Polowaa 14:1-35
14 Mi wana lanɔ nɔ taasi kpeekpeiyo wo simi chiɛi ndɔɔ yi,Kɛ wana lanɔ diɔmndo, piɔlɔɔ o pial ndu a bala ndɔlaŋ ni.
2 Wana tosa sɔɔŋ o nɛi sakpoo choo wo nɔ siooŋnde le Chɛhowa,Kɛ wana tosa sɔɔŋ o kafalaŋ choo wo tul ndu leyɛ.
3 Diomnda yoŋgala fula diɔmndo o sondo laŋ, la cho ko mɛɛ nda luaa wana a sioŋndeŋ yɛ.Kɛ sɔɔŋ wanaa taasiaa dimi woŋ manda nda ni.
4 Te nauwa ve le, o diandaa fondaŋ nda dou nda nyɛdiaa wo wa ni.Kɛ mi kpaaya nau towaa nɔ wo tosa mi nyɛdiaa wa tau.
5 Sei tonyaa dimi choolaŋ te,Kɛ sei lachoowaa, choolaŋ o dimi teleŋ o teleŋ ni.
6 Wana mam waŋnda wo nuuviaa bɛɛ taasioo, o seeluŋ ndu le.Kɛ wana bii sɔɔŋ bila wo, haupa mbo sɔla kɔl kaloo.
7 Holnuŋ diɔmndo le,Kanifuule a seeluŋ niŋ kɔl kalu o nyɛ o dimi wo niŋ te.
8 Mi wana nɔ taasioo wo bii fondaŋ o cho kɔlaŋ ndo bila,Kɛ diɔmnda, mi diɔmii ndɛi hui nda.*
9 Diɔmnda tosa bɛɛ yɔŋ wɔɔŋndo, a buulaŋ te.*Kɛ wanaa cho sakpo wa cho a bɛɛndiaŋ le ma toosiaŋ tɛɛŋ.
10 Waŋndo pila sina kɔl ndɔ tambɛiyo ni,Nduyɛ wana o wana nɔla mbo sina nyaale cho ndu o kɔl lo le.
11 Chiɛi wana dɛnɛ wɔɔŋndo cho tambei sɔla,Kɛ mi tɛndii wana cho sakpo wo lo isisi yi.
12 Mi waŋndo yiyaŋ maa o nɛi sakpoo choo o cho kɔlaŋ ni,Kɛ o mɛɛlulaŋ, mbo yɛɛ ndu o piɔmndo niŋ.
13 Lepum waŋndo wa mamɔɔ, mi kɔllo wa o saŋgaa niŋ.Nduyɛ mi nyaaloo mɛɛlu lepum a kɔl tambɛiyo.
14 Wana chɛl sila le wo cho fulamakɔɔlilaŋ sɔla le kelala ndɔlaŋ,Kɛ mi wana kɛndɔɔ sɔla fandaa le sɔɔŋ kɛndɛŋ o tosa woŋ.
15 Mi diɔmndo laalaŋ nyɛ o nyɛ nda dimul ndu pɛ,Kɛ mi wana taasioo yiyaŋ fɛŋ tuupa mbo tosa nyɛ o nyɛ.
16 Mi wana taasioo wa yekeŋ, nduyɛ mbo mulul dɛnɛ wɔɔŋndo kɔɔ.Kɛ diɔmndo saalaŋ isɔɔ le,* nduyɛ o laalaŋ o ndupila niŋ.
17 Wana keleŋa tumboo dɔɔnɔŋndo wo, o diɔmnde niŋ o tosa sɔɔŋ ni.Kɛ wana yiyaŋ tuupa mbo tosa sɔɔŋ ndo,* mi waŋnda tul ndu leyɛ.
18 Diɔmndo, diɔmnde cho nyɛm kɛŋ ndɔŋ ni.Kɛ wana taasioo, kɔl kaloo cho mɔsil ndɔ lemasaa ni.
19 Wana yɔŋ wɔɔŋndo cho wana dɛnɛ kɛndɔɔ wulaŋ beŋ,Nduyɛ mi wana dɛnɛ wɔɔŋndo baŋ wulaŋ o dio kpaki wana cho sakpo wo.
20 Wana bala fondoo, mi wanaa nda chiɛɛliaŋnda bɛɛ tul ndu leyɛ.Kɛ wana sulaa, ndu sɔla chaŋyaŋ tau ni.
21 Wana pɛɛsa pɛ wana bala fondoo, mɛɛ o tosa hakioo.Kɛ wana o wana tuiinuŋ pɛ wana bala fondoo inyiɛɛ, o cho wa a kɔl kɛndɛ.
