Sam 104:1-35
104 I cho Chɛhowa saŋgala.
Oo Chɛhowa Mɛlɛka nuu, a cho bɔɔ o bɛndu.
A chuɛɛnuŋ kpaayaa a bɛɛleŋ.
2 A pinda pindaŋ nyɛ wawoŋndo maa doma.A kindu choo choo mɛɛ nda kindu nuaa tɛndiiyo yɛ.
3 O simi suŋgbuma saa lumuila ndɔlaŋ o choo choo niŋndaŋ o mɛŋndaŋ choo,Mbo toosiaa yumbu yumbu ikpuŋgbaa nyɛ ndɔ nyaanaŋ suaa naŋndo,Mbo kua o kumbaŋnda hueiye choo.
4 Mbo tosa mi maalikɛiyaa nduaa wa nyaa yoomaa kpaaya bɛndu o inyinaya,Nduyɛ mbo tosa mi buɛiyaa nduaa wa maa yiŋnde wule wuleleŋ.
5 O tosa mi lɛŋndeŋ le sim yi o chiyii nduɛi choo.Le fɛɛŋ a fɛɛŋ le feŋaŋ o fondaŋ ndɔɔ le.
6 Ma kumbu leŋ kpu a mɛŋndaŋ mɛɛ waŋndo wounuŋ nuaa domaa yɛ.
Nduyɛ mi mɛŋndaŋ ma kumbu pembuŋ bɛndoŋ.
7 Mɛɛ ŋ deŋul maŋ, mi ma nyaanuŋ.Mɛɛ ma tuei num deŋioo maa ma taŋ, mi ma nyaanuŋ a nyiiyaa.
8 Mi pembuŋ bɛndoŋ fula nduyɛ mi kpoloŋndaŋ la tuaunuŋO fondaŋ ŋ toosiaa le laŋ ndo.
9 Ma kɛsi pɛŋgulaŋ naa mɛŋndaŋ ma nɔ mi ma mɛɛlu wa,Le halikpeŋ ma kumbu lɛ lɛŋndeŋ maa paandu le.
10 Mbo tosa mi mɛŋndaŋ ma buli o kpoloŋndaŋ niŋ,Nduyɛ mi ma wa hiouwɔɔ o pembuŋ bɛndoŋ tɛɛŋ.
11 Mi sofɛliaa wa a bolola vesɛilaŋ nda kol mɛŋndaŋ maŋ.Mi pemboŋ muŋ soli mɛŋndaŋ le mi visiaa yonduaa kpou kol.
12 O peela laŋ holnɔŋndo youwaa balu o choo choo niŋnda taŋgul waaŋii ndɛi ni,Nduyɛ ma soli chondoŋ o yɔmii cho o peela laŋ holnɔŋndo ve tɛɛŋ.
13 O lo o lumuila ndɔlaŋ niŋ choo choo mbo pɔɔliaa pemboŋ.
Mi lɛŋndeŋ le sɔla nyɛdiaa tau a walta ŋ tosa laŋ.
14 O tosa mi billo wul le chɔluaa,Nduyɛ mi yɔmnde wul o lɛŋndeŋ choo,Le mi i yɔŋgu waŋnda chieeya nyɛdiaa,
15 Muɛima tosa mi wanachioo naŋ kɔl laŋ,Chuɛiyaŋ le mi hɔlla niŋgila,Vɛlɛ a beedii* tosa mi wanachioo sɔla yoomuaŋ ndo.
16 Yɔmii Chɛhowa ve cho mɛŋndaŋ sɔlaa nyɛkɛndɛi,Yɔmii sida o tɔl Lebanɔŋ nde.
17 Loŋ youwa taŋgul waaŋii ndɛi ni.
O yɔmii chunipa ve niŋ youwaa sitɔkiiya lɔl ni.
