Polowaa 31:1-31
31 Diomnda Masaa Lɛmuɛɛ laŋ la cho laŋ ni, diomnda sɔvɛla kala ndɔ dimul ndu le ndu silaa laŋ:
2 Po nuu, yɛɛnɛ ya dimul lɛ num?Yɛɛ kpeekpei ya dimul lɛ num po ni ya velu wo?Nduyɛ yɛɛ ya dimi yɛ po ni ya chua buŋgɛi yo?
3 Tɛɛmbuu yoomuma numndaŋ waŋ laanduaa kɔɔli le,Nduyɛ, tual nɛila tɛɛmbuu masaa waa laŋ kɔɔli le.
4 Lɛmuɛɛ, hei bɛnda kposoŋ le masaa le.O bɛnda mi masaa kol muɛiyaŋ te,Kɛlɛŋgaa niŋ te mi masaa nyuna aa: “Ɔɔ muɛima niaŋ?”
5 Yɔŋii nda kol ma puɛɛnuŋ a sawaa okɔɔ,Nduyɛ ma kɛɛ wanaa bala fonduaa dila ndalaŋ kioo o sɔɔŋ niŋ.
6 Ke wanaa cho tambei sɔlaa wa muɛima nɛiyaa nɛiyaŋ,Nduyɛ ma ke wanaa cho o kɔlta tambɛilaŋ niŋnda muɛiyaŋ.
7 A kol ma puɛɛnuŋ a bala fondola ndalaŋ okɔɔ,Nduyɛ ma puɛɛnuŋ a bahawɛila ndalaŋ okɔɔ kpou.
8 Soo le wanaa nɔla isɔɔ le wa,Nduyɛ ma suŋgu le dila wanaa cho tambei sɔlaa wa kpou.
9 Soo okoŋ ma kelu yamaŋ o nɛi sakpoo choo.Suŋgu le dila wanaa nɔ nyɛsɔlaa bɔɔ le wa a wanaa bala fonduaa.
א [Alɛfi]
10 Nɛɛnɛ nɔla yɛ mbo sɔla lanɔ nɔ suliŋnda kɛndɛlaŋ ndo?*
O cho o sɔvɛ mbo hiau pouta baa kalalaŋ o peelo.*
ב [Bɛti]
11 Mi pɔnɔ ndɔ tiindaŋ ndu a kɔl ndɔɔ kpou,Nduyɛ nyɛ o nyɛ sɔvɛ ve pɔnɔ ndɔ lepɛŋ te.
ג [Kimɛɛ]
12 O yoomu ndɔɔ niŋ kpou,Sɔɔŋ kɛndɔŋ o tosal pɔnɔ ndɔ ni, o cho sɔɔŋ wɔɔŋndoŋ te.
ד [Dalɛti]
13 Mbo nuuviaa yiiŋii saa a kolala kɛndɛ kɛndɛlaŋ,Nduyɛ o kaala wallo tosaa a bala ndɔlaŋ.
ה [Hee]
14 O cho ko maa dɛndɛ mamɛŋ wana leyulaa.Mbo kuɛ landaŋ, mbo kɔ huŋ a nyɛdiaa ndɔɔ.
ו [Wau]
15 Nyumndaŋ ma wa wɔ mbo chɛŋ,Mbo bɛɛndiaa nyɛdiaa le yuŋgu ndɔɔ,Nduyɛ mbo ke buɛiyaa nduaa laanduaa nyɛdiaa o tiŋ.
ז [Sayiŋ]
16 Mbo kɛsi kɔllo o lɛŋndeŋ choo, okoŋ mbo pendu leŋ.Nduyɛ, mbo tɔl kpele makilepiiyo a saŋga ndɔɔ.*
ח [Hɛti]
17 Mbo bɛɛndiaŋ le wali kala kalaa tosaa,*Nduyɛ mbo kindi bala ndɔlaŋ poŋ.
ט [Tɛti]
