Sam 105:1-45
105 La mel Chɛhowa balikaa, la veelu diola ndɔlaŋ.La dimul waŋnda a sɔɔŋ o tosa woŋ okɔɔ!
2 La solul ndu chondei, la saŋgala ndu o chondei niŋ.*La yiyaŋ* a walta ndɔla kɔndɔfiltaŋ kpou okɔɔ.
3 La pɛɛluŋ a diola ndɔla diandaa laŋ.
Maa wanaa cho Chɛhowa nuuviaa wa dɔɔnuŋ nyaale o kɔlta ndalaŋ niŋ.
4 La nuuviaa Chɛhowa, nduyɛ mi la nyuna ndu le mbo ke nya yoomuaŋ.
La nyuna ndu le malaa teleŋ o teleŋ.
5 La loonuŋ a walta ndɔla kɔndɔfiltaŋ okɔɔ,Kaamaala ndɔlaŋ, vɛlɛ a yamaŋ o kelu woŋ.
6 Nya chuauwaa mamaa* Ebilaham buɛi ndɔ wa,Nya puaa Chekɔpu wa, wanaa nduaa o hɛli wa.
7 Ndu cho Chɛhowa Mɛlɛka naa ni.
Ndu kialu yamaŋ o lɛŋndeŋ choo kpou ni.
8 Fɛɛŋ bɛɛ o puɛɛnuŋ a kpema ndɔɔ,Vɛlɛ a buŋgɛi o chua le wanaa cho hunɔɔ o chilaŋ niŋ o waalaŋ niŋnda le.
9 Kpemaa hoo o yii a Ebilaham ni,Nduyɛ mbo chuel Aase buŋgɛi mbo mɛnaŋ po.
10 Mbo yii vɛlɛ kpemaa hoo a Chekɔpu.Nduyɛ kpema fɛɛŋ a fɛɛŋndo o cho le Isɔluɛi ni.
11 Mbo dimi aa: “I cho nya lɛŋnde Kenaŋ ndeŋ ke,Mi le simnuŋ nyɛm kɛŋ nya.”
12 A teleŋ ndaa kuiyɔ tau le wo o chuel nda buŋgɛi hei ni.A tonya, ndaa kuiyɔ tau le, nduyɛ mialla nda wa o lɛŋndeŋ niŋ ni.