22 Wana kɛɛsiaŋ sɔɔŋ wɔɔŋndoŋ o kɔl lo, o kpundɔɔ niŋ o mɛɛlu ni.
Kɛ wana yiyaŋ le sɔɔŋ kɛndɔŋ tosaa wo, waŋnda cho ndu kaala lo lechoo wo chɔm nduyɛ ma laalaŋ o ndu niŋ.
23 Wali kɛ kɛ wana tosa pɛ kalaŋ, a sɔla tɔnɔɔ leniŋ.Kɛ wanaa chalnuŋ tombola bɛndoo wa, o bala fondolaŋ niŋ nda mɛɛlu ni.
24 Wanaa nɔ taasioo wa, sullo cho mɔsil nda lemasaa ni.Kɛ diɔmndo ndu, sɔɔŋ ŋdiɔmndoŋ koni o tosa ni.
25 Mi wana timbi seile tonyaleŋ ndo piŋi yoomulaŋ,Kɛ sei lachoowaa, choolaŋ o dimi teleŋ o teleŋ ni.
26 Wana o wana nɔ pɛ siooŋnde le Chɛhowa, mɛɛ o nɔ tiindaŋ kala kalaa o ndu niŋ.Nduyɛ, mi siooŋii keŋ simnuŋ naa viaŋnaŋnda le chuauwaa nduaa.
27 Wanaa nɔ siooŋnde le Chɛhowa wa cho hiouwɔɔ lachi a waa yoomu,Nduyɛ mi siooŋii keŋ piŋi waŋnda a sɔla piɔm te.
28 Te masaa nɔ pɛ waŋnda tau, o sɔla bɛɛleŋ.Kɛ te o nɔ wanaa bɔɔ le, piɔllo masale ndɔleŋ le piɔl ni.
29 Wana nɔ sinapɛŋgoo tau wo keleŋa tumbe dɔɔnɔŋ te,Kɛ wana keleŋa tumbe dɔɔnɔŋndo, diɔmndo o cho ni.
30 Te wana nɔ kɔl nyuloo pɛ, mɛɛ a nɔ kɛndiaa.Kɛ paŋalaa cho ko maa naa tosa mi paalaŋ la sɛ wo.
31 Wana o wana tosal pɛ wana bala fondoo kafalaŋ, mɛɛ o yei Wana Toosiaa ndu wo.Kɛ wana o wana tuiinuŋ pɛ wana bala fondoo inyiɛɛ, mɛɛ o saŋgala Mɛlɛka.
32 Wana dɛnɛ wɔɔŋndo, dɛnɛ ndɔ wɔɔŋndo tɛɛmbuu ndu ni.Kɛ wana cho sakpo wo, lo lechoo ndɔɔ cho wa naa nduaa viaŋnaŋnda ni.
33 Wana nɔ sinapɛŋgoo wo, o saŋgalaŋ a taasi cho ndu o kɔllo le.Kɛ diɔmnda saŋgalaŋ a nyɛ nda sina wo okɔɔ ni.
34 Sakpoyɛi tosa mi lɛŋndeŋ le sɔla saŋgalaa,Kɛ mi hakioo tusi waŋnda siɔmbulaŋ.
35 Mi masaa hini kɔl a buɛi tosa sɔɔŋ a taasi wo,Kɛ mbo tuulu kɔl ŋama ŋama a buɛi tosa sɔɔŋ lasiɔmboŋ ndo.
Tɛɛsiaalaŋ
^ Ɔɔ naapum, “mi diɔmnda hui acheleŋnda.”
^ Ɔɔ “a buulaŋ le siŋgaŋ tosa le.”
^ Ɔɔ “mi diɔmndo dɔunuŋ tumbe.”
^ Ɔɔ “wana yiyaŋ o sɔɔŋ choo wo.”
