Obadaya 1:1-21
1 Yilaŋii Obadaya* che ve:
Nyɛ Chɛhowa, Mɛlɛka Kpuluŋguma Bɛndoo dimi a Idɔm okɔɔ wo cho hoo ni:
“Ŋ tuei yooŋgu fula Chɛhowa o ba wo,Nduyɛ o vem kiilanɔ ndɔɔ kaalaŋ tɛɛŋ:
‘La chɔŋ, miŋ bɛɛndiaŋ le miŋ kɔ chiŋalaŋ ndu a sɔŋgɔɔ.’”
2 “I siiŋguu num wana fondoo fuu o kaalaŋ tɛɛŋ.Siɔmbulaŋ la tol num.
3 Kaa heelaŋ cho num o kɔl lo hui num.Num cho hoo o viaŋnaŋ o pouwo bɛŋgu,Nduyɛ ma wa o fondaŋ filioŋndo wo, ma dimi o kɔl niŋ aa,‘Nɛɛnɛ nɔla yɛ mbo tusi ya lɛŋ?’
4 O yɔŋ bɛɛ ma toosiaa naa num aa chalaa choo choo pɔ* maa kowɛ,Ɔɔ ma toosiaa waaŋnde numndeŋ o looŋ tɛɛŋ,I cho num nanɔɔ naa ŋ cho wa kaŋ nda mi tusi num,” Chɛhowa dimi lende ni.
5 “Te viiya hinul num pɛ, nduyɛ mi wanaa del waŋnda choo wa hinul num ichɔl,Baa o cho nyɛm nda yeema woŋ kinɛi le nda cho chiimbuu le?
Ɔɔ te o wa yɛ maa wanaa kendiaa makilepiiya ndaa hinul num ni,
Baa a ve kilepiiyaŋ mapum mɛi kɔɔli le?(A cho num tɛɛmbuu kpata kpata!*)
6 A nuuviaa Iisɔ tɛɛ tɛɛ!
A poondiaa nyɛm ndɔŋ baa kalaŋ cho ŋ viaŋaa woŋ kpou!
7 A tou num haaa ma fuuluu o pɛŋgula lelɛŋndaŋ.
Wanaa nya cho o diompilɔɔ niŋnda* kpou hui num.
Wanaa cho o kɔl nyuloo niŋ a num nda tiu num ba.
Wanaa nya dia nyɛdiaa latulu wa cho num yaŋɔɔleŋ yeŋ,Kɛ a cho wa o sina choo le.
8 Mi Chɛhowa dimi aa, “O paale leŋ choo,I cho wanaa taasiaa Idɔm tɛɛmbuu,Nduyɛ, mi tɛɛmbuu wanaa nɔ sinapɛŋgoo wa o fondaŋ ŋpemboo o tanda Iisɔ wo niŋ.
9 Num Tɛmaŋ, siooŋnde cho kuubaa num aa chɔuwa biyɔɔ,Kanifuule, wana o wana cho o fondaŋ ŋpemboo o tanda Iisɔ wo niŋ, a cho nda diu diu kpou.
10 Le mɛɛ ŋ sɔŋga a Chekɔpu pɔmbɔ num yɛ,Siɔmbulaŋ la cho num biyɔɔ,Nduyɛ ma sɔla tambei lefafɛɛŋ.
11 Paale ŋ wa nuaa isisi ma wa tofaa leŋ,Paale yaamɔɔwa hiŋ ma kuaŋnuŋ a puaa nduaa chɔuwa o biyɔɔ niŋ ndeŋ,Teleŋ wanaa lekaa wa luɛi o dio kpaki ndɔɔ, ma wuu kooŋ le nyɛm wa Chulusalɛm ndoŋ piɔuwaŋndo wo,Num bɛɛ ma tosa maa nda.
