Maki 9:1-50
-
Mɛlɛka tosa mi Chiisu maŋgaŋ (1-13)
-
Poombɔ nyinaa wɔɔŋnda wa kɔɔli wo sɔla siŋgioo (14-29)
-
Nyɛ o nyɛ tiuba mbo yɔŋnuŋ le wana nɔ laalaŋndo wo (23)
-
-
Chiisu soo vɛlɛ a piɔm ndɔɔ okɔɔ (30-32)
-
Buɛiya hiŋaŋ diomndaŋ le wana cho wana bɛndoo wo (33-37)
-
Wana o wana simul naa le, mɛɛ le naa o cho ni (38-41)
-
Sɔɔŋ tosa ma luɛi o hakioo niŋndoŋ (42-48)
-
“La nɔ hɛlle nya niŋ” (49, 50)
9 Okoŋ kɔɔli, mi Chiisu dimul nda aa: “A tonya mi dimul nya, wanaa pum nya tɛɛŋ a vi niŋ kposoŋ te, haaa ma huŋ chɔ Masale Mɛlɛkaleŋ.”
2 Mɛɛ palɛi hiou i ŋɔmpum, mi Chiisu chua Pitɛ, Chemisi, a Chɔŋ, ma hel o pembii vilɛi pum choo nda kpeele. Okoŋ, mi Mɛlɛka tosa mi Chiisu maŋgaŋ nda o hɔl.
3 Mi nyɛla wa ndu lekɔɔ laŋ la yɔŋnuŋ ŋɛlɛŋgi ŋɛlɛŋgi. Mi la yɔŋnuŋ la humbu fo fo. Nyɛ o nyɛ cho o chieeŋndo choo mbo nɔla nyɛlaŋ dindi lende le.
4 Mi Ilaicha nda Muuse fula nda o hɔl, ma cha nda suukaŋndo a Chiisu.
5 Okoŋ, mi Pitɛ dimul Chiisu aa: “Wana Pɛɛkaa, o bɛnda bɔɔ miŋ wa nanuŋ. Ŋ taŋgullɔɔ buundaŋ* la yaa. Opilɛ le num, opilɛ le Muuse, nduyɛ opilɔɔ le Ilaicha.”
6 Pitɛ ndoo sina nyɛ ndoo nɔ le dimioo wo le, kanifuule a wa a siooŋnde tau tau.
7 Mi yumbu yumboo kilaŋ, mbo kumbu nda kpu. Okoŋ ma tuɛi diomndo o yumbu yumboo niŋ aa: “Po nuu cho hoo ni. I kaala ndu. La tuei ndu diom.”
8 Ma mɛɛndiaŋ o lepilɛ niŋ kpe, kɛ a chi lɛ wana o wana cheleŋ nda ikɛi le, mɛɛ Chiisu.
9 Mɛɛ nda wa pembei tolɔɔ, mi Chiisu sila nda o kala kala maa a dimul wana o wana nyɛ nda che wo le, haaa mɛɛ mi Po wana pɔnɔɔ huŋ fula waŋvilɛiya tɛɛŋ.
10 Ma kɛsiŋ ndi o lakɔl. Kɛ ma wa suukaŋndo ndapila tɛɛŋ a nyɛ fulaa waŋvilɛiya tɛɛŋ sim ndo okɔɔ.
11 Ma kandu ndu nyunaa aa: “Le yɛɛnɛ wanaa pɛɛku waŋnda sawala Mɛlɛkalaŋ nda dimi yɛ maa Ilaicha nɔ fɛlɛŋ mbo hiŋ?”
12 Mbo mulul nda aa: “Ilaicha nɔ mbo hiŋ fɛlɛŋ le nyɛ o nyɛ miŋgioo o fondaŋ ndɔɔ. Kɛ le yɛɛnɛ i cho yɛ i poonyiaa a Po wana pɔnɔɔ okɔɔ maa o nɔ mbo saŋga tau tau, nduyɛ ma tɛɛmbuu ndu labɛɛ?
13 Kɛ mi dimul nya, Ilaicha hiŋ niŋ. Nduyɛ mi waŋnda tosa nyɛ o nyɛ nda yeema a ndu, a mɛɛ i cho i poonyiaa a ndu okɔɔ yɛ.”
14 Mɛɛ nda hiŋ o buɛiya a piliaa lo, ma cha faŋga bɛndoo nda a balaa silɔ. Wanaa pɛɛku waŋnda sawala Mɛlɛkalaŋ nda wa diomndaŋ hiŋaŋndo a nda.
