Malakai 2:1-17
2 “Nya wanaa soliaa lasalaa, le nya sawaa hoo cho ni.
2 Te la kɛɛ pɛ le ya nilaŋ yaŋɔɔ, nduyɛ mi la kɛɛsiaa a kɔl nyaa kpou le diola nilaŋ kiɔɔ saŋgalaa , I cho nya sendioo handɔɔ choo, okoŋ mi siŋga salala nyalaŋ a sendilaŋ. A tonya, I siŋga salala nyalaŋ a sendilaŋ, kanifuule la kɛɛ le ndi kɛsiŋndo o kɔl.” Chɛhowa, Mɛlɛka puaa chɔuwa dimi lende ni.
3 “I cho yɛiyuŋ nyaŋ tɛɛmbuu le sɔɔŋ nya tosa woŋ. Chɔluaa nya soli salaa o bɔŋaŋnda nyalaŋ nda, I cho nya poola ndalaŋ fasaŋa o hɔl, nduyɛ mi la kɔ del o laŋ choo.*
4 Okoŋ, la cho sina maa ya yɔŋgu nya sawaa hoo ni, le halikpeŋ mi kpema ya yii a Livaiyo hiou lachi a waa.” Chɛhowa, Mɛlɛka puaa chɔuwa dimi lende ni.
5 “Kpema ya yii a ndu wo wa le yoomu ndɔɔ mandaa vɛlɛ a kɔl ndɔ nyuloo. Le salala ya dɔu ndu laŋ ndaŋ, mi keŋ tosa mbo nɔ siooŋii nii. Nduyɛ le mɛɛ ndoo nɔ bɛɛleŋ le diola nilaŋ yɛ, mbo kɛɛ le nyɛ tɛɛmbuu ya kɔllo wo tosaa.
6 Pɛɛkula tonyalaŋ ndoo pɛɛku waŋnda ni. Sɔɔŋ wɔɔŋ muŋ fula ndu o sondo le. O wa o kɔl nyulu niŋ a ya, nduyɛ mi ndoo tosa sɔɔŋ sakpo ya o hɔl. Mbo tosa mi wanaa bɔɔbɔɔ mal sɔɔŋ wɔɔŋndoŋ tosaa.
7 Sɔɔŋ kɔl kaloŋ wana soliaa lasalaa nɔ ni mbo wa dimioo. Nduyɛ, o ndu lo waŋnda nɔ ni ma kuɛ le mbo pɛɛku nda sawalaŋ, kanifuule buɛi Chɛhowa wo o cho ni, Mɛlɛka puaa chɔuwa.
8 “Kɛ nyapila faŋaŋ o nɛi tonyaa choo. Nduyɛ, la tosa mi wanaa bɔɔbɔɔ kɛɛ le sawaa biyɔɔ. La tɛɛmbuu kpema ya yii a Livaiyo.” Chɛhowa, Mɛlɛka puaa chɔuwa dimi lende ni.
9 “Lelaŋ, I cho tosa mi la simnuŋ wanaa fonduaa, nduyɛ mi tusi nya siɔmbulaŋ waŋnda kpou o hɔl. Kanifuule la faŋaŋ o nɛila nilaŋ choo, nduyɛ mi la kɛɛ le waŋnda biyɔɔ kpeŋ kpeŋ a mɛɛ sawaa dimi yɛ..”
10 “O cho finyaa o pilɛ le naŋ nɔ le? O cho Mɛlɛka pilɔɔ kpe le toosiaa naa le? Mɛɛ le yɛɛ naŋ cho yɛ kiɔɔ waa sakpo naapila tɛɛŋ, nduyɛ miŋ wa kpema finyaa naa mamaa nɔɔliaa?
11 Waŋnda Chuda kɛɛ le sɔɔŋ tosaa o nɛi sakpoo choo. Nduyɛ suɛi nɔɔlɛiye tosaŋ o Isɔluɛi niŋ vɛlɛ a Chulusalɛm. Chuda kɛɛ Chɛhowa bɛɛleŋ kioo,* Mɛlɛka kaala diondɔɔ wo. Nduyɛ, mbo chua wana lanɔ piɛi mɛlɛka lachoowaa wo o nɔɔ niŋ.
12 Wana o wana tosa hei pɛ, mɛɛ mɛɛ wana koŋ o wa, Chɛhowa cho ndu faŋa o tɛndiila Chekɔpu laŋ niŋ, o yɔŋ bɛɛ maa mbo soli salalaŋ o Chɛhowa lo, Mɛlɛka puaa chɔuwa.”
13 “La tosa vɛlɛ nyɛ cheleŋ. La cho tosaa mi waŋnda wa chaŋndaŋ, ma wa mɔnɛi biyɔɔ, nduyɛ ma wa bandu luamaa lasala Chɛhowa wo liiviaa a mɛmiaŋ. Lelaŋ, o heu lɛ ba a salala nyalaŋ te, kɛlɛŋgaa niŋ te mbo naŋ kɔl le nya nyɛ o nyɛ biyɔɔ o ba.
14 Mi la nyuna aa, ‘Le sabu yɛɛ?’ Kanifuule, Chɛhowa cho lesei maa a cho sakpo a lanɔ ŋ chua o chua piaanduyɛi numnde niŋndo le, mi che bɛɛ chaaŋ num, a lanɔ ŋ yii kpemaa a ndu wo o cho ni.
15 Kɛ wana pilɛ cho nya tɛɛŋ, ndu tosa keŋ te. Kanifuule, nyina Mɛlɛkaa cho ndu choo. Nduyɛ, yɛɛ wana koŋ wa yɛ nuuviaa? Chuauwaa Mɛlɛkaa.* Lelaŋ, la mandaŋ a yiyaŋnda nyalaŋ, nduyɛ bii lanɔ ŋ chua o chua piaanduyɛi numnde niŋndo biyɔɔ wɔɔŋndo le.
16 Kanifuule, I tul* kɛyaŋndo leyɛ.” Chɛhowa, Mɛlɛka Isɔluɛiya dimi lende ni. “Nduyɛ, wana kaala* hoo sɔŋgɔlaŋ ndo bɛɛ, I tul ndu leyɛ.” Chɛhowa, Mɛlɛka puaa chɔuwa dimi lende ni. “Lelaŋ, la mandaŋ a yiyaŋnda nyalaŋ, nduyɛ la biinaŋ o nɛi kaŋgalaa niŋ te.”
17 “La tosa mi Chɛhowa saŋga a sɔɔŋ nya dimi woŋ. Kɛ mi la nyuna aa, ‘Yɛɛ naŋ tosa yɛ mbo saŋga a naa?’ La cho dimioo aa, ‘Waŋndo tosa bɛɛ dɛnɛ wɔɔŋndo, o cho wana kɛndɛ Chɛhowa o hɔl, nduyɛ mbo hini kɔl a ndu.’ La cho vɛlɛ dimioo aa, ‘Kuɛɛnɛ Mɛlɛka cho sakpo wo cho yɛ?’”
Tɛɛsiaalaŋ
^ Koŋ cho ni, o fondaŋ ndaa viau poola chɔuluaa ndaa soli salalaŋ ndo.
^ Ɔɔ naapum, “nɔɔliaa chiɛi Mɛlɛkaa.”
^ Hibuluiye, “Kulii Mɛlɛka ve.”
^ Hibuluiye, “o tul.”
^ Hibuluiye “chuɛɛnuŋ.”
