Polowaa 26:1-28
26 Mɛɛ mɔm ikpuŋgbaa hiŋ a wɔɔle kala kalaleŋ te yɛ,Nduyɛ mi piɔɔ kɛɛ siaa a teleŋ kuauwaa yɛ, lende koni o bɛnda mi diɔmndo sɔla bɛɛleŋ te ni.
2 Mɛɛ youwo nɔ nuaa saboo le mbo nyaanuŋ ɔɔ lɛfɛŋndo le mbo hiŋnuŋ choo choo yɛ,Lende koni sendioo bii waŋndo o fondo fuuwo choo le ni.*
3 Le soo kpatooleŋ le cho ni. Sofɛlɔɔ ndu, nyɔɔ nda baa ndu o sondo ni.Kɛ diɔmndo ndu, le ndu kɔɔ fukpaa sioŋndeŋ le cho ni.
4 Mulul diɔmndo maa diɔm te,Yɔŋii num bɛɛ simnuŋ maa ndu.
5 Mulul diɔmndo mɛɛ diɔmii nduɛi cho yɛ,Yɔŋii o yiyaŋ maa o nɔ taasioo.
6 Mɛɛ waŋndo kili nuaa peluŋ ndɔŋ mbo simnuŋ wana bɛvɛi yɛ,*Lende koni wana mal diɔmndo sɔɔŋ sɔviɔŋ o ba wo cho ni.
7 Mɛɛ peluŋ wana bɛvɛiyo cho ŋ solul ndu mako le yɛ,Lende koni tale fula diɔmnda o sondo wo cho ni.
8 Diɔmndo bɛɛleŋ kioo,O cho ko mɛɛ waŋndo yii nuaa pouwo o faandaa yɛ.
9 Mɛɛ yuɛi luɛi nuaa wana kolaa o ba yɛ,Lende koni tale fula diɔmnda o sondo wo cho ni.
10 Mɛɛ waŋndo lo nuaa pisultaŋ mbo wuu chiŋɔleŋ okoŋ mbo yɔŋul waŋndo yɛ,Lende koni wana chua diɔmndo ɔɔ wana hiauwaŋndo le wallo wo cho ni.
11 Mɛɛ tuŋndo kusi nuaa mbo miiŋgu kusi koŋ deembuuwo yɛ,Lende koni diɔmndo miŋgi diɔmii pilɛi kpe tosaa ni.
12 A che niŋ waŋndo o yiyaŋ maa o cho wana taasi wo?
Tiindaŋndo cho le diɔmndo mbo hiau wana waa lende.
13 Mi wana siɛlɛiyo dimi aa: “Kpɔkuŋndo* cho o nɛi,O cho o luŋ kpendekele!”
14 Mɛɛ dioo hiŋnuŋ nuaa o koŋjiiŋ nda landu ndu woŋ choo yɛ,Lende koni wana siɛlɛiyo mulu muluŋ o kpele ndɔɔ choo ni.
15 Mi wana siɛlɛiyo wou baa o hɛŋgɛi nyɛdiaa tumndo di,Kɛ mbo wa o saŋgɛi yɔkɔɔ le kɔndɔɔ mbo mɛɛnuŋ.
16 Wana siɛlɛiyo yiyaŋ maa o nɔ taasioo,Mbo hiau wanaa ŋɔmmɛu waa yɔŋgu muli taasioo wa.
17 Mɛɛ waŋndo saa nuaa tuŋndo nilaŋ yɛ,Lende koni wana wa hoo hiouwɔŋndo mbo tuulu kɔl le sɛɛŋgiaŋ pilaa wo* cho ni.
18 Mɛɛ wana seemɛiyo wuu nuaa bal leyiŋndo a chiŋɔma piɔmndaŋ yɛ,
19 Lende koni waŋndo tosal wana nda chiɛɛliaŋ ndo kaŋgalaa ni mbo dimi aa: “Mamɔɔlaŋ koni ya wa ni!”
20 Te yɔmnde ve o yiŋ te, yiŋndeŋ le nyum.Nduyɛ te wana balu a chaanda o sondo wo ve le, sɛɛŋgiaŋndaŋ la chuu.
21 Mɛɛ wana wou nuaa suɛɛnde o dɛŋgultaŋ choo nduyɛ ma wou yɔmnde o yiŋ yɛ,Lende koni wana lasɛɛŋgiaŋndo kui sɔŋgɔɔ ni.
22 Wana balu a chaanda o sondo wo, diomnda ndɔlaŋ la cho ko maa nyɛdiaa yeelɛi,O wana mial chɔ chɔ mbo kuɛŋnuŋ o demboo niŋndo.
23 Diomnda kɛndɛlaŋ waŋndo dimullo kɛ ma nɔ nɛiyɔŋ ndɔɔ o kɔl,O cho ko mɛɛ nda toosiaa nuaa nyɛi laandei a puuloo ma kumbu ndi a kanii humbuei yɛ.
24 Mi wana tul acheleŋnda leyɛ wo soliŋ diomnda kɛndɛlaŋ kpeku le yɛle ndɔle tulaaleŋ vioŋɔɔ,Kɛ huiyo koni o wa waŋnda o kɔl ndɔɔ niŋ ni.
25 Mi che bɛɛ mbo dimi diomnda kɛndɛlaŋ, laalaŋ ndu le.Kanifuule, sɔɔŋ dɛnɛ wɔɔŋndoŋ ŋɔmmɛu cho ndu o kɔl ni.
26 Mi che bɛɛ mi wana waa lende dimi choolaŋ le yɛle ndɔle tulaaleŋ vioŋɔɔ,Kɛ kaala ndɔla dɛnɛ wɔɔŋndaŋ la cho chɔɔmɔŋ kpendekele o kundaa niŋ.
27 Wana tou sooŋndo wo cho delɔɔ o sooŋ o tou wo niŋ.Nduyɛ wana o wana pimbul pouwo pɛ, pou koŋ cho ndu miiŋgu choo.
28 Wana dimi choolaŋ ndo tul wanaa o tusi nyɛpalaa choo wa leyɛ.Sɔɔŋ sondo yeelɛiyoŋ dimioo le waŋndo heeloo, o kpundɔɔ niŋ ŋ wa ndu lueiyo ni.
Tɛɛsiaalaŋ
^ Ɔɔ naapum, “sendi waŋndo tɛɛmbuu isɔɔ le wo bii ndu le.”
^ Hibuluiye, “nyɛpalaa kolɔɔ.”
^ Ɔɔ “yalakanaa.”
^ Ɔɔ naapum, “mbo wou sondoo o sɛɛŋgiaŋ pilaa niŋndo.”