15 Kɛ mɛɛ faŋgaa che dɔɔ Chiisu, mi kɔndɔfillo bii nda. Ma nyaanuŋ le ndu kɔlaŋ yilɔɔ.
16 Mbo nyuna nda aa: “A yɛɛ okɔɔ nya cho yɛ diomndaŋ hiŋaŋndo a nda?”
17 Mi wana pilɛ o faŋgaa tɛɛŋ muli aa: “Wana Pɛɛkaa, I chuu num po nuu, kanifuule nyina wɔɔŋndo cho ndu kɔɔli. Mbo tosa ndu o suu le.
18 Teleŋnda bɔɔbɔɔ te o chua ndu pɛ, o viɔl ndu lɛŋ, hiiyo fula ndu o sondo, o sɔm chiŋndoŋ, nduyɛ mi yoomuaŋ ma chuu ndu fo. Mi dimul buɛiyaa numnda le ma tou ndu nyina wɔɔŋndo hoo kɔɔli, kɛ a tiuba le.”
19 Mi Chiisu dimul nda aa: “Ee nya waŋnda haa, baa la nɔ laalaŋ te? Le vɛɛ kpɛ ya cho yɛ wa a nya latulu? Le vɛɛ kpɛ ya cho yɛ wa nya biuwɔŋndo? Huŋ a ndu naa ya chua.”
20 Okoŋ ma huŋ a poombɔɔ naa ndu chua. Kɛ mɛɛ nyina wɔɔŋndo che dɔɔ Chiisu, mbo chua poombɔɔ, okoŋ mbo del lɛŋ, mbo wa kɔlaŋ a pimbullo, mi hiiyo fula ndu o sondo.
21 Okoŋ mi Chiisu nyuna finya ndɔ aa: “Le vɛɛ kpɛ o viou yɛ niŋ a naa hoo?” Mbo muli aa: “Chɔŋ o chuaambɔyɛi nduɛi niŋ.
22 Teleŋnda bɔɔbɔɔ, mbo mal ndu o yiŋ, te koŋ te o mɛŋndaŋ niŋ le ndu diyɔɔ. Kɛ te a nɔla pɛ ma tosa nyɛ, mɛɛ yandii tuiinuŋ naa inyiɛɛ ma mala naa fɔ.”
23 Mi Chiisu dimul ndu aa: “Le yɛɛnɛ ŋ dimi yɛ aa, ‘Te a nɔla pɛ’? Nyɛ o nyɛ tiuba mbo yɔŋnuŋ le wana nɔ laalaŋndo wo.”
24 O lepilɛ niŋ kpe, mi finyaa poombɔɔ dimi choo choo aa: “I nɔ laalaŋndo! Mala ya mi laalaŋ nuu chɔɔlu kalu poŋ!”
25 Mɛɛ Chiisu che maa faŋgaa wa nda deŋgelaŋndo choo, mbo tuau nyina wɔɔŋ koŋ aa: “Num nyina wɔɔŋ tosa hoo waŋndo tuii le, nduyɛ o suu le wo, mi dimul num, faŋaŋ poombɔɔ hoo kɔɔli, nduyɛ tual lɛ ndu kɔɔli kposoŋ te!”
26 Mi nyina wɔɔŋ koŋ mal yioo kpeleŋ. Mbo chua vɛlɛ poombɔɔ, nduyɛ mbo yɔɔkpiaa ndu tau tau. Okoŋ mbo faŋaŋ ndu kɔɔli. Mi poombɔɔ wou kpandeŋ. Wanaa bɔɔbɔɔ wa dimioo aa: “O vi!”
27 Kɛ mi Chiisu saa ndu baa, mbo chua ndu, mbo sim.
28 Mɛɛ o luɛi chiɛiniŋ, mi buɛiyaa nduaa nyuna ndu nda kpeele aa: “Le yɛɛnɛ naŋ bumba yɛ nyina wɔɔŋ koŋ touwɔɔ?”
29 Mbo mulul nda aa: “Piɛileŋ kinɛi le nɔla nyina waa nuaa touwɔɔ ni.”
30 Mɛɛ nda faŋaŋ loŋ, ma keeku Kalili. Kɛ ndoo yeema mi wana o wana sina a ndi okɔɔ le.
31 Kanifuule, o wa buɛiyaa nduaa pɛɛkoo mbo wa nda dimullo aa: “A cho hunɔɔ Po wana pɔnɔɔ pisi waŋnda o ba, nduyɛ ma dii ndu. Kɛ o yɔŋ bɛɛ ma dii ndu, o cho miiŋgu yoomu o paale yaa ndɔleŋ choo.”
