Malakai 3:1-18
3 “I cho buɛi nuu viomɔɔ, mbo kɔ toosiaa pɔɔ nɛiyo ya lachi. O lepilɛ niŋ kpe, masa tonya nya cho nuuviaa wo cho hunɔɔ o chiɛi ndɔɔ niŋ. Nduyɛ buɛi cho le kpemaa wo cho hunɔɔ, o nya nɔ yeemɛi tau le chɔɔ wo. A tonya, o nɔ le hunɔɔ kɛsɛ.” Chɛhowa, Mɛlɛka puaa chɔuwa dimi lende ni.
2 “Nɛɛnɛ biunuŋ yɛ niŋ paale o cho hunɔɔ leŋ? Nɛɛnɛ nɔla yɛ niŋ mbo sim yi te o hiŋ pɛ? Kanifuule, o cho wa maa yiŋnde dindi chiliŋnde leŋ, nduyɛ mbo wa mɛɛ sɛɛ tuaa lanyiɔɔ cho nuaa yɛ.
3 O cho hunɔɔ ichali maa wana teeŋgiaa kanii humbuei, nduyɛ mbo dindi ndi wo. O cho hunɔɔ puaa Livaiya dindi, nduyɛ mbo teeŋgiaa nda mɛɛ nda teeŋgiaa nuaa kooliiye a kanii humbuei yɛ. A cho hunɔɔ simnɔŋ wanaa Chɛhowa wa, a yɔŋgu kelaŋ o sandei choo wa.
4 Kela waŋnda Chuda a Chulusalɛm cho wa yɔŋgoo laŋ, la cho Chɛhowa kɔllo nɛŋi, mɛɛ ndii yɔŋnuŋ o sindɔɔ niŋ yɛ.
5 “I cho nya sɔɔŋguu ikɛi le nya yamɛi kilullo. Nduyɛ, wanaa viam yawalaŋ nda, wanaa suundɛiya, wanaa chua buŋgaŋ lachoowaŋ nda, a wanaa tosal wanaa nda chua le wallo wa kafalaŋ nda, I cho nda seileŋ tɛndal. Nduyɛ, wanaa tosal wanaa vii piaanduaa wa, a chuauwaa nɔ lɛ ŋfinya le wa kafalaŋ nda, vɛlɛ a wanaa kɛɛ le mialla malaa wa kpou, I cho nda seileŋ tɛndal. Waŋnda haa nɔ isiooŋ le ya le.” Chɛhowa, Mɛlɛka puaa chɔuwa dimi lende ni.
6 “Kanifuule, ya cho Chɛhowa ni. I siŋgaŋ te. Nduyɛ nya cho chuauwaa Chekɔpu wa ni. La chuu wɔ kpou le.
7 Chɔŋ a teleŋ finyaa nyaa mamaa, mi la mulul sawala nilaŋ kɔɔ, nduyɛ mi la kɛɛ le laŋ biyɔɔ. La miiŋgu ya o ibuŋ, mi ya bɛɛ miiŋgu nya o ibuŋ.” Chɛhowa, Mɛlɛka puaa chɔuwa dimi lende ni.
Kɛ mi la nyuna aa: “Vɛɛ naŋ cho yɛ looku miiŋgu num o ibuŋ?”
8 “Baa wana chioo nɔla pa mbo chiimbuu Mɛlɛka? Kɛ la cho ya chiimbuuwo.”
Nduyɛ mi la nyuna aa: “Vɛɛ naŋ cho yɛ num chiimbuuwo?”
“O tɔ ndɔɔ a toolulaŋ nya cho kiɔɔ yɔŋgoo ni.