18 Le chuiŋaa bandilaa pembuŋ bɛndoŋ cho ni.O poutaŋ tɛɛŋ sɛŋaa bandilaa viaŋnuŋ ni.
19 O toosiaa paŋgei le teleŋnda yɛ yɛlaŋ chɔmndo,Nduyɛ paaleŋ le sina teleŋ le nɔ mi le del lo.
20 Ma tosa mi paaleŋ le del mɛɛ ŋ toosiaa nyumndaŋ,Le halikpeŋ mi visiaa yonduaa wa balɔɔ leniŋ ichɔl.
21 Kpɔkuŋaa* fɔŋnduaa cho pɛɛliaa le nyɛ nda dia wo,Nduyɛ ma muliŋ o Mɛlɛka lo le nyɛdiaa ndaa.
22 Te paaleŋ le sɛ pɛ,A miiŋguŋ a kɔ hiniŋ o sooŋnda ndalaŋ niŋ.
23 Okoŋ mi wanachioo kuɛ o wali ndɔɔ niŋ,Nduyɛ mbo lo wallo haaa mi paaleŋ le del.
24 Oo Chɛhowa, walta numndaŋ la cho bɔɔ!
A taasi numndo ŋ tosa laŋ kpou ni.
Lɛŋndeŋ le cho le piaa cha a nyɛm ŋ toosiaa woŋ.
25 Pee mɛŋma ihɛllo cho o bɛndu bɛndu nduyɛ o cho o kuaŋnaŋ kɛ kɛ.Nyaa yoomaa cho a piaa leniŋ cha, o pɔmbɔ ni o bɛndu ni, nduyɛ a chuu chɔm te.
26 Lechoo dɛndɛla bɛndula kua o mɛŋndaŋ choo laŋ la kela ni,Nduyɛ leniŋ Liviaataŋ* ŋ toosiaa wo pisul ni.
27 Nda kpou num nda chum niLe ma ke nda nyɛdiaa a teleŋ nda nɔ ma sɔla wo.
28 Nyɛ ŋ ke nda wo nda chuuŋgiaa ni ma kɛsi.
Te a kumbi pɛ bala numndaŋ, a sɔla nyɛm kɛndɔŋ a hini kɔl.
29 Te a viŋ nda hɔlla pɛ, a yɔŋnuŋ pulaŋ pulaŋ.
Te a poonda pɛ yoomu ndaa, a vi okoŋ a miiŋgu o puuloo niŋ.
30 Te a yɔŋgu pɛ nyina num diandaa, nyɛ o nyɛ sɔla yoomoo,Nduyɛ a miŋgi nyɛ o nyɛ o lɛŋndeŋ choo o sɛnɛi.
31 Naŋɔɔ bɛndu Chɛhowa wo cho wa le fɛɛŋ a fɛɛŋ.
Chɛhowa cho dɔɔnɔŋ nyaale o walta o tosa laŋ niŋ.
32 O tofa pɛ lɛŋndeŋ, le nyiiya kpa kpa.O pilaŋ pɛ pembuŋ bɛndoŋ, kumnde kinduŋ lechoo.
33 I cho chondoŋ soli le Chɛhowa teleŋ ya cho wa yoomu wo kpou.Te I cho wɔ pɛ yoomu, I cho chondoŋ soli* le Mɛlɛka nuu saŋgalaa.
34 Maa yiyaŋnda nilaŋ la nɛŋi ndu kɔllo.*
I cho dɔɔnɔŋ nyaale o Chɛhowa niŋ.
35 Wanaa tosa sɔɔŋ wɔɔŋndoŋ nda cho lo pɛ o lɛŋndeŋ choo,Nduyɛ wanaa dɛnɛ wɔɔŋnda ve lɛ niŋ kposoŋ te.
I cho Chɛhowa saŋgala. La saŋgala Chɛhowa!*
Tɛɛsiaalaŋ
^ Ɔɔ “bulu.”
^ Ɔɔ “Yalakanaa.”
^ Tofa Tɛɛsiaa.
^ Ɔɔ “nyɛchaa lɔɔ.”
^ Ɔɔ naapum, “Maa nyɛ ya yiyaŋ a ndu okɔɔ wo wa nyɛ kɛndɛ.”
^ Hibuluiye, “Haleluuya.”