32 Kɛ a bii nyɛ o dimi wo bila le, nduyɛ a wa siooŋnde le ndu nyunaa.
33 Ma huŋ Kepaaniɔm. Mɛɛ nda wa chiɛiniŋ, mbo nyuna nda aa: “O yɛɛnɛ choo nya wa yɛ diomndaŋ hiŋaŋndo o nɛi?”
34 Kɛ ma mei doŋ, kanifuule le wana cho wana bɛndoo nda tɛɛŋndo nda wa diomndaŋ hiŋaŋndo o nɛi ni.
35 Mbo chal, mbo veelu kiilaa nduaa 12 nda. Mbo dimul nda aa: “Wana o wana yeema pɛ mbo wa wana tasoo, o nɔ mbo wa wana mɛɛlaa kpɔŋ, nduyɛ mbo wa buɛiyo le nya kpou.”
36 Okoŋ mbo veelu poombɔ pɔmbɔɔ mbo simi ndu nda lachi. Mɛɛ o handu ndu balaŋ o choŋgu, mbo dimul nda aa:
37 “Wana o wana chɛl poombɔ pɔmbɔ waa nuaa le sabu nuu pɛ, mɛɛ ya o chɛl koŋ ni. Nduyɛ wana o wana chɛl la pɛ, o cho ko ya le o chɛl te, kɛ wana vem ya wo o chɛl vɛlɛ koŋ ni.”
38 Mi Chɔŋ dimul ndu aa: “Wana Pɛɛkaa, miŋ cha waŋndo nyinaa wɔɔŋnda touwɔɔ o diola numndaŋ niŋ, kɛ miŋ kuuna ndu, kanifuule o cho wana naa le.”
39 Kɛ mi Chiisu dimi aa: “La kuuna ndu le, kanifuule wana o wana tosa walta kɔndɔfiltaŋ o diola nilaŋ niŋ, okoŋ kɔɔli mbo kandu bɛɛ sɔɔŋ wɔɔŋndoŋ dimioo a ya okɔɔ le.
40 Wana o wana simul naa le, mɛɛ le naa o cho ni.
41 Nduyɛ wana o wana ke nya pɛ mɛŋma kolaŋ o yɔŋ bɛɛ aa taalaa cha le mɛɛ nya cho le Kiliti yɛ, a tonya mi dimul nya, wana koŋ cho hunɔɔ fandaa sɔla.
42 Kɛ wana o wana tosa pɛ mi wanaa pɔmbuaa dɔu haa laalaŋndo o ya niŋnda opilɛ bɛɛ mal laalaŋ ndɔɔ, o bɛnda bɛɛ ma baa ndu pou bɛndoo o labolo, ma kɔ mal ndu o mɛŋma ihɛllaŋ niŋ.
43 “Te ba numndo wa pɛ tosaa le ma luɛi o hakioo niŋ, mɛɛ kiolu ndu kpali. O bɛnda ma huŋ sɔla yoomoo a baa opilɛ, mbo hiau kɔlaŋ Kɛhɛna* a balaŋ la tiɔɔŋ.
44 *——
45 Nduyɛ te pelii numnde wa pɛ tosaa le ma luɛi o hakioo niŋ, mɛɛ kiolu ndi kpali. O bɛnda ma huŋ sɔla yoomoo a pelei ipilɛ, mbo hiau kɔlaŋ Kɛhɛna* a peloŋ ŋmuuŋ.
46 *——
47 Te hɔlte numndeŋ le wa pɛ tosaa le ma luɛi o hakioo niŋ, mɛɛ viou leŋ. O bɛnda ma huŋ luɛi o Masale Mɛlɛkaleŋ niŋ a hɔlteŋ lepilɛ, mbo hiau kɔlaŋ Kɛhɛna* a hɔltaŋ la tiɔɔŋ.
48 Loŋ ndu, dɛluaa vi le, nduyɛ yiŋndeŋ bɛɛ le nyum te.
49 “Mɛlɛka cho wanaa waa nuaa yiŋndeŋ chuchɔɔ choo mɛɛ waŋndo chuchu nuaa hɛlle o nyɛdiaa yɛ.
50 Hɛlle yeela. Kɛ te yeelaa fulaŋ pɛ o hɛlle niŋ, a yɛɛnɛ nya miŋgi yɛ vɛlɛ yeelaa o ndi niŋ? La nɔ hɛlle nya niŋ, nduyɛ mi la wa a kɔl nyulu vellaa velle.”
Tɛɛsiaalaŋ
^ Ɔɔ “yɛkpɛlaŋ.”
^ Tofa Tɛɛsiaa.
^ Tofa Tɛɛsiaa.
^ Tofa Tɛɛsiaa.
^ Tofa Tɛɛsiaa.
^ Tofa Tɛɛsiaa.