12 Duaunuŋ nyaale o paale nyɛpalaa komal pɔmbɔ num ndeŋ choo le.Duaunuŋ nyaale o paale waŋnda Chuda sɔla tambei leŋ choo le.Nduyɛ, suaa a yoŋga o paale nda wa o nyɛpalaa niŋndo leŋ choo le.
13 A nɔ ma hiŋ o dio kpaki wanaa niaa o paale kpundɔɔ komal nda leŋ choo le.Duaunuŋ nyaale o paale kpundɔɔ komal ndu leŋ choo le.Nduyɛ, yaa baa o sul ndɔɔ o paale kpundɔɔ komal ndu leŋ choo le.
14 Sim o nɛila bandulaŋ le wanaa nduaa cho nyaanɔŋndo wa diu diu wo le.Nduyɛ, mal wanaa nduaa hɛluŋ nda yaamɔɔwaa ndaa o ba o paale kpundɔɔ komal nda leŋ choo le.
15 Paale Chɛhowa cho waŋnda kpou hinul teŋ le cho niŋ kpɛɛluŋ.
Mɛɛ num tosal chaanda yɛ, lende koni nda cho num tosal ni.
Dɛnɛ wɔɔŋ ŋ tosal chaanda wo, o cho miiŋgu numpila o lebol.
16 Mɛɛ ŋ kol nuaa muɛiyaŋ o pembii nii diandɛi choo yɛ,Lende kaalaŋ kpou la hiau niŋ lachi a maŋ kolɔɔ ni.
A cho maŋ kolɔɔ ma pim maŋ cha,Nduyɛ, a cho wa naŋ chaa kani bɛɛ a ve achal te.
17 Kɛ wanaa cho nyaanɔŋ nda cho lakɔ o Pembii Saayɔŋ Nde choo,Nduyɛ i cho wa i diandaa.Nyɛm ndaŋ kpou le yuŋgu Chekɔpu wo ŋ cho wa ni.
18 Yuŋgu Chekɔpu wo cho simnɔŋ yiŋndeŋ,Mi yuŋgu Choosɛ wo wa biyɔɔ wule wule,Nduyɛ mi yuŋgu Iisɔ wo wa maa bil vesɛi.A cho nda malɔɔ o yiŋ, ma ŋuɛ chilikɔ.Wana pilɛ bɛɛ sɔla niŋ chindaa o yuŋgu Iisɔ wo niŋ te,Kanifuule, Chɛhowa pila dimi lende ni.
19 Tanda Nɛkɛbi wo a fondaŋ ŋpemboo o tanda Iisɔ wo niŋ cho wa le nda.Tanda Siɛfila wo a lɛŋnde Filitiaa leŋ bɛɛ cho wa le nda.
Yondo Ifiluem ndo a yondo Sameeliaa wo cho wa le nda.Nduyɛ Kiliaadi cho wa le Bɛŋjamiŋ.
20 Wanaa nda cho soli o kpakioo hoo niŋnda,Waŋnda Isɔluɛi, le nda lɛŋnde Kenaŋ ndeŋ haaa kɔ bii a tanda Saluɛfati wo cho wa ni.
Wanaa nda bii Chulusalɛm ma kua a nda Sefaluadi wa, le nda chieeŋ bɛndoŋ Nɛkɛbi cho wa ni.
21 Wanaa cho nda piŋi wa cho lakɔ o Pembii Saayɔŋ Nde choo,Le ma kɔɔsa a waŋnda o fondaŋ ŋpemboo o tanda Iisɔ wo niŋ.Nduyɛ, le Chɛhowa masaleŋ le cho wa ni.
Tɛɛsiaalaŋ
^ Diolaŋ ndaŋ la sim, “Buɛi Chɛhowa Wo.”
^ Ɔɔ naapum, “ma hel choo choo pɔ pɔ.”
^ Ɔɔ naapum, vɛɛ kpɛ nda cho yɛ num tɛɛmbuu?
^ Ɔɔ “wanaa ŋ yii kpemaa a nda wa.”