13 A wa balɔɔ o lɛŋnde niŋ.A chɛŋ pɛ o masaleŋ ndeŋ bɛŋgu, a kuɛ o masale cheleŋ bɛŋgu.
14 Mɛlɛka chɛl mi wana o wana tusi nda nyɛpalaa choo le,Kɛ mbo tusi masaa waa nyɛpalaa choo le nda.
15 Mbo dimi aa: “La pilaŋ wanaa niaa ya pɔya wa le,Nduyɛ wanaa niaa suaa le ya wa, la tosal nda nyɛ o nyɛ wɔɔŋ te.”
16 Mbo tosa mi yima bɛnduaŋ ma del o lɛŋndeŋ niŋ,Ndaa sɔla lɛ nyɛdiaa le.*
17 Mbo yɔŋ Choosɛ nda lachi,O nda pisi le mbo wa chiɔɔ wo.
18 Ma yii ndu peloŋ a yɔlɔŋ,Nduyɛ ma baa ndu chiliŋnde o labolo.
19 Haaa mi nyɛ dimiŋndo yɔŋnuŋ,Diomnda Chɛhowa laŋ la wa ndu dindioo ni.
20 Mi masaa yɔŋ yooŋgoo le ma soli ndu.Mi masa wa waŋnda choo wo mal ndu.
21 Mbo siiŋguu ndu masaa le chiɛi ndɔɔ,Nduyɛ mbo handu ndu nyɛm kɛŋ ndɔŋ kpou bolleŋ,
22 Le mbo nɔ kpaayaa laŋgbaa nduaa kalla choo,*Nduyɛ mbo pɛɛku waŋ banaa nduaa taasioo.
23 Okoŋ mi Isɔluɛi huŋ o lɛŋnde Ichipi leŋ niŋ,Nduyɛ mi Chekɔpu wa miallo o lɛŋnde Ham ndeŋ niŋ.
24 Mi Mɛlɛka tosa mi wanaa nduaa kui tau tau.Mbo tosa ma sɔla kpaayaa ma hiau yaamɔɔwaa ndaa,
25 A o chɛl ma siŋga kɔlta ndalaŋ le buɛiyaa nduaa yɛleŋ tullo,Nduyɛ ma yii nda dumbu* wa.
26 Mbo viam Muuse buɛi ndɔ,Vɛlɛ a Elɔŋ wana o hɛli wo.
27 Ma tosa kaamaalaŋ nda o hɔl,Vɛlɛ a sɔɔŋ kɔndɔfilloŋ o lɛŋnde Ham ndeŋ niŋ.
28 Mbo yɔŋ nyumma kpiŋgbiaŋ mi ma kumbu lɛŋndeŋ kpu.A* kɛɛ le nyɛ o dimul nda wo tosaa le.
29 Mbo tosa mi mɛŋma ndaŋ ma simnuŋ koowaŋ,Nduyɛ mbo diu suwaa ndaa.
30 Mi sɔlla hialu lɛŋnde ndaleŋ,Nduyɛ ma tiu o chiɛila lemasa laŋ niŋ silɔ.
31 Mbo tosa mi yɔluaa a muiya hialu lɛŋndeŋ,Nduyɛ ma tiu ba o ba fee o tandala ndalaŋ niŋ.
32 Mbo tosa mi piɔɔ ndaa simnuŋ looŋ kpuŋgbaŋ,Nduyɛ mbo yɔŋ nyɛ ŋualalɛiyo* o lɛŋnde ndaleŋ niŋ.
33 Mbo tɛɛmbuu yɔmii ndɛi makilepiiye a yɔmii ndɛi mafikiiye,Nduyɛ mbo yimi yimi yɔmnde o tanda ndaa niŋ.
34 Mbo tosa mi soonuaa fɔŋnduaa hialu lɛŋndeŋ,Ndaa chuu chɔm te.
35 Ma tɛɛmbuu yɔmnde kpou o lɛŋndeŋ niŋ,Vɛlɛ a tɔlɔɔ kɛ kɛ ndaa nɔ.
36 Okoŋ mbo diu puaa tasiaa kpou o lɛŋndeŋ niŋ,Puaa tasiaa nda velu a kpaaya Mɛlɛka ke nda le violɔɔ wo wa.
37 Mbo soli wanaa nduaa Ichipi, ma kuaŋnuŋ a kaniŋ humboŋ vɛlɛ a kooliiyoŋ.Nduyɛ o kaala ndɔlaŋ tɛɛŋ kpou, wana o wana del te.
38 Mi waŋnda Ichipi duaunuŋ nyaale mɛɛ Isɔluɛiya mal lɛŋnde ndaleŋ,Kanifuule siooŋnde wa nda le Isɔluɛiya.
39 Mbo tusi yumbu yumbu ikpuŋgbaa le wanaa nduaa mandaa,
Vɛlɛ a yiŋndeŋ le nda nyɛ wawoŋndo kioo ichɔl.
40 Mɛɛ nda nyuna ndu le visioŋ, mbo ke nda wɔlla.O wa nda nyɛdiaa* kioo fulaa o choo choo niŋ ma dia ma pum cha.
41 Mbo kumbi pouwo mi mɛŋndaŋ ma buli,Mi ma kua koŋgioo o pollo niŋ maa pee hiauwaa.
42 Kanifuule, mbo loonuŋ a buŋgɛi diandaa o chuel Ebilaham buɛi ndɔ ve.
43 Mbo soli wanaa nduaa o hɛli wa o lɛŋnde Ichipi leŋ niŋ,Nduyɛ a wa deŋioo a kɔl kɛndɛ bɛndoo.
44 Mbo ke nda lɛŋii kaala cheleŋ.Mbo tosa ma loo nyɛm kɛŋ wanaa cheleŋ tosa wallo kalaŋ le muŋ sɔlaa woŋ,
45 Le halikpeŋ ma tosa nyɛ o dimul nda wo,Nduyɛ ma bii sawala ndɔlaŋ.
La saŋgala Chɛhowa!*
Tɛɛsiaalaŋ
^ Ɔɔ “loolul ndu nyɛchaa.”
^ Ɔɔ naapum, “La soo.”
^ Hibuluiye, “kulii.”
^ Hibuluiye, “Mbo yam tinda ndoo ke nda beediiyo wo.” Ɔɔ naapum, “tindala ndaa soliŋ kpeku le beediiyo heeloo o lakonda laŋ.”
^ Hibuluiye, “Le mbo yii laŋgbaa nduaa kalla.”
^ Ɔɔ “defoo.”
^ Ɔɔ naapum, “Muuse nda Elɔŋ.”
^ Ɔɔ “tɛŋgɛ tɛŋgɛlaŋ.”
^ Ɔɔ “beediiyo ɔɔ buloo.”
^ Hibuluiye, “Haleluuya!”
