miiŋgu o la nda lo.
10 O lepilɛ niŋ kpe, mbo luɛi o dɛndɔɔ niŋ nda buɛiyaa nduaa ma huŋ o tanda Dalimanutaa wo niŋ.
11 Mɛɛ o fuuluu, mi Falisiiya huŋ ma kandu ndu balioo chiŋaa le ndu tɔɔndaŋndo. Ma dimul ndu le mbo tosa kaamaa le chɔmndo maa Mɛlɛka vem ndu ni.
12 Mbo yoomu fuu. Mbo dimi aa: “Le yɛɛnɛ waŋnda teleŋndo hoo yeema yɛ kaamaa? A tonya mi dimul nya, kaama cheleŋ tosaŋ lɛ niŋ kposoŋ le waŋnda teleŋndo hoo le.”
13 Mbo mɛi nda loŋ, mbo luɛi vɛlɛ o dɛndɔɔ niŋ, mbo taŋ o kɔŋgɔɔ opilɔɔ.
14 Kɛ, mi buɛiyaa nduaa puɛɛnuŋ le beediiyo chuaa. Nduyɛ ndaa nɔ nyɛ o nyɛ o dɛndɔɔ niŋ te, mɛɛ beediiyo kpuŋgbɛi ipilɛ kpe.
15 Mbo sila nda aa: “La mandaŋ a yiisii* Falisiiya a yiisii kunda Hɛlɔɔ wo.”
16 Okoŋ ma kandu sɛɛŋgiaŋndo ndapila tɛɛŋ le mɛɛ nda chue beedii le yɛ.
17 Mɛɛ Chiisu tuei nyɛ nda wa dimioo wo, mbo nyuna nda aa: “Le yɛɛnɛ nya cho yɛ sɛɛŋgiaŋndo maa la hiŋ a beedii le? Mɛɛ la sina wɔ suɛi hei lapɛŋgu le? Baa kɔlta nyalaŋ la kendu wɔ suɛi biyɔɔ bila?
18 ‘La nɔ hɔltaŋ, kɛ la cho pa chɔɔ a laŋ? La nɔ nilaŋ, kɛ la cho pa tueiyɔɔ a laŋ?’ La loonuŋ pa
19 teleŋ ya yimi yimi beedii kpuŋgbaŋ ŋuɛɛnoo mi ke waŋ piaanduaa 5,000 wo? Vɛɛnɛ o nda dema wo ndoo pɛ yɛ kambɛilaŋ?” Ma mulul ndu aa: “Tɔ a la tiɔɔŋ.”
20 “Mɛɛ ya yimi yimi beedii kpuŋgbaŋ ŋɔmmɛu wo mi ke waŋ piaanduaa 4,000, vɛɛnɛ o nda dema wo ndoo pɛ yɛ kambɛila* bɛndulaŋ?” Ma mulul ndu aa: “La ŋɔmmɛu.”
21 Mbo nyuna nda aa: “Mɛɛ la sina wɔ ndi lapɛŋgu le?”
22 Mɛɛ nda fuuluu Bɛtisaida, ma chuu ndu po sumɛiyo. Nduyɛ ma nyɔɔlu ndu le mbo pilaŋ ndu.
23 Mi Chiisu saa po sumɛiyo baa mbo faŋaŋ a ndu chiee. Mɛɛ o tufu ndu lɔluaŋ o hɔl, mbo pilaŋ ndu, mbo nyuna ndu aa: “Yɛɛnɛ ŋ cho yɛ chɔɔ?”
24 Mi poo mɛɛndiaŋ, mbo dimi aa: “I cho waŋchieeya chɔɔ balɔɔ, kɛ maa iyɔm ya cho nda chɔɔ ni.”
25 Mi Chiisu pilaŋ vɛlɛ poo hɔlla, mbo siaŋgu, nduyɛ mbo wa niŋ chɔɔ nyɛkɛndɛ walaŋ.
26 Mbo dimul ndu le mbo kuɛŋnuŋ o ndu lo. Kɛ mbo dimul ndu aa: “Miiŋgu wɔ chiee le.”
27 Mi Chiisu nda buɛiyaa nduaa mal le kɔlaŋ o sɔndɔkɔlta balu Sisaliaa Filipai laŋ. Mɛɛ nda wa kɔlaŋ, mbo kandu buɛiyaa nduaa nyunaa aa: “Yɛɛ waŋnda cho yɛ dimioo a wana ya cho wo okɔɔ?”