18 Mbo sɔla tɔnɔɔ o yulale ndɔleŋ niŋ,Nduyɛ lambui ndɔɔ nyum ichɔl te.
י [Yodi]
19 Challe mbo womul a bala ndɔlaŋ,Nduyɛ mbo lɔɔ kola ndɔɔ a ba ndɔ.
כ [Kafi]
20 Mbo tosal wanaa nɔ nyɛsɔlaa bɔɔle wa kɛndɛi,Nduyɛ mbo mala wanaa bala fonduaa.
ל [Lamɛdi]
21 O buulaŋ a yuŋgu ndɔɔ okɔɔ a teleŋ ihueiyo le,Kanifuule wana o wana o ndu lo chiɛiniŋ nɔ doma ihueiyo.*
מ [Mɛmi]
22 Mbo toosiaa kolala ndɔla kpelelaŋ a ba ndɔ.
Nyɛla ndɔla chuɛɛnaŋ ndaŋ, a yiiŋii visiaa la toosiaŋ ni.
נ [Nuŋ]
23 Waŋnda sina pɔnɔ ndɔ nyɛkɛndɛi o diola kpaki chioo,Naa o chal waŋ banaa lelɛŋnda tɛɛŋ nda.
ס [Samɛki]
24 Mbo toosiaa nyɛla kɛndɛ kɛndɛlaŋ* le pisioo,Nduyɛ mbo pisi yauvii waŋnda yiinuŋ o chaŋnde yulaa o ba.
ע [Ayiŋ]
25 O nɔ yoomuaŋ, nduyɛ bɛɛleŋ pila waŋnda nɔ le ndu ni.Mbo nɔ tiindaŋndo le chilaŋ.*
פ [Pe]
26 Sɔɔŋ taasioŋ fula ndu o sondo ni,Nduyɛ, mi sawa cho a kɛndɛi* okɔɔ wo manda diɔɔmule ndɔleŋ te o wa pɛ suɛi.
צ [Sadi]
27 Mbo handu kɔllo o walta cho tosaŋndo o ndu lo chiɛiniŋ ndaŋ choo,Nduyɛ o cho wana siɛlɛi kposoŋ te.
ק [Kilofi]
28 Te chuauwaa nduaa chɛŋ pɛ idii, a naŋ kɔl a ndu.Nduyɛ te pɔnɔ ndɔ chɛŋ ni, o chandu ndu.
ר [Luɛsi]
29 Waŋ laanduaa nɔ suliŋnda kɛndɛlaŋ nda* cho tau,Kɛ num, a hiou nda kpou.
ש [Shiŋ]
30 Mi dialuŋ kɛndɔŋ hui wana, nduyɛ naŋɔɔ lahɔllo lo lefafɛɛŋ te.*Kɛ wana lanɔ nɔ siooŋii Chɛhowa ve wo, ndu sɔla saŋgalaa ni.
ת [Tau]
31 O nɔ mbo sɔla fandaa le nyɛ o tosa wo,*Nduyɛ mi waŋnda saŋgala ndu o diola kpaki chioo le walta o tosa laŋ.
Tɛɛsiaalaŋ
^ Tofa Tɛɛsiaa.
^ Ɔɔ “lanɔ nɔ taasioo wo.”
^ Ɔɔ “nyɛ ndɔ sɔlaa.” Hibuluiye, “kɔmnde bala ndɔlaŋ la sɔla leŋ.”
^ Hibuluiye, “mbo kindi lɔlula ndɔlaŋ.”
^ Hibuluiye, “domalaŋ la tiɔɔŋ.”
^ Ɔɔ “nyɛla lebɛŋgulaŋ.”
^ Ɔɔ “Mbo mam muɛɛŋ le siɔdii lachioo.”
^ Ɔɔ “kaala lo lechoo wo.”
^ Ɔɔ “Waŋ laanduaa taasiaa.”
^ Ɔɔ “nyɛ fondoo fuu o cho ni.”
^ Hibuluiye, “o nɔ mbo sɔla kɔmnde bala ndɔlaŋ.”