9 A tonya, sendioo cho nya choo* le mɛɛ nya cho ya chiimbuuwo yɛ. Nduyɛ Isɔluɛiya kpou cho hei tosaa ni.
10 La huŋ a o tɔ ndɔɔ kpou o chiɛi kɛsiaa lawolɔɔ niŋ, le halikpeŋ mi nyɛdiaa wa o chiɛi nuu niŋ. A yandii, la tofawɔ ya o nɛiyo hoo choo, mi la che te I kumbul niŋ nya diolaŋ o choo choo niŋ, mi hulu nya salaa choo le. Okoŋ, nyɛ o nyɛ ve nya lepɛŋ te.” Chɛhowa, Mɛlɛka puaa chɔuwa dimi lende ni.
11 “I cho nyɛ tɛɛmbuu tɔlɔɔlaŋ ndo* touwɔɔ le nya. Okoŋ, o tɛɛmbuu lɛ niŋ tɔlɔɔla cho o lɛŋnde nyaleŋ niŋndaŋ te, kɛlɛŋgaa mi kilepiiyaŋ o kpelela nyalaŋ niŋ ma kɛɛ le komɔɔ.” Chɛhowa, Mɛlɛka puaa chɔuwa dimi lende ni.
12 “Waŋnda kpou cho dimi maa wanaa kɔl kɛndiaa nya cho ni. Kanifuule, lɛŋnde nyaleŋ le wa niŋ lɛŋnde waŋnda yeema leŋ.” Chɛhowa, Mɛlɛka puaa chɔuwa dimi lende ni.
13 Mi Chɛhowa dimi aa: “La cho diomnda wɔɔŋndaŋ dimioo a ya okɔɔ.”
Nduyɛ mi la nyuna aa: “Vɛɛ naŋ dimi yɛ diomnda wɔɔŋndaŋ a num okɔɔ?”
14 “La dimi aa, ‘Tɔnɔ o tɔnɔ cho o Mɛlɛka piɛiyo niŋ te. Tɔnɔ yɛɛnɛ naŋ sɔla yɛ niŋ o sawala ndɔlaŋ biyɔɔ niŋ? Nduyɛ, tɔnɔ yɛɛnɛ naŋ sɔla yɛ niŋ le Chɛhowa, Mɛlɛka puaa chɔuwa chɔmndo maa ŋ tambu kɔl le hakila naalaŋ?
15 Ŋ cho chɔɔ mi wanaa heelaŋnda wa a kɔl kɛndɛ, nduyɛ mi wanaa tosa dɛnɛ wɔɔŋndo wa sɔla batiuwaa. Ma bii kɔllo ma tɔɔndaŋ Mɛlɛka, kɛ nyɛ o nyɛ yɔŋnuŋ nda le.’”
16 A teleŋ koŋ, mi wanaa nɔ siooŋnde le Chɛhowa wa suukaŋ ndapila tɛɛŋ, o kɛ kɛ nda chaaŋ ndɔ. Chɛhowa wa hiouwɔɔ lachi a nda nilaŋ yaŋɔɔ nyɛkɛndɛi. Wanaa nɔ siooŋnde le Chɛhowa, nduyɛ ma nɔ bɛɛleŋ le diola ndɔlaŋ nda, ma poonyiaa nda diolaŋ o yauwo niŋ ndu o hɔl le loonɔŋndo a nda.
17 Mi Chɛhowa, Mɛlɛka puaa chɔuwa dimi aa: “A cho simnɔŋ wanaa niaa, o paale ya cho nyɛm kɛŋ teŋgeŋ ndoŋ hɛli leŋ choo. I cho nda inyiɛɛ tuiinɔŋ, mɛɛ finyaa tuiinuŋ nuaa po ndɔ tosal ndu wallo wo inyiɛɛ yɛ.
18 La cho teŋgeŋndo chɔ wana cho sakpo wo tɛɛŋ a wana dɛnɛ wɔɔŋndo. Nduyɛ, mi la che vɛlɛ teŋgeŋndo wana cho Mɛlɛka piɛiyo wo tɛɛŋ a wana cho ndu piɛi le wo.”
Tɛɛsiaalaŋ
^ Ɔɔ naapum, la cho ya sendioo handɔɔ choo.
^ Naapum nyaa yoomaa pɔmbuaa tɛɛmbuu tɔlɔɔlaŋ nda.