28 Ma mulul ndu aa: “Apum cho dimioo aa Chɔŋ Wana Yiŋaa ŋ cho ni. Apum aa Ilaicha. Apum aa wana suaa le Mɛlɛka wo opum.”
29 Mbo nyuna nda aa: “Kɛ nya yɛ, vɛɛ nya dimi yɛ? Wana maavɛɛ ya cho yɛ?” Mi Pitɛ mulul ndu aa: “Num cho Kiliti ni.”
30 Okoŋ mbo sila nda o kala kala maa a dimul wana o wana a ndu okɔɔ le.
31 Mbo kandu nda pɛɛkoo maa Po wana pɔnɔɔ nɔ le saŋgaa sɔlaa tau, nduyɛ mi laŋgbaa kalla, a masaa wanaa soliaa lasalaa, a wanaa pɛɛku waŋnda sawala Mɛlɛkalaŋ nda kɛɛ ndu, okoŋ ma dii ndu. Kɛ mbo miiŋgu yoomu o paale yaa ndɔleŋ choo.
32 Mbo dimul nda suɛi hei kpendekele. Kɛ mi Pitɛ veelu ndu o lesɔŋgi, mbo kpaa ndu maa o dimi sɔɔŋ waa lende le.
33 Mi Chiisu muliŋ, mbo tofa buɛiyaa nduaa. Mbo dimul Pitɛ aa: “Faŋaŋ ya nanuŋ,* Setana! Kanifuule, nyɛ ŋ yiyaŋ hoo wo cho yiyaŋ Mɛlɛka le, kɛ yiyaŋ waŋchieeya.”
34 Okoŋ mbo veelu faŋgaa a buɛiyaa nduaa. Mbo dimul nda aa: “Wana o wana yeema pɛ mbo simnuŋ buɛi ni, o nɔ mbo kɛɛ ndupila,* nduyɛ mbo chua yɔm ndɔ imɔnɔɔ,* mbo tol la kɔɔli.
35 Wana o wana kindiŋ pɛ le yoomu ndɔɔ piŋioo, o cho ndu hiɔlɔŋ. Kɛ wana o wana chɛl pɛ mi yoomu ndɔɔ hɛluŋ ndu le sabu nuu, a le sabu yooŋgu kɛndɔɔ, o cho ndu miŋgi sɔla.
36 Te waŋndo sɔla pɛ nyɔɔŋ o chieeŋndo niŋ kpou, kɛ nduyɛ mi yoomu ndɔɔ hɛluŋ ndu o muŋ nuuviaa niŋ, tɔnɔ yɛɛnɛ wa yɛ o keŋ niŋ?
37 Yɛɛ kpeekpei waŋndo yɔŋgu yɛ le yoomu ndɔɔ baŋaa?
38 Wana o wana yɔŋ pɛ siɔmbulaŋ le ya, a diomnda nilaŋ o chieeŋ yɔŋ wɔɔŋ sendu hoo a Mɛlɛka le wo niŋ pɛ, mɛɛ Po wana pɔnɔɔ bɛɛ te o hiŋ pɛ o biilu Finya ndɔ wo niŋ nda maalikɛiyaa nduaa diandaa, o cho siɔmbulaŋ yɔŋ le ndu.”
Tɛɛsiaalaŋ
^ Ɔɔ “buloo.”
^ Ɔɔ “kambɛila nda wou nyɛdiaa laŋ.”
^ Ɔɔ “lɛvɛŋ.”
^ Ɔɔ “kambɛila nda wou nyɛdiaa laŋ.”
^ Kilikiiye, “Hiou ya amakɔɔ.”
^ Ɔɔ “o nɔ lɛ mbo wa le ndupila le.”
^ Tofa Tɛɛsiaa.
